“Naʼnitiní danohłı̨́į dooleeł.” (Heb. 5:12) Ánihiilaii Jiihóvah baa nitsíníkees éí yádiłhiłdi aláahgo Naʼnitinii nilíinii, éí náánáłaʼ hwee dahodoosįįł biniyé nidaʼniitin doogo nihá ąą áyiilaa. Jiihóvah binaʼnitin tʼáá aaníigo naanish nihąą niiníláhígíí—tʼáá hooghan hazʼą́ągi, áłah náʼádleehgi, doodaiiʼ atah nahwiilneʼgo—éí naanish ayóó ílı̨́įgo nihąą niilyá. Haitʼéego éí łaʼ diiʼnííł?

Paul éí Timothy naaltsoos yichʼįʼ íiyiilaa yę́ę, éí biyiʼdę́ę́ʼ haitʼéego łaʼ diiʼníłígíí yee nihił hodoolnih: “Diyin God bizaad bee akʼeʼashchíinii diné bichʼįʼ yíníłtaʼ, áádóó bee bichʼįʼ yáníłtiʼ índa bee naʼnítingo ádíínílzin.” Paul ánáádíʼní: “Háálá díí baa nanináago yisdádíínááł, índa danółtsʼą́ąʼii yisdádookah.” (1 Tim. 4:​13, 16) Naʼnitin binahjįʼ yisdáʼdooldah binaʼanishígíí nah niilyá. Saad yíídóoltahgi dóó bee naʼnitinígíí yéigo yinichįįhgo ádííníilzingo binanilnish. Díí naaltsoos éí yee níká adoolwoł. Díí naaltsoos hadilyaaígíí bee baa ákodíníízįįł.

Jiihóvah naʼnitinígi átʼéego éí łaʼ doo beełtʼéego nazhnitin da. (Job 36:22) Díí naaltsoos éí hazhóʼó naʼnítin dóó nizhónígo ííníłtaʼ dííleełgo yee níká adoolwoł. Ákondi díí naʼnitinígíí éí Jiihóvah bitsʼą́ą́dę́ęʼgo tʼááká baa yoonééh lágo, éí tʼáá bí tʼéiyá diné ádaayiidlóós. (John 6:44) Áko, tʼáá áłahjįʼ níłchʼi diyinii níká adoolwołgo bíká sodilzin. Diyin Bizaad tʼáá áłahjįʼ choiníłʼı̨́. Jiihóvah tʼéí baa hwiiʼniih, tʼáá nihí éí dooda. Daníistsʼą́ʼígíí bijéí yee Jiihóvah ayóóʼádayóʼníi dooleełgo binanilnish.

Haneʼ tsʼídá aláahgo ílíinii bílaʼashdlaʼii bee nidíʼnóotįįłgi nihichʼįʼ ąą ályaa. “Diyin God adziilii hainíláhígíí” baa íinílíigo, łaʼ diiʼnííł daníidzingo nihaa daʼíiniidlí.—1 Pet. 4:11.

Nihíighahdóó nidaʼniitinígíí,

Jiihóvah Yá Dahalneʼé bí Hastóí Alą́ąjįʼ Daʼéeʼéshígíí