“Éí bąą yiską́ągo áhootʼée dooleełígíí tʼáadoo bíká ádił nídahodołchiłí, háálá yiską́ągo bíká ádił nídahodichiłii dahólǫ́ǫ doo.”—MATTHEW 6:34.

Díí áhyiłní: Niheʼiinaʼ éí ádił náhodilchił biiʼ hólǫ́. Ádił náhodilchiłgo nide átʼéhí díí jı̨́ doo yiską́ągo áhodooníiłgi, tʼáadoo ałhiih náníʼniłí. Tʼááłáʼí jı̨́ ádeeshłííł nínízinii beʼíłʼı̨́.

• Ádił náhozhdilchiłgo ade átʼé tʼóó hoł hanchaʼ. Beʼdíílííł, áłtsé, baa ákonínízin hade áhootʼéego hatsʼíís doo bá yáʼátʼéeh da. Haʼátʼíí shı̨́ı̨́ baa níniʼgo tʼáadoo biniyéda łeh. Naaki góneʼ, baa ákonínízin łaʼda ádoolnííł jinízingo bikʼehgo áhánééh doo baa hániʼ da.

“Nidi yáʼąąshdę́ę́ʼ bee hódzáanii éí . . . áʼáhwiinítʼı̨́ʼí.”—JAMES 3:17.

Díí áhyiłní: Tʼáadoo nizhónígo áhodoonííł níníziní. Tʼáadoo ayóo wódahgóó ádá nitsíníkeesí, doodaiiʼ náádaałaʼ.

• Ádá ákonínízin. Ádá nihootʼáagi hazhóʼó beʼíłʼı̨́, dóó bíninilʼánígíí doo náádaałaʼ yídaneelʼánígíí baa ákonínízin. Éí doo nide átʼée da. Doo biʼoh ádíílííł dah. Éí yáʼátʼéehgo chʼídíínááł naa ałdóʼ áłtsʼíísígo dlohdilchí éí yáʼátʼééh ałdóʼ hoł hózhǫ́ǫ doo joodlohgo—éí azhą́ shı̨́ı̨́ tʼáadoo leʼé doo ákótʼįįh da ndi. Hatah hwiinéego áyósin dóó hoł hózhǫ́ǫ łeh.

“Diné akʼidiʼyiitįįhii doo ádił nídiiltéeh da.”—PROVERBS 17:27.

Díí áhyiłní: Doo ákotʼéego ntsáhákees yidínóołtłʼah áádóó hááhiniilwołí.

• Niʼdiiłʼáhígíí nił bééhózin dóó baa ákonínízingo haitʼéego hashtʼedíílííł. Tʼáá haʼátʼíhída niʼdiiłʼáago baa nitsíníkeesii hazhóʼó baa ákonínízin. Ánítʼéhígi éí doodago ááníiłgi ałdóʼ. Niʼdiiłʼáhígíí naaltsoos bikááʼ ádíílííł díí átʼéego nił bééhodoozįįł. Áádóó náasdi tʼáá ní hazhóʼó hashtʼedíílííł. Hazhóʼó nabikʼísíníłkeesgo nighan hazʼą́ągi niʼdiiłʼáhígíí hashtʼedíílííł. Tʼóó nił laanaago, binanilnishígíí hazhóʼó hashtʼedíílííł bee hosíníłʼą́ągo haʼátʼíí shı̨́ı̨́ bééhonísinígíí ninaanish ádíílííł.

• Níníłʼı̨́įgo, niʼdiiłʼáhígíí hazhóʼó hashtʼedíílííł. Éí náánáłaʼ doo biʼdiiłʼáa da. Náánáłaʼ éí łahgo átʼéego yinéłʼı̨́į łeh. Kweʼé tááʼ chʼídaastʼą́:

  1. Tʼáadoo tsxı̨́įłgo díí doo ákótʼéégóó ájítʼı̨́ níníziní. Ałkééʼ nisoozı̨́įgo łaʼda nilą́ąjįʼ eelwodgo doo ákótʼéégóó ájítʼı̨́ níníziní. Biniinaa chéchįʼ niiʼdeeyáago áádóó náhóóchįįdgo shąʼ éí yiniinaa nilą́ąjįʼ íízı̨́ʼii doo nił bééhózin da. Ákondi biniinaanii shı̨́ı̨́ hólǫ́ǫgo átʼé nínízin. Aooʼ, éí tʼáá aaníí.

  2. Ádahootʼéegi yáʼátʼéehgo baa nitsíníkees. Azeeʼálʼı̨́įdi shá bíighah jizdáa łeh éí doodaiiʼ airportgida. Áko abaʼ ánítʼéego naaltsoos yííníłtaʼ éí doodago naanish nááná emailda ałtso ádadíílííł.

  3. Nił áhootʼéegi hazhóʼó baa nitsíníkees. Bee shichʼįʼ anáhóótʼiʼígíísh yiską́ągo doodaiiʼ damóogo tʼáásh shichʼįʼ nahwiiʼnáa doo? Azhą́ ayóo ádaníłtso ndi, doo nide átʼée da doo.

“Bíniʼdii tʼáá ałtsoní yáʼátʼéehgo índa hashtʼehodítʼéego baa naʼaldeeh leʼ.”—1 CORINTHIANS 14:40

Díí áhyiłní: Neʼiinaʼ siláagi ááníiłii hazhóʼó ałkééʼ síníłnil.

• Niheʼiinaʼ siláhígíí hazhóʼó nihinaanish ałkééʼ sinilgo ííníilzin. Nihide áhootʼéego doodaiiʼ doo ałkééʼ siilnilgo éí nihidínóołtłʼah. Tʼáá shı̨́ı̨́ bikʼi hodoolzhish niidzingo ádiilnííł yę́ę doo beʼiilʼįįh da. Díí naaki hazʼą́ baa nitsíníkees doo.

  1. Schedule íinilaaígíí beʼíłʼı̨́ dóó beʼdíílííł.

  2. Baa nitsíníkees tʼáá nínízinígíí hashtʼedíílííł.

“Hálaʼ tʼáá ałchʼishjí tʼáá bizááká bee joolnishgo níyol chʼééh bíjílyeed nahalinígíí éí biláahgo tʼááłáhíjí hálákʼeegi hasyéél hadeezbingo yáʼátʼééh.”—ECCLESIASTES 4:6.

Díí áhyiłní: Tʼááłáhígíí átʼéego tʼóó ádił ninílníishgo yáʼátʼééh yę́ę ałtsʼą́ą́ʼ kwíilʼı̨́į, ‘hálaʼ tʼáá ałchʼishjí tʼáá bizááká bee joolnish’ nahalin. Ląʼí deiyílníísh béeso yee nídaʼdoołdįįł dóó chodeidoołʼįįł yę́ę tʼáá bá biʼoh nidahaleeh.

• Naanish dóó béeso éí hazhóʼó nabikʼísíníłkeesgo áníłʼı̨́ habéeso ląʼígo éí doo ił hózhǫ́ átʼée da. Nááná achʼįʼ anáhwiitʼéehgo ałdóʼ doo yiʼoh áyósin da. Ákondi, baa yínííł hólǫ́ǫ doo. Ecclesiastes 5:12 ání, “Tʼáá ałtsoní bee hólóonii éí yąą doo hazhóʼó ałhosh da.” Tʼáá bíninilʼánígíí tʼéí bee iiná áníłʼı̨́.

• Hááʼáyı̨́ı̨́h bá hosíníłʼą́. Áko niʼdiiłʼáhígíí doo nide átʼée da. Bíninidlínígíí naanish íinisingo honeeni yáʼátʼéhígíí áníłʼı̨́ níłchʼi naalkidí éí doo níká adoolwoł da.

• Technology bá nahwiiniłʼááh. Tʼáadoo tʼáá áłahjįʼ email dóó text message baa náánítahí, social sites ádaatʼéhígíí ałdóʼ. Ákondi, nanilnishgo éí email bídadéétʼiʼígíí choiníłʼı̨́, nihilniishgo éí tʼáadoo ayóó baa nánítʼíní.

“Hatsʼíís bidziil dooleeł biniyé naʼádízhʼnítaah éí tʼóó kónízahíjįʼ ílı̨́.”—1 TIMOTHY 4:8.

Díí áhyiłní: Áłahjįʼ naʼádíltsʼǫǫdgo bee nitsʼíís yáʼátʼééh.

• Nitsʼíís bá yáʼátʼéhígíí beʼíłʼı̨́. Náádiilwoʼgo binahjįʼ nitah yáʼáhootʼééh dóó binahjįʼ nitsʼíís ade áhootʼé yikʼeh didoodleeł. Chʼiyáán yáʼádaatʼéhígíí niyą́, tʼáadoo nihísíhí. Háánílyı̨́ı̨́h.

• Nitsʼíís doo bá yáʼátʼéhígíí bitsʼą́ąjįʼ kónítʼé, éí nátʼoh, azeeʼ, tó diłhił. Béeso bíká nishínílnish yę́ę neʼiiná yidínóołtłʼah.

• Azeeʼííłʼíní tʼáá baa nánídááh. Nide átʼéhígíí tʼóó nił hanííchaadgo áájí ndaʼałkaahígíí níká adoolwoł.

“Yáʼádaatʼéehii nihił béédahózingo bee lą́ nidaʼayohłeeh doo.”—PHILIPPIANS 1:10.

Díí áhyiłní: Binahosíníʼánígíí hashtʼenilééh.

• Ádíílíłígíí ałkééʼ ninínííł. Ninaanish baa hastiʼígíí áłtsé ádíílííł. Binahjįʼ hazhóʼó baa hastiʼígíí éí átʼah ádíílííł. Łaʼda naanish baa díʼaah éí doodago tʼóó nahjįʼ nídidííʼááł.

• Łaʼ damóojįʼ baa nishínílnishígíí hazhóʼó baa ákonínízin. Binahjįʼ ninaanish hazhóʼó ałkééʼ sinilgo ánáádíídlííł. Kótʼéego baa ákonínízingo naanish doo nide átʼée da.

• Doo ná bíighah da nidahaleehígíí baa ákonínízin. Hááʼáyı̨́ı̨́h tʼáá bá hosíníłʼą́ éí nidziilgo ánóhsin doo. Binahjįʼ doo ayóó naanish nide átʼée da.

“Diné bijéí biiʼ biʼdiiłʼáii hólǫ́ǫgo éí yikʼee yínííł sidáa łeh, nidi saad yáʼátʼéehii bee bichʼįʼ haʼadzihgo éí bił náhooshǫǫł.”—PROVERBS 12:25.

Díí áhyiłní: Naa áhwiinítʼı̨́ʼí saad yáʼátʼéehii éí łaʼ bidziilgo áyósin.

• Niʼdiiłʼáhígíí diné yáʼátʼéehgo nitsíkeesígíí bił hólneʼ. Éí binahjįʼ haʼátʼíhída niʼdiiłʼáhígíí łahgo átʼéego baa ákonínízin doo. Kótʼéego náánáłaʼ bił hojilneʼgo éí hatah yáʼáhootʼéeh łeh.

• Shíká anilyeed diní naanish łahjįʼ aa hidíʼaah. Tʼáadoo tʼáá sáhí nanilnishí.

• Naanish nide átʼéego, haitʼéego doo nide átʼée da dooleeł. Binahjįʼ akʼiʼdiitįįhiigíí, saad yáʼátʼéehii bee yáníłtiʼ haitʼéego baa nitsíníkeesígi. (Proverbs 17:27) Doo ná bee halnééhgóó, náánáłaʼ doo bił ahidinílnáago shąʼ?

“Diyin kʼehgo hojoobaʼ ádaatʼéego ádaa nitsídaakeesii bikʼidahojidlí.”—MATTHEW 5:3.

Díí áhyiłní: Bílaʼashdlaʼii éí hooghan, ééʼ, chʼiyáán yídin danilı̨́. Ił hózhǫ́ niidzingo níłchʼi kʼehgo chʼiyáán bídin nilı̨́ı̨́ doo.

• Sodizin yéigo níká adoolwoł. Diyin God éí kótʼé ní, “Nihidaʼdiiłʼáhígíí tʼáá ałtso baa dahidohʼaah, háálá nihíneedlı̨́įgo nihaa áhályą́.” (1 Peter 5:7) Sodizin dóó tʼáá ałtsoní hazhóʼó nabikʼítsiilkeesgo éí atah hózhǫ́ náhásdlı̨́įʼii átʼé.—Philippians 4:​6, 7.

• Diyin God Bizaad bitsʼą́ą́dę́ę́ʼ naaltsoos danéedéhígíí yíníłtaʼ. Nihíká adoolwoł dóó niheʼoodląʼ bidziilgo íidoolííł biniyé ályaa. “Tʼáá ákogi átʼéego hódzą́ índa yáʼátʼéehii áádóó doo yáʼátʼéehii nił bééhózingo bee ádaa áhólyą́.” (Proverbs 3:21) Diyin Bizaad yííníłtaʼgoósh tʼáá bá nahwiiníłʼaah? Proverbs haʼdííłtah éí yáʼátʼééh.