Jesus kóhootʼée doo nínę́ęgi átʼéego nahasdzáán nidahoneesʼą́ą́góó God biNahatʼaʼ nizhónígo baa náhaneʼgo hazʼą́. (Matthew 24:14) Naaltsoos Daniel áníigo díí Nahatʼaʼ God bitsʼą́ą́dóó hootʼáałii átʼé. Daniel wóltaʼ 2 ání bílaʼashdlaʼii ayóó átʼéego dziilii yee dahwéeʼaah dooleeł ní. Tʼáá ałkʼidą́ą́ʼ Bábilan yę́ę bee hahoolzhiizh dííshjı̨́įjįʼ. Áádóó verse 44 ání:

Yáʼąąshiidę́ę́ʼ God éí bee óhólníihgo bił hazʼáanii niidooʼáałgo tsʼídá doo wóchxǫǫh átʼée da doo. “Tsʼídá doo łaʼda bee hóhólníih da doo; díí bee óhólníihgo bił dah nidahazʼáanii ałtso bił nihoníyáa doo, nidi éí [God] bee óhólníihgo bił hazʼáanii hoolʼáágóó hólǫ́ǫ doo.”

Diyin Bizaad áníigo God biNahatʼaʼ éí bílaʼashdlaʼii binahatʼaʼ bitséskʼeh nidootʼáałgo nahasdzáán bikáaʼgi bohoníłdzilgo hashtʼehodítʼéego hazʼą́ą doo. Áko haitʼéego hazʼą́ą doo? Kodóó łaʼ bee ádee haʼoodzíiʼii tʼáá aaníí ádooníłígíí:

• ANAAʼ ÁDIN DOO

  Psalm 46:9: “[God éí] nahasdzáán nidaneesʼą́ąjįʼ anaaʼ dahólóonii ánéísįįd. Ałtı̨́ı̨́ʼ yiyiitííh; tsiidétáán yiyiiłneʼ. Tsinaabąąs bijáád naakiígíí iidiyiiłkʼą́ą́h.”

  Tsʼídá tʼáá átʼé béeso anaaʼ biniyé chooʼínígíí éí łahjįʼgo diné bee bíká aʼdoowołgo ályaago haadash hootʼée doo! Díí éí God biNahatʼaʼ tʼéiyá biyaadóó kótʼéego bohodoolnííł.

• NAAŁNIIH ÁDIN DOO

  Isaiah 33:24: “Ákwii kééhatʼínígíí doo łaʼ daastsaah didooniił da.”

  Doo łaʼda bijéí bąą dahazʼą́ą da, cancer, diabetes, doodaiiʼ haʼátʼíí shı̨́ı̨́ naałniih ádaatʼéii ádaadingo kééhwiitʼı̨́įgo baa nitsíníkees. Azeeʼálʼı̨́ índa azeeʼ ádaadin doo. Nahasdzáán yikááʼ kéédahatʼı̨́į dooleełígíí bitsʼíís hadadíłtʼée doo.

• CHʼIYÁÁN TʼÓÓ AHAYÓÍ DOO

  Psalm 72:16: “Dziłghą́ąʼdi álástsiiʼ tʼóó ahayóigo kʼidoolyáhígíí hanootʼą́ągo” dahólǫ́ǫ doo.

  Nahasdzáán éí chʼiyáán hááhinootʼı̨́įłgo ííłʼı̨́į doo. Diné tʼáá ałtso chʼiyáán bá dahólǫ́ǫgo doo nantłʼagóó nishóhootʼeeh doo. Doo łaʼda dichin nízin da doo. Chʼiyáán yáʼádaatʼéehii yidą́ą doo.

• ADINIIH, CHA, ANINÉ ÁDIN DOO

  Revelation 21:4: “[God éí diné] dabinákʼeeshtoʼ tʼáá ałtso yá yidootʼoł, aniné ádin doo, áádóó atínáhodinidleeh ádin doo, áádóó cha ádin doo índa adiniih ádin doo, háálá áłtséédą́ą́ʼ dahólóonii bił yóóʼahóóyá.”

   Nahasdzáán ayóó ánóolingo atsʼíís hadíłtʼéego iiná doo ninítʼiʼ da doodleeł! Ánihiilaii ayóóʼánihóʼníinii Jiihóvah díí nihichʼįʼ yee ádee haadzííʼ.

Díísh éí tʼáá átʼé áhodoonííł nínízin? Diyin Bizaad éí kóhootʼéego dooleeł níigi ląʼí tʼáá aaníí laanaa deinízin. Ndi kótʼéego hoolʼáágóó iiná dooleełgi éí tʼáá aaníí ákódooníił hwiindzingo baa nitsáhákeesgo tʼáá nantłʼa. Díí éí tʼáá aaníí ákótʼé, háálá diné łaʼda kótʼéego hináanii yee nihił hodoolnihgi tʼáá ádin.

Bílaʼashdlaʼii éí niʼiidzííh dóó anoonééł áádóó adinííh, achʼįʼ nahwiiʼná, atíʼoolnííł ádaatʼéii yinaalteʼ nilı̨́įgo hoolzhish. Áko díí átʼéego yeeʼ iiná nihá niilyá danízin. Ndi Ánihiilaii Diyin Jiihóvah éí bílaʼashdlaʼii kótʼéego hináa dooleełgo, doo yiniyé áyiilaa da.

God ádee hadoodzíiʼgi tʼáá aaníí áhodoonííł niidzin doo biniyégo éí kóní: “Shizaad shizééʼdóó hahwiileehígíí éí . . . doo tʼáadoo biniyéhígóó shichʼįʼ tʼą́ą́ʼ kónídooʼníił da, nidi tʼáá shił hóshónígíí łaʼyidoolííł áádóó tʼáá biniyé bee haasdzíʼíjigo éí yáʼátʼéehgo ádoonííł.”​—Isaiah 55:11.

Diyin Bizaad éí Jiihóvah Diyin nilíinii “tsʼídá doo biyoochʼíidii” nilı̨́, biłní. (Titus 1:2) Jiihóvah éí díí tʼáá átʼé baa hózhóonii bee nihá ił chohooʼı̨́įgo nihá áyiilaago díí baa nitsíikees doo: Tʼáásh aaníí bohónéedzą́ągo bílaʼashdlaʼii éí nahasdzáán bikááʼ honóoshónígo hoolʼáágóó kéédahatʼı̨́į dooleełgo átʼé? Haʼátʼíí íidzaago éí God tʼáá aaníí kótʼéego áhodeeshłííł níigi bee nihikʼihozhdoodliił? Díí bikéédóó baa haneʼígíí díí naʼídíkid yee nił hodoolnih.