1, 2. (a) Yilʼaadii Paul bíyoołkááł yę́ędą́ą́ʼ haʼátʼíí biniyé naalteʼ dóó ééʼdichííd tʼéiyá baa yádaatiʼgo hazʼą́ą́ ńtʼééʼ? (b) Paul éí ééʼdichííd ił hóshóonii háí bitsʼą́ą́dóó ní?

AŁKʼIDĄ́Ą́ʼ Oodlání yę́ę éí Rome binahatʼaʼ biyaa kéédahatʼı̨́ı̨́ ńtʼééʼ. Ákwii kéédahatʼínígíí éí bee hazʼáanii, ánihwiitʼaah bił ndaaztʼiʼii, índa tʼáá binííkʼehgóó ndaakaigo ayóó yaa bił dahózhǫ́. Ákótʼée ndi naalteʼ danílínígíí yadaʼólíigo éí tʼéiyá alááh átʼéego há nidaalnish. Łah ákweʼé naalteʼ ląʼí hólǫ́ǫ́ ńtʼééʼ. Ákwii kéédahatʼínígíí, índa Oodlání ałdóʼ, éí naalteʼ dóó tʼáá nííkʼeh naʼadá tʼéiyá baa yádaatiʼgo hazʼą́.

² Yilʼaadii Paul éí ééʼdichííd tʼáá ahą́ą́h yeinítʼı̨́įgo akʼeʼashchı̨́. Éí íídą́ą́ʼ kéédahatʼínę́ę bee bichʼįʼ anídahwiiztʼiʼígíí hashtʼedoolnííł hwiindzin, ndi Paul éí doo łahdóó yee atah da. Paul dóó Oodlání yił nidaalnishígíí éí God biNahatʼaʼ dóó Christ Jesus nááʼádiisʼniiʼgi ayóó ílíinii átʼéii bikʼiʼdidootı̨́įłgi yee nidaʼneeztą́ą́ʼ. Paul éí ééʼdichííd bitsʼą́ą́dóó ił hóshǫ́ aʼósinii bikʼíʼdoodáałgi éí yił Oodlání  danilíinii yił hoolneʼ. Éí ání: “Jiihóvah Níłchʼi nilı̨́, Jiihóvah biníłchʼi diyinii hólǫ́ǫgi ééʼdichííd hólǫ́.”​—2 Corinthians 3:17, NW.

3, 4. (a) Paul éí 2 Corinthians 3:17 tʼáá bilą́ąjįʼ haʼátʼíí yee haadzííʼ? (b) Jiihóvah bitsʼą́ą́dóó ééʼdichíidii niidzingo haadiiʼnííł?

³ Paul naaki góneʼ Corinthians yichʼįʼ naaltsoos áyiilaa yę́ę kótʼéego yaa halneʼ. Éí Mózes, Jiihóvah bidiyingo naalʼaʼí łaʼ bił hojílǫ́ǫ́ ńtʼéeʼgo áádóó Dził Sáínaidę́ę́ʼ hadah náádzáago ájítʼéé ńtʼéeʼgi chʼíiníʼą́. Haniiʼ bitsʼádiʼnílííd! Áko Ízrel dineʼé kótʼéego Mózes dajiiłtsą́ągo béédadzisdzííd, áádóó Mózes haniiʼjįʼ bikʼiʼjístiʼ. (Exodus 34:29, 30, 33; 2 Corinthians 3:7, 13) Paul ání: Ndi Jiihóvah “yichʼįʼ dah nídiikaigo dabintsíkees bikʼéstiʼ yę́ę nahgóó iiltsos.” (2 Corinthians 3:16) Paul haʼátʼíí níigo ání?

⁴ Bídahwiilʼą́ąʼgo éí tʼáá ałtsoní Áyiilaii Jiihóvah tʼéiyá tʼáá bí íinízinígíí yikʼehgo áánííł. Áko Jiihóvah dóó “biníłchʼi diyinii hólǫ́ǫgi” ééʼdichííd hólǫ́. Ndi Paul ánínę́ęgi éí ééʼdichííd niidzingo éí Jiihóvah bichʼįʼ tsíńdííkos. Díí áníigo éí áhánígo Jiihóvah bił kʼé ahidiʼníi doo. Ízrel dineʼé éí honoojíidi naaníjooʼnééł yę́ędą́ą́ʼ bílaʼashdlaʼii nitsíkeesdę́ęʼgo nitsídajikees, Jiihóvah nitsíkeesdę́ęʼgo éí ndagaʼ. Éí bíntsídaakees dóó dabijéí bikʼidaʼástiʼ nidahalin. Tʼáá nihí daniidzingóó neiikai danízingo yee hwiih ádaʼdólzin ńtʼééʼ.​—Hebrews 3:8-10.

5. (a) Haitʼéhígíí ééʼdichíidii Jiihóvah biníłchʼi diyinii aa yiilé? (b) Łaʼda naalteʼ nilı̨́į ndi, doodaiiʼ awáalya sidáa ndi, ééʼdichííd ił hóshóonii bee hólǫ́ǫgo haitʼéego nihił bééhózin? (c) Haʼátʼíí baa nídadíitʼįįł?

⁵ Jiihóvah biníłchʼi diyinii éí ałʼąą ádaatʼéii binaalteʼ ídlı̨́įgi yitsʼąą nihéédiyiichííd. Díí éí bílaʼashdlaʼii nihá doo kódooníił da. Niʼiidzííh, anoonééł, dóó yoochʼííd bee nahaghá ádaatʼéii áádóó ádaʼoolʼįįłii Jiihóvah díí bitsʼąą nihéédiyiichííd. (Romans 6:23; 8:2) Dooládóʼ shı̨́ı̨́ díí bitsʼąą hwéédoochidgo baa hózhóonii átʼé! Azhą́ łaʼda naalteʼ nilı̨́į ndi, doodaiiʼ awáalya sidáa ndi, éí ééʼdichííd ił hóshóonii hwee hólǫ́ǫ doo. (Genesis 39:20-23) Nihisister Nancy Yuen dóó nihibrother Harold King éí hweʼoodląʼ biniinaa awáalya yah ahoʼdooʼnil, ákótʼée ndi ił hóshóonii tʼáá hwee hólǫ́. Díí éí JW Broadcasting biiʼdę́ę́ʼ yee ádaa halneʼgo dínííłʼįįł. * Kʼad éí díí naʼídíkid baa nídadíitʼįįł: Nihéédoochidgi nihił nilı̨́įgo haitʼéego ííshjání ádiilnííł? Áádóó haitʼéego baa honiidzą́ągo choiniilʼı̨́į doo?

6. Ízrel dineʼé éí ééʼdichíidii Jiihóvah beiníláago haitʼéego tʼáadoo yaa ahééh daniizı̨́įʼ da?

⁶ Tʼáadoo leʼé ílíinii nihailyéehgo éí aʼníláhígíí bichʼįʼ ahééh niidzin łeh. Ízrel  dineʼé éí hwéédadeeshchid yę́ęgi Jiihóvah yichʼįʼ tʼáadoo ahééh daniizı̨́įʼ da. Ííjipdę́ę́ʼ Jiihóvah chʼééhoníʼeezhdóó bikʼijįʼ tʼáadoo hodíínaʼí éí áadi chʼiyáán nídajidı̨́ı̨́h yę́ę bídin dajizlı̨́ı̨́ʼ. Mána Jiihóvah yee há naʼałtsoʼ yę́ę bikʼee chaał hahojííłʼá. Tʼóó Ííjipgóó nidiikah daaní! Ééʼdichíidii Jiihóvah hainíláhą́ą́ éí “łóóʼ, taʼneeskʼání díkʼǫ́zhígíí, chʼééh jiyání, chʼil daadánígíí, tłʼohchin índa chʼil díchʼíʼígíí” ádaatʼéii biláahdigo baa nitsídajikees. Áko biniinaa Jiihóvah hachʼįʼ báhóóchįįd. (Numbers 11:5, 6, 10; 14:3, 4) Díí bitsʼą́ą́dóó íhooʼaah.

7. Paul éí 2 Corinthians 6:1 yee naʼneeztą́ąʼgi, haitʼéego tʼáá bí yikʼehgóó átʼé, áádóó nihí ałdóʼ haitʼéego ákóniitʼée doo?

⁷ Paul éí Oodlání tʼáá ałtso ííłníigo Jesus Christ aYeʼ nilíinii binahjįʼ éí ééʼdichíidii Jiihóvah nihainíláhígíí baa ahééh danohsin. (2 Corinthians 6:1 yíníłtaʼ.) Paul éí niʼiisíihii nilı̨́įgo bąąhági átʼéii dóó anoonééł yinaalteʼ nilı̨́, áko biniinaa tʼáá íiyisíí bikʼeh yínííł jílı̨́. Ndi kójíní: “Jesus Christ nihiBóhólníihii yisdáshidoołtéełgo Diyin God bichʼįʼ baa ahééh nisin!” Haʼátʼíí biniyé kójíní? Paul éí Oodlání yił danilínígíí hazhóʼó yił náhoolneʼ: “Christ Jesus bee níłchʼi diyinii bitsʼą́ą́dóó iiná bibee hazʼáanii éí bąąhági átʼéii áádóó anoonééł bibee hazʼáanii bitsʼą́ąjįʼ shéidííchid.” (Romans 7:24, 25; 8:2) Paul átʼéego, Jiihóvah éí bąąhági átʼéii dóó anoonééł binaalteʼ ídlı̨́įgi bitsʼąą nihéidííchidgi doo béédiyiiʼnah da. Jesus bibeʼiinaʼ bee nihikʼé nináʼílyáagi éí nihíniʼ yáʼátʼéehgo bee God bá neilʼaʼ, áko ił hózhǫ́ nihaa yiilé.​—Psalm 40:8.

8, 9. (a) Nííkʼeh naʼadá chooʼı̨́į dooígi Peter haʼátʼíí ní? (b) Nííkʼeh naʼadá haitʼéego doo hazhóʼó chooʼı̨́į da dooleełgo átʼé?

⁸ Nííkʼeh naʼadá Jiihóvah nihainíláhígíí doo tʼóó baa ahééh niidzin da  doo, ndi hazhóʼó choiniilʼı̨́į doo. Yilʼaadii Peter éí nííkʼeh nihaiyílyáhígíí éí bąąhági ániitʼéegi tʼáadoo tʼóó éída bikʼijįʼ nisoołʼánígo bąąhági ádaatʼíní nihiłní. (1 Peter 2:16 yíníłtaʼ.) Díí éí Ízrel dineʼé honoojíidi ákódáátʼįįd ńtʼéeʼgi bee bééhániih. Nihí ałdóʼ díí kónihiʼdiʼníigi yéigo béédeilniih doo. Séítan áádóó biyáádóó bił hazʼáanii tʼóó ahayóígóó bidádahonooníinii nihichʼįʼ kwííłʼı̨́, éí ídaʼoolkąąh dóó íiyisíí bídin hwiindzinii nahidoonih biniyé ádaatʼı̨́. Ééʼ bee haʼdítʼéii, doodı̨́įłii, doodlı̨́įłii, dóó dínóolʼįįłii éí ayóó ádanóolinii chodayoołʼı̨́įgo yee ídaʼoołkąąh. Nííkʼeh naʼadá doo hazhóʼó choiniilʼı̨́ı̨́góó díí tʼáá átʼé yóóʼadanihidínóoʼahgo átʼé.

⁹ Peter yee haadzíʼígíí nihí ałdóʼ bikʼeh ániitʼée doo. Óltaʼ dóó naanish haitʼéego ádiilnííł? Dííshjı̨́įdi ániid ndaakaii éí yéigo daʼíínółtaʼ dabidiʼní. Áko wódahgo yéigo daʼííłtaʼii éí naanish ílíinii bikʼi díínáałgo nibéeso ląʼí doo, áádóó ił ídlı̨́ nee hólǫ́ǫ doo, dabidiʼníigo bił ííshjání ádaalʼı̨́. Ániid ndaakaii éí yéigo ajííłtaʼgo nizhóní danízin łeh. Ndi hazhéʼé dóó hamá bił haʼátʼíí béédajilniih doo?

10. Ádá nahatʼaʼ tʼáá shí bee shíhólnííh niidzingo haʼátʼíí bénéiilniih doo?

¹⁰ Łaʼ ádeinízingo éí ádá nahatʼaʼ tʼáá shí tʼéí bee shíhólnííh, áko éí bee shíniʼ hashtʼedítʼé. Paul yee haadzííʼ yę́ę yéédaalniih: “Tʼáá shił ákogo haʼátʼéegoshąʼ diné náánáłaʼ biʼdiiłʼáhígíí nashiníłtłʼago bee shaa hwiinítʼı̨́į doo?” (1 Corinthians 10:29) Tʼáá aaníí éí íídíiltahgi dóó nihinaanish ádiilníiłgi bee nihíhólnííh, bénéiilniih doogo éí doo tʼáá ałtsojįʼ nihíhólníih da, áádóó bee ádá nihodiyiitʼaahii tʼáá nihí bá ninéítłish. Éí bąą Paul ání: “Tʼáá ałtsoní bee shá hazʼą́ą nidi doo tʼáá ałtsoní shá yáʼátʼéeh da. Tʼáá ałtsoní bee shá hazʼą́ą nidi doo tʼáá ałtsoní anooséełgo bidziilgo éʼéléeh da.” (1 Corinthians 10:23) Áko azhą́ ádá nihodiyiitʼaahgi tʼáá nihí bee nihíhólníih ndi, nihí niidzinígíí éí doo ayóó ílı̨́į da.

11. Nihibąąhági átʼéii dóó anoonééł bitsʼą́ąjįʼ haʼátʼíí biniyé Jiihóvah nihéédííchid?

¹¹ Peter éí nííkʼeh naʼadá hazhóʼó chodeinołʼı̨́ nihidííniidgo éí “God yá naalteʼ danohłı̨́įgo” ádaʼdíínółzin doo nihiłní. Tʼáá siidzı̨́ı̨́ ńtʼééʼ bee Jiihóvah bá neilʼaʼ doo biniyé nihibąąhági átʼéii dóó anoonééł bitsʼą́ąjįʼ nihéédidoochiłgi Jesus choyoosʼįįd.

12. Nóah dóó bighan hazʼą́ą́dóó haitʼéego nihinááł nizhónígo ádaʼiilaa?

¹² Nííkʼeh naʼadá yáʼátʼéehgo chooʼı̨́įgo wołí bee Jiihóvah bá naʼaʼaʼgi niheʼadziilii dóó bá hosiilʼą́ągo ííníilzin doo. Áko tsʼísee kʼehgo baa ooldahii índa bidáhonooníinii doo ayóó ílíinii átʼée da niidzingo baa nitsíikees doo. (Galatians 5:16) Nóah áádóó bighan hazʼą́ą́dóó yił ádaatʼįįd yę́ę baa nitsíníkees. Binaagóó ayóó átʼéego tsiʼooldahgo hazʼą́ą́ ńtʼééʼ. Ndi diné yeíkahii tʼáadoo yee atah daazlı̨́įʼ da. Jiihóvah naanish bee diníʼánígíí wołí bee tʼóó yideílníishgo ádaʼdiilyaa. Tsinaaʼeeł  ádayiilaa, áádóó naaldeehii dóó tʼáá bí ádá chʼiyáán áłah ádayiilaa, índa tó dooląąłígíí diné yee yił nidahasneʼ. “Nóah díí biʼjiilaa; Diyin God áhodííniidígíí tʼáá ałtso biʼjiilaa.” (Genesis 6:22) Kódajiidzaago Nóah dóó bighan hazʼą́ą́dóó íídą́ą́ʼ hoogááł yę́ę bitsʼą́ąjįʼ yisdájookai.​—Hebrews 11:7.

13. Jiihóvah éí haʼátʼíí yichʼįʼ nihííłʼaad?

¹³ Jiihóvah éí haʼátʼíí yichʼįʼ nihííłʼaad? Jesus bá naalʼaʼii niidlı̨́įgi éí nahaneʼgi God díí yichʼįʼ nihííłʼaadii nihił bééhózin. (Luke 4:18, 19 yíníłtaʼ.) Dííshjı̨́įdi Séítan éí ląʼí diné bíniʼ yił chʼaa yishchı̨́, índa doo tʼáá aaníí hodílzin, naadeełii, índa nihináágóó ádahootʼéii baa ooldáhígíí binaalteʼ dajílı̨́įgo doo baa ákódazhnízingóó áhoolaa. (2 Corinthians 4:4) Jesus nahalingo nihí éí Diyin éédiyiichíidii Jiihóvah yéédahodoosįįłgo yichʼįʼ dahodísin doo biniyé diné bíká anéijah. Díí baa nihił dahózhǫ́. (Matthew 28:19, 20) Diné bił nahaneʼgi tʼáá nantłʼago átʼé. Łahgóó éí God doo bééhodeesįįł da danízin, áádóó łaʼ éí bił ahozhniilnih yę́ęgi bádahachįʼ łeh. Ndi Jiihóvah éí nahaneʼ yichʼįʼ nihííłʼaadgi kótʼéego baa nitsíikees doo, ‘Díí shá ashjaʼósindą́ą́ʼ Jiihóvah ląʼígoósh bá naashʼaʼ doo?

14, 15. Ląʼí Jiihóvah bidineʼé éí haʼátʼíí ádadiiʼníił daniizı̨́ı̨́ʼ? (Áłtsé adahaskidígíí níníłʼı̨́.)

¹⁴ Jiihóvah bidineʼé éí díí nihił hoogáłígíí nidootʼihgo bichʼįʼ hoolzhishgo yaa ákodahiniizįįh. Áko biniinaa bibee daʼiinaʼ tʼóó bikiinígo ádeileʼgo pioneer deeshłeeł daniizįįh. (1 Corinthians 9:19, 23) Łaʼ éí tʼáá kéédahatʼı̨́įgi pioneer ádaʼałʼı̨́, łaʼ éí pioneer bídin hóyééʼgóó ahikááh. Ashdlaʼ nááhaidóó wóshdę́ę́ʼ 250,000dóó baʼaan pioneer yaa ádaʼdiistʼą́, áko kʼad éí 1,100,000dóó baʼaan pioneer dahólǫ́. Dooládóʼ baa hózhǫ́ǫ da, tʼóó ahayóí tʼáá bí ádeinízingo Jiihóvah yá ndaalʼaʼ!​—Psalm 110:3.

¹⁵ Haʼátʼíí bíká análwoʼgo nííkʼeh naʼadá bee hódzą́ yee ádaa ádahályą́? John dóó Judith baa haneʼgo éí 30 nááhai daʼníłtsʼą́ą́ʼgóó kéyah biiʼ Jiihóvah yaa nahalneʼgo tah diiʼáázh. Kójíníigo éí 1977 Pioneer Service School tʼóó bił hahoolzhiizh yę́ędą́ą́ʼ éí dajííłtaʼígíí pioneer bídin hóyééʼgóó dahidookah hodooʼniid. Áko John dóó Judith hweʼiinaʼ tʼóó bikiinígo ázhdoolííł. Díí biniinaa John hanaanish ałʼąą áńjoodlííł. Tʼahádóó kéyah náánáłahgóó dashdiiʼáazhgo áadi nahojilneʼ ńtʼééʼ. Éí náánáłahdi kééhojitʼı̨́, índa saad łahgo átʼé, áádóó níłchʼi ałtah ánááʼníłígíí há nantłʼa, áko haʼátʼíí háká eelwod? Jiihóvah bichʼįʼ sozdilzin dóó baʼjólíigo háká eelwod. Kótʼéego Jiihóvah bá  nijilʼaʼgi hoolzhiizhgo haitʼéego baa nitsíjíkees? John ájíní: “Jiihóvah yéigo bá ajitʼı̨́įgo tʼáadoo beełtʼéhí da. Éí tʼáá aaníí azhéʼé nilínígíí átʼéego shizhéʼé sílı̨́ı̨́ʼ. Kʼad éí James 4:8 íiyisíí ánínígi baa ákonisin: ‘Áhánígo God bił hojílǫ́ǫ doo, áádóó God áhánígo hoł hólǫ́ǫ doo.’ Bíká hanishtáhnę́ę bikʼíníyá nisin, éí biniyé iináagi baa hózhǫ́.”

16. Ląʼí haitʼéego yaa dahóyą́ągo nííkʼeh naʼadá hózhǫ́ chodayoosʼįįd?

¹⁶ Łaʼ éí John dóó Judith nahalingo nízáágóó pioneer ádaʼałʼı̨́. Ndi łaʼ éí tʼóó kóníshgháníjįʼ pioneer ádaʼałʼı̨́. Ákótʼée ndi ląʼí éí daʼníłtsʼą́ą́ʼgóó kin binaʼanishgi tʼáá jííkʼe yee ándaalwoʼ. Warwick, New York world headquartersdi nihibrothers dóó nihisisters 27,000 daatsʼí ánéelą́ąʼgo neheeskaigo atah yindaashnish. Łaʼ éí naaki damóojįʼ, łaʼ éí tʼáá díkwíí nídeezidjįʼ, áádóó łaʼ éí nááhaidóó baʼaan atah nidaashnish. Ląʼí nihibrothers dóó nihisisters tʼáadoo leʼé ninádeidiyiizʼą́ągo Warwickdi atah nidaashnish. Éí nizhónígo nihinááł ádaʼiilaa, Diyin éédiyiichíidii Jiihóvah yee yaa dahaznih!

17. Nihéédoochidgi hazhóʼó choiniilʼı̨́įgo haʼátʼíí bíká díníitʼı̨́įʼ doo?

¹⁷ Jiihóvah béédahosiilzįįdgi índa tʼáá nihí ádeiniidzingo bá nideilʼaʼgi baa nihił dahózhǫ́. Áko ééʼdichííd éí ílíinii átʼéego baa nitsíikeesgo éí bee ádá nahwiitʼáagi bee ííshjání íilʼı̨́. Nihéédoochidgi hazhóʼó choiniilʼı̨́įgo wołí bee Jiihóvah bá neilʼaʼ doo. Áko Jiihóvah yee ádee haadzííʼ yę́ę baa nihił dahózhǫ́ǫ doo: “Diyin God baʼáłchíní baa hózhǫ́ǫgo béédahideeshchidígi átʼéego ádaalyaii dadidoołdziłígíí adiłdzid bitsʼą́ą́dóó béédahididoochił.”​—Romans 8:21.