Séítan dóó biníłchʼi ndaalʼaʼí doo hoolʼáágóó bílaʼashdlaʼii yindaʼadloʼ da doo. Jiihóvah éí tʼááʼíídą́ą́ yáʼąąshdę́ę́ʼ adadayiistłʼííd. (Revelation 12:9) God éí hodíínááʼígo, Séítan dóó biníłchʼi ndaalʼaʼí yikʼijįʼ nináá doolnish. God éí John díí bił ííshjání áyiilaa: “Nítʼééʼ yáʼąąshdę́ę́ʼ diyingo naalʼaʼí léiʼ aʼáán doo nihoodzáanii bibee ąą ńdítı̨́hí dah yootı̨́įłgo áádóó béésh daʼahólzhaʼí ayóo daʼátʼéé léiʼ dah yooléełgo hadahooleełgo yiiłtsą́. Áko naʼashǫ́ʼiitsoh yisił, éí tʼáá ałkʼidą́ą́ʼ tłʼiish nilínígíí, níłchʼi bidaʼiiníziinii binanitʼaʼí éí Séítan wolyéii, áko tʼááłáhídi mííl nááhaijįʼ yeʼeztłʼǫ́ǫgo aʼáán doo nihoodzą́ą́ góneʼ ayiyííłhan, áádóó yidádiʼnítą́ áádóó yidádiʼnídléézh. Tʼááłáhídi mííl nááhaijįʼ ałʼąą dineʼé bił dah nidahazʼą́ą́góó doo yininááʼádloʼ da dooleeł biniyé ákódzaa.” (Revelation 20:​1-3) Hodíínááʼígo Séítan dóó biníłchʼi ndaalʼaʼí hoolʼáágóó ádadooldįįł.—Revelation 20:10.

Nihookááʼ bikááʼgi diné doo yáʼádaatʼéhígíí ádooldįįł.—Psalm 37:9, 10; Luke 13:5.

Séítan dóó biníłchʼi ndaalʼaʼí nahjįʼ kódaalyaago bikéédóó Jiihóvah éí bílaʼashdlaʼii yikʼijídlíii doo. Béénílniihgo éí daneeznáanii tsʼídá doo háadida dahólǫ́ǫ da dóó doo dahiináa da. Jesus éí daneeznánígíí tʼóó yéego daʼałhosh ní—naʼageeł tʼáágééd. (John 11:11-14) Biniiyé ákóozhdííniidígíí Jesus tʼááʼíídą́ą́ʼ bił bééhózingo ádaadinígíí iináajįʼ chʼéédabiʼdiʼdoolził dóó náádidoojah. Áko ázhdííniid: “Háálá bichʼįʼ hoolzhish jishchááʼ góneʼ [béédahaniihgo, New World Translation] naazhjéʼígíí . . . háádahidookah”—John 5:28, 29; díí ałdoʼ yidiixła Acts 24:15.

Éí tʼáá kǫ́ǫ́ náásgóó kéyah bikááʼ kénáádahatʼı̨́į doo. Éí ánáánádin haʼnínígíí doo baa dahodiitsʼaʼ da doo. Ákó ndi daneeznánée náábiʼdiiljééʼ haʼníi doo! Ayóó adeeníiʼnínée jishchááʼdę́ę́ʼ náábiʼdiiljééʼgo tʼáá íiyisíí baa nihił dahózhǫ́ǫ doo!