Níłchʼi dineʼé hólǫ́! Yádiłhił biiʼ nahazʼą́ągi níłchʼi dineʼé yáʼádaatʼéhígíí dóó doo yáʼádaashónígíí hólǫ́. Níłchʼi dineʼésh bílaʼashdlaʼii danilı̨́įgo kǫ́ǫ́ kéédahatʼı̨́ı̨́ ńtʼééʼ dóó dáninéé ńtʼééʼ?

Ndagaʼ, éí dooda. Bílaʼashdlaʼii ádin yileehgo, doo éí háájigo anáánáádzáa da. Háásh yitʼéego éí díí nihił bééhózin? Háálá Diyin Bizaad ákótʼéego nihił halneʼ. Diyin Bizaad éí tʼááʼaaníinii átʼé. Tsʼídá tʼáá bí tʼéiyá tʼááʼaaníí God nilı̨́ éí Jiihóvah wolyé. Áko éí díí bíBizaad. Jiihóvah éí bílaʼashdlaʼii áyiilaa; áko ádin yileehgo haa yitʼįhígíí bił bééhózin.—Psalm 68:4; 2 Timothy 3:16.

Diyin Bizaad áníigo éí God áłtsé hastiin Ádam áyiilaa, “niʼ bitsʼą́ą́dóó łeezh yee.” (Genesis 2:7) God éí Kéyah Tʼáadoo Bee Honóoshónígi, dáʼákʼeh ĺíden holyéedi, Ádam ákweʼé hináago áyiilaa. Ádam Jiihóvah bibee hazʼáanii yiʼiilaago éí doo dadootsaał da ńtʼééʼ, dííshjı̨́įdi tʼahdíí hináa doo ńtʼééʼ. Ákó ndi God bibee hazʼáanii Ádam tʼáá ákójínéehgo kʼíjinítiʼ, God ábíłní: “háálá łeezh bitsʼą́ą́dóó ániʼdiilyaago łeezh nílı̨́, áko łeezh nídíídleeł.”—Genesis 3:19.

Díísh haʼátʼíí áhyiłní? Jiihóvah tʼahdoo Ádam łeezh yee íílééh yę́ędą́ą́ háadish hójílǫ́ǫ ńtʼééʼ? Doo éí háadida hójílǫ́ǫ da ńtʼééʼ. Doo éí yáʼąąshdi níłchʼi dineʼé jílı̨́į da ńtʼééʼ. Áko Jiihóvah Ádam tʼóó “łeezh nídíídleeł” yił nínée éí tʼóó dadootsaałgo ííłní. Doo éí yádiłhił biiʼ nahazʼą́ągi ákǫ́ǫ́  jizlı̨́ı̨́ʼ da. Ádam daaztsáago iiná bąąh ásdįįd doo éí háadida nááhojídlǫ́ǫ da. Anoonééł iiná bąąh ádin.

Áko shąʼ łaʼ daneeznánígíí, éísh ałdóʼ doo dahójílǫ́ǫ da? Diyin Bizaad áníigo éí:

• “Tʼáá ałtso [biláʼashdlaʼii dóó naaldlosh] tʼááłáhíjįʼ ahikááh; tʼáá ałtso łeezh łibáhí bitsʼą́ą́dóó ádaatʼı̨́, áádóó tʼáá ałtso łeezh łibáhí nídadoodleeł.”—Ecclesiastes 3:20.

• “Daneeznáanii éí tʼáadoo bił béédahóziní da.”—Ecclesiastes 9:5.

• “Bibee ayóóʼádaʼóʼniʼ yę́ę áádóó akʼee dadiniihii índa daʼoołchʼı̨́ı̨́d yę́ę ałkʼidą́ą́ʼ ádaasdįįd.”—Ecclesiastes 9:6.

• “Háálá díníyáhígóó naanish áádóó nahatʼá áádóó ił ééhózin índa hódzą́ jishcháaʼdi ádin.”—Ecclesiastes 9:10.

• “[Diné] łeeyiʼ góyaa yileeh; tʼáá éí bijı̨́ bintsíkees ádįįh.”—Psalm 146:4.

 Díí saad hadahasdzoígíí nił nilı̨́į doogoísh ná nanitłʼa? Nił ákótʼéego éí díí baa nitsíníkees doo: Ahastiin dóó azhéʼé jílínígíí béeso níyíił bįįh łi, áko baʼáłchíní yee yaa áhályą́. Éí diné ádin yileehgo beʼasdzą́ą́ dóó baʼáłchíní tidaʼhooníih łi. Chʼiyáán nahodoonihígi ndi béeso bąąh ádin łi. Ałdóʼ ahastiinée bidaʼanaʼí beʼasdzą́ą́ dóó baʼáłchíní atídeełʼı̨́į doogo átʼé. Áko naʼídílkid: ‘Áko éí hastiin yádiłhił biiʼ nahazʼą́ągi hiná ládą́ą́ʼ, haash yitʼéego éí beʼasdzą́ą́ dóó baʼáłchíní doo yaa áhályą́ą da, dóó diné doo yáʼáshónígíí doo yá yichʼą́ naagháa da?ʼ Áko Diyin Bizaad ánínée tʼáá ákótʼé. Diné daaztsáago iiná bąąh ásdįįd, dóó éí haitʼéego haʼátʼíida ánáánéedoodlííł da.—Psalm 115:17.

Ákoísh daneeznánígíí nááhididoojahgo átʼé? Aooʼ. Nááʼdiijeehígíí éí hodíínááʼígo índída yaa ahoʼniilneʼ. Béénílniih daneeznánígíí nihí ádeetʼínígíí doo bił béédahóziní da, doo danihooʼı̨́į da, doo danihidiitsʼaʼ da, dóó doo nihichʼįʼ yádaałtiʼ da. Doo éí bááhádzid da. Doo éí níká adoolwoł da, dóó doo atíndoolííł da.—Ecclesiastes 9:5; Isaiah 26:14.