Yáʼátʼéehgo ázhdooníłígíísh nanitłʼa nínízin?— Ląʼí diné éí ákódeinízin. Diyin God Bizaad éí ashkii yázhí léiʼ Josáíyah wolyéego yáʼátʼéehgo ázhdooníiłgi ayóó há nanitłʼa ńtʼééʼ níigo yaa halneʼ. Ákondi hakʼis yáʼátʼéehígíí hólǫ́ǫgo háká anáhiʼnilchééh ńtʼééʼ. Josáíyah dóó bikʼis baa íhwidiilʼááł.

Josáíyah bizhéʼé Éíman wolyé, éí Júdah aláahgo binaatʼáanii nílı̨́. Éíman éí doo yáʼádaashxóonii yaa naayá, dóó edaʼalyaii bichʼįʼ nahojisá. Josáíyah bizhéʼé daaztsą́ bikéédóó, Josáíyah éí Júdah aláahgo binaatʼáanii jizlı̨́ı̨́ʼ. Índída éí tseebíí honááhai! Bizhéʼésh nahalingo doo yáʼádaashxóonii yaa naayá nínízin?— Ndagaʼ, bí éí doo ákódzaa da!

Josáíyah tʼah ashkii yázhí nilı̨́ı̨́ ndi, Jiihóvah bikʼeh honishʼı̨́į doo nízin ńtʼééʼ. Éí  biniinaa Jiihóvah ayóíʼádayóʼnínígíí tʼéiyá dahakʼisgo ájiilaa. Áko Josáíyah yáʼátʼéehgo ázhdooníiłgi hakʼis háká anáhiʼnilchééh. Háíshąʼ éí Josáíyah dabikʼis ńtʼééʼ?

Zefanáíyah éí łaʼ hakʼis nilı̨́. Zefanáíyah éí God yá halneʼii nilı̨́. Éí Júdah dineʼé edaʼalyaii bichʼįʼ nidahojiłáago tiʼhooʼnííh biih dookah bijiníigo tʼáá bítséedi bee bił hojoolneʼ. Josáíyah éí Zefanáíyah yidiiztsʼą́ąʼgo Jiihóvah tʼéiyá bichʼįʼ hozhdísin. Edaʼalyaii éí ndagaʼ.

Jeremáíyah éí ałdóʼ łaʼ nááhákʼis. Éí kʼasdą́ą́ʼ Josáíyah bił ałhąąh honááhai, dóó tʼáá áhą́dígi haghango ahił jineeyą́. Tʼáá ájíłah éí yáʼátʼéehgo ázhdooníiłgi dóó Jiihóvah bikʼeh hojíłʼı̨́įgi bee áłká anáhiʼnilcheeh. Yéigo éí ałkʼis jílı̨́ı̨́ ńtʼééʼ. Áko Josáíyah daaztsą́ągo Jeremáíyah yínííł nílı̨́įgo biniinaa sin łaʼ binahjįʼ áyiilaa.

Josáíyah bikʼis áyiilaaígíí binahjįʼ haʼátʼíí bitsʼą́ą́dóó bíhwiidííłʼááł?— Azhą́ shı̨́ı̨́ Josáíyah tʼáh ashkii yázhí jílı̨́į ndi, yáʼátʼéehgo ázhdoonííł tʼéiyá jinízin ńtʼééʼ. Tʼáá íídą́ą́ʼ hoł bééhózingo éí Jiihóvah ayóíʼádayóʼnínígíí tʼéiyá dahakʼis doo. Áko Jiihóvah ayóíʼádayóʼnínígíí, dóó yáʼátʼéehgo ádííníiłgi yee níká anídaalwoʼ dooígíí nikʼis ádíílííł!