1-2. Jesus haʼátʼíí biniinaa nitsééjíltłiʼ ńtʼééʼ?

JESUS bidiʼyoolyéełgi beiníłką́, áko nitsééjíltłiʼ. Diné doo yáʼádaatʼéehii índa doo dajoobaʼii dahodiyoołhééł. Dazhdootsaałgi éí tʼáá náábíláhídi łaʼ hoʼdiiłʼáago bikʼee nitsééjíltłiʼ. Hazhéʼé ayóóʼájóʼní áádóó bił honishǫ́ǫ doo jinízin. Yéigo nahóhodíʼnóotah ndi, éí yéigo bichʼįʼ haʼjólníigo tʼéiyá Jiihóvah bízhiʼ bikʼíhátʼááh yę́ę kʼéézhdoołdǫǫł. Tʼáadoo bee akʼíhátʼáhígóó dajiztsą́ągo éí nihokááʼ dineʼé ayóóʼájóʼnínę́ę hoolʼáágóó ííná bá bohónéedzą́ągo ázhdoolííł.

² Azhą́ hoʼdiiłʼaahígíí hade átʼée ndi, hoł hózhǫ́. Hódahoołʼaahii ábijiní: “Shibee ił hózhǫ́ nihaa dinishʼaah.” (John 14:27) Jesus éí Jiihóvah yił kʼé ahidiʼnínígíí binahjįʼ “Diyin God bitsʼą́ą́dę́ę́ʼ bee achʼįʼ hózhǫ́” bił hodéesyéelgo ábósin. Áko Jesus bintsékees índa bijéí doo nitsináltłiʼ da.—Phil. 4:​6, 7.

3. Haʼátʼíí baa nídadíitʼįįł?

³ Jesus bide átʼé yę́ęgi átʼéego doo nihił nahazʼą́ą da, ndi tʼáá ałtso bikééʼ deíkáhígíí atídabiʼdilʼı̨́į doo. (John 15:20; 2 Tim. 3:12) Jesus nahalingo nihí ałdóʼ nitséédeiiltłiʼ. Azhą́ idaʼdiiłʼáaii nihide ánátʼįįh ndi, nihíniʼ haitʼéego déesyéel doo? Jesus nihokáaʼgi nahasneʼ yę́ędą́ą́ʼ táaʼgo ádzaagi dadíníilʼįįł. Áko nihichʼįʼ hodiiʼnáago díí adzaaʼígíí beʼiilʼı̨́į doo.

4. 1 Thessalonians 5:17 bikʼehgo oodlání haʼátʼíí bee hachʼįʼ haʼoodzííʼ? Áádóó Jesus dadootsaałgo sodoolzin yę́ę łaʼ chʼíníʼaah.

⁴ 1 Thessalonians 5:17 yíníłtaʼ. Jesus dazhdootsaałjįʼ bichʼįʼ hodeeshzhiizhgo ląʼídi sozdoolzin. Dazhdootsaałgi bee hwééhániihgo ánáʼálʼįįh doogo áʼjiilaago éí bááh índa doodlı̨́įłii bikʼi sozdoolzin. (1 Cor. 11:​23-25) Atisʼadeesdzá álʼı̨́įgi daʼjííyą́ą́ʼ, áádóó hódahoołʼaahii bił sozdoolzin. (John 17:​1-26) Tʼáá éí bitłʼééʼ Gethsémaniidi jíkaigo Jesus éí sozdilzingo baa nízhdiidzá. (Matt. 26:​36-39, 42, 44) Hweʼiinaʼ niitʼéehgo tsʼídá ákéeʼdi saad bee hajoodzíʼígíí éí hasodizin. (Luke 23:46) Éí bijı̨́ tʼáá ałtso áhoodzaaígíí sozdilzingo Jiihóvah bee bił hojoolneʼ.

5. Ídahoołʼaahii haʼátʼíí biniinaa yééʼ daazlı̨́ı̨́ʼ?

⁵ Jesus éí Bizhéʼé yaʼólíi doo biniyé tʼáá ahą́ą́ yichʼįʼ sodilzin, áko bichʼįʼ nahwiiʼnáa ndi haʼólníigo yił chʼéhéghááh. Hódahoołʼaahii éí tłʼééʼ bíighah shił sodadoołzin bijinínę́ę yiʼoh daazlı̨́ı̨́ʼ. Áko íhodínóotah baa ílkidgo yééʼ dajizlı̨́ı̨́ʼ. (Matt. 26:​40, 41, 43, 45, 56) Azhą́ nihichʼįʼ hodiiʼnáah ndi, Jesus bedaʼiilʼı̨́įgo ‘sodadiilzingo’ éí bikééʼ nisiidzı̨́į doo. Haʼátʼíísh bíká sodiilzin doo?

6. Oodląʼ éí haitʼéego nihíká adoolwołgo nihił hodéesyéel doo?

⁶ Jiihóvah bichʼįʼ sodadiilzingo éí niheʼoodląʼ “bee aa dadzííníidlíhígíí bilááh [nihá] ánílééh,” dabidiʼníi doo. (Luke 17:5; John 14:1) Jesus yikééʼ deíkáhígíí Séítan nabídínóotah, áko biniinaa oodląʼ bidziilii deíníikeed doo.  (Luke 22:31) Achʼįʼ nahwiiʼná nihide ánátʼįįhgo, niheʼoodląʼ haitʼéego nihíká análwoʼgo nihił hodéesyéel doo? Nihichʼįʼ anáhóótʼiʼ hashtʼediilníiłgi tʼáá haashı̨́ı̨́ nízahjįʼ bíniilʼą́, áádóó éí Jiihóvah tʼóó baa didiitʼááł. Baa dzííníidlíigo yáʼátʼéehgo nihá ádooníiłgo éí binahjįʼ nihintsékees índa nihijéí bił hodéesyéel doo.—1 Pet. 5:​6, 7.

7. Robert áníigi bitsʼą́ą́dóó haʼátʼíí bíhwiiniłʼą́ą́ʼ?

⁷ Azhą́ nihichʼįʼ nahwiiʼnáa ndi, sodizin bee nihintsékees déesyéél. Robert, elder nilı̨́įgo 80dóó baʼaan binááhai éí kóní: “Shichʼįʼ anáhóótʼiʼ náhádleehgo, Philippians 4:​6, 7 binaʼnitinii yéigo shíká análwoʼ. Béeso nanideehgi bee shichʼįʼ anáhóótʼiʼ ńtʼééʼ. Łah éí elder nishłı̨́ı̨́ ńtʼéeʼgi tʼóó kóníshgháníjįʼ shaa náádiilyá.” Robert haʼátʼíí bíká análwoʼgo bintsékees déesyéél? “Nitsináshtłiʼgo éí tʼáá ákǫ́ǫ́ sodíszįįh,” jiní. “Tʼáá ahą́ą́h índa shijéí tłʼááhdę́ę́ʼ ádíshníigo sodiszingo éí shił hodéesyéelgo áshósin.”

8. John 8:29 bikʼehgo, haʼátʼíí biniinaa Jesus hoł hodéesyéél ńtʼééʼ?

⁸ John 8:29 yíníłtaʼ. Jesus éí atíbiʼdilʼı̨́į ndi bijéí déesyéél, háálá Bizhéʼé yił hóshǫ́ǫ dooígi éí aláahdi áyósin. Azhą́ bá nantłʼa ndi, akʼeh hółʼı̨́. Bizhéʼé Jiihóvah ayóóʼáyóʼní, áko tʼáá éí tʼéí yá naalʼaʼgo hináá ńtʼééʼ. Tʼah doo nahasdzáán bikáaʼjįʼ jigháá yę́ędą́ą́ʼ “naanish yiyiichįįhii” hodiʼníí ńtʼééʼ. (Prov. 8:30) Nahasdzáán  bikáaʼgi éí bízhneedlı̨́įgo Hazhéʼé baa nahojisneʼ. (Matt. 6:9; John 5:17) Díí naanish tʼáá íiyisíí baa hoł hózhǫ́ǫ́ ńtʼééʼ.—John 4:​34-36.

9. Tʼáadoo áhodiilzéhí nahwiilneʼgi haitʼéego nihíká adoolwołgo nihił hodéesyéel doo?

⁹ Jiihóvah bikʼeh dahoniilʼı̨́įgo éí Jesus bedaʼiilʼı̨́. Áko éí ‘tʼááłáhígi átʼéego Bóhólníihii bá nideilʼaʼgo’ átʼé. (1 Cor. 15:58) ‘Tʼáadoo áhodiilzéhí’ nahwiilneʼgo éí nihichʼįʼ ánahwiitʼéeh ndi, doo ayóó nihidaʼdiiłʼáa da doo. (Acts 18:5) Bił dahwiilneʼígíí łaʼ nihiláahdi bichʼįʼ anídahaztʼiʼgo átʼé. Ákondi, Jiihóvah ayóóʼádayóʼní daaleehgo áádóó binaʼnitinii yikʼehgo dahináago éí bił dahózhǫ́ǫ łeh. Nihinááł ákódaaneʼgo éí Jiihóvah tʼáá aaníí nihaa áhályą́ą́ lá niidzin doo, áádóó tʼáá éí binahjįʼ nihintsékees áádóó nihijéí bił hodéesyéel doo. Nihisister łaʼ yínííł bikʼee tʼáadoo bą́ą́h nishłíní da nízin ńtʼééʼ. Ájíní: “Nahashneʼgo éí shintsíkees hashtʼedítʼé áádóó shił hózhǫ́. Nahashneʼgo éí Jiihóvah ahánígo adíshóltąʼ nisin.”

10. Brenda áníigi bitsʼą́ą́dóó haʼátʼíí bíhwiiniłʼą́ą́ʼ?

¹⁰ Náánáłaʼ nihisister Brenda wolyéego baa haneʼ. Éí bichʼéʼé yił tʼáá áłah bitsʼíís yéigo bąąh dahazʼą́. Brenda éí wheelchair tʼéiyá choyoołʼı̨́ áádóó doo ayóó hadziil da. Hootahgóó nahojilneʼgi éí tʼáá bíjíighahgo tʼéiyá ániʼjiilʼįįh, ndi naaltsoos achʼįʼ álʼı̨́įgi éí íiyisíí áʼjíłʼı̨́. Ájíní: “Nihił hoogáałgi biiʼ éí díí áníshtʼéhígíí doo hashtʼéédooʼníił da. Tʼáadoo óoshłeʼígóó baa tsídíkééz, áko kʼad éí nahashneʼígíí alą́ąjįʼ íínísin. Nahashneʼgo éí shidaʼdiiłʼáhígíí shitsʼą́ąjįʼ kóyósin. Bił dahashneʼígíí éí íiyisíí baa nitséskeesgo áshósin. Áádóó náasdi nahasdzáán ániid ánálnéeh dooígíí bíká shił chohooʼı̨́įgo áshósin.”

11. Haʼátʼíí biniinaa Jesus éí bídahoołʼaahii bił nilı̨́ı̨́ ńtʼééʼ?

¹¹ Jesus éí bá nantłʼa ndi nahasneʼ, bídahoołʼaahii doo bitsʼákááhgóó áhánígo bikʼis danilı̨́ı̨́ ńtʼééʼ. Proverbs 18:24 ání: “Bił hajííʼáázh biláahgo náánáłaʼ áhánígo kʼé hóʼníinii hólǫ́.” Jesus bídahoołʼaahii díí saad yikʼehgo dahináá ńtʼééʼ, áádóó Jesus kótʼéego akʼis danilíinii bił nilı̨́ı̨́ ńtʼééʼ. Nahojilneʼ yę́ędą́ą́ʼ ashiiké bił hajííjéeʼii tʼáadoo daboosdląąd da. (John 7:​3-5) Łahda hakʼéí éí tsizhʼdeeyáá lá dahałní. (Mark 3:21) Ákódajiníi ndi, Jesus dadootsaał bitłʼééʼ bídahoołʼaahii bikééʼ naazínígíí ííłní: “Nihí tʼéiyá nashíhodiʼntaahgi tʼáá áłahjįʼ shił dahólóonii danohłı̨́.”—Luke 22:28.

12. Jesus éí bídahoołʼaahii haitʼéego ahánígo bikʼis danilı̨́ı̨́ ńtʼééʼ, áádóó haitʼéego bíká iijééʼ?

¹² Jesus éí bídahoołʼaahii ádaaníiłgi łahda doo bił yáʼátʼéeh da ńtʼééʼ, ndi dahoodlą́ągi éí íiyisíí bá jooʼı̨́. (Matt. 26:40; Mark 10:​13, 14; John 6:​66-69) Hoʼdiyoolyééł bitłʼééʼ díí hastóí hakééʼ naazínígíí ábijiní: “Shikʼisóó nihidííniid, háálá shiTaaʼ bitsʼą́ą́dóó disétsʼą́ʼígíí tʼáá ałtso bee nihił béédahózingo ánihiishłaa.” (John 15:15) Doo naaki nilı̨́ı̨́góó Jesus bikʼis danilíinii éí haʼjólníigo ádahósin ńtʼééʼ. Éí haká anájahgo nahojisneʼ, áko tʼáá íiyisíí ił hózhǫ́ hajéí biiʼ hadeezbingo áhoolaa.—Luke 10:​17, 21.

13. Jesus éí bikʼis haitʼéego ahánígo bikʼis danilı̨́ı̨́ ńtʼééʼ, áádóó haitʼéego bíká iijééʼ?

¹³ Jesus éí hastóí dóó sáanii bikʼis danilínígíí nahalneʼgóó índa haʼátʼíí shı̨́ı̨́ yídin nilínígíí bee bíká anájah ńtʼééʼ.  Łaʼ éí bá ádahwiinítʼı̨́įgo bighandi bił nídaʼjidı̨́ı̨́h ńtʼééʼ. (Luke 10:​38-42; John 12:​1, 2) Náánáłaʼ éí joogááłgóó hoł deíkááh áádóó bistʼeʼ ádaatʼéii łaʼ hanídaʼałtsoʼgo hoolzhiizh. (Luke 8:3) Jesus éí diné yáʼátʼéehii bikʼis danilı̨́. Bí éí yáʼátʼéehgo bikʼis yá áánííł áádóó yéigo shíká aníjíjah dooleeł éí doo nízingo nayólíi da. Jesus éí doo niʼiisíihii nilı̨́. Azhą́ bikʼis nidaʼiisíihii danilı̨́į ndi, bíká anájahgi yaa ahééh nízin. Éí bíká anájahgo bił hózhǫ́ǫgo ábósin.

14-15. Akʼis yáʼátʼéehii haitʼéego ádiilnííł, áádóó haitʼéego nihíká anájah doo?

¹⁴ Akʼis yáʼátʼéehii danilíinii éí Jiihóvah bikééʼ siidzı̨́įgi yee nihíká anídaajah doo. Kótʼéii łaʼ shikʼis doo jinízingo éí tʼáá hó ałdóʼ yáʼátʼéehgo bichʼįʼ ájooníił doo. (Matt. 7:12) Diyin Bizaad áníigo éí tʼáá háíshı̨́ı̨́ íiyisíí “badahojoobáʼíígíí” bíká ánéilwoʼ doo. (Eph. 4:28) Oodlání bił yah anáníjahígíí łaʼ shı̨́ı̨́ bíká adíilwołgo átʼé. Doo háágóoda naagháhígíí chʼiyáán łaʼ baa dííjih. Béeso bee bichʼįʼ anídahaztʼiʼii chʼiyáanda łaʼ bee bíká adiilwoł. Doodaléiʼ bił yah anáníjahígíí jw.org^® website índa JW Library^® app chooʼı̨́įgi bee nidíníítįįł, áko yéédahósingo yee ídahoołʼaah doo. Tʼáá ałtsojįʼ áká anéiilwoʼgo éí nihił hózhǫ́ǫ doo.—Acts 20:35.

¹⁵ Nihíhodiʼneestą́ąʼgo nihikʼis ádeilyaaígíí éí nihíká adoojah, áko nihił dahózhǫ́ǫ doo. Job yáłtiʼgo Iiláíhu hazhóʼó bíistsʼą́ą́ʼ ńtʼééʼ. Tʼáá ákótʼéego nihidaʼdiiłʼáhígíí baa yéiiltiʼgo nihikʼis danihíistsʼą́ąʼgo  nihíká anájah. (Job 32:4) Éí nahatʼáagi bee shíká azhdoojah tʼáadoo níníziní, ndi Diyin Bizaad yee nihichʼįʼ yádaałtiʼgo éí baa honiidzą́ągo yísíníiltsʼą́ąʼ doo. (Prov. 15:22) Naatʼáanii David éí aʼohgo áʼdólzingo bikʼis bíká anájah ńtʼééʼ. Nihichʼįʼ anáhóótʼiʼ haleehgo, nihikʼis nihíká adoojahgi ádaa hodzódliʼ biniinaa tʼáadoo tʼą́ą́ʼ sínítíní doo. (2 Sam. 17:​27-29) Akʼis yáʼátʼéehii éí Jiihóvah eidiyiiʼaahii átʼé.—Jas. 1:17.

16. Philippians 4:​6, 7 bikʼehgo, haitʼéego tʼéiyá achʼįʼ hózhǫ́ shíídiiltʼeeł? Łaʼ chʼíníʼaah.

¹⁶ Philippians 4:​6, 7 yíníłtaʼ. Diyin Bizaad éí haʼátʼíí biniyé achʼįʼ hózhǫ́ ‘Christ Jesus beego’ tʼéiyá Jiihóvah éí eidiyiiʼaah ní? Jesus éí Jiihóvah íinízinii yiʼdoolíiłgi bikʼiʼdiitą́ągo áádóó yiniidlą́ągo éí binahjįʼ tʼéiyá nitsíikeesgi índa ániitʼéiigi nízaadgóó bee nihił hózhǫ́ǫ doo. Christ nihá nináʼádeetʼą́ągo nihibąąhági ádaatʼéii nihá yóóʼahideestʼą́. (1 John 2:12) Nihikʼi hodooldohígíí bee hadaʼííníilní! Jesus éí God biNahatʼaʼ biNaatʼáanii jizlı̨́įʼgo, Séítan dóó bikééʼ naazínígíí atídanihiłʼínę́ę bił ahóóyáa doo. (Isa. 65:17; 1 John 3:8; Rev. 21:​3, 4) Díí éí bee nihił chodahooʼı̨́! Azhą́ Jesus éí naanish nantłʼaii nihaidiníʼą́ą ndi, nihił hojílǫ́ǫgo nihíká anijílwoʼgo hoolzhish. (Matt. 28:​19, 20) Díí beego doo nihił yéeʼ da! Akʼi hodooldoh, ił chohooʼı̨́, índa doo nihił yééʼgóó éí nihintsíkees déesyéelgo nihił dahózhǫ́ǫ doo.

17. (a) Haitʼéego nihił hózhǫ́ǫ doo? (b) John 16:33 bikʼehgo, haʼátʼíí nihá bohónéedzą́?

¹⁷ Nanídiʼnitaahígíí łaʼ bikʼee yínííł ánítʼéego, nintsékees haitʼéego déesyéelgo nił hózhǫ́ǫ doo? Jesus ádzaaígíí beʼíłʼı̨́į doo. Áłtsé góneʼ éí, tʼáá ahą́ą́h sodílzin. Naaki góneʼ éí, azhą́ nantłʼa ndi, Jiihóvah bikʼeh honíłʼı̨́ áádóó bínindlı̨́įgo nahólneʼ. Tááʼ góneʼ éí, nanídiʼnitaahgo nikʼis níká anájahgo íínísin. Kónítʼı̨́įgo éí achʼįʼ hózhǫ́ Jiihóvah eidiyiiʼaahii nintsékees dóó nijéí yaa áhályą́ą doo. Áádóó Jesus nahalingo nanídiʼnitaahígíí bikʼeh didlı̨́į doo.—John 16:33 yíníłtaʼ.