DOO ÁKǪ́Ǫ́ ÁJÍÍTʼĮĮDGO éí tʼáá íiyisíí hwiʼdiiłʼáa łeh. King David akʼeʼashchí, “Doo ákwii áátʼįįdii . . . hééł nahalingo shide áníłdáás.” (Psalm 38:4) Łaʼ oodlání danilíinii tʼáá íiyisíí yínííł daazlı̨́ı̨́ʼ. Éí hade ádaadzaago biniinaa Jiihóvah doo shá néididooʼáał dazhniizı̨́ı̨́ʼ. (2 Corinthians 2:7) Tʼáásh ákótʼé? Yéigo ádił asínísiihgo, Jiihóvah tsʼídá doo náánéidiʼdooʼááł da nínízin? Ndagaʼ, éí doo ákótʼée da!

Diné ádił asiihígíí Jiihóvah náyookąąhgo, éí doo yóóʼabididooʼáał da. Ákondi tʼáá áníigo bíká adeeshwoł nízin. Jesus éí prodigal son haneʼ bee akʼididootı̨́įłʼígíí yaa halneʼ, éí Jiihóvah azhéʼé ayóóʼóʼóʼníinii jílı̨́į ndi hayeʼ bąąhági ádaatʼéii yaa nídiidzá. Éí aYeʼ jílı̨́įgo tʼáá haʼátʼíida doo hwił nilı̨́įgo haa haneʼ, éí hazhéʼé hanaalyeʼé áłah áyiilaago kéyah nízaad léiʼgóó ajííyá. Áko áadi tsiʼnjigháago hanaalyeʼé tʼóó bee nidzizneʼ. Haashı̨́ı̨́ nízaad nihoolzhiizhgo índa haghango nídeeshdááł jiniizı̨́įʼ. “Tʼah nízaadę́ę́ʼ joogáałgo hazhéʼé hoołtsą́ągo, haa aʼááh niizı̨́ı̨́ʼ, áádóó haa yílwodgo hazénázhchidgo haztsʼǫs.” (Luke 15:​11-20) Ni ałdóʼ Jiihóvah bił kʼé nááʼahidideeshniił nínízinísh? Ndi bitsʼá dinínídzáhígíí daatsʼí biniinaa tʼahdii bąąh níniʼ? Díí Jesus azhéʼé yaa halneʼígíí átʼéego Jiihóvah níká déezʼı̨́ı̨́ʼ dóó naa joobaʼgo shá nízhdoodááł hóʼní.

Ákoshąʼ tʼóó ahayóigo ádił asínísiihgo éí Jiihóvah doo shá yóóʼiididooʼáał daʼ shı̨́ı̨́ nínízin? Jiihóvah éí díí átʼéego nánóhkááh Isaiah 1:18gi ání: “‘Kʼad hágo haaʼíshąʼ díí baa nídíitʼįįł,’ ní Jiihóvah. ‘Azhą́ nihibąąhági átʼéii éí tʼáá íiyisí łichxííʼ nidi, yas nahalingo łigai dooleeł; azhą́ diłhiłgo łichxííʼ nidi, aghaałgaiigi átʼéego łigai doo.’” Azhą́ shı̨́ı̨́ bąąhági átʼéii doo haa yóóʼadididootʼáał da nahalin ndi, Jiihóvah éí tʼáá átʼé nihaa kʼééyiʼdoołchxǫǫłgo yíneelʼą́ą.

Jiihóvah éí asínísiihígíí biniinaa tiʼhwiyínííhgo doo ná yinízin da. Ákoshąʼ haitʼéego Diyin ná yóóʼiidííʼánígi dóó níniʼ yáʼátʼééh násdlı̨́ʼígíí nił bééhodoozįįł. Díí nabikʼítsíníłkeesgo King David naaki hazʼą́ągo ałkʼee áyiilaa. Áłtsé kótʼéego haadziih: “Bee hazʼáanii hítiʼii éí Bóhólníihii bee bił hodeeshnih.” (Psalm 32:5) Béénílniih, Jiihóvah éí tʼáá íídą́ą́ʼ shichʼįʼ sodilzin dóó ‘hágo haaʼíshąʼ díí baa nídíitʼįįł,’ áko hashtʼéii díínííł nidííniid. Áko baa nánídááh. Jiihóvah bí bee hazʼáanii kʼíinítiʼ dóó niʼdiiłʼáhígíí bee bił hólneʼ. David tʼáá bí ádzaaígi binahjiʼ yikʼídiitʼą́ągo, bijéí biiʼ dę́ę́ʼ kótʼéego sodoolzin: “Doo ákwii áátʼįįdii ałtso shąąh táánígis . . . Tʼáá bijéí tłʼááhdę́ę́ʼ ádił niʼiisíiʼgo yąąh bíniʼgo yínííł naagháii éí doo nahjįʼ kódíílíił da.”—Psalm 51:​2, 17.

Naaki góneʼ, David éí Nathan, God yá halneʼé nilíinii, bíká eelwod. (2 Samuel 12:13) Dííshjı̨́įdi éí Jiihóvah hastóí oodlání yá naazíinii inda bídinéestʼánígíí  choyoołʼı̨́, éí nidaʼiisííhígíí nídaokąąhgo yíká anájah, áko Jiihóvah yił kʼé ndaʼahididooniił. Díí hastóí oodlání yá naazíinii bichʼįʼ háínídzíiʼgo, Diyin Bizaad chodeiyoołʼı̨́įgo dóó ná sodadilzingo bee yínííł nilı̨́į yę́ę bikʼé didiidleeł áádóó diyin kʼehgo nitah yáʼánááhootʼééh dooleeł.—James 5:​14-16.

Tʼáá aaníí ayóó nantłʼa ndi, Jiihóvah bichʼįʼ ádił ajisiihígíí bee adah hójídoolní, áádóó hastóí oodlání yá naazíinii bee bił hójídoolní. David ádił iisihgo tʼáá ákótʼéego bá nantłʼa ńtʼééʼ. David éí ‘doo ádaa halneʼgo’ hodíínaʼ. (Psalm 32:3) Ádił adzisihii bitsʼą́ą́dóó tʼáá ákogi éʼétʼé bíhwiijiiłʼą́ą́ʼ áádóó baa hoł hózhǫ́ǫgo yáʼátʼéehgo hweʼiinaʼ ájiilaa.

Hoł nááhóózhǫǫdígíí éí David aláahdi ílı̨́įgo ninazhdiidlá. Áko akʼeʼjishchı̨́: “Diné éí bee hazʼáanii jiiztiʼii há yóóʼańdootʼáanii, éí ádił niʼdziisíiʼii ałtso há bikʼéé hoodziidii éí hoł hózhǫ́.” (Psalm 32:1) Áádóó sodoolzin: Jiihóvah “nílíinii, shizééʼ ąą áhólééh, áko bee naa hashniih doo.” (Psalm 51:15) David hodiiłʼa yę́ę há nahjįʼ kólyaa áádóó adzisih yę́ę God haa neidiníʼą́ągo biniinaa ahééh jiniizı̨́ı̨́ʼ. Éí biniinaa Jiihóvah baa nahojisneʼ.

Jiihóvah éí níniʼ yáʼátʼééh násdlı̨́įʼgo baa ákodíníizįįł nízin. Áádóó nánááłʼaʼ diné bee bił nahołneʼgo dóó bí íinízinígíí, yínííł bąąh ádingo, hojoobaʼ dóó ayóó baa nił hózhǫ́ǫ doo nóʼní. (Psalm 65:​1-4) Shaa nánídááh niłní yę́ę béénílniih “nihibąąhági ádaatʼéii nihá kʼéédaʼdoolchǫǫł . . . áko Bóhólníihii bitsʼą́ą́dóó bee ákʼééhwiitáadii nihee náhoodleeł doo.”—Acts 3:19.

Martha éí ákódzaa. Tʼáá bí ádaa halneʼ: “Shiyáázh naaltsoos Bee Haʼídéesʼı̨́įʼii dóó Chʼééńdzííd! shichʼįʼ ííłʼı̨́įgo áádóó yíníshtaʼgo Jiihóvah béénáhosésįįd. Tʼóó ahayóigo asésiihígíí biniinaa Jiihóvah shaa yóóʼahidíʼaah bidideeshniił yę́ę tʼáá íiyisíí shá nantłʼa. Jiihóvah shaa joobaʼgo tʼáá shǫǫdí bidishníigo bichʼįʼ sodeesdzin. Dízdiin nááhai, áadi índa Jiihóvah baa nánísdzá. Sheʼiinaʼ bee bééhózin, díkwííshı̨́ı̨́ nááhai nidi Jiihóvah tʼáá bá nináájilʼaʼ doogo átʼéé lą́. Jiihóvah tʼáá háiida yóóʼazhdííʼą́ą ndi tʼáá yił kʼé nááʼahídidooniłgo bihónéedzą́ dóó ayóóʼánáábóʼníi doo.”