1-2. Jesus éí John 4:​35, 36gi saad choyoosʼįįdígíí haʼátʼíí ááhyiłní?

JESUS éí dádaʼakʼehgóó tłʼoh naadą́ą́ʼ ániid kʼidoolyáago yitah tádííyá. (John 4:​3-6) Dı̨́ı̨́ʼ nídeezidgo índa daʼdoogish baa hodoolzhish. Jesus ání: “Dadohhaałgo dádaʼakʼehgóó dadóhʼı̨́ı̨́ʼ, háálá daʼdiigaii, . . . agizhjįʼ ahoolzhiizh.” (John 4:35, 36 yíníłtaʼ.) Haʼátʼíí ááhyiłní?

² Jesus éí bílaʼashdlaʼii yeinítʼı̨́į ndi, binahjįʼ nitsáhákeesgo daʼagizhígíí choyoosʼįįd. Íídą́ą́ʼ áhóótʼįįdgi baa nitsíníkees. Azhą́ Jew dineʼé éí Samériya dineʼé doo yił naaldeeh da ndi, Jesus éí asdzání Samériya dineʼé nilı̨́įgo yichʼįʼ yáłtiʼ áádóó bíistsʼą́ą́ʼ. Áko Jesus díí ‘daʼdiigaii daʼagizhjįʼ ahoolzhiizh’ nínígíí éí Samériya dineʼé Jesus yaa dahodiiztsʼą́ąʼgo baa hojilneʼígíí ła nihił béédahodoozįįł nízingo yichʼįʼ yikah ńtʼééʼ. (John 4:​9, 39-42) Diyin Bizaad neiłkaahii łaʼ, “Díí diné laanaa danízinígíí éí tłʼoh naadą́ą́ʼ daagizh baa hoolzhiizhígíí nidahojílin,” níigo yaa nátʼı̨́.

3. Jesus nahalingo diné níníłʼı̨́įgo naʼnitinígíí haitʼéego bíká adoolwoł?

³ Diné yáʼátʼéehgo haneʼ bee bił dahwiilneʼígííshąʼ? Tłʼoh naadą́ą́ʼ doogish baa hoolzhiizhígíísh nahalingo níníłʼı̨́? Ákótʼéego éí tááʼ hazʼą́ągi tʼáá aaníi doo. Áłtsé éí, naʼniitinjí bidíníilkaal doo. Dadoogish éí tʼóó kónízahíjįʼ bá hooʼaah, doo éí naʼáhozhdilziid da. Naaki góneʼ éí, diné daniistsʼą́ąʼgo baa nił hózhǫ́ǫ doo. Diyin Bizaad ání diné ‘agizh yaa bił dahózhǫ́.’ (Isa. 9:3) Áádóó tááʼ góneʼ éí, diné íhoołʼaahii dooleełgo baa nitsíikees doo, áko bił  hozhdoolnihígíí éí yíneedlínígíí bił ííshjání ájiiłʼįįh.

4. Haʼátʼíísh yilʼaadii Paul bitsʼą́ą́dóó bíhwiidiilʼááł?

⁴ Jesus éí Samériya dineʼé doo nahjįʼ kóyóʼníi da, bikééʼ ndaakaiígíí shı̨́ı̨́ éí kódadzaa. Ndi, éí ídahoołʼaah dooleełgo yá laanaa nízin. Nihí ałdóʼ tʼáá ákótʼéego nidahwiilneʼgóó diné, Christ yíhoołʼaahii dadooleełgo bá laanaa daniidzin. Yilʼaadii Paul éí áʼdoolníiłgi nizhónígo íʼiilaa. Haʼátʼíísh bitsʼą́ą́dóó bíhwiidiilʼááł? Táaʼgo hazʼą́ baa nídadíitʼįįł: (1) Yił nidahalneʼii éí biʼóʼoolʼįįł yá yaa ákonízin ńtʼééʼ, (2) yídaneedlínígíí éí yaa ákonízin, áádóó (3) Jesus yíhoołʼaahii dadooleełgo yá laanaa nízin ńtʼééʼ.

5. Haitʼéego éí Paul synagogue biiʼ Jew dineʼé ádajítʼéegi bił bééhózin ńtʼééʼ?

⁵ Paul éí tʼáá ahą́ą́h naʼnitin ńtʼééʼ. Thesalonáíkadi Jewish synagogue “táadi hááʼáyı̨́ı̨́h jı̨́ azlı̨́ʼígíí biyiʼ Diyin God bizaad bee akʼedaʼashchínígíí hoł yeinístʼįįd.” (Acts 17:​1, 2) Paul ákweʼé Jew nilı̨́įgo neeyą́, áko ákwii bił yáʼáhootʼééh. (Acts 26:​4, 5) Paul éí Jew dineʼé ádajítʼéegi bił bééhózin, áko doo náhinílyéésgóó neinitin ńtʼééʼ.—Phil. 3:​4, 5.

6. Nidaʼiiniihgi dóó synagoguegi Paul dabíistsʼą́ʼígíí haitʼéego ałʼąą ádaatʼé?

⁶ Paul éí nabíhodiʼnitaahgo Thesalonáíkagóó azhniichą́ą́ʼ, dóó Beríyajįʼ áádóó Áthenzjįʼ. Tʼáá ajitʼínígíí átʼéego synagoguegi “Jew dineʼé índa diné dahodísinii bił baa nídajitʼı̨́.” (Acts 17:17) Nidaʼiiniih bá hazʼą́ągi nahojilneʼgo ákweʼé éí łahgo ádaatʼéii náádabíistsʼą́ą́ʼ. Ákweʼé philosophers dóó Gentiles dabíistsʼą́ąʼii éí ‘naʼnitin ániidíii bee naʼnítin’ dabiłní. “Háálá haʼátʼíí shı̨́ı̨́ doo bééhózin da léiʼ baa hólneʼgo dasidiitsʼą́ą́ʼ, éí bąą éidí nihił béédahodoozįįł,” náádahałní.—Acts 17:​18-20.

7. Acts 17:​22, 23 bikʼehgo Paul éí haitʼéego nahalneʼgi łahgo áyiilaa?

⁷ Acts 17:​22, 23 yíníłtaʼ. Paul éí Áthenzdi Gentiles dóó Jew dineʼé doo aheełtʼéego yił nahasneʼ da. Paul éí kwíizhnízin daatsʼí: ‘Áthenz dineʼé lá haʼátʼíí dayoodlą́?’ Ákweʼé hazʼą́ągi haʼasíidgo nidahojiłáagi yaa ákoniizı̨́ı̨́ʼ. Diyin Bizaad biiʼdę́ę́ʼ tʼáá aaníigo naʼnitin dóó tʼáá íídą́ą́ʼ hoł béédahózinígíí bikʼehgo náhodíníitą́ą́ʼ. Bible commentator łaʼ ání: “Jew dineʼé Oodlání nilı̨́įgo Paul bił bééhózingo Gríik dineʼé éí tʼáá aaníinii God  doo dayoodlą́ą da, ndi bí God yaa halneʼígíí éí tʼáá íídą́ą́ʼ béédahojísingo hoł ííshjání áyiilaa.” Áko Paul éí áádóó hazhóʼó yee hachʼįʼ haadzííʼ. Paul éí Áthenz dineʼé bił béédahózinígíí yikʼehgo ííłní “Diyin doo bééhózinii” bichʼįʼ ndahołáhígíí éí baa yáshtiʼ. Gentiles éí Diyin Bizaad doo bił béédahózin da ndi, Paul éí tʼáadoo hakʼi deeyáa da. Ákondi dáʼakʼehdi daʼdiigaiigo agizhjįʼ ahoolzhiizh nidahojílingo haa ákoniizı̨́ı̨́ʼ. Díí binahjįʼ yáʼátʼéehgo haneʼii hoł chʼíiníʼą́.

8. (a) Ndahwiilneʼgóó diné bibee ádaʼoolʼįįłii haitʼéego baa ákoniidzin doo? (b) Háida sheʼoodląʼ hólǫ́ níigo, haitʼéego bichʼįʼ háádiidzih?

⁸ Paul nahalingo haʼiilzíid doo. Nidahwiilneʼgóó diné bibee ádaʼoolʼįįłii hailzíid doo. Bighan dóó bichidísh haitʼéego hadeidiilaa? Bízhiʼ, biʼééʼ hadítʼéegi, índa bizaadísh beʼoodląʼ bee bééhózin? “Tʼáá shí sheʼoodląʼ hólǫ́,” daatsʼí niłní. Flutura special pioneer nilı̨́įgo ájíní: “Sheʼoodląʼ éí doo yidíídląął biniyé nááníyáa da, ndi díí nił chʼídeeshʼááł biniyé . . . “

9. Beʼoodląʼ hólónígíí bił aheełtʼéego baa nitsóhkeesii haitʼéego bíká íísíníłtsʼą́ąʼ doo?

⁹ Tʼáá íídą́ą́ʼ beʼoodląʼ hólóonii haʼátʼíí bił baa nídíitʼįįł? Aheełtʼéego baa nitsóhkeesii éí bíká íísíníłtsʼą́ą́ʼ. Tʼááłáʼí Diyin Godgo daatsʼí yoodlą́, doodaiiʼ Jesus éí bílaʼashdlaʼii yisdáyiiníiłgo daatsʼí yaa ákonízin? Dooda léiʼ dííshjı̨́įdi doo yáʼáshǫ́ǫ́góó nihił hoogáłígíí nidootʼih bichʼįʼ hoolzhishgo daatsʼí yoodlą́? Aheełtʼéego yinohdlánígíí binahjįʼ Diyin Bizaad biiʼdóó yíneedlínígíí bił chʼídííʼááł.

10. Haitʼéego ádaʼdiilnííł, áádóó haʼátʼíí biniyé?

¹⁰ Łaʼ diné éí bibee oodląʼ yee nidaʼnitinígíí doo tʼáá átʼé dayoodlą́ą da. Kódaatʼéhígíí tʼáá íiyisíí dayoodlánígíí nił bééhodoozįįł. Australiadę́ę́ʼ David special pioneer nilı̨́įgo ání: “Kʼad éí tʼóó ahayóí philosophy dóó dayoodlánígíí ałhiih dayiinííł.” Albaniadę́ę́ʼ Donalta ání: “Łaʼ sheʼoodląʼ hólǫ́ daaníi ndi, God éí doo dayoodlą́ą da.” Áádóó Argentinadę́ę́ʼ brother missionary nilı̨́įgo éí kótʼéego yaa ákoniizı̨́ı̨́ʼ. Trinity yinishdlą́ daaníi ndi, Azhéʼé, aYeʼ, índa níłchʼi diyinii tʼááłáʼí God nilı̨́įgi doo dayoodlą́ą da. “Díí aheełtʼéego nitsáhákees binahjįʼ éí doo nantłʼagóó bił chʼíhozhdooʼááł,” jiní. Áko haʼátʼíí lá íiyisíí diné dayoodlą́ągi nił bééhodoozįįł. Paul nahalingo “tʼáá ałtsojįʼ tʼáá ádzíłtso . . . tʼáá hó ádajítʼéhígi átʼéego” íʼdiʼdíílnííł.—1 Cor. 9:​19-23.

11. Acts 14:​14-17 áníigo éí Lístradi Paul haitʼéego diné hazhóʼó neineeztą́ą́ʼ?

¹¹ Acts 14:​14-17 yíníłtaʼ. Paul éí dabíistsʼą́ąʼii haʼátʼíí yá yaa ákonízin ńtʼééʼ, índa naʼnitingi łahgo áyiilaa. Lístradi éí Diyin Bizaad doo ayóó bił béédahózin da. Áko Paul éí Diyin Bizaad hazhóʼó choyoołʼı̨́įgo yee naʼneeztą́ą́ʼ. Aneestʼą́ náhoodleełgi dóó iiná bee níʼdooldįįłgi yaa hoolneʼ. Saad dóó binahjįʼ akʼidiʼdootı̨́įłii choyoołʼı̨́įgo éí dabíistsʼą́ąʼii bikʼidaʼdiitą́.

12. Diné yídaneedlíinii baa ákoniidzingo éí haitʼéego bił chʼídííʼáałgi hashtʼedíílííł?

¹² Dahootahgóó diné yídaneedlíinii baa ákonínízin, éí bikʼehgo bił chʼídííʼáałgi hashtʼedíílííł. Díí haitʼéego ádiiʼnííł? Haʼiilzíid doo. Áko baa ákoniidzingo kʼééʼdídlééh, naaltsoos yółtaʼ, chidí yinaalnish, doodago tʼáá haʼátʼííhída daatsʼí yaa naaghá. Bíighah ládą́ą́ʼ yaa naagháhígíí binahjįʼ yíneedlínígíí nabídídíiłkił. (John 4:7) Ééʼ yee hadítʼéegi bee baa ákodíníizįįł. Éí dóoneʼé nilı̨́įgi doodaiiʼ binaanish doodaiiʼ sports team bił yáʼátʼéhígíí hoł bééhodoozįįł. Gustavo ání: “Diné łaʼ 19 binááhaigo bichʼįʼ haasdzííʼ. Biʼééʼ éí famous singer bikʼi naashchʼąąʼgo yee hadítʼé. Éí bínabídééłkidgo: ‘Díí éí bídínéeshnáago baa nitséskees,’ shiłní. Díí bee ahił hwiilneʼígíí binahjįʼ Diyin Bizaad yíhoołʼaahii silı̨́ı̨́ʼ, kʼad éí nihibrother nilı̨́.”

13. Diyin Bizaad bóhooʼaahgi haitʼéego yídaneedlı̨́įgo ádíílííł?

¹³ Diyin Bizaad bee nanitinígíi éí yíneedlı̨́įgo íínísin, bíká adoolwołgi bił ííshją́ą́ ádíílííł. (John 4:​13-15) Nihisister Poppy wolyéego éí asdzą́ą́ léiʼ haneʼ yíneedlı̨́įgo bił yah ajííyá. Poppy éí díí asdzą́ą́ naʼnitinjí professor nilı̨́įgo bicertificate dah sitą́ągo jiiłtsą́. Áádóó Poppy éí nihí ałdóʼ Diyin Bizaad bitsʼą́ą́dę́ę́ʼ dóó meetingsdi nidaʼniitin, jiní. Áko díí asdzą́ą́ Diyin Bizaad yíhoołʼaahii silı̨́ı̨́ʼ,  áádóó biiskání meetingdi níyá, circuit assemblydi ałdóʼ níyá. Tʼááłáʼí nááhaigo baptize ábiʼdilyaa. Díí baa nitsíníkees: ‘Baa náshdáahgo nanishtinígíí haʼátʼíísh yídaneedlı̨́? Diyin Bizaad bóhooʼaahgi haitʼéego lá yídaneedlı̨́įgo bił chʼídeeshʼááł?’

14. Diyin Bizaad bee nanitinígíí éí haitʼéego biniyé hashtʼéédinitʼįįh doo?

¹⁴ Diyin Bizaad bee nanitinígíí tʼáá ałʼąą biniyé hashtʼéédinitʼįįh, beʼiinaʼ hazʼą́ągi índa yíneedlínígíí bá baa ákonínízin. Saad dah naazhjaaʼ yídííłtah, dóó videos nidííłkił, índa Diyin Bizaad bitsʼą́ą́dę́ę́ʼ illustrations choidííłʼįįłígíí éí hashtʼedíílííł. Díí baa nitsíníkees: ‘Díí íhoołʼaahii haʼátʼíí yíneedlı̨́įgo bijéí yidiyoołnááł?’ (Prov. 16:23) Albaniadi asdzání léiʼ pioneer Flora wolyéego nabinitingo ání: “Nááʼdiijeeh naʼnitinígíí doo shił nilı̨́į da.” Flora éí díí naʼnitin bikʼizhdiʼdootı̨́įłgi doo yaa tsı̨́ı̨́ł nilı̨́į da. Áko ájíní: “Diyin nááʼdiijeeh yee nihoníʼáanii áłtsé bééhozhdoosįįł.” Áádóó éí tʼáá ninázhʼnítįįh bikʼeh Jiihóvah bibee ayóóʼóʼóʼní, bibee hódzą́, índa bibee adziil bił chʼééjíʼááh. Tʼahádóó éí nááʼdiijeeh bee naʼnitin yoosdląąd. Kʼad éí yaa bił hózhǫ́ǫgo Jiihóvah yá naalʼaʼ.

15. Acts 17:​16-18 bikʼehgo Gríisdi baa ooldah yę́ę Paul haitʼéego biʼdiiłʼá, ndi haʼátʼíí biniinaa Áthenz dineʼé tʼáadoo yikʼi déyáa da?

¹⁵ Acts 17:​16-18 yíníłtaʼ. Áthenz kin dah shijaaʼgi éí edaʼalyaii bichʼįʼ nidahadlá, naʼageh bee tsiʼnaʼadá, dóó pagan philosophy dayoodlą́ągo baa ooldah ndi, Paul éí Áthenz dineʼé tʼáadoo yikʼi deeyáa da. Paul éí biʼdódziih ndi ałdóʼ tʼáadoo bąąh nahonííłkaad da. Tʼóó baaʼihgo yájíłtiʼ, áádóó atíʼjíłʼı̨́, índa diné ádaa haʼniihii jílı̨́ı̨́ ńtʼéeʼ ndi, Paul éí tʼáá bí ałdóʼ Oodlání silı̨́ı̨́ʼ. (1 Tim. 1:13) Jesus éí Paul bohónéedzą́ągo yaa ákoniizı̨́ı̨́ʼ, tʼáá ákótʼéego Paul éí Áthenz dineʼé yaa tsídeezkééz. Beijólíhígíí tʼáá ákótʼé.—Acts 9:​13-15; 17:34.

16-17. Haʼátʼíí binahjįʼ bééhózingo diné tʼáá ałʼąądę́ę́ʼ deíkáahii Jesus bídahoołʼaahii dooleełgo átʼé? Łaʼ baa chʼíhoníʼaah.

¹⁶ First century diné tʼóó ahayóí ałʼąą ádaatʼéii Jesus bídahoołʼaahii daazlı̨́ı̨́ʼ. Kórinthdi Oodlání kéédahatʼíinii Paul hachʼįʼ íʼiilaa, éí díí Oodlání łaʼ doo yáʼátʼééhgóó deíkááh, doodaiiʼ tʼóó baaʼihgo kéédahojitʼı̨́. Ánáádíʼní: “Łah nihí łaʼ ákódanohtʼéé nítʼééʼ. Nidi nihibąąhági átʼéii nihąąh tánásgiz.” (1 Cor. 6:​9-11) Diné kótʼéego deíkááh yę́ę yáʼátʼéehgo deíkááh dooleełgoósh baa nitsíníkees doo?

¹⁷ Díí jı̨́ tʼóó ahayóí beʼiinaʼ hashtʼéédeedleʼgo Jesus yídahoołʼaahii nidahaleeh. Australiadi special pioneer nilı̨́įgo Yukina wolyéego diné áłʼąą ádaatʼéii Diyin Bizaad bił danilı̨́įgo baa ákozhniizı̨́ı̨́ʼ. Łah real estate officegi asdzání léiʼ tattoos áádóó hadítʼéegi bee baa ákozhniizı̨́ı̨́ʼ. Yukina ájíní: “Bichʼįʼ niʼ nishłı̨́į ndi, bichʼįʼ haasdzííʼ. Diyin Bizaad yíneedlı̨́įgo, Psalms biiʼ saad hadasdzooígíí bitsʼíís bikááʼ tattoo ádaalyaa lá!” Áádóó Diyin Bizaad yíhoołʼaahgo yaa nídiidzá dóó meetingsgóó ałdóʼ naaghá silı̨́ı̨́ʼ. *

18. Haʼátʼíí biniyé diné éii kójítʼé tʼáadoo dabidiiʼníní doo?

¹⁸ Jesus dádaʼakʼehgóó agizhjįʼ ahoolzhiizh  níigi, éísh diné tʼáá ałtso bikééʼ deíkáah doogo ááhyiłní? Ndagaʼ. Diyin Bizaad áníigo tʼáá díkwíí tʼéiyá Jesus dayoodlą́ą doo. (John 12:​37, 38) Áádóó nitsídadzikeesgi Jesus bił bééhózin. (Matt. 9:4) Ákondi dabiidoodląąłígíí hainitáá ńtʼééʼ. Áádóó yaa bił hózhǫ́ǫgo tʼáá ałtso yił nahasneʼ. Nihí éí ajéí átʼéegi doo nihił bééhózin da, áko nidahwiilneʼgóó índa háida éii kódajítʼé tʼáadoo dabidiiʼníní doo! Ákondi nihí éí diné nahalneʼé dadooleełgo bá laanaa niidzin doo. Marc, Burkina Fasodi missionary nilı̨́įgo ání: “Diné łaʼda tʼáá tsı̨́įłgo íhwiidoołʼááł nisinígíí éí tʼóó niʼ áyiiłʼįįh. Áádóó łaʼda íhoołʼaahgi niʼ kódeidoolííł nisinígíí éí náásgóó nizhónígo ídahoołʼaah. Áko Jiihóvah biníłchʼi nihoolóósjí éí nihá yáʼátʼéehgo baa ákoniizı̨́ı̨́ʼ.”

19. Nidahwiilneʼgóó haitʼéego diné baa nitsídeikees doo?

¹⁹ Nidahwiilneʼgóó daʼdiigaii daʼagizh baa hoolzhiizh doo ląʼí nahalin da doo. Jesus bídahoołʼaahii áyidííniid yę́ę béénílniih. Dádaʼakʼehgóó daʼdiigaii, áko kʼad agizh baa hoolzhiizh. Diné éí beʼiiná hashtʼedeidoolíiłgo Jesus yídahoołʼaahii dadooleełgo átʼé. Jiihóvah éí íhoołʼaahii dadooleełígíí “daʼílíinii” nidahojílingo honéłʼı̨́. (Hag. 2:​7, New World Translation) Jiihóvah dóó Jesus diné yinéłʼínígi átʼéego diné níilʼı̨́įgo beʼiinaʼ átʼéegi dóó yíneedlínígíí nihił bééhodoozįįł. Nihibrothers dóó nihisisters dadooleełgo bá laanaa hwiindzin.