1. God bá ndaalʼaʼí haʼátʼíí ádeidoolííł, dóó haʼátʼíí biniinaa? (Naaltsoos bikááʼdę́ʼígíí níníłʼı̨́.)

JESUS ánihiłní: “Ałʼąą dineʼé tʼáá ałtso ídahoołʼaahii danilı̨́įgo ádaahłeʼ.” (Matt. 28:19) Tʼáá ałtso God bá ndaalʼaʼí haitʼéego nidahalneʼ ałtso yedaʼdoolíiłgo ídahoołʼááh. (2 Tim. 4:5) Díí naalnish éí tsʼídá aláahdi ílínígíí átʼé. Azhą́ doo nihá bíighah da ndi nidahwiilneʼ daniidzin.

2. Nidahwiilneʼ ałtso bidaʼdiilníiłgo haʼátʼíísh nihiníłtłʼah?

² Ílíinii baa nidaʼaldeehígíí éí ayóó naanishgo átʼé. Łaʼ éí ląʼí ahééʼiilkeedgo nidaalnish áko dabighan hazʼą́ą́dóó deinízinígíí bee dahólǫ́ǫ doo. Áádóó łaʼ éí dabighan hazʼą́ą́dóó bąąh siláhígíí, bitah dahoniigáhígíí, yínííł danilínígíí, doodaiiʼ náás daazlı̨́ʼígíí dabiníłtłʼah. Azhą́ doo yáʼátʼééhgóó nihił hooʼaʼgo haitʼéego nidahwiilneʼ ałtso bidaʼdiilnííł?

3. Nidahalneʼígíí haʼátʼíísh nidabiníłtłʼah?

³ Nihiníłtłʼaaígíí éí Jiihóvah bá nideilʼaʼgi aʼoh ádeiyíníilzin ndi tʼáadoo nihąąh ninádahakaʼí. Tʼáá áníiltso aneestʼąʼ doo tʼáá aheełtʼéego nihee dahólǫ́ǫ da, éí Jesus bił bééhózin. (Matthew 13:23 yíníłtaʼ.) Jiihóvah éí tʼáá ałtso bá ádeilʼínígíí éí ayóó bił nilı̨́. (Heb. 6:​10-12) Ákondi, łaʼ éí bił dahooʼaʼígíí ląʼígóó tʼáá dabíighahgo nidahalneʼ. Haitʼéego nidahwiilneʼígíí alą́ąjįʼ ádeiyíníilzin,  dóó niheʼiinaʼ deiníłtłʼaaígíí bitsʼą́ąjįʼ kóniitʼée doo, índa hazhóʼó nidahwiilneʼgo dóó nidaʼniitingo bídahwiidiilʼááł. Áłtsé, nidahwiilneʼ ałtso bidaʼdiilníiłgo haʼátʼíísh áhyiłní?

4. Nidahwiilneʼ ałtso bidaʼdiilníiłgo haʼátʼíísh áhyiłní?

⁴ Nidahwiilneʼ ałtso bidaʼdiilníiłgo éí tʼáá nihá bíighahgo nidahwiilneʼ dóó nidaniitin áhyiłní. Ákondi, haa néelą́ą́ʼ nahosinílneʼ doo tʼáá éí tʼéiyá da. Haʼátʼíí biniyé nidahwiilneʼ éí Jiihóvah bił nilı̨́. Jiihóvah dóó diné ayóóʼádeíníiʼní binahjįʼ haleebee bee nidahwiilneʼ. * (Mark 12:​30, 31; Col. 3:23) Tʼáá nisiidzı̨́ı̨́ ńtʼééʼ bee Jiihóvah bá nideilʼaʼgo éí tʼáá átʼé nihidziil bee nideilnishgo áhyiłní. Nidahwiilneʼígíí baa ahééh daniidzingo, haneʼ yáʼátʼéehii tʼáá awołí bee diné bichʼįʼ yádeiltiʼ.

5-6. Haitʼéego diné łaʼ doo bá bíighahgóó nidahalneʼ ndi tʼahdii alą́ąjįʼ áyósin. Łaʼ baa chʼíhoníʼaah.

⁵ Díí baa nitsíníkees: Dinééh léiʼ yaa bił hózhǫ́ǫgo dootłʼizhii yee éʼéłʼı̨́. Dootłʼizhii yee ííłʼı̨́ tʼáá baa náhootʼaah góneʼ yee naalnish dóó łahda baa nahanih. Azhą́ dootłʼizhii yee ííłʼínígíí baa nahanih ndi, doo ląʼí béeso yee ííłʼı̨́į da. Áko tʼáá ákwíí jı̨́ chʼiyáán bá hooghandi cashier nilı̨́įgo nanilnish. Azhą́ tʼáá áłahájįʼ chʼiyáán bá hooghandi naalnish ndi, dootłʼizhii yee ííłʼínígíí ayóó bił nizhóní. Tʼáá ákwíí jı̨́ dootłʼizhii yee ííłʼínígíí yiyiichįįhgo yee naalnish doo nízin. Ákótʼée ndi yaa bił hózhǫ́ǫgo dootłʼizhii yee ííłʼínígíí tʼáá baa náhootʼaah góneʼ yinaalnish, azhą́ tʼóó kóníshgháníjįʼ ndi.

⁶ Éí nahalingo, azhą́ doo nihá bíighah da ndi nidahwiilneʼ daniidzin. Ákondi, nahalneʼgi ayóóʼííníʼní. Diné éí haneʼ yáʼátʼéehii bichʼįʼ nahólneʼgo bijéí yidiiłnáahgo bíká díníʼı̨́ı̨́ʼ. Azhą́ tʼóó ahayóí baa áhólyą́ą ndi, haitʼéego nahólneʼígíí  alą́ąjįʼ íínísingo binanilnish doo shı̨́ı̨́ baa nitsíníkees.

7-8. Nidahwiilneʼígíí baa nitsíikeesgo, Jesus haitʼéego bedaʼiilʼı̨́?

⁷ Jesus nahólneʼígíí yáʼátʼéehgo yaa nitsékees nizhónígo nihá íʼiilaa. Jesus éí God biNahatʼaʼ yaa halneʼígíí alą́ąjįʼ áyósin. (John 4:​34, 35) Haa shı̨́ı̨́ néelą́ą́ʼ sizitʼą́ą́góó tádííyáago naʼneeztą́ą́ʼ. Tʼáá baa náhootʼaah góneʼ diné yichʼįʼ yáłtiʼ dahasłą́ągi dóó dabighangóó, éí Jesus beʼiinaʼ alą́ąjįʼ nahalneʼgo áyósin.

⁸ Háadi shı̨́ı̨́ nidaakai ndi, diné tʼáá yíiltsé shı̨́ı̨́ haneʼ yáʼátʼéhígíí bee bił dahwiilneʼ éí Christ bedaʼiilʼı̨́. Tʼáá nihí niidzingo nahwiilneʼ baa ádeiniitʼą́. (Mark 6:​31-34; 1 Pet. 2:21) Bił áłah nídeidleehígíí łaʼ éí special, regular, doodaiiʼ auxiliary pioneers danilı̨́. Łaʼda saad ałʼąą ádaatʼéego yídahoołʼaah doodaiiʼ nidaʼniitinígíí bídį hóyééʼgóó áká anídaajahgo biniyé ákǫ́ǫ́ ádaa hanééh. Ákondi, nidahalneʼígíí publishers binaanish ndi, tʼáá yídaneelʼánígi átʼéego ádeiłʼı̨́. Nidahwiilneʼígíí łahda ląʼí íʼiilʼįįh doodaiiʼ tʼáá bíniilʼánígi átʼéego íʼiilʼįįh, éí Jiihóvah doo ląʼí shá ádadoołíił da nihiłní. Jiihóvah bił hózhóonii nilı̨́, áko nihí ałdóʼ nidahwiilneʼígíí “haneʼ yáʼátʼéehii ayóó átʼéii” átʼé, díí baa nihił dahózhǫ́ǫgo nihá yinízin.—1 Tim. 1:11; Deut. 30:11.

9. (a) Paul binaanish hólǫ́ǫ ndi, éísh haitʼéego nahojilneʼígíí alą́ąjįʼ ájósin? (b) Acts 28:​16, 30, dóó 31 éí Paul nahojilneʼígíí yaa nitsékees haitʼéego ííshjání ííłʼı̨́?

⁹ Yilʼaadii Paul beʼiinaʼ áátʼįįdígíí nahalneʼgo álą́ąjįʼ ílı̨́įgo áyósin. Kórinthdi Paul naakidi nahojilneʼ tázhdííyáago, habéeso áłchʼı̨́dí silı̨́ı̨́ʼ áko níbaal ííłʼı̨́įgo yinaashnish. Ákondi, níbaal ádaalneʼgi doo hoł ayóó ílı̨́į da. Paul tʼáá bí yee ákʼindidaa yiniyé naalnish, áko Kórinth áłah nídaadleehdi haneʼ yáʼátʼéhígíí ‘tʼáadoo bideenání’ baa nahojilneʼ. (2 Cor. 11:7) Azhą́ Paul naanish hwee hólǫ́ǫ ndi, nahaneʼígíí alą́ąjįʼ ájósin dóó Hááʼáyı̨́ı̨́h jı̨́ góneʼ nazhnitin. Áádóó nihołtłʼaaígíí yáʼátʼééh silı̨́ı̨́ʼ, Paul nahalneʼígíí alááh áyósin. “Paul tʼáadoo áhozdiilzéhí, Jesus éí Christ nilı̨́, jiníigo Jew dineʼé bił nahojilneʼ.” (Acts 18:​3-5; 2 Cor. 11:9) Naaki nááhaijįʼ Paul haghangi biʼdiiltsood, éí tʼáá haa nídaakahígíí haneʼ ííshjání dóó naaltsoos yikʼeʼałchíigo ííłʼı̨́. (Acts 28:​16, 30, 31 yíníłtaʼ.) Paul nahalneʼígíí ayóó bił ílı̨́įgo, áko doo haʼátʼíhída nabiníłtłʼah da. Paul ání: Díí nahalneʼígíí nihee dahólǫ́ áko ‘doo nihąąh nahwiiłkaad da.’ (2 Cor. 4:1) Paulgi átʼéego, nihí ałdóʼ nihinaanish hólǫ́, ákótʼée ndi niheʼiinaʼ siláagi nidahwiilneʼígíí tsʼídá alą́ąjįʼ dóó ílı̨́įgo ádeíníilzin.

10-11. Nihitsʼíís bichʼįʼ anídahaztʼiʼ ndi haitʼéego nidahwiilneʼígíí łaʼ diilnííł?

¹⁰ Náás daazlı̨́ı̨́ʼígíí doodaiiʼ bitsʼíís bee bichʼįʼ anídahaztʼiʼgo éí nidahwiilneʼígíí tʼóó nígháníjįʼ ndi, éí ałʼąą ádaatʼéego nahalneʼígíí yaa bił dahózhǫ́. Ałkʼidą́ą́ʼ daʼoodlání danilínígíí éí diné háadi shı̨́ı̨́ nidaakai ndi, yił nidahalneʼ ńtʼééʼ. Dahooghangóó, dahasłą́ągi, dóó tʼah hidínááhgóó, ‘ałdóʼ bił baa nídajitʼínígíí’ saad tʼáá aaníinii bee bił dahalneʼ. (Acts 17:17; 20:20) Dahootahgóó nideiikaigo nidahwiilneʼ doo nihá bíighah da łeh, áko haaʼída dahasłą́ągi nidasiikéego tʼáá háí shı̨́ı̨́ nihąąh diigháahgo bił nidahwiilneʼ. Doodaiiʼ tah hidínááhgóó, naaltsoos bikʼeʼashchı̨́įgo, índa béésh bee haneʼé  chodeilʼı̨́įgo éí nahaneʼ doo. Publishers yéigo bichʼįʼ anídahaztʼiʼ ndi, éí ałʼąą ádaatʼéego nahalneʼígíí yaa ahééh danízin.

¹¹ Nitsʼíís bichʼįʼ anídahaztʼiʼ ndi, tʼáá łaʼ díílíiłgo nahólneʼgo nínízin. Yilʼaadii Paul áátʼįįdígíí baa nínáádadíitʼįįł. Paul kóní: “Tsʼídá aláahdi átʼéego adziil nilíinii Diyin God bitsʼą́ą́dę́ę́ʼ átʼéego bééhózin doo biniyé, tʼáá nihí nihitsʼą́ą́dóó éí dooda.” (2 Cor 4:7) Paul nahojilneʼ tázhdííyáago, hatah honiigai adziil jinízin. Galatians yaa chʼíhoníʼą́: “Shąąh dah hazʼánígíí biniinaa áłtséedi haneʼ yáʼátʼéehii bee nihił hweeshneʼígíí nihił béédahózin.” (Gal. 4:13) Ní ałdóʼ nitsʼíís bichʼįʼ anáhóótʼiʼ ndi azeeʼííłʼíní, azeeʼ néiikahí, dóó nitsʼíís yikʼidéezʼı̨́įʼii éí haneʼ yáʼátʼéehgo tʼáá nihá baa ahóótʼiʼ. Díí diné nidaalnish publishers bichʼįʼ nidaakai ndi doo dahaaztą́ą da.

12. Ninááʼ bee haaʼísíídinílʼı̨́ı̨́ʼ, haʼátʼíí áhyiłní?

¹² Jesus ání: “Bee hoolʼiní bee adinídínígi átʼéego anááʼ bee atsʼíís bá adinídíín. Éí bąą ninááʼ yáʼátʼéehgo nitsʼíís tʼáá átʼé bił hoolʼin doo.” (Matt. 6:22) Haʼátʼíí áhyiłní? Éí tʼóó bikiinígo niheʼiinaʼ ádeínóhsin, áádóó deiníłtłʼaaígíí bitsʼą́ąjįʼ kóniitʼée doo. Jesus áátʼįįdígíí átʼéego beʼiinaʼ alą́ąjįʼ nahalneʼgo áyósin ííshjání ííłʼı̨́. Áádóó Jesus éí bídahoołʼaahii Jiihóvah índa biNahatʼaʼ baa ákodanohsin yee neineeztą́ą́ʼ. Jesus  bedaʼiilʼı̨́įgo, niheʼiinaʼ éí nidahwiilneʼígíí alą́ąjįʼ ííshjání ádeiyíníilzin, “Diyin God bee bóhólníihgo bił hazʼáanii áádóó yee tsʼídá tʼáá ákogi átʼéii alą́ąjįʼ hádaahtʼı̨́.”—Matt. 6:33.

13. Tʼáá nidahwiilneʼígíí haʼátʼíísh yee nihíká adoolwoł?

¹³ Nááná kótʼéego niheʼiinaʼ tʼáá ayáhígo ádeiyíníilzingo, éí áłtsé nahwiilneʼígíí bee łaʼjįʼ bíká ánéilwoʼígíí Jiihóvah yee dahodoosįįł dóó ayóóʼádeiyóʼníi dooleeł. * Nihinaalnishígíí hashtʼediilníiłgo, nidahwiilneʼígíí éísh alą́ąjįʼ ííníilzin doo? Honeeni bąą daʼaldeehígíí tʼą́ą́ʼ kódíílííł?

14. Łaʼ dahalneʼii haitʼéego nahwiilneʼgo hashtʼeiilyaa?

¹⁴ Elder łaʼ Elias dóó beʼasdzą́ą́ kódzaa. Elias kóní: “Pioneer ádiilnííł yę́ę doo nihá bíighah da. Ákondi ádá nahwiitʼáago éí tʼáadoo hodinaʼí nahwiilneʼ doo. Béeso baa há niidzin doo hashtʼeʼnihiʼnííł, dóó honeeni bąą daʼaldeehígíí tʼáá áhwiindzin doo, áádóó baa naalnishígíí naanish yázhí bíídííkił. Éí binahjįʼ eʼeʼaahgo atah nahołneʼ, dóó Bible studies bee naʼniitin, áádóó náhidizíidgo midweek service ánéiilʼįįh. Dooládóʼ baa hózhǫ́ǫ da!”

15-16. 1 Timothy 4:​13, 15 binahjįʼ nidahwiilneʼgóó haash yitʼéego dayiichįįh yiidleeh? (“Nahashneʼ Ałtso Biʼdeeshłííł Bee Bíká Áshtʼı̨́” ałdóʼ níníłʼı̨́.)

¹⁵ Łahgo átʼéego, nidahwiilneʼ beʼiilʼįįhgo hazhóʼó yiyiichįįh yiidleeh. Diné binaanishígíí hazhóʼó íhwiideeshʼááł dóó dayiichįįh daaleeh, náásgóó yínáádahoołʼaah. Nihí ałdóʼ nidahwiilneʼígíí tʼáá  náás ídahwiilʼaah daniidzin.—Prov. 1:5; 1 Timothy 4:​13, 15 yíníłtaʼ.

¹⁶ Haitʼéego nidahwiilneʼígíí hazhóʼó ałtso bidaʼdiilnííł? Iiná dóó Naʼnítin Áłah Náʼádleehgi tʼáá damóo náʼoodleeł biyiʼ bee nináádanihinitin. Díí áłah náʼádleehgi nidahwiilneʼ dayiichįįh yiidleehgo nihił ílı̨́įgo yee nihíká análwoʼ. Áko chairman nilínígíí éí publisher assignment ájiilaaígíí yee yichʼįʼ yáłtiʼ. Éí díí naʼnitinígíí bił haneʼgo, bitsʼą́ą́dóó bíhodiilʼááł. Baa chʼíhootʼánę́ę bitsʼą́ą́dóó bíhwiilʼą́ʼígíí éí nidahwiilneʼgóó bichʼįʼ choidííłʼįįł. Nihifield service group overseer, náánáłaʼ publisher, doodaiiʼ pioneer danilínígíí, índa circuit overseer éí shíká anílyeed bididiiʼniił doodaiiʼ nahólneʼgóó bił nidíílnish. Toolbox Bee Naʼnitinii choidííłʼįįłgo tʼáá yéigo dayiichįįh yiidleeh. Éí naʼnitinígíí dóó nidahwiilneʼígíí baa nihił dahózhǫ́ǫ dooleeł.

17. Nahólneʼígíí ałtso beʼdíílíiłgo, haitʼéego nikʼihojidlíi doo?

¹⁷ Jiihóvah “bił deíníilníísh” ayóó nihił ílı̨́! (1 Cor. 3:9) ‘Yáʼádaatʼéehii nił bééhózingo lą́ nihileeh doo’ índa nahólneʼígíí alą́ąjįʼ íínísin éí binahjįʼ ‘nił hózhǫ́ǫgo Bóhólníihii bá nanilʼaʼ!’ (Phil. 1:10; Ps. 100:2) Azhą́ nantłʼa ndi doodaiiʼ doo bíninilʼą́ą da ndi, Jiihóvah adziil nee diníʼą́ągo áko nahwiilneʼígíí ałtso beʼdíílííł. (2 Cor. 4:​1, 7; 6:4) Tʼáá áłahájįʼ doodaiiʼ tʼóó kónígháníjįʼ nahólneʼgo, nahaneʼ alą́ąjįʼ íinisingo ‘baa nił hózhǫ́ǫ’ doogo átʼé. (Gal. 6:4) Nahólneʼígíí ałtso beʼdíílíiłgo, Jiihóvah dóó diné ayóóʼííníʼníigo bee ííshjání íinilaa. “Háálá díí baa nanináago yisdádíínááł, índa danółtsʼą́ąʼii yisdádookah.”—1 Tim. 4:16.