1-2. Ákʼé nináʼílyá haʼátʼíí óolyé, áádóó haʼátʼíí biniyé ákʼé nináʼílyée doo?

ÁDAM éí perfect jílı̨́įgo bąąhági ájiidzaago biniinaa hoolʼáágóó jiináa dooleeł yę́ęgi yóóʼajííłdéél. Doo tʼáá hó tʼéiyá ádá yóóʼajííłdéel da. Haʼáłchíní náás daʼahideeshchíinii ałdóʼ bitsʼą́ą́ʼ yóóʼajííłdéél. Ádam kójíítʼįįdgo tʼáadoo bee achʼą́ą́h hajódziihí da. Tʼáá ákójínéehgo ákójiidzaa. Ákoshąʼ haʼáłchíní? Éí kójíítʼįįdgo, éí tʼáh doo dahoʼdíchíih da. Ádam ájíítʼįįdígíí biniinaa dazhdootsaał. (Rom. 5:12, 14) Ákoósh Jiihóvah éí Ádam baʼáłchíní hoolʼáágóó dahináa dooleełgo yá áʼdoolííł? Aooʼ! Ádam bąąhági ájiidzaago tʼáá ákǫ́ǫ́ tʼáá íídą́ą́ʼ Jiihóvah tsʼídá tʼóó ahayóí Ádam baʼáłchíní yisdéidooniłgo áyiilaa. (Gen. 3:15) Jiihóvah éí kʼad bikʼíhoolzhiizh niizı̨́ı̨́ʼ góneʼ, yáʼąąshdę́ę́ʼ biYeʼ yidoołʼaałgo “beʼiiná ninéididooʼáałgo daaztsánígíí yee ląʼí néidiyoołnih.”—Mark 10:45; John 6:51.

² Ákʼé nináʼílyá haʼátʼíí óolyé? Christian Greek Scriptures biiʼdę́ę́ʼ yeinítʼı̨́įgo éí Ádam yóóʼayííłdéélígíí Jesus yikʼé nináʼídlá. (1 Cor. 15:22) Haʼátʼíí biniyé ákʼé nináʼílyée doo? Jó, Jiihóvah bibee hazʼáanii yee hasʼą́ągo éí łaʼda jiisxı̨́įgo éí hweʼiinaʼ bee ninázhdoodlééł. (Ex. 21:23, 24) Ádam éí perfectgo áhoʼdiilyaa yę́ę yóóʼajííłdéél. Áko Diyin bibee hazʼáanii bikʼeh áʼdoolníiłgo Jesus perfectgo beʼiiná ályaaígíí ninéidiníʼą́. (Rom. 5:17) Áko éí binahjįʼ háíshı̨́ı̨́ díí ákʼé nináʼályáhígíí joodlą́ągo Jesus éí ‘Hoolʼáágóó haTaaʼ Nilı̨́į’ doo.—Isa. 9:6; Rom. 3:23, 24.

3. John 14:31 dóó 15:13 bikʼehgo Jesus éí haʼátʼíí biniyé bitsʼíís perfect ályaaígíí ninádideeshʼááł niizı̨́ı̨́ʼ?

³ Jesus éí beʼiiná ninádideeshʼááł niizı̨́ı̨́ʼ, háálá Jiihóvah dóó nihí ayóóʼánihóʼní. (John 14:31; 15:13 yíníłtaʼ.)  Áko sheʼiinaʼ ninítʼiʼjįʼ yéigo Jiihóvah bikééʼ sézı̨́į doo nízin ńtʼééʼ. Jesus kódzaago Jiihóvah éí bílaʼashdlaʼii índa nahasdzáán tʼáá yá hodeezʼánę́ęgi átʼéego yihodoolííł. Diyin éí Jesus tʼah doo daatsaahgóó haʼátʼíí biniyé tsʼídá yéigo bichʼįʼ nahwiiʼnáago áyiilaagi baa nídadíitʼįįł. Índa yilʼaadii John éí ákʼé nináʼílyáagi yaa hoolneʼ yę́ęgi tʼáá áłtsʼísígo baa nídadíitʼįįł. Áádóó akéeʼdi éí ákʼé nináʼályáhígíí haitʼéego baa ahééh hwiindzin doo, áádóó bidziil óolzin dooígi ałdóʼ baa nídadíitʼįįł.

4. Jesus haitʼéego daaztsą́?

⁴ Jesus éí hodiʼyoolyéełgo bichʼįʼ hodeeshzhiizh yę́ęgi baa nitsíníkees. Tsʼídá tʼóó ahayóí diyingo ndaalʼaʼí yíká ádidooniiłgo bíká adoojah, ndi Rome bisiláo tʼóó bá hojiiłʼaʼgo dahoołtsood. Áádóó doo haa daastiʼgóó yéigo nídahoneesxaal. (Matt. 26:52-54; John 18:3; 19:1) Éí beʼatsxis hatsįʼ yee hayiiłdlaadgo yee nídahoneestsxas. Áádóó haneʼdę́ę́ʼ dił náálı̨́įgo tsin ayóó átʼéego nidaazgo jootı̨́įłgo ádahoolaa, éí hodiʼyoolyééłgóó bichʼįʼ tsin dashdiiłjid. Áádóó éí tsin nidaazgo biniinaa doo hadziil da jizlı̨́ı̨́ʼ, áádóó ákwii łaʼ naazínígíí, eii bá yítı̨́ı̨́ł hodooʼniid. (Matt. 27:32) Hodiʼyoolyéełgi jiníyáago siláo éí hakeeʼ dóó hálaʼ tsin bąąhjįʼ yił adaʼaskaal. Áádóó tsin hoł nídeidiitą́ągo hoł oʼoolkaal yę́ę góneʼ iidláád. Hakʼis índa hamá haa daacha, ndi Jew binaatʼáanii éí tʼóó há nidahałtʼiʼ. (Luke 23:32-38; John 19:25) Hachʼįʼ nahwiiʼnáago ląʼí ahééʼílkid. Tsin bąąh dah hizhdéłtı̨́įgo hajéí índa hajéí yilzólí yéigo naalnishgo biniinaa chʼééh nízhdídzih jizlı̨́ı̨́ʼ. Hayol ásdįįd ndi Jesus éí Hazhéʼé Jiihóvah tsʼídá akéeʼdi bichʼįʼ sozdoolzin, áádóó hweʼiinaʼ ninázhdiníʼą́. (Mark 15:37; Luke 23:46; John 10:17, 18; 19:30) Dooládóʼ shı̨́ı̨́ tʼóó baa yáhásinígi átʼéego hachʼįʼ nahwiiʼnáago dajiztsą́!

5. Jesus éí haʼátʼíí íiyisíí bijéí neezgaigo áyiilaa?

⁵ Jesus éí ayóó átʼéego neezgaigo hoʼdiisyı̨́, ndi íiyisíí aláahdi bee hakʼéhástʼahgo biniinaa hoʼdiisyínígíí éí Diyin baaʼihgo bá háínídzííʼ hodooʼniid. Kótʼéego tʼáá ádzaagóó hakʼéhástʼahgo biniinaa hajéí neezgaigo áyiilaa. (Matt. 26:64-66) Áko baa yáhásinígi átʼéego hodiʼyoolyéełgo Hazhéʼé doo yaa hodidooʼáał da jinízin. (Matt. 26:38, 39, 42) Haʼátʼíí biniyé Jiihóvah éí haYeʼ bichʼįʼ nahwiiʼnáago biʼdiisyı̨́įgo tʼóó yá yee hoołʼaʼ? Díí táaʼgo biniinaanii baa nídadíitʼįįł.

6. Jesus éí haʼátʼíí biniyé tsin bąąhjįʼ dah hizhdéłtı̨́įgo áhoʼdilyaa?

⁶ Áłtséhígíí éí, Jesus tsin bąąhjįʼ dah hodiʼdooltéełgo éí Jew dineʼé hóyéeʼgo bá haʼoodzííʼ yę́ęgi yitsʼą́ąjįʼ yisdéidoonił. (Gal. 3:10, 13) Jew dineʼé éí Diyin bibee hazʼáanii bikʼeh dahoniilʼı̨́į doo dazhdííniid, ndi tʼáadoo bikʼehgóó ádajiidzaa da. Ádam baʼáłchíní dajílínígíí biniinaa dazhdínóonééł, áko hó ałdóʼ hóyéeʼgo há haʼoodzííʼ. (Rom. 5:12) Ízrel dineʼé éí Diyin bibee hazʼáanii áháłníigo łaʼda éí idiʼyoolyéełgo biniyé bąąhági ájiidzaago éí hó ałdóʼ hodiʼyoolyééł ní. Áádóó éí hatsʼíís yę́ę tsin bąąh dah hidéłtı̨́įgo álʼįįh. * (Deut. 21:22, 23; 27:26) Áko Jesus éí tsin bąąh dah hizhdéłtı̨́įgo áhoʼdiilyaago Jew dineʼé doo dahonízin da yę́ę nináʼázhdeetʼą́ągi bíká adoolwołgo bá bohónéedzą́ągo ájiilaa.

7. Haʼátʼíí éí naaki góneʼ Diyin éí biYeʼ bichʼįʼ nahwiiʼnáago yá yee hoołʼaʼ?

 ⁷ Naaki góneʼ, Jesus éí Aláahgo Nááʼiiłniihii ídlı̨́į dooleełgi bíhwiizhdoołʼááł biniyé hachʼįʼ nahwiiʼnáago Diyin tʼóó há yee hoołʼaʼ. Diyin bikʼeh holʼı̨́į dooleełgi tsʼídá yéigo bee náʼíhonitaahii átʼéegi Jesus bee bóhoneestą́ą́ʼ. Ayóó átʼéego hachʼįʼ nahwiiʼnáago ‘yéigo ájíníigo hanákʼeeshtoʼ náálı̨́įgo’ sozdilzingo níʼjookąąh. Jesus “nahóhodiʼnitaahgo tiʼhodzoozniiʼ, éí bąą nabídahodiʼnitaahii bíká azhdoolwołgo” bízhneelʼą́, éí yídin danilíinii bił bééhózin. Jiihóvah kótʼéego Aláahgo Nááʼiiłniihii ayóó joobaʼii éí ‘doo danihidziilígíí bąą nihaa aʼááh dínóozįįłgi yíneelʼą́ągo’ átʼéegi nihá niiníłtı̨́įgo ayóó baa ahééh daniidzin.—Heb. 2:17, 18; 4:14-16; 5:7-10.

8. Haʼátʼíí éí tááʼ góneʼígíí Jiihóvah éí Jesus tsʼídá yéigo bichʼįʼ nahwiiʼnáago tʼóó yá yee hoołʼaʼ?

⁸ Tááʼ góneʼígíí, ílı̨́įgo naʼídíkidii ííshjání ádoolnííł biniyé Jiihóvah éí Jesus bichʼįʼ nahwiiʼnáago tʼóó yá yee hoołʼaʼ. Éí bílaʼashdlaʼii tsʼídá yéigo bóhoneestą́ąʼgo, éísh Jiihóvah tʼáá yikééʼ sizı̨́į doo? Séítan éí ndagaʼ ní. Bílaʼashdlaʼii éí Diyin bá nidajilʼaʼ, éí dazhnízinii nihaazhdoolééł dazhnízin, nihiłní Séítan. Éí tʼáá Ádam átʼéhígi átʼéego Jiihóvah doo ayóóʼádajóʼníi da, ní. (Job 1:9-11; 2:4, 5) Jiihóvah éí biYeʼ doo bitsą́ doogáał dago yaa dzólí, éí bąą biYeʼ tsʼídá yéigo nabóhoneestą́ąʼgo yá yee hoołʼaʼ. Jesus éí Bizhéʼé tʼáadoo yitsʼą́ąjįʼ dah diiyáa da. Áko éí Séítan biyoochʼíidgo áyiilaa.

9. John éí haʼátʼíí nihinááł nizhónígo áʼiilaa?

⁹ Tʼóó ahayóí Oodlání bikʼijįʼ ídlı̨́ áádóó ałʼąą ádaatʼéégóó bee nabídahoneestą́ą́ʼ. Ákondi hadaʼólníigo nidahalneʼgo bídeiníłką́, háálá ákʼé nináʼályáhígíí yee beʼoodląʼ dabidziil. Bééhózinígo 60dóó baʼaan nááhai, yilʼaadii John éí wołí bee atʼı̨́įgo Christ tʼáá aaníigo baa haneʼii índa ákʼé nináʼályáhígíí yaa nahasneʼ. Kʼadę́ę 100 honáháahgo Roman Empire hwéédaaldzidgo biniinaa táyiʼdę́ę́ʼ kéyah hááʼáago Pátmos hoolyéedi awáalya adahastʼeʼ. Éí “Diyin God bizaad baa hashneʼgo índa Jesus bá hashneʼgo biniinaa,” jiní. (Rev. 1:9) John éí oodląʼgi índa haʼólníigi nihinááł nizhónígo áʼiilaa.

10. John éí ákʼé nináʼílyáagi yaa halneʼgo haitʼéego yaa ahééh nízingo íʼiilaa?

¹⁰ John éí Diyin Bizaad biiʼ Jesus ayóóʼííníshʼní áádóó naʼádiisʼniiʼígi ayóó baa ahééh nisin níigo yikʼeʼashchı̨́. Éí ákʼé nináʼályáagi índa tʼáá éí bitsʼą́ą́dóó bohónéedzáanii íidoolíiłgi 100dóó baʼaan ánéelą́ąʼdi yee hanáádzííʼ. Éí łahgo ání: “Nihí łaʼ bąąhági íitʼı̨́įgo ííshją́ą́ Jesus Christ tsʼídá tʼáá ákogi átʼéii jílíinii éí Diyin God aTaaʼ bichʼįʼ nihá naʼakʼíyájíłtiʼ.” (1 John 2:1, 2) Áádóó ánáázhdiʼníigo éí “Jesus baa haneʼii” ílíinii átʼé jiní. (Rev. 19:10) Áko bééhózinígo John éí ákʼé nináʼílyáagi yéigo baa ahééh jinízin. Áko nihí ałdóʼ haitʼéego tʼáá ákóniitʼée doo?

11. Bidádahonooníinii bitsʼąą ánítʼée doogo haʼátʼíí nihíká análwoʼ doo?

¹¹ Bąąhági átʼéii bitsʼą́ąjįʼ ánítʼé. Ákʼé nináʼályáagi tʼáá aaníigo baa ahééh niidzingo éí doo kótʼéego nitsíikees da doo: ‘Bąąhági átʼéii bidánooshníigo bííníshghahgo átʼé. Ádeeshníił áádóó shá yóóʼanídidootʼááł dideeshniił.’ Ndi bidádahonooníinii aʼdoonííł hwiiniidzı̨́įʼgo  éí kódííniid doo: ‘Éí dooda! Tsʼídá doo ákódeeshníił da, háálá Jiihóvah dóó Jesus tʼóó ahayóígóó shá áátʼįįd.’ Áko Jiihóvah éí adziilii bííníikeed doo, éí ‘bąąhági átʼéii biyiʼjįʼ shiʼóółnííh lágo’ bidiiʼníigo néiniikąąh doo.—Matt. 6:13.

12. 1 John 3:16-18 haitʼéego bikʼehgóó ádiiʼnííł?

¹² Nibrothers dóó nisisters ayóóʼííníʼní. Ákwíitʼı̨́įgo éí ákʼé nináʼályáagi baa ahééh niidzingo átʼé. Háálá doo tʼáá ni tʼéiyá Jesus beʼiiná ná ninéidiníʼą́ą da, ndi nihibrothers dóó nihisisters ałdóʼ yá ninádeetʼą́. (1 John 3:16-18 yíníłtaʼ.) Nihibrothers dóó nihisisters bíká anéiilwoʼgi bee ayóóʼádeíníiʼní. (Eph. 4:29, 31–5:2) Éí łaʼda bitʼah honiigaigo doodaiiʼ yéigo bichʼįʼ hodiiʼnáahgo, éí natural disasters ádaatʼéii bitsʼą́ą́dóó bichʼįʼ hodiiʼnáahgoda bíká adiilwoł. Ndi brother doodaiiʼ sisterda łaʼ doo yáʼátʼéhígi ánihííłʼįįdgoda doodaiiʼ saad doo yáʼátʼéehii yee nihichʼįʼ haadzíiʼgo éí bikʼee niháhóóchįįdgoda, éí haadiiʼnííł?

13. Haʼátʼíí biniyé forgive áʼíilʼı̨́į doo?

¹³ Brother doodaiiʼ sister łaʼ forgive ádíílíiłgi łahdaásh ayóó ná nantłʼa? (Lev. 19:18) Ákótʼéé ládą́ą́ʼ, díí bikʼehgo áʼdoolnííł: “Ałchʼįʼ hadaʼíínółní, łaʼda bichʼįʼ saad dahosoołı̨́įʼgo bił kʼé nídaʼahididoohʼniił; doo ákwii ádaohtʼįįdii Jiihóvah nihá yóóʼiidiiʼaahígi átʼéego doo ákwii ádaʼahołʼı̨́ı̨́ nítʼéeʼii ahá yóóʼadahidohʼaah.” (Col. 3:13, NW) Nihibrother doodaiiʼ nihisister tʼáá forgive ánéiilʼįįh bikʼeh éí ákʼé nináʼályáhígíí baa ahééh niidzingo átʼéegi Nihizhéʼé Jiihóvah bił ííshjání íilʼı̨́. Diyin nihainíláii haitʼéego baa ahééh niidzingo yiidáał doo?

14. Ákʼé nináʼályáhígíí haitʼéego baa ahééh niidzin?

¹⁴ Ákʼé nináʼályáhígíí Jiihóvah bichʼįʼ baa ahééh nínízin. Nihisister Joanna 83 binááhaigo Indiadę́ę́ʼ naagháago ání: “Tʼáá ákwíí jı̨́ sozdilzingo shí baa nitséskeesgo ákʼé nináʼályáhígíí bee háájídzihgo ayóó ílı̨́, áádóó Jiihóvah bichʼįʼ baa ahééh jinízin doo.” Nisodizin bee éí ooʼááł biiʼ niʼiyínísííʼgóó baa nitsíníkeesgo Jiihóvah shá yóóʼanáhidíʼaah bidiníigo bichʼįʼ sodilzin. Ndi, tʼáá yéigo bąąhági átʼéii íínítʼįįdgo bee ádąąh dah hwiinilʼaʼgo éí elders daníistsʼą́ąʼgo níká adoojah. Ayóóʼádanóʼníigo Diyin Bizaad yee nichʼįʼ hadadoodzih  áádóó nił sodadidoolzįįł. Éí Jiihóvah díí bá yóóʼanídíʼaah daaníigo ná nídayookąąh doo. Áko éí Jiihóvah yáʼátʼéehgo bił kʼé ahidiʼnínę́ęgi “doo átʼéhí da” ná áńdeidoodlííł.—Jas. 5:14-16.

15. Ákʼé nináʼílyáhígíí baa ííníiltaʼgo áádóó nabikʼítsíilkeesgo haʼátʼíí biniyé bá náhwiilʼaah doo?

¹⁵ Ákʼé nináʼályáhígíí nabikʼítsíníłkees. Nihisister Rajamani wolyéego 73 binááhaigo ání: “Jesus bichʼįʼ nahwiisnáaʼgi baa ííníshtaʼgo ayóó bikʼee shinákʼeeshtoʼ nídadinah.” Ni shı̨́ı̨́ ałdóʼ tʼáá ákónítʼé Diyin biYeʼ ayóó átʼéego bichʼįʼ nahwiisʼnáaʼgi baa nitsíníkeesgo nijéí ayóó yineesgai. Ndi Jesus naʼádiisʼniiʼígi nabikʼítsíníłkeesgo éí Jesus índa Bizhéʼé ayóóʼííníʼníigo ándoolííł. Ákʼé nináʼílyáhígíí hazhóʼó nabikʼítsíníłkeesgo níká análwoʼ doogo study project bee ádíílííł.

16. Ákʼé nináʼályáhígíí baa nahwiilneʼgo haitʼéego nihíká análwoʼ? (Naaltsoos bikááʼdę́ʼígíí níníłʼı̨́.)

¹⁶ Ákʼé nináʼályáhígíí bee naʼnítin. Ákʼé nináʼályáhígíí baa nahwiilneʼgo éí ayóó baa ahééh niidzin yiidleeh. Naaltsoos bee índa ndaalkidgo éí haʼátʼíí biniyé Jesus nihá daaztsą́ągi hazhóʼó baa hwiilneʼgo yee nihíká análwoʼgo ádaalyaa. Łaʼ éí God Bitsʼą́ą́dę́ę́ʼ Nizhónígo Haneʼ! binaaltsoos bíhwiidooʼáłígíí 4gi éí “Háísh éí Jesus Átʼı̨́?” nínígíí choidiilʼįįł. Doodaiiʼ Diyin Bizaad Nanihinitingo Átʼé wolyéhígíí bíhooʼaah 5 góneʼ éí “Nihikʼé Nináʼílyáagi—God Einílá” nínígíí ałdóʼ naʼniitingi yee nihíká adoolwoł. Áádóó Jesus Daaztsą́ągi Bééhániihgo ánáʼálʼįįhgi neidáago áádóó bíniidlı̨́įgo łaʼda nihaa díínááł bidiiʼníigo éí binahjįʼ ákʼé nináʼályáhígíí ayóó baa ahééh niidzingo ánánihiilʼįįh. Jiihóvah kótʼéego biYeʼ baa nidahwiilneʼgo nihainíláhígíí ayóó baa hózhǫ́!

17. Diyin éí ákʼé nináʼílyáii haʼátʼíí biniyé ayóó átʼéii einíláii átʼé?

¹⁷ Tʼáá ákónéehee éí ákʼé nináʼályáhígíí baa ahééh niidzingo yiidáał doo. Háálá ákʼé nináʼályáagi, éí azhą́ niʼiisíihii niidlı̨́į ndi, áhą́dígo Jiihóvah bikʼis diidleeł. Háálá ákʼé nináʼályáagi, éí Devil yaa naagháii ałtso bitsʼą́ą́ʼ ádooldįįł. (1 John 3:8) Háálá ákʼé nináʼályáagi, éí Jiihóvah nahasdzáán tʼóó átséedi yá yihodeezʼánę́ęígíí bohodoolnííł. Nahasdzáán tʼáá siʼą́ą́ ńtʼééʼ tsʼídá honóoshónígo nidootsił. Tʼáá ałtso diné deíkááh shı̨́ı̨́ Jiihóvah ayóóʼádayóʼníigo yá ndaalʼaʼ doo. Éí bąą Diyin éí ákʼé nináʼílyáii einíláii tʼáá ákwíí jįʼ baa ahééh niidzingo yiidáał doo!