1. Nihikʼé nináʼílyáagi éí haʼátʼíí nihá ił chohooʼı̨́įgo áyósin?

JESUS CHRIST nááʼádiisʼniiʼgi éí tʼóó ahayóígóó bee nihikʼihojídlíigo ííłʼı̨́. Nihikʼé nináʼílyáagi éí binahjįʼ Ádam baʼáłchíní tʼáá ákogi éʼétʼé ayóóʼádayóʼnínígíí éí God baʼáłchíní dadooleeł. Nááʼáłdóʼ bee nihikʼihozhdoodliiłígíí éí nihił dahózhǫ́ǫgo hoolʼáágóó dahiniiʼnáa doo. Ndi yáʼąąshii índa nahasdzáán bídadéétʼiʼii éí nináʼílyáagi aláahdi bídéétʼiʼ.—Hebrews 1:8, 9.

2. (a) Yáʼąąshii dóó nahasdzáán bídadéétʼiʼii haitʼéego Jesus yee sodoolzin? (Áłtsé naashchʼąąʼígíí níníłʼı̨́.) (b) Haʼátʼíí baa ídahwidiilʼááł?

² Jesus tʼah doo daatsaahgóó, hódahoołʼaahii kótʼéego sodadołzin doo yiłníigo neineeztą́ą́ʼ: “[Nihizhéʼé] yáʼąąshdi honílóonii, nízhiʼ diyingo óolzin, bee nóhólníihii náásgóó kʼeeʼąą yilzhish leʼ. Áádóó bee íinínízinii tʼáá yáʼąąshdi ááníłígi átʼéego nahasdzáán bikáaʼgi áánííł.” (Matthew 6:9, 10) God bízhiʼ diyingo óolzingi, God biNahatʼaʼ hooʼáał dooígi, dóó God íinínízinii ááníił dooígi éí nihikʼé nináʼílyáagi haitʼéego ahídadéétʼiʼgo baa ídahwiidiilʼááł.

3. Jiihóvah bízhiʼ óolyéegi haʼátʼíí óolyé? Séítan éí haitʼéego Jiihóvah bízhiʼ yiyííłchǫʼ?

³ Jesus éí Bizhéʼé Jiihóvah bízhiʼ diyingo óolzin doo níigo sodoolzin. Jiihóvah tʼáá bí átʼéiigi yee ádójí. Adahwiisʼáágóó Bí ayóó ábóodziilii dóó tʼáá ákogi éʼétʼéii nílíinii jílı̨́. Jesus éí “shiTaaʼ Diyin” yiłníigo yiyíízhiʼ. (John 17:11) Jiihóvah éí jidiyin, tʼáá ałtsoní ájooníłígíí índa bee hazʼáanii ádajileʼígíí ałdóʼ dadiyin. God éí bee hazʼáanii bílaʼashdlaʼii yá íidoolíiłgi bee bóhólnííh, ndi Íídendi Séítan yikʼijįʼ haadzíiʼgo yee inaʼazloʼ. Éí tʼáá ádzaagóó Jiihóvah yaa halneʼgo bízhiʼ yiyííłchǫʼ.—Genesis 3:1-5.

4. Jesus éí haitʼéego God bízhiʼ dílzingo áyiilaa?

⁴ Jesus éí Jiihóvah bízhiʼ ayóóʼáyóʼníigo tʼáá awołí bee dílzingo áyósin ńtʼééʼ. (John 17:25, 26) Éí haitʼéego? Ájooníiłgi dóó honaʼnitingi jidísin ńtʼééʼ. Jesus éí Jiihóvah bibee hazʼáanii tʼáá ákogi ádaatʼé áádóó yichʼįʼ nihíłʼáhígíí nihá yáʼátʼéehgo átʼéiigi yee naʼneeztą́ą́ʼ. (Psalm 40:8-10 yíníłtaʼ.) Azhą́ Séítan ayóó átʼéego hachʼįʼ nahwiisʼnáaʼgo dajiztsą́ą ndi, Jesus éí tʼáadoo God yitsʼą́ąjįʼ dadiiyáa da. Áko bílaʼashdlaʼii bitsʼíís hadíłtʼéii éí Jiihóvah yikʼeh hółʼı̨́į dooleełgi ííshjánígo áyiilaa.

5. Haitʼéego Jiihóvah bízhiʼ díníilzin doo?

⁵ Haitʼéego Jiihóvah bízhiʼ ayóóʼííníiʼníigo ííníilzin doo? Éí haʼátʼíí shı̨́ı̨́ íitʼįįłígíí binahjįʼ. Jiihóvah éí diyingo dahiniiʼnáa doo nihóʼní. (1 Peter 1:15, 16 yíníłtaʼ.) Díí áhyiłníigo éí tʼáá bí tʼéiyá bichʼįʼ hodíníilzingo ayóóʼííníiʼníigo bikʼeh honiilʼı̨́į doo. Azhą́ atínihiʼdilʼı̨́į ndi, Jiihóvah yee nanihinitinígíí wołí bee niheʼiinaʼ bikʼehgo yiiltʼih doo. Jiihóvah bibee hazʼáanii bikʼehgóó yiidáałgo bízhiʼ baa dahwiiʼniih. (Matthew 5:14-16) Jiihóvah bibee hazʼáanii tsʼídá yáʼátʼééh áádóó Séítan biyoochʼíidgo íilʼı̨́į doo. Ákondi nidaʼiyiilzíih doo. Áko asiilziihgo hashtʼediilnííł áádóó Jiihóvah bízhiʼ diilchxǫǫłgi baa siitiʼ doo.—Psalm 79:9.

6. Nidaʼiyiilzíih ndi, haʼátʼíí biniyé Jiihóvah éí tʼáá ákogi ániitʼéego nihá hadoozih?

⁶ Azhą́ anoint ánihiʼdiilyaa doodaiiʼ dibé náánáłaʼígíí aniitah ndi, nihikʼé nináʼílyáagi yiniidlą́ągo éí niʼiyiilzíihgi Jiihóvah nihá yóóʼánéidiiyiiʼaah. Áko baa ádaʼdeestʼánígíí éí dabidísingo yaa nitsíkees. Jiihóvah anoint ádayiilaaígíí baʼáłchíní índa dibé náánáłaʼígíí dabikʼisgo tʼáá ákogi ádaatʼéego yá haadzííʼ. (John 10:16; Romans 5:1, 2; James 2:21-25) Nihikʼé nináʼílyáagi Nihizhéʼé nizhónígo bił kʼé hwiindzin índa bízhiʼ dadíníilzingo yee nihá bohónéedzą́ągo áyósin.

7. Nihikʼé nináʼílyáagi éí haʼátʼíí bee nihikʼihwiizhdoodliił?

⁷ Jesus sodoolzingo ání: “Bee nóhólníihii . . . kʼeeʼąą yilzhish.” Nihikʼé nináʼílyáagi éí haitʼéego God biNahatʼaʼ bił ahídéétʼiʼ? God biNahatʼaʼ éí Jesus dóó 144,000 ánéelą́ągo bílaʼashdlaʼii náhaasdláʼígíí bee hadítʼé. Éí díí 144,000ígíí yáʼąąshgóó náábiʼdidooljahgo nihikʼé nináʼílyáhígíí bee bohónéedzą́ągo áyiilaa. (Revelation 5:9, 10; 14:1) Díí éí naatʼáanii dóó náádaʼiiłniihii danilı̨́įgo Jesus yił tʼááłáʼí damííl nááhaijįʼ nahasdzáán yikʼi dahwéeʼaah doo. Ákwii nahalzhiishgo Jiihóvah éí biNahatʼaʼ yee nahasdzáán ayóó ánoolingo niidooʼááł  áádóó bílaʼashdlaʼii tʼáá átʼé bitsʼíís hadadíłtʼéego íidoolííł. Ákohgo índída yáʼąąshdi dóó nahasdzáán bikááʼ Jiihóvah bá nidaalʼaʼii tʼááłaʼí dah oonéeł doo. (Revelation 5:13; 20:6) Jesus éí Séítan dóó tʼáá ałtsoní niyiishchxǫʼígíí nahjįʼ kwíidoolííł.—Genesis 3:15.

8. (a) Jesus éí bídahoołʼaahii haitʼéego God biNahatʼaʼ ayóó ílı̨́įgo átʼéiigi yee neineeztą́ą́ʼ? (b) God biNahatʼaʼ haitʼéego bee akééʼ siidzı̨́?

⁸ Jesus éí bídahoołʼaahii God biNahatʼaʼ ílı̨́įgo átʼéiigi yee neineeztą́ą́ʼ. Éí haitʼéego? Taah hoʼdooltı̨́ı̨́dóó Jesus éí God biNahatʼaʼ nizhónígo baa haneʼgi bee nízhdíʼníitą́ą́ʼ. (Luke 4:43) Hódahoołʼaahii éí nahasdzáán nidaneesʼą́ą́góó shaa nidahołneʼ doo, yidííniid. (Acts 1:6-8) Dííshjı̨́įdi, God biNahatʼaʼ baa nahaneʼgi binahjįʼ díí nihá ashjaʼósin: Éí nihikʼé nináʼílyáagi bíhwiidooʼááł áádóó God biNahatʼaʼ biyaadóó kééhoniitʼı̨́į doo. God biNahatʼaʼ bikééʼ siidzı̨́įgo éí anoint ádaalyaaígíí nizhónígo haneʼgi bee bíká anéiijah doo.—Matthew 24:14; 25:40.

9. Jiihóvah éí bílaʼashdlaʼii yiniyé áyiilaagi haʼátʼíí biniyé yiniidlą́ą doo?

⁹ Jesus haʼátʼíí níigo ání: “Bee íinínízinii . . . ááníił” doo? Jiihóvah kóhodoonííł níigo tʼáá aaníí áhodoonííł. (Isaiah 55:11) Azhą́ Séítan éí Jiihóvah bikʼijįʼ hadziidziih ndi, Jiihóvah ánínígíí doo bitsʼą́ą́ʼ niʼ ázhdoolíił da. Jiihóvah haʼátʼíí biniyé nahasdzáán áyiilaa? Éí Ádam dóó Íiv baʼáłchíní bitsʼíís hadadíłtʼéego nahasdzáán yikááʼ kééhatʼı̨́į doo biniyé áyiilaa. (Genesis 1:28) Ádam dóó Íiv éí tʼáadoo haʼáłchíní haleehí dajiztsą́ągo éí God nahasdzáán yiniyé áyiilaa yę́ęgi tʼáadoo nídoodleełí da. Áko Jiihóvah éí bíniʼdii haʼáłchíní hodooleeł nízingo há yee hoołʼaʼ. Bibee daʼoodląʼ dabidziilígíí éí nihikʼé nináʼílyáagi binahjįʼ, nihitsʼíís hadíłtʼéego hoolʼáágóó iiná nihá bohónéedzą́ą doo. Jiihóvah ayóóʼánihóʼní, iiná baa hózhǫ́ nihá yinízin yę́ę nihaa deeshłééł nízin.

10. Daneeznánę́ę, éí nihikʼé nináʼílyáagi haitʼéego bee bíká adoolwoł?

¹⁰ Jiihóvah tʼáadoo yéédahoosįįdgóó tʼóó ahayóí diné daneeznánę́ę shąʼ? Jiihóvah éí diné dahiináa doo nízin. Daneeznánę́ę iiná yaa néiidiiyoodlééł, éí nihikʼé nináʼílyáagi bee bohónéedzą́ągo ályaa. Áádóó náábiʼdiiljéʼígíí Jiihóvah yéédahodoosįįłgo hoolʼáágóó dahiináa doo. (Acts 24:15) Jiihóvah éí iiná eidiyiiʼaahii nílı̨́, éí daneeznánę́ę iiná yaa néídláhígíí Bizhéʼé jidooleeł. (Acts 17:24, 25) Jesus kóníigo sodoolzin, “[Nihizhéʼé] yáʼąąshdi honílóonii,” yiłnínígíí éí Jiihóvah átʼı̨́. (Matthew 6:9) Jiihóvah éí naanish ayóó átʼéii Jesus yąąh niinílá, éí daneeznánę́ę nínéiididoołjah. Jesus ání: “Shí nááʼdiʼyiijeeh índa iiná nishłı̨́.”—John 6:40, 44; 11:25.

11. Tʼóó ahayóí áłah nilíinii éí haʼátʼíí God bá yinízin?

¹¹ Jesus ałdóʼ ání: “Tʼáá háiida Diyin God íinízinii bidaʼjiłʼínígíí éí shitsilí índa shideezhí índa shimá jílı̨́.” (Mark 3:35) God íinízingo éí diné daʼníłtsʼą́ą́dę́ę́ʼ dabidísin doo. Éí “doo yóołtaʼ ánéelą́ą́ʼgóó tʼóó ahayóí áłah nilı̨́įgo” bee bééhoʼdílzin, éí nihikʼé nináʼílyáagi dayoodlą́ áádóó God bikʼeh dahoniilʼı̨́į doo danízin. God yaa dahaniihgo ádaaní: “NihiDiyin God éí bikááʼdóó nahatʼáii yikááʼdóó dah sidáii índa Dibé  Yázhí nilíinii, éí bee yisdáʼiildéehii bee bóhólnííh.”—Revelation 7:9, 10.

12. Jesus sodoolzin yę́ę bitsʼą́ą́dóó, Jiihóvah éí bílaʼashdlaʼii yiniyé áyiilaagi haʼátʼíí bídahwiilʼą́ą́ʼ?

¹² Jesus yee sodoolzinígíí bitsʼą́ą́dóó éí Jiihóvah índa bílaʼashdlaʼii yiniyé áyiilaagi baa ídahwiilʼą́ą́ʼ. Áłtsé éí, Jiihóvah bízhiʼ dadíníilzin índa baa dahwiiʼniih doo. (Isaiah 8:13) Jesus éí nihá yisdáhóótʼiʼgo áyiilaagi nááʼádiisniiʼígíí ałdóʼ God bízhiʼ yee baa haʼniih. Jesus bízhiʼ éí “Jiihóvah Yisdáʼiiníiłii Nilı̨́” jiníigo óolyé. Naaki góneʼ éí, Jiihóvah biNahatʼaʼ binahjįʼ nihikʼé nináʼílyáhígíí bílaʼashdlaʼii akʼeh dahółʼínígíí tʼáá ałtsojįʼ bikʼi hozhdoodlíiłgo íidoolííł. Tááʼ góneʼ éí, Jiihóvah ádeeshłííł nízinígíí doo łaʼda niʼ kwíidoolíiłgi deiniidlą́.—Psalm 135:6; Isaiah 46:9, 10.

13. Haʼátʼíí biniyé baptize ánihiʼdidoolnííł?

¹³ Nihikʼé nináʼílyáagi baa ahééh niidzingo Jiihóvah baa ádidíítʼáałgo baptize ánihiʼdidoolnííł. Ákwíidzaago éí nihikʼé nináʼílyáagi yiniidlą́ áádóó Jiihóvah “bííʼ daniidlı̨́” daniidzin doo. (Romans 14:8) Baptize ánihiʼdiilyaago éí Jiihóvah díí bííníikeed doo, “ádaa ákonisdzingo áshílééh.” (1 Peter 3:21) Áko nihikʼé nináʼílyáagi binahjįʼ Jiihóvah bííníikeedígíí nihee dooleeł. Áádóó tʼáá ałtsoní nihaa deeshłééł nihiłnínę́ę tʼáá aaníí nihee dooleełgo deiniidlą́.—Romans 8:32.

14. Jiihóvah éí haʼátʼíí biniyé diné ayóóʼádeíyínóhʼní nihiłní?

¹⁴ Tʼáá ałtsoní Jiihóvah ááníiłgi ayóóʼóʼóʼní yee átʼı̨́. Áko dabidísinígíí ałdóʼ ákódajítʼéii doo nízin dóó ayóóʼádaʼahijóʼníi doo. (1 John 4:8-11) Diné ayóóʼádeiyíníiʼníigo éí “[Nihizhéʼé] yáʼąąshdi hólóonii baʼáłchíní” daniidlı̨́į doo daniidzingo ííshjání ádeilʼı̨́į doo. (Matthew 5:43-48) Áłtsé aláahdi bee hazʼáanii éí, Jiihóvah ayóóʼájóʼníi doo, naaki góneʼ éí, náánáłahjįʼ diné ayóóʼájóʼníi doo. (Matthew 22:37-40) Diné ayóóʼííníiʼníigo éí God biNahatʼaʼ bee naniitin doo. Jiihóvah ánínígi átʼéego diné ayóóʼííníiʼníigo, ndi nihibrothers dóó nihisisters éí aláahdi ayóóʼííníiʼníigo éí Jiihóvah ayóóʼííníiʼníigo “nihiyiʼ hadaałtʼéego hashtʼeelyaa” doo.—1 John 4:12, 20.

15. (a) Haʼátʼíí Jiihóvah kʼad yee nihikʼihadlí? (b) Haʼátʼíí bee nihikʼihozhdoodliił?

¹⁵ Nihikʼé nináʼílyáagi yiniidlą́ągo éí nihibąąhági ádaatʼéii Jiihóvah nihá “kʼéédaʼdoolchǫǫł,” nihiłní. Éí ałtso yóóʼiididooʼááł. (Acts 3:19-21 yíníłtaʼ.) Nihikʼé nináʼílyáagi, bílaʼashdlaʼii łaʼ yáʼąąshdi Jiihóvah baʼáłchíní danilı̨́įgo íidoolíiłgo bee bohónéedzą́ągo ályaago baa bídahwiilʼą́ą́ʼ. Éí anoint ádaalyaaígíí ádaatʼı̨́. (Romans 8:15-17) Dibé náánáłaʼígíí éí nahasdzáán bikááʼ tʼáá łaʼ haʼoojééʼ nahalingo Jiihóvah bił hazʼą́ąjįʼ yah oohkááh, dabidiʼní. Dibé náánáłaʼígíí bitsʼíís hadadíłtʼéii ádaalyaago áádóó akéedi naʼíhonitaah baa hodoolzhish. Áádóó Jiihóvah tʼáá bikééʼ nijizı̨́įgo éí baʼáłchíní dajílı̨́įgo áhodoolííł. (Romans 8:20, 21; Revelation 20:7-9) Jiihóvah éí baʼáłchíní ayóóʼáyóʼníigo ahoolʼáa doo. Nihikʼé nináʼílyáagi éí hoolʼáágóó bee akʼihadlíinii hólǫ́ǫ doo. (Hebrews 9:12) Jiihóvah ayóó átʼéego nihikʼé nináʼídlá, doo éí łaʼda nihighaidoodléeł da.

16. Nihikʼé nináʼílyáagi éí haʼátʼíí bitsʼąą nihéédidoochił?

¹⁶ Nihibąąhági ádaatʼéii bitsʼąą tsíńdahideekéezgo, tʼáá łaʼ haʼoojééʼ nahalingo Jiihóvah bił hazʼą́ąjįʼ ádiidáałgo átʼé, Devil bidiʼníinii doo niʼ ánihidoolíił da. Jesus éí tʼááłáhídi nááʼádiisniiʼgo daaztsą́, áko ałtso nihikʼé naʼílyá. (Hebrews 9:24-26) Ádam anoonééł nihaazhnílá, ndi Jesus nááʼádiisniiʼgi iiná doo ninítʼiʼii nihainílá. Nihikʼé nináʼílyáagi éí Séítan binahatʼaʼ índa dadíítsaał binéiildzidgi bitsʼąą nihéédoochid.—Hebrews 2:14, 15.

17. Jiihóvah bibee ayóóʼóʼóʼní haitʼéego baa nitsíníkees?

¹⁷ God yee hahaasdzíiʼii bidahodoolnííł. Tʼáá ałtsoní ádaalyaaígíí yá yee hasʼánígi átʼéego, Jiihóvah ałdóʼ doo łah ánáʼnéeh da. Jiihóvah éí doo nihidínóoʼah da. (Malachi 3:6) Jiihóvah éí doo iiná tʼéiyá nihainíláa da. Bibee ayóóʼóʼóʼniʼ nihainílá. “Diyin God ayóóʼánihóʼníigo nihił béédahózin áádóó deisiidląąd. Diyin God ayóóʼóʼóʼní átʼé.” (1 John 4:16) Yee hahaasdzíiʼii áłahjįʼ bohoolnííł. Nahasdzáán ayóó ánoolingo ádoolníiłgo bichʼįʼ hoolzhish. Tʼáá ałtso diné, Jiihóvah yee átʼéii yedaalʼı̨́į doo, índa ahidiníłnáago ayóóʼádaʼahóʼníi doo. Áko yáʼąąshdi dóó nahasdzáán bikááʼ bá nidaalʼaʼii kódaaníi doo: “Aa haʼniih, ayóó éʼétʼé, hódzą́, ahééh hasin, ił ídlı̨́, óhólnííh índa adziil, éí hoolʼáágóó ahóyéelʼáágóó nihiDiyin God bííʼ dooleeł!”—Revelation 7:12.