NIHOOKÁÁʼGÓÓ tʼáá ałtso diné bichʼįʼ nidahwiiʼná—Jiihóvah bidineʼé ałdóʼ. Psalmist akʼeʼashchı̨́: “Shijéí biʼdiiłʼáhígíí ląʼí yileehgo.” (Psalm 94:19) Jesus ałdóʼ kódiiniid, nihoogháahjįʼ yoołkáałgo diné bí “iiná bidaʼdiiłʼáhígíí” tʼóó ahayóí doo, áko éí biniinaa Jiihóvah bá nideiilʼaʼ yę́ę nihá nanitłʼah doo. (Luke 21:34) Nishąʼ? Ni daatsʼí ałdóʼ nichʼįʼ nahwiiʼná: béeso daatsʼí dabiʼoh, nighan hazʼą́ągi daatsʼí tʼóó ahayóigo anídahaztʼiʼ, éí doodaiiʼ nitsʼíís daatsʼí bąąh dahooʼaah? Jiihóvah lá haitʼéego níká adoolwoł, áko haʼíínílníi doo?

Nihidaʼdiiłáhígíí ląʼí yileehgo éí tʼáá sáhí bichʼįʼ haʼjólní doogi doo bíighah da. Éí biniinaa yilʼaadii Paul akʼeʼashchı̨́: “Tʼáá ałtsojįʼ nihichʼįʼ nahwiiʼnáa . . . nihił áhádįįh . . . ; naaʼanihínídzílghał.” Ákondi Paul konaadiʼní: “doo tsístłʼaitʼaash da . . . doo nanihidiʼtseed da.” Haʼátʼíísh bee bíniildzil doo? “Tsʼídá aláahdi átʼéego adziil” bee—éí adziilii nihí diyin God, ayóó ábóodziilii Jiihóvah bitsʼą́ą́dę́ęʼ.—2 Corinthians 4:​7-9.

“Tsʼídá aláahdi átʼéego adziil” níká eelwod yę́ę, baa nitsíníkees. Béénílniihish łaʼ yáʼátʼéehgo haneʼ dísínítsʼą́ąʼgo, éí bee Jiihóvah bí ayóóʼóʼóʼniʼ ayóó baa ahééh ninzı̨́ı̨́ʼ? Jiihóvah nahasdzáán nizhónígo ánéidoodlííł, diné bee bił hólneʼ yę́ędą́ą́ʼ shı̨́ı̨́ neʼoodląʼ bidziil áyiilaa? Áłah náʼádleehgi nídeikahgo áádóó náánáłaʼ diné niheʼoodląʼ bee bił dahwiilneʼgo, haash yitʼéego nihíká análwoʼ doo? Tʼáá ałtso achʼįʼ nahwiiʼná bichʼįʼ bee adziil dooígíí nihee haleeh áko nihinitsíkees yáʼátʼéehgo nihił hózhǫ́ǫgo Jiihóvah bá nináánéiilʼaʼ doo.

Tʼáá aaníí tʼóó ahayóígóó shı̨́ı̨́ ninaanish hólǫ́ǫ leh. Jiihóvah ánihiłní shibee hazʼáanii aláahdi bíká ádaahtʼı̨́ dóó bikʼehgo dahiinohʼnáa. (Matthew 6:33; Luke 13:24) Ákoshąʼ, łaʼ nitsʼą́ąjįʼ danilı̨́įgo, doodaiiʼ nitsʼíís bąąh dahazʼą́ągo, éí doodaiiʼ nighan hazʼą́ągi tʼóó ahayóígóó anídahaztʼiʼ, éí daatsʼí biniinaa chʼééh díníyá? Éí doodaiiʼ ninaanish daatsʼí biniinaa doo áłah náʼádleehgóó ałnáánídááh da? Tʼóó ahayóígóó bee nide áhootʼéego—dóó tʼáá ałtsojįʼ doo nábíighahgóó dóó biʼoh nilʼaahgo—tʼóó bikʼéé nił haada łeh. Jiihóvah ná yinízinii daatsʼí łahda doo bíneeshʼą́ą da nínízin łeh.

Jiihóvah éí nihaa ákonízin. Doo bíniilʼą́ą daígíí doo nihí yókeed da. Áádóó nihitsʼíís bąąh dahooʼaahgo dóó yinił yiidleehgo, yáʼátʼééh nídíídleełígíí tʼáá hodinaahgi éí Jiihóvah bił bééhózin.—Psalm 103:​13, 14.

Áko Jiihóvah haitʼéego Iiláíjah yaa áhályą́ ńtʼééʼ yee baa nitsíníkees. Iiláíjah yínííł silı̨́ı̨́ʼ dóó tʼáá íiyisí bił yéeʼgo biniinaa tʼóó honoojíígóó yóó ajoolwod. Ákoísh Jiihóvah bichʼahóóshkeedgo nátʼą́ą́ʼ anábinííłchą́ą́ʼ? Ndagaʼ. Jiihóvah naakidi bidiyingo  nidaalʼaʼí, Iiláíjah yichʼįʼ ayííłʼaʼ, tʼáá hazhóóʼógo chʼéézhdoosił áádóó adooyı̨́ı̨́ł biniyé. Tʼáá ákótʼée nidi, Iiláíjah dízdiin yiską́ąjįʼ tʼahdii bił yééʼ ńtʼééʼ. Jiihóvah lá haitʼéego bíká anáánáálwod? Áłtsé, haa áhályą́ągi Jiihóvah hoł ííshjání áyiilaa. Naaki góneʼ éí Jiihóvah haa joobaʼgo, hazhóʼó hachʼįʼ hadziih. Áádóó Jiihóvah bidineʼé díkwíí miil shı̨́ı̨́ tʼahdii bichʼįʼ dahodísingo hoł ííshjání áyiilaa. Áko díí binahjįʼ tʼáadoo hodiinaʼi, Iiláíjah ayóó yínááneedlı̨́įgo nahalneʼii násdlı̨́ı̨́ʼ. (1 Kings 19:​1-19) Díísh haʼátʼíí bitsʼą́ą́dóó bíhwiidííłʼááł? Iiláíjah biʼdiiłʼáhígíí ląʼí silı̨́ı̨́ʼ, ndi Jiihóvah hachʼįʼ haʼólní dóó haa joobaʼ ńtʼééʼ. Nihí ałdóʼ Jiihóvah tʼáá ákótʼéego nihaa áhályą́.

Jiihóvah bá naʼalʼaʼgi hazhóʼó baa nitsíníkees. Áłtséédą́ą́ʼ baa naniná yę́ę kʼad áánííłígíí tʼáadoo bił ahaah naninilí. Díí haneʼ binahjįʼ baa nitsíníkees: Diné łaʼ néiltihígíí díkwíí shı̨́ı̨́ nídeezidjįʼ doo náázhdiilwoʼgo éí doo áłtséédą́ą́ʼ náázhdiilwo yę́ęgi átʼée da doo. Ndi tʼóó kónígháníjįʼ náázhdiilwoʼgo, éí áłtsé hadziilgo ánáhodoodlííł áadi índída nizaagóó ninázhdidoolwoł doo. Daʼoodlání éí diné néiltihígíí nidahalin. Bééhózínígo łaʼ yidoolíłígíí yaa ntsídaakeesgo naʼádídanitah. (1 Corinthians 9:​24-27) Diyin kʼehgo ádaʼoolʼįįłii ná bohónéedzánígíí łaʼ bíká ánítʼı̨́. Náá bíighahdą́ą́ʼ da, daʼoodlání áłah nídaadleehdi nihaa díínááł. Jiihóvah bichʼįʼ sodilzingo shíkáʼinilyeed bididííniił. Áádóó neʼoodląʼ bidziil násdlı̨́įʼgo, ‘Jiihóvah yáʼátʼéehii jílı̨́įgo nił bééhodoozįįł.’ (Psalm 34:8) Díí béénílniih, Jiihóvah ayóóʼíiníʼninígíí binahjįʼ tʼáá ałtso aaníílii—azhą́ shı̨́ı̨́ kóníshéhí ndi, ayóó bił nílı̨́įgo átʼé.—Luke 21:​1-4.

Haash yitʼéego éí June beʼ oodląʼ bidziil anáyiidláago Jiihóvah yaa nádzá? June kóní: “Jiihóvah shíká anilyeed bidishníigo tʼáá áłahjįʼ bichʼįʼ sodiszin ńtʼééʼ. Áádóó shizhaʼáád tʼáá akǫ́ǫ́ kintahgi nitsaago áłah náʼádleehígíí bił hooʼaah níigo shił hoolneʼ. Tʼááłáhíjįʼ ákǫ́ǫ́ deeshááł niizı̨́ı̨́ʼ. Tsʼídá ayóó baa hózhǫ́ yáʼíítʼééh Jiihóvah Yá Dahalneʼé bił ahínáánéiishkai. Díí áłah azlı̨́ı̨́ʼígíí bibaʼ áníshtʼé yę́ę shíká eelwodgo shidziil ánáshiidlaa. Kʼad éí shił hózhǫ́ǫgo Jiihóvah bá nináánishʼaʼ. Iiná éí kʼad hazhóʼó yéigo shił nilı̨́. Díí baa ákoniizı̨́ı̨́ʼ, tʼáá sáhígo doo bííníshghah da. Jiihóvah baa nánisdzáagi tʼahdii shá bohónéedzą́ą́ lá, áko ayóó baa ahééh nisin.”