Séítan ałtso hóółchxǫʼę́ę Jiihóvah tsʼídá tʼááʼátʼéii ńtʼééʼ hashtʼéii doodlííł. Jiihóvah éí Jesus nihookááʼ tʼáá síʼą́ą́ ńtʼééʼ yinantʼaʼí áyiilaa. Éí binahatʼaʼ biyaadóó nihookááʼ tʼáá síʼą́ą́ ńtʼééʼ kéyah tʼáadoo bee honóoshónígo íidoolííł.—Daniel 7:13, 14; Luke 23:43.

Díí tʼáá ałtso Jiihóvah yee ádee hahasdzííʼ:

• CHʼIYÁÁN TʼÓÓʼAHAYÓI DOO: “[Nihookááʼ] bikááʼgóó ádaʼazįįd doo, Diyin God, tʼáá nihí nihiDiyin God, nihikʼijidlíi doo.” “Dziłghą́ąʼdi álástsiiʼ tʼóó ahayóigo kʼidoolyáhígíí hanootʼą́ągo . . . ”—Psalm 67:6; 72:16.

• ANAAʼ ÁDIN DOO: “Hágo, Bóhólníihii [Jiihóvah] binaanish níníłʼı̨́; . . . [Nihookááʼ] nidaneesʼą́ąjįʼ anaaʼ dahólóonii ánéísįįd.”—Psalm 46:8, 9.

• DINÉ DOO YÁʼÁSHÓONII ÁDIN DOO: “Háálá doo yáʼáshǫ́ǫ́góó ádaaníiłii ádooldįįł . . . Háálá tʼóó nááhodooʼnááʼígo diné doo yáʼáshóonii ádin doo; tʼáá aaníí, kééhatʼı̨́ı̨́ nítʼééʼ yę́ęgi hazhóʼó hádííníʼı̨́ı̨́ʼ, nidi ádin doo.”—Psalm 37:9, 10.

•  ATAH HONEEZGAII, YÍNÍÍŁ DÓÓ ÁNOONÉÉŁ ÁDIN DOO: “Áko doo daʼooʼíinii éí daʼooʼı̨́į dooleeł áádóó bijédaahkałii daʼdidootsʼı̨́ı̨́ł. Áádóó diné naaljı̨́ı̨́d nilíinii bįįh nahalingo dah náníljı̨́įh doo, índa doo yádaałtiʼii dahataał doo.”—Isaiah 35:5, 6.

  “Diyin God tʼáá bí hoł hólǫ́ǫ doo . . . Dabinákʼeeshtoʼ tʼáá ałtso yá yidootʼoł, aniné ádin doo, áádóó atínáhodinidleeh ádin doo, áádóó cha ádin doo índa adiniih ádin doo, háálá áłtséédą́ą́ʼ dahólóonii bił yóóʼahóóyá.”—Revelation 21:3, 4.

Séítan dóó biníłchʼi ndaalʼaʼí ayóo dabiyoochʼííd. Jiihóvah éí doo biyoochʼííd da. Jiihóvah tsʼídá tʼááʼaaníinii tʼéii yee hahadziih. Jiihóvah tʼáá ałtso yee nahodiníʼánée íidoolííł. (Luke 1:36, 37) Jiihóvah ayóóʼánóʼní dóó Kéyah Tʼáadoo Bee Honóoshónígi hiinínáa doogo ná yinízin. Áko Jiihóvah Yá Dahalneʼé choidííłʼįįł, Diyin God Bizaad biiʼ tʼááʼaaníinii ayóó ánóolinígíí yee nidandínóotı̨́ı̨́ł. Tʼááʼaaníinii bikʼeh honíłʼı̨́įgo éí, yoochʼííd kʼehgo oodáałii, ííníziin kʼehgo ntsáhákees dóó hániʼ tʼóó bił tłʼééʼígíí biiʼdóó néididoochił. Ałdóʼ hoolzhishgóó niʼiidzííh dóó anoonééł nóótąʼígíí biiʼdóó néididoochił. Jesus ánínígi átʼéego: “Tʼáá aaníinii nihił béédahodoozįįł, índa tʼáá aaníinii nihéédeididoochił.”—John 8:32.