Díí tʼáá aaníí Jiihóvah kótʼı̨́įgo, baa nitsíníkees niheʼiinaʼ haitʼéego yihodidoołtʼih. Brother nilı̨́įgo biyeʼ ádiisxı̨́. Azhéʼé jílínígíí ayóó átʼéego hajéí yistał. Áko baa nitsíjíkeesgo Jiihóvah daatsʼí hó dóó hweʼasdzą́ą́ díí ayóó átʼéego áhoʼdiilyaaígíí bichʼįʼ haʼjólníi doogo há yiyiiłtsą́. Tʼóó ahoniiʼyóí ayóó átʼéego ánihiʼdidoolníiłgo átʼé. Ákosh tʼáá ałtso nihichʼįʼ ádahooníłígíí, Jiihóvah áshíłʼı̨́ diiʼníigo bikʼíhwiitʼáah doo?

1 Corinthians 10:13 kóní hwiindzingi, ‘Jiihóvah éí tʼáá bítséedi íiniizįįhgo haʼátʼíí bichʼįʼ haʼjólníi dooleeł áádóó háidíígíí lá bee hodínéeshtah,’ Diyin Bizaad éí doo yikééʼ sizı̨́į da. Díí haʼátʼíí biniyé kóhwiindzin? Kodóó dı̨́įʼgo dadíníilʼįįł.

Áłtséhígíí, tʼáá nihí nihóhólníihgo ádá nitsíikeesgi Jiihóvah nihainílá. Tʼáá nihí ádá nihodiyiitʼaah doo nihóʼní. (Deuteronomy 30:19, 20; Joshua 24:15) Jiihóvah bił honiilzhǫ́ǫgo ádá nihodiyiitʼaah ládą́ą́ʼ, éí bí baʼííníidlíigo nihiyoołáał doo. (Proverbs 16:9) Ndi doo yáʼátʼééhgóó ádá nihodiitʼaahgo, tʼáá éí bee nihikʼi náhwiidleeh doo. (Galatians 6:7) Jiihóvah díí bee hodínéeshtah nízingo, ákosh tʼáá nihí nihóhólníihgo ádá nitsíikees doo?

Naaki góneʼ, tʼáadoo kótʼé ílíní akʼi dahwiileʼii, Jiihóvah doo yee achʼą́ą́h naagháa da. (Ecclesiastes 9:12) Nihidáahdi doo éédahózin da, doo áhodoonííł yę́ęgi áhootʼįįh, háálá łaʼda tʼáadoo kótʼé ílíní ayóó átʼéego áhootʼįįh. Jesus éí diné 18 yiltʼéego kin bikʼiiłdáazgo nabistseed níigo yaa halneʼ. Áko díí dazhneeznánígíí éí doo God atʼı̨́į da, ní. (Luke 13:1-5) Tʼah doo atíʼánééhgóó God éí, díí hináa doo doodaiiʼ dadootsaał níi dooígi, doo beełtʼée da.

Tááʼ góneʼ, tʼááłáʼí niitínígo éí Jiihóvah bikʼeh hóʼı̨́ı̨́jí oodáłígíí yíníitąʼ doo. Séítan ání, Jiihóvah bá nidajilʼaʼ háálá hakʼihadlíigo há asłá. Séítan ánihiłníigo éí nihichʼįʼ hodiisnáaʼgo Jiihóvah bitsʼádíídááł. (Job 1:9-11; 2:4; Revelation 12:10) Áko Jiihóvah éí achʼįʼ nahwiiʼná nihá yichʼą́ą́h naagháago, Séítan tʼáá aaníí ání nahalin doo.

Dı̨́ı̨́ʼ góneʼ, Jiihóvah éí tʼáá ałtsojįʼ ánihiʼdidoolníiłgi tʼáá bilą́ąjįʼ bił bééhodoozįįłgi doo yee nihaa nitsíkees da. Tʼáá aaníí, Jiihóvah éí náasdi áhodooníłígíí shił bééhodoozįįł nízingo bił bééhodoozįįłgo átʼé. (Isaiah 46:10) Ndi Diyin Bizaad áníigo Jiihóvah éí tʼáá ałtsojįʼ tʼáá bilą́ąjįʼ shił bééhodoozįįł níigo doo yaa nitsíkees da. (Genesis 18:20, 21; 22:12) Jiihóvah éí ayóóʼóʼóʼní índa tʼáá ákogi átʼé, áko haʼátʼíí shı̨́ı̨́ tʼáá nihí bee ádá nihodiitʼaahgi yee nihíhółnííh.—Deuteronomy 32:4; 2 Corinthians 3:17.

Paul ání, Jiihóvah éí “bídanoołʼáanii biláahdi [yee] nanihíhodínóotahgi doo yee hasʼą́ą da”, díísh haʼátʼíí áhyiłní? Éí áníigo, achʼįʼ nahwiiʼná hazlı̨́įʼgo Jiihóvah nihíká adoolwoł, tʼah doo achʼįʼ hodiiʼnááhgóó éí ndagaʼ. * (Footnote níníłʼı̨́.) Jiihóvah baʼííníidlíigo éí haʼátʼíí shı̨́ı̨́ bee atínihiʼdilʼínígíí biiʼ hádiidáałgi yee nihíká análwoʼ. (Psalm 55:22) Haʼátʼíí biniyé Paul kóníigi, naakigo dadíníilʼįįł.

Áłtsé biniinaaígíí éí achʼįʼ nidahwiiʼná tʼáá áníiltso nihichʼįʼ áánííł. Séítan binahatʼaʼ biyaadóó kééhwiitʼı̨́įgo nihichʼįʼ nidahwiiʼná, doodaiiʼ ayóó ánihiʼdidoolnííł. Jiihóvah badaʼííníidlíigo  éí achʼįʼ nidahwiiʼná bił chʼíhonítʼiʼgo átʼé, índa Jiihóvah doo bitsʼą́ąjįʼ dah didiidáał da. (1 Peter 5:8, 9) 1 Corinthians 10 góneʼ, Paul díí yaa halneʼ, Ízrel dineʼé éí halgaigi ałʼąą ádaatʼéego bee hachʼįʼ nidahwiisʼnááʼ. (1 Corinthians 10:6-11) Jiihóvah badaʼjólíigo bee hachʼįʼ nidahwiisʼnááʼígíí bichʼįʼ hadaʼjólníi doo. Ndi łaʼ Ízrel dineʼé éí tʼáadoo akʼeh dahółʼı̨́į da, háálá Jiihóvah tʼáadoo yadaʼoozlíiʼ da.

Naaki góneʼ biniinaaígíí “God éí baʼahódlí.” Díí haʼátʼíí níigo ání? Níléídę́ę́ʼ Jiihóvah bidineʼé yaa áhályą́ą́ ńtʼéeʼgi daníilʼı̨́įgo éí “ayóóʼádabóʼníinii índa bibikʼeh óʼooʼníiłii yikʼeh dahółʼíinii” yíká análwoʼ. (Deuteronomy 7:9) Bídahwiilʼą́ąʼgo, Jiihóvah yee hahadziihii yiʼoolíiłgo átʼé. (Joshua 23:14) Yiniidlą́ągo éí (1) haʼátʼíí shı̨́ı̨́ bee nihichʼįʼ nidahwiiʼnánígíí doo bííníigah da dooleełgi Jiihóvah doo yee hasʼą́ą da, áádóó (2) “chʼíhonítʼiʼgo nihá íidoolííł.”

Jiihóvah yadaʼólíhígíí haitʼéego bá chʼíhonítʼiʼgo yá ííłʼı̨́? Tʼáá aaníigo éí bee achʼįʼ nidahwiiʼnáanii nihá nahjįʼ kwíidoolíiłgo átʼé. Ndi béénílniih, Paul áníigo Jiihóvah éí achʼįʼ nidahwiiʼná “bił chʼíhonítʼiʼgo nihá íidoolííł, áko bídanoołʼą́ą doo.” Díí áníigo Jiihóvah éí danihidziil ánihidoolíiłgo doo bitsʼádíídáał da. Haitʼéego éí nihidziilgo ánihidoolíiłgi łaʼ dadíníilʼįįł.

• Jiihóvah éí “tʼáá ałtsojįʼ atínihiʼdilʼı̨́įgo hanihiʼiyoołnííh.” (2 Corinthians 1:3, 4) Jiihóvah éí biníłchʼi diyinii, dóó Bizaad, índa baʼahódlíigo hóyą́ągo naalʼaʼii choyoołʼı̨́įgo nihintsíkees siláagi hashtʼedítʼéego áyósin.—Matthew 24:45; John 14:16; Romans 15:4.

• Jiihóvah éí biníłchʼi diyinii yee nihíká análwoʼ dooleełgo átʼé. (John 14:26) Hazhóʼó ádá nahwiitʼáa dooleełgo éí níłchʼi diyinii Diyin Bizaad biiʼ dahaneʼii dóó naʼnitinígíí yee yéénihidiyiiłniih.

• Jiihóvah éí diyingo nidaalʼaʼii choyoołʼı̨́įgo nihíká anájah dooleełgo átʼé.—Hebrews 1:14.

• Jiihóvah éí danihikʼis índa danihilah choyoołʼı̨́įgo nihíká anájah dooleełgo átʼé. Saad yee yádaałtiʼgi índa ádaaníiłgi bee danihidziil dooleełgo átʼé.—Colossians 4:11.

1 Corinthians 10:13 góneʼ, haʼátʼíí bitsʼą́ą́dóó bídahwiilʼą́ą́ʼ? Jiihóvah éí háidíígíí lá bee hodínéeshtah, doo nízin da. Ndi Jiihóvah baʼííníidlíigo éí haʼátʼíí shı̨́ı̨́ bee achʼįʼ nidahwiiʼnáanii bichʼįʼ haʼííníilníi doo. Áádóó nihá chʼíhonítʼiʼgo áyósin, áko bikééʼ siidzı̨́į doo.