Tʼáá Aaníigo Átʼéegi Náasdi Áhodooníłígíí Baa Haneʼ
Łahdaásh kótʼéego nitsíníkees łeh, ‘Náasdi haash hodoonííł?’ Diyin Bizaad éí náasdi áhodooníłígíí ílı̨́įgo yaa halneʼ. Bílaʼashdlaʼii nahasdzáán bikááʼ kéédahatʼíinii tʼáá ałtso bídéétʼiʼ.
“Diyin God bee bóhólníihgo bił hazʼáanii tʼáá áyídídę́ę́ʼ bił nihoolzhiizhgo nihił béédahodoozįįł,” Jesus éí kótʼéego yaa hoolneʼ. (Luke 21:31) Díí átʼéego yee naʼneeztą́ą́ʼ éí ałʼąą dineʼé ałchʼįʼ nídahidiibáah doo, łahgóó ayóó átʼéego niʼ nídahidiʼnáah doo, nídahodichįįh áádóó nidahałniih doo—dííshjı̨́įdi tʼáá ákódahoonííł.—Luke 21:10-17.
Náá ałdóʼ Diyin Bizaad biiʼdóó baa haneʼ, “nihoogháahjįʼ yoołkáałgo” diné doo yáʼáshǫ́ǫgo deiyíkáah doo. 2 Timothy 3:1-5 yídííłta. Tʼáá bééhózinígo, Diyin Bizaad yaa haneʼígíí éí dííshjı̨́įdi díí átʼéego baa ooldah.
Haʼátʼíísh áhyiłní? God biNahatʼaʼ kodę́ę́ʼ bichʼįʼ hoolzhish, éí kéyah bikáaʼgo tʼáá áníłtéél ńtʼééʼ łahgo átʼéego ánáhodoodlííł. Áko índa nizhónígo kééhwiitʼı̨́į doo. (Luke 21:36) Diyin Bizaad biyiʼdóó, God yee ádee haadzííʼ yę́ę éí kéyah dóó diné kéédahatʼínígíí bá yáʼádaatʼééh dooleeł. Kweʼé éí łaʼ baa chʼídahwiistʼą́.
YÁʼÁTʼÉEHGO HOOTʼÁÁŁ
“Áádóó [Jesus] bee óhólníihii áádóó ayóó átʼéii índa bee óhólnííh bił hazʼáanii baa deetʼą́, áko diné danilíinii, ałʼąą dineʼé danilíinii índa bizaad ałʼąą átʼéego yee yádaałtiʼii tsʼídá tʼáá ałtso há nidaalʼaʼ dooleeł. Hoolʼáágóó bee óhólníihii hólǫ́ǫgo éí tsʼídá doo bił yóóʼahodoogáał da índa bee óhólníihgo bił hazʼáanii tsʼídá doo ádooldįįł da.”—DANIEL 7:14.
Díí áhyiłní: God biNahatʼaʼ biyáádóó, biYeʼ Naatʼáanii hooʼáałgo iiná bee níʼdiildįįł.
NIHITAH YÁʼÁDAHOOTʼÉEH DOO
“Kééhatʼínígíí doo łaʼ daastsaah didooniił da.”—ISAIAH 33:24.
Díí áhyiłní: Doo nitsʼíís bąąh dahazʼą́ą da doo. Hoolʼáágóó iiná ná bohónéedzą́ągo átʼé.
TʼÁÁ AŁTSOGO HODÉEZYÉEL DOO
“Nahasdzáán nidaneesʼą́ąjįʼ anaaʼ dahólóonii ánéísįįd.”—PSALM 46:9.
Díí áhyiłní: Ałchʼįʼ naʼabaahii dóó bitsʼą́ą́dóó tiʼhooʼnííh ádin doo.
KÉYAH BIKÁAʼGI DINÉ TʼÁÁ ÁKOGI ÁDAATʼÉII HÓLǪ́Ǫ DOO
“Diné doo yáʼáshóonii ádin doo . . . Aʼohgo ádaatʼéii nahasdzáán daabííʼ dooleeł.”—PSALM 37:10, 11.
Díí áhyiłní: Diné doo yáʼádaatʼéhígíí ádaadin doo. Ákondi, Diyin God bikʼeh dahółʼíinii éí dahináa doo.
KÉYAH TʼÁÁ SIʼĄ́Ą́ ŃTʼÉÉʼ AYÓÓ ÁHONÓOLIN DOO
“Áádóó kin ádeidoolíiłgo yiiʼ kéédahatʼı̨́į doo índa chʼil naʼatłʼoʼii kʼideididooléełgo bineestʼąʼ deiyą́ą doo.”—ISAIAH 65:21, 22.
Díí áhyiłní: Kéyah tʼáá áníłtéél ńtʼééʼ nizhónígo náhásdlı̨́įʼ doo. God íinízinígíí yeʼdoolííł, “nahasdzáán bikáaʼgi” ááníiłii bíká sodadiilzin.—Matthew 6:10.
