Matthew dóó Luke éí Jesus biʼdizhchı̨́įgi dóó tʼah ániid naagháago ałʼąą átʼéego yaa hoolneʼ. Tʼáá ájíłah éí łaʼ nizhdiltʼéego bintsékees dóó áátʼįįdgi íiyisíí yaa hoolneʼ.

Matthew éí Jóseph ábiʼdoolʼįįd yę́ęgi yaa halneʼ. Éí Mary iʼniiltsąądgo hoł bééhoozingo bikʼee ájiidzaagi, nijiiyeełgo diyingo bá naalʼaʼí łaʼ díí hazhóʼó yee hoł hoolneʼ, áádóó bikʼehgóó ájiidzaagi baa haneʼ. (Matthew 1:​19-25) Áádóó Jóseph nijiiyeełgo diyingo bá naalʼaʼí tsxı̨́įłgo Ííjipgóó dohkááh hodííniid, akʼeh hojííłʼįįdgi baa haneʼ. Matthew ánáázhdíʼníigo Jóseph nináájiizyeelgo diyingo naalʼaʼí ánááhodooʼniidgo Ízrelgóó nihéénóhkááh. Ákǫ́ǫ́ nijíkai, éí Názarethgi kééhwiitʼı̨́į doo jiniizı̨́ı̨́ʼ. (Matthew 2:​13, 14, 19-23) Matthew binaaltsoos áłtsé naakigo wóltaʼígíí éí Jóseph bízhiʼ 8di chʼíiníʼą́, Mary éí tʼáá 6ídi chʼíiníʼą́.

Luke éí Mary íiyisíí baa hojólneʼ. Éí diyingo naalʼaʼí Géíbriyel wolyéego Mary yaa níyáhą́ągi, Mary bikʼéí Elízabeth yichʼįʼ naayáhą́ągi, dóó Mary éí Jiihóvah yaa haznih yę́ęgi baa haneʼ. (Luke 1:​26-56) Jesus tiʼhwiidoonihgi, Símiyan éí Mary bee bił hojoolneʼgi yaa halneʼ. Jesus éí índída 12 binááhaigo Jiihóvah bikin biiʼ sohodizingóó bizhéʼé dóó bimá yił yíkai yę́ęgi yaa halneʼ. Éí kweʼé Mary ádííniid yę́ęgi Luke bikʼínizhnínil, Jóseph ádííniidígíí éí tʼáadoo da. Díí áhóótʼįįdígíí Mary tʼáadoo yaa yooznah daígi baa hojoolneʼ. (Luke 2:​19, 34, 35, 48, 51) Luke binaaltsoos áłtsé naakigo wóltaʼígíí éí Mary bízhiʼ 17di chʼíiníʼą́, Jóseph éí tʼáá 7ídi chʼíiníʼą́. Matthew éí Jóseph bińtsékees dóó áátʼįįdgi íiyisíí yaa hoolneʼ. Luke éí Mary bińtsékees dóó áátʼįįdgi yaa hoolneʼ.

Jesus bitsʼą́ą́dóó biʼdizhchínígíí ałdóʼ Matthew dóó Luke ałʼąą átʼéego yaa hoolneʼ. Matthew éí Jóseph biʼdizhchı̨́ı̨́dę́ę́ʼ ałkééʼ niinínil. Jesus éí Jóseph hazhéʼé ajíłʼíinii nilı̨́įgo David binahatʼaʼ bee hazʼáanii binahjįʼ hó. Éí haitʼéego hó? Jó Jóseph éí Naatʼáanii David bá yizhchíinii Sálaman bitsʼą́ą́dóó hoʼdizhchı̨́. (Matthew 1:​6, 16) Ndi Luke éí Mary bitsʼą́ą́dóó biʼdizhchíinii ałkééʼ niinínil. Áko Jesus éí “David baʼáłchíní ahoolchíiłii bitsʼą́ą́dóó diné” jílı̨́įgi David binahatʼaʼ éí hoʼdizhchı̨́ı̨́dę́ę́ʼ binahjįʼ hó, díí baa hojólneʼ. (Romans 1:3) Éí haitʼéego hó? Jó Mary éí Naatʼáanii David há yizhchíinii Néíthan bitsʼą́ą́dóó hoʼdizhchı̨́. (Luke 3:31) Ndi haʼátʼíí biniyé Luke éí Mary, Híílai bitsiʼ jílı̨́ jiníigo tʼáadoo ájiilaa da? Jó ałkʼidą́ą́ʼ éí hoʼdoochííłdę́ę́ʼ naaltsoos ałkééʼ danéedéehgo éí hastóí bízhiʼígíí naaltsoos bikááʼ nidahaʼnííł ńtʼééʼ. Áko Luke éí Jóseph, Híílai biyeʼ yidííniid, íídą́ą́ʼ diné yikʼidaʼdiitą́ągo Jóseph éí Híílai yaadaaní nilı̨́.—Luke 3:23.

Matthew dóó Luke éí Jesus bitsʼą́ą́dóó biʼdizhchíinii ałkééʼ niinínilgi bee bééhózingo God éí Mesáíyah doogááł nínę́ę éí Jesus átʼı̨́. Jesus éí Naatʼáanii David yitsʼą́ą́dóó yigáałii nilı̨́įgi diné bił béédahozin, Férisiiz dóó Sádjusiiz ałdóʼ doo bił naaki danilíi da ńtʼééʼ. Matthew dóó Luke éí Jesus bitsʼą́ą́dóó biʼdizhchíinii yaa hoolneʼgi niheʼoodląʼ bidziilgo ánáyoodlííł, áádóó tʼáá ałtso God yee ádee hahaasdzííʼ yę́ę tʼáá aaníigo bohodoolníiłgo deiniidlą́.