1. Jiihóvah éí bidineʼé haitʼéego yééhósin?

JIIHÓVAH GOD “bidineʼé yaa bił hózhǫ́.” (Ps. 149:4) Éí yáʼátʼéehgo ániitʼéiigi yooʼı̨́ dóó bikʼis diidleełgi nihíká adoolwoł nízin. Áádóó náásgóó ániitʼéii dooleełígíí bił bééhózin. Éí biniinaa tʼáá bikʼehgóó íitʼįįł doo, ákótʼéego éí hoolʼáágóó áhą́dígo bikʼis niidlı̨́į doo!—John 6:44.

2. Haʼátʼíísh biniinaa łaʼ Jiihóvah doo ayóóʼádabóʼníi da danízin?

² Łaʼ ádaaní, Jiihóvah bidineʼé dah yikahígíí ayóóʼáyóʼníigo shił bééhózin. Ákondi shí sizínígi haʼátʼíísh biniinaa Jiihóvah ayóóʼáshóʼníi doo? Haʼátʼíí biniinaa łaʼ ákótʼéego nitsídaakees? Oksana * tʼah nooséłí nilı̨́įgo yéigo tiʼhoozniiʼ. Éí ání: “Baptize áshiʼdilyaa áádóó pioneer silı̨́ʼígíí éí yéigo baa shił hózhǫ́ǫ́ ńtʼééʼ. Ákondi 15 nááhai bikéédóó, ałkʼidą́ą́ʼ atíshiʼdiilyaa yę́ę bénááshniiʼ. Íinisingo éí Jiihóvah doo shaa bił hózhǫ́ǫ da, dóó díí ádahóótʼįįd yę́ę shı̨́ı̨́ biniinaa doo ayóóʼáshóʼníi da niizı̨́ı̨́ʼ.” Yua, pioneer sister nilı̨́ı̨́ léiʼ, ałdóʼ tʼáá ákótʼéego tiʼhoozniiʼ. Éí ání: “Sheʼiinaʼ Jiihóvah baa diníʼą́ éí yaa bił hózhǫ́ǫ doo nisinígíí biniinaa. Ákondi áádę́ęʼgo ayóóʼáshóʼníi dooleełígíí tʼóó daatsʼígo baa nitséskees.”

3. Díí article biiʼ haʼátʼíísh baa ídahodiilʼááł?

³ Díí naakigo sisters baa chʼíhootʼánígíí éí, hódę́ęʼgo Jiihóvah ayóóʼájóʼníi ndi, áádę́ę́ʼ ayóóʼáhóʼnínígíí éí łahda doo joodlą́ą da łeh. Haʼátʼíísh biniinaa Jiihóvah naa aʼááh nízinígíí tʼáá aaníí átʼéego yidíídląął? Jiihóvah doo  ayóóʼáshóʼníi da nínízingo, haʼátʼíísh níká adoolwoł? Díí ndaʼídíkidígíí kʼad łaʼ baa nídadíitʼįįł.

4. Haʼátʼíísh biniinaa Jiihóvah doo ayóóʼánihóʼníi da niidzingo baa hastiʼgo átʼé?

⁴ Jiihóvah ayóóʼánihóʼnínígíí yiniidlą́ągo éí bíniidlı̨́įgo bá neilʼaʼ łeh, azhą́ shı̨́ı̨́ iiná nanitłʼah ndi. Ákondi God doo nihaa ákonízin da niidzingo éí ‘tsʼídá doo danihidziil da.’ (Prov. 24:10) Tʼóó nihaa nináhákaʼgo éí Séítan nihikʼijįʼ naalnishgo, doo bíniildzil da doo.—Eph. 6:16.

5. God doo ayóóʼáshóʼníi da danízinígíí haitʼéego nitsídabiiłkeesgo ádabileʼ?

⁵ Dííshjı̨́įdi ákótʼéego nitsáhákeesígíí biniinaa łaʼ bedaʼoodląʼ yę́ę doo daniłdzilgóó ádeeleʼ. Elder léiʼ James wolyéego ání: “Azhą́ shı̨́ı̨́ Bétheldi naashʼaʼ dóó foreign-language congregationjí atah nahashneʼ ndi, Jiihóvah daatsʼí doo shaa bił hózhǫ́ǫ da niizı̨́ı̨́ʼ. Sodiszingo daatsʼí doo shíistsʼą́ąʼ dago nitséskees.” Eva ałdóʼ Bétheldi naalʼaʼgo ání: “Jiihóvah doo ayóóʼáshóʼníi da hwiindzinígíí éí baa hastiʼgo shił bééhózin. Jiihóvah nizhónígo bá nijilʼaʼ yę́ę doo bízhneedlı̨́į da jileeh.” Michael éí regular pioneer dóó elder nilı̨́įgo kóní: “Jiihóvah doo ayóóʼáshóʼníi da jinízingo éí tʼáadoo baa ákozníziní bitsʼá jidoogáałgo átʼé.”

6. God doo ayóóʼáshóʼníi da niidzingoshąʼ haadiiʼnííł?

⁶ Jiihóvah doo ayóóʼáshóʼníi da hwiindzingo nitsáhákeesígíí éí niheʼoodląʼ yidoołchxǫǫłgo átʼé. Díí átʼéego nitsáhákeesígíí tʼáá akǫ́ǫ́ neʼ kódíílííł. Jiihóvah “bitsʼą́ą́dę́ę́ʼ bee achʼįʼ hózhǫ́ náhásdlı̨́įʼii . . . nihijéí índa nihintsékees yaa áhályą́ą doo.” (Ps. 139:23; Phil. 4:6, 7) Łaʼ nibrothers dóó nisisters tʼáá nigi átʼéego nitsídaakeesgo átʼé. Áádóó tʼáá níléédę́ę́ʼ Jiihóvah yá nidaasʼaʼ yę́ę ndi ákótʼéego baa chʼídahwiistʼą́, éí baa ídahodiilʼááł.

7. Paulshąʼ éí haʼátʼíí bee bichʼįʼ nahwiisnááʼ?

⁷ Łahdaásh naanish naa dadeestʼánígíí ląʼí łeh, áko hazhóʼó ałtso ádíílíiłgi ayóó  ná nantłʼa łeh? Yilʼaadii Paul ałdóʼ tʼáá ákótʼéé ńtʼééʼ. Doo tʼááłáʼí congregation tʼéiyá yąąh bíneʼ da ńtʼééʼ, “daʼoodlání áłah nídaadleehii tʼáá ałtso.” (2 Cor. 11:23-28) Nąąh dah azʼánígíísh biniinaa naa nináháłkaʼ? Paul ałdóʼ bąąh dah azʼą́ą́ ńtʼééʼ. Ni nahalingo shı̨́ı̨́ doo ákóníshtʼée da dooleeł yę́ę chʼééh jinízin ńtʼééʼ. (2 Cor. 12:7-10) Bąąhági átʼéii biiʼ niʼdizhchínígíísh biniinaa naa nináháłkaʼ? Paul ałdóʼ díí ánízin ńtʼééʼ. Áko “Dooládóʼ lá diné hojoobaʼ átʼéii nishłı̨́į da!” łahda jidííniid. Háálá yáʼátʼéehii ádeeshnííł jinízinígíí chʼééh bíká ájítʼı̨́.—Rom. 7:21-24.

8. Azhą́ shı̨́ı̨́ Paul bichʼįʼ nahwiisʼnáaʼ ndi, haʼátʼíísh bíká eelwod?

⁸ Azhą́ shı̨́ı̨́ Paul díí átʼéego bił hazʼą́ą́ ńtʼéeʼ ndi, Jiihóvah tʼáá yá naalʼaʼ ńtʼééʼ. Haʼátʼíísh éí bee dzíłdzil ńtʼééʼ? Doo hadaałtʼéii jílı̨́į da ndi Jesus há nináʼádeetʼánígíí binahjįʼ hweʼoodląʼ tʼáadoo ninázhdiníʼą́ą da. Jesus “tʼáá háiida boodlą́ągo baa dzólíhígíí éí . . . iiná doo ninítʼiʼii bee hólǫ́ǫ dooleeł” níigo yee ádee haadzííʼ yę́ę yoodlą́ą́ ńtʼééʼ. (John 3:16; Rom. 6:23) Azhą́ shı̨́ı̨́ yéigo bąąhági ádeiidzaa ndi, baa náʼiikąąhgo éí Jiihóvah nihaa nídideeshʼááł nízin.—Ps. 86:5.

9. Galatians 2:20gi Paul ádííniid yę́ę haʼátʼíí bitsʼą́ą́dóó bídahodiilʼááł?

⁹ Paul éí ‘Diyin God biYeʼ ayóóʼáshóʼníigo shá daaztsą́’ nínígíí binahjįʼ doo bił naaki nilı̨́ı̨́góó ábiilaa. (Galatians 2:20 yíníłtaʼ.) Diné doo yáʼátʼéehii, doo nílı̨́ı̨́góó ádaa nitsíkees da ńtʼééʼ. Paul éí Rome dineʼé kóyidííniid: “Tʼahdii bąąhági ááníiłii daniidlı̨́ı̨́ nítʼééʼ yę́ędą́ą́ʼ Christ nihá daaztsą́.” (Rom. 5:8) God ayóóʼánihóʼníigi tsʼídá tʼáadoo yidínóołtłʼahí da.

10. Romans 8:38, 39 haʼátʼíí bitsʼą́ą́dóó ídahwiilʼą́ą́ʼ?

¹⁰ Romans 8:38, 39 yíníłtaʼ. Paul éí God beʼayóóʼóʼóoʼniʼ bidziilígíí bił bééhózin. Díí ání: “Diyin God yee ayóóʼánihóʼníinii . . . yitsʼánihidooniłgi doo yídaneelʼą́ą da.” Jiihóvah éí Ízrel dineʼé nízaadgóó yaa joozbaʼ ńtʼééʼ yę́ę, Paul bił bééhózin. Áádóó tʼáá bí sizínígi Jiihóvah haa níjoozbaʼígíí ałdóʼ yił ółtaʼ. Áko kójíní nahalin, Jiihóvah “tʼáá bí biYeʼ doo ánéísįįdgóó tʼáá áníiltso nihá ninéidiníʼą́,” áko haʼátʼíí biniyé éí doo yinishdlą́ą da doo?—Rom. 8:32.

11. 1 Timothy 1:12-15gi Paul niʼiisíiʼgo baa chʼíhootʼą́ą ndi, God ayóóʼábóʼníí ńtʼééʼígíí haitʼéego nihił bééhózin?

 ¹¹ ◌1 Timothy 1:12-15 yíníłtaʼ. Paul tʼahdoo Oodlání yileeh yę́ędą́ą́ʼ ájíítʼįįd yę́ę shı̨́ı̨́ bąąh hániʼ ńtʼééʼ. Áko “tsʼídá aláahgo” ádił niʼiisíihii nishłı̨́ jidííniid. Tʼáá aaníinii tʼah doo yíhoołʼaah yę́ędą́ą́ʼ, kin hadaasʼáágóó Oodlání danilíinii atííłʼı̨́ı̨́ ńtʼééʼ. Łaʼ awáalya góneʼ adabidiʼnilgo, doodaiiʼ á nidahwiiʼaahii díí nidabidiʼdooltsił daaniihgo yikééʼ sizı̨́ı̨́ ńtʼééʼ. (Acts 26:10, 11) Áko hó honiinaa Oodlání ániid naaghá léiʼ bimá dóó bizhéʼé ádingo shı̨́ı̨́ biniinaa bąąh hániʼ ńtʼééʼ. Áko ałkʼidą́ą́ʼ niʼjiisííʼ yę́ę bikʼee yínííł jílı̨́į ndi, kʼad łah ánízhdoodlíiłgi doo bíighah daígíí hoł bééhózin. Jesus há nináʼádeetʼánígíí tʼéí binahjįʼ kójidííniid: “Kʼad áníshtʼéhígíí éí Diyin God shaa joobaʼgo áníshtʼé.” (1 Cor. 15:3, 10) Haʼátʼíísh éí bitsʼą́ą́dóó íhodiilʼááł? Jesus nihá ádinígíí nił ílı̨́įgo ánílééh. Éí binahjįʼ Jiihóvah áhą́dígo bikʼis nílı̨́į doo. (Acts 3:19) Kʼad dóó náásgóó íitʼįįłgi éí God bił ílı̨́. Ałkʼidą́ą́ʼ nidaʼayeelzííʼ yę́ę éí ndagaʼ, azhą́ shı̨́ı̨́ Jiihóvah Yá Dahalneʼé daniidlı̨́įgo ádeiidzaa ndi, doodaiiʼ níwohdą́ąʼ da.—Isa. 1:18.

12. Doo yáʼáshǫ́ǫ́góó ádaa nitsíikeesgo haash yitʼéego 1 John 3:19, 20 nihíká análwoʼ doo?

¹² Jesus éí nidaʼayiilzííʼ yę́ę biniinaa nihá nináʼádeetʼánígíí éí shí doo bą́ą́h anishłı̨́į da nínízingoshąʼ? Łahda shı̨́ı̨́ nihijéí bąąhági ániitʼé nihiłníi łeh, biniinaada doo bą́ą́h aniidlı̨́ı̨́góó nitsíikees łeh. (1 John 3:19, 20 yíníłtaʼ.) Áádóó Jesus nihá nináʼádeetʼą́ yę́ę éí ni, nibąąhági átʼéii doo bikʼístiʼgóó nitsíníkeesgo ánániilʼįįh. Ákótʼéego nitsíníkees  ládą́ą́ʼ díí béénílniih: “Diyin God éí nihijéí biláahdi ayóó átʼéii” nilı̨́. Jiihóvah éí tʼáadoo nídí ayóóʼánihóʼní, dóó nihibąąhági átʼéii nihaa néiidiyiiʼaah. Diyin Bizaad tʼáá áłahájįʼ yíníiltaʼgo, bidineʼé bił neildeehgo, dóó tʼáá ahą́ą́h sodiilzingo éí Jiihóvah haitʼéego íiyisí nihaa nitsíkeesígíí bééhózíní yileeh. Díí ádeetʼı̨́įgo éísh haʼátʼíí biniyé ayóó ílı̨́?

13. Diyin Bizaad yíníiltaʼgo haitʼéego nihíká análwoʼ? (“ Diyin Bizaad Díí Átʼéego Bíká Anídaalwoʼ” ałdóʼ níníłʼı̨́.)

¹³ Tʼáá ákwíí jı̨́ Diyin Bizaad yíníłtaʼ, ákótʼéego éí Jiihóvah tʼáá ałtso bee bééhoʼdílzinii hazhóʼó bikʼiʼdidíítı̨́ı̨́ł. Diyin Bizaad jółtaʼgo hániʼ dóó hajéí ‘kʼéhézdongo nináyiilóós.’ (2 Tim. 3:16) Elder léiʼ Kevin wolyé, éí doo ajílı̨́ı̨́góó ádaa nitsíjíkeesgo ájíní: “Psalm 103 yíníshtaʼgo shíniʼ hashtʼeʼ nináyiiłkees, dóó haitʼéego Jiihóvah íiyisí shaa nitsíkeesígíí hazhóʼó bikʼiʼdiyiishtįįh.” Eva baa chʼíhootʼánę́ę ałdóʼ ání: “Jiihóvah bił daʼílíinii dóó haʼátʼíí nabiiłnáagi nabikʼítséskeesgo shijéí bił hodéezyéelgo ánáshiilʼįįh. Áádóó binahjįʼ sheʼoodląʼ dínísééh ní.”

14. Sodizin éí haitʼéego nihíká análwoʼ?

¹⁴ Tʼáá áłahjįʼ sodílzin. (1 Thess. 5:17) Háiida hakʼis ázhdoolííł jinízingo tʼáá áłahjįʼ bichʼįʼ yájíłtiʼ doo, yee hwééhodoosįłígíí bee bił hojilneʼ doo. Jiihóvah nihikʼis nilı̨́įgi ałdóʼ tʼáá ákótʼé. Tʼáá ałtsoní baa nitsíikeesgi, nihidaʼdiiłʼáhígíí ndi bee bichʼįʼ sodiilzin doo. Ákótʼéego éí baʼííníidlí áádóó ayóóʼánihóʼnínígíí yiniidlą́. (Ps. 94:17-19; 1 John 5:14, 15) Yua baa chʼíhootʼánę́ę ałdóʼ ání: “Jiihóvah bichʼįʼ sodiszingo doo éí díísh jı̨́ ádahóótʼįįdígíí tʼéiyá bee bił hashneʼ da. Tʼáá ałtso baa nitséskeesígíí dóó áníshtʼéegi bee bichʼįʼ yáshtiʼ. Áko doo tʼóó naatʼáanii akʼi bóhólníihii nilı̨́įgo baa nitséskees da, ndi Azhéʼé baʼáłchíní ayóóʼáyóʼníigo bééhosésįįd.”—“Díísh Tʼáá Íídą́ą́ʼ Yíníłtaʼ?” níníłʼı̨́.

15. Tʼááłáʼí niitínígo haash yitʼéego Jiihóvah nihaa áhályą́?

¹⁵ Danihikʼisóó bił honílǫ́; éí Jiihóvah bitsʼą́ą́dę́ę́ʼ danilı̨́. (Jas. 1:17) Jiihóvah éí nihibrothers dóó nihisisters éí “tʼáá áłahjįʼ” ayóóʼádanihóʼníigo yee nihaa joozbaʼ. (Prov. 17:17) Paul éí naaltsoos Colossians áyiilaago ákweʼé łaʼ bíká ííjééʼígíí yitaa íízhiʼ. Éí díí átʼéego yaa haadzííʼ, “bee shił náhoojǫǫłii danilı̨́.” (Col. 4:10, 11) Christ Jesus ndi bikʼis dóó níłchʼigo ndaalʼaʼí bíká adahaazhjéʼígíí ayóó yaa ahééh niizı̨́ı̨́ʼ.—Luke 22:28, 43.

16. Jiihóvah áhą́digo bił niidlı̨́į dooígi, haash yitʼéego éí danihikʼisóó yee nihíká anídaajah?

 ¹⁶ Áłah náʼádleehgi danikʼis níká adoojahgóosh bíká díníʼı̨́įʼ łeh? Ákweʼé dahóyánígíí łaʼ nihidaʼdiiłʼáhígíí bee bichʼįʼ haidzihgo, doo éí niheʼoodląʼ doo bidziilígíí biniinaa da, ndi nihaa áháyą́. James baa chʼíhootʼánę́ę ání: “Oodlání dahóyáanii bił honishłǫ́ǫgo ayóó shíká anídaajah. Doo ákweʼé nitséskeesgo dashíistsʼą́ąʼ łeh, dóó ayóóʼádashóʼnínígíí shił ííshjání ánídayiiłʼįįh. Éí binahjįʼ Jiihóvah ayóóʼáshóʼnínígíí dóó shaa aʼááh nízinígíí shił bééhózin.” Éí biniinaa nihibrothers dóó nihisisters áhą́digo bił daniidlı̨́įgo ayóó ílı̨́.

17-18. Háísh éí yiniidlą́ą doo, dóó haʼátʼíí biniyé?

¹⁷ Séítan éí tʼáá ákogi ádeiʼníiłgi nidadiiltʼih nihóʼní. Éí Jiihóvah doo ayóóʼánihóʼníi da, dóó doo bą́ą́h inishłíní da niidzin doogo nihá yinízin. Éí tsʼídá doo ákótʼée da.

¹⁸ Jiihóvah tʼáá aaníí ayóóʼánóʼní. Tʼáá íiyisí anílı̨́įgo éí hoolʼáágóó ‘beʼayóóʼóʼóʼniʼ biiʼ dahoniidlǫ́ǫ doo,’ tʼáá Jesus nahalingo. (John 15:10) Éí biniinaa Séítan dóó tʼáá nijéí ndi tʼáadoo yíísíníłtsʼą́ʼí. Ndi, Jiihóvah tʼááłáʼí niitínígo nihiníłʼínígíí yíísíníłtsʼą́ą́ʼ! Jiihóvah éí ni dóó “bidineʼé yaa bił hózhǫ́”, díí éí tʼáá aaníigo yinídlą́!