1. Aizéíyah éí Jesus Christ haitʼéego yaa chʼíhoníʼą́? Díí haʼátʼíí biniyé bee hadaʼííníilní?

AIZÉÍYAH éí Jesus Christ kótʼée dooleeł níigo yaa chʼíhoníʼánę́ę bee hadaʼííníilní, dóó nihił chodahooʼı̨́įgo ádanihósin. Aizéíyah áníigo Jesus éí “dayiiłtseʼígíí bikʼehgo doo einítʼı̨́į da doo, índa yidiitsʼaʼii bikʼehgo doo ánihwiiʼaah da doo, nidi badahojoobáʼíii tsʼídá tʼáá ákwii átʼéego yikʼi hadidoodzih.” (Isaiah 11:3, 4) Díí haʼátʼíí biniyé bee hadaʼííníilní? Diné joodláago bitah kééhwiitʼı̨́, áko dayiiłtseʼii bikʼehgo yee aa nídaatʼı̨́. Tsʼídá yáʼátʼéehii Ánihwiiʼaahii Jesus daniidzin, éí doo tʼóó dzólníígóó ánihwiiʼaah da doo!

2. Jesus éí haʼátʼíí nihidííniid? Haʼátʼíí baa nídadíitʼįįł?

² Jesus átʼéiigi doo ádaniitʼée da, áko kótʼé diiʼníigi doo áłahjįʼ yáʼátʼéeh da. Deiitʼíinii éí doo nihá ndanitłʼagóó bee kótʼé dadiiʼníi łeh. Jesus ánihidííniid: “Tʼóó dzólníígóó tʼáadoo ándahoyohʼaahí, nidi tʼáá ákogi átʼéego  ándahoyohʼaah.” (John 7:24) Jesus éí shígi átʼéego nitsídaakees nihiłní. Díí biiʼdóó éí tááʼ áłʼąą átʼéego shí kótʼéego baa nitséskees haʼníigi baa nídadíitʼįįł: diné dóoneʼé nilı̨́įgi, bibéeso haa néelą́ąʼgi, áádóó binááhaigi. Díí bitsʼą́ą́dóó éí haitʼéego Jesus bikʼeh ádaniitʼée doo, áádóó tʼáadoo tʼóó dzólníígóó kótʼé dadiiʼníní doo.

3, 4. (a) Peter éí haʼátʼíí biniyé doo Jew danilíinii łah átʼéego yaa tsíńdeezkééz? (Áłtsé naashchʼąąʼígíí níníłʼı̨́.) (b) Haʼátʼíí łah ánáánátʼéhígíí Jiihóvah éí Peter yee neineeztą́ą́ʼ?

³ Yilʼaadii Peter éí doo Jew dineʼé danilíinii doo yáʼádaashǫ́ǫ da hodiʼníigo hayaa hooʼaʼ. Peter éí Sesaríyagóó doo Jew dineʼé nilı̨́ı̨́góó Korníílyas bichʼįʼ díínááł hodóʼníigo, haajiidzaa nínízin? (Acts 10:17-29) Ániid áhóótʼįįdgo biniinaa łah átʼéego tsízdeezkééz. Éísh haʼátʼíí áhóótʼįįd? Éí God bitsʼą́ą́dę́ę́ʼ hoł áhátʼı̨́įgo áhoolaa. (Acts 10:9-16) Peter éí níbaal nahalingo yádiłhił biiʼdę́ę́ʼ niʼjįʼ nahííłtsoozgo nidaaldlooshii doo yáʼádaatʼéehii biyiʼgo jiiłtsą́. Iinééʼ jidiiztsʼą́ąʼgo ání: “Nídiidááh, Peter; łaʼ naniłtseed áádóó ílghał.” Táaʼdi, Peter éí dooda jiní. Áádóó iinééʼ ánáhodooʼniid: “Diyin God haʼátʼíhída hashtʼeyiilaii tʼáadoo tʼáá bóhólníhígíí átʼé bidiníní.” Peter kóhódiʼníigo tʼáadoo bikʼizhʼdiitą́ą da. Níłchʼi diyinii éí Peter, Korníílyas bighangóó ahóółʼaʼ, áko akǫ́ǫ́ dashdiiyá.

⁴ Jew dineʼé éí doo Jew danilíinii bighangóó doo ndaakai da ńtʼééʼ. Peter éí “tʼóó dzólníígóó” diné ánoolingi bee aa níjítʼı̨́įgo éí Korníílyas bighangóó doo jiníyáa da doo ńtʼééʼ. Áko haʼátʼíí biniyé Peter akǫ́ǫ́ níyá? Diyin bitsʼą́ą́dóó hoł áhóótʼįįdgi áádóó níłchʼi diyinii ahóółʼaʼgo binahjįʼ łah átʼéego tsízdeezkééz. Peter éí Korníílyas jíistsʼą́ąʼgo áádóó ájíní: “Kʼad tʼáá aaníí shił bééhoozin, Diyin God doo ałʼohgo diné yaa nitsíkees da. Nidi ałʼąą dineʼé bitahdę́ę́ʼ tʼáá háiida hodísin áádóó tʼáá ákogi ááníłígíí tʼéiyá ádeidiitʼaah.” (Acts 10:34, 35) Kótʼéego ánáá ályaago Peter baa bił hóozhǫǫd, áko kʼad Oodlání bídadéétʼiʼ dooleeł. Éí haitʼéego bídadéétʼiʼ doo?

5. (a) Jiihóvah éí Oodlání haʼátʼíí hoł béédahózin doo nízin? (b)  Tʼáá aaníinii naʼnitin nihił bééhózin ndi, haitʼéego tʼahdii nitsíikeesgo átʼé?

⁵ Jiihóvah éí diné doo ałʼohgo yaa nitsíkeesgi Oodlání tʼáá ałtso baa ákodazdínóozįįł biniyé Peter choyoosʼı̨́ı̨́d. Jiihóvah éí dóoneʼé niidlı̨́įgi, ałʼąą ániitʼéegi, doodaiiʼ nihizaad doo yee nihinéłʼı̨́į da. God bikʼeh hółʼíinii ádeidiitʼaah. (Galatians 3:26-28; Revelation 7:9, 10) Díí shı̨́ı̨́ tʼáá íídą́ą́ʼ nił bééhózin. Diné joodláago niyaa hooʼaʼgoshąʼ? Azhą́ shı̨́ı̨́ shí yeeʼ doo ákóníshtʼée  da nínízin ndi, łahgoósh tʼahdii tʼáá ákónítʼéego átʼé? Azhą́ Peter éí God doo ałʼohgo diné yaa nitsíkees da níigo yee áká eelwod ndi, hó éí tʼahdii tʼáá ákójítʼéé ńtʼééʼ. (Galatians 2:11-14) Áko haitʼéego éí Jesus bikʼehgóó ádaniitʼée doo, áádóó tʼóó dzólníígóó tʼáadoo aa nídeiitʼíní doo?

6. (a) Diné joodláagi haitʼéego nahjįʼ kódiilnííł? (b) Elder jílı̨́įgo haitʼéego bee ííshjání ázhdiilyaa?

⁶ Dinéésh tʼahdii jiniidláago átʼé? Diyin Bizaad biiʼdóó bíhwiilʼaahii díí átʼéégóó ahaah neinil doo. (Psalm 119:105) Diné daatsʼí tʼahdii jiiníłáago bee shaa ákohwiindzingo doo bee ádaa ákonínízin da, diiʼníigo nihikʼis łaʼ nabídíilkid doo. (Galatians 2:11, 14) Díí shı̨́ı̨́ doo bee ádaa ákoniidzin dago átʼé! Elder nilı̨́įgo díí bee bichʼįʼ anáhóótʼiʼ. Éí full-time Jiihóvah yá naalʼaʼii nilı̨́įgo kóníigo yaa halneʼ. Ahastiin nilínígíí éí dóoneʼé łahdę́ę́ʼ doo daʼjílı̨́į dago haa nitsáhákeesii bitsʼą́ą́dóó joogááł. Elder nilínígíí éí díí ahastiin ląʼígóó yáʼátʼéehgo baa hojoolneʼ, ndi ałdóʼ kójíní: “Dóoneʼé baaʼihgo doo dajílı̨́ı̨́góó haa nitsídahakeesii díí brother bitsʼą́ą́dóó joogááł, ndi há áhwiinítʼı̨́įgi dóó hweʼiinaʼ siláagi éí doo ákójítʼée da.” Díí haʼátʼíí bitsʼą́ą́dóó íhooʼaah? Haʼátʼéegi shı̨́ı̨́ Jiihóvah bá neilʼaʼ, ndi diné joodláagi bee ádaa ákoniidzingo éí bee shíká aʼdoowoł niidzin doo. Haʼátʼíí ałdóʼ ádiiʼnííł?

7 “Nihijéí tłʼááhdę́ę́ʼ [ayóóʼíʼííníʼníigo]” haitʼéego ádíílííł?

⁷ “Nihijéí tłʼááhdę́ę́ʼ [ayóóʼíʼííníʼníigo]” éí diné joodláagi nihiiʼ ádin doo. (2 Corinthians 6:11-13) Tʼáá ni nidineʼé danilínígíísh tʼéiyá bił ahínéekahgo nił yáʼátʼééh? Náánáłahdę́ę́ʼ dineʼé danílínígíí bił ahínéekahgo yáʼátʼéeh doo. Hootahgóó nidahodiilnih bidiiʼníida doo. Doodaiiʼ nighandida shił daʼdoosı̨́ı̨́ł, doodaiiʼ tʼóó ahíídiikahda bidííniid. (Acts 16:14, 15) Nijéí ayóóʼóʼóʼní bee hadeezbin doo, diné joodláagi doo bá hazʼą́ą da doo. “Tʼóó dzólníígóó” aa néitʼı̨́įgi, łahgo baa nínáádadíitʼįįł.

8. Leviticus 19:15 haʼátʼíí bitsʼą́ą́dóó íhooʼaah?

⁸ Diné daʼatʼíinii índa bahojoobáʼíii haitʼéego baa nitsíníkees? Leviticus 19:15 ání: “Doo tʼáá ákogi átʼéii bee tʼáadoo á nihodiyíʼaahí; diné bahojoobáʼíii tʼáadoo aʼohgo nił nilíní, doodaiiʼ diné ayóó átʼéii tʼáadoo aʼohgo nił nilíní, nidi tʼáá ákogi átʼéego bił kééhótʼíinii bá nihodiyíʼaah.” Diné atʼı̨́įgi doodaiiʼ bahojoobáʼígo baa nitsíikeesgi haitʼéego nihídéétʼiʼ?

9. Sálaman haʼátʼíí níigo áʼiilaa, áádóó haʼátʼíí yee naʼnitin?

⁹ Sálaman éí kóníigo áʼiilaa: “Bahojoobáʼíii yił kééhatʼíinii nidi, bá doolnih, nidi diné atʼíinii éí bikʼisóó tʼóó  ahayóí.” (Proverbs 14:20) Díí haʼátʼíí yee naʼnitin? Doo bee ádaa áhwiilyą́ą́góogo nihibrothers daʼatʼíinii tʼéiyá danihikʼis niidzin doo, bahojoobáʼíii éí ndagaʼ. Diné bee dahólóonii doodaiiʼ bee ádaadinii ádaatʼéii bee níilʼı̨́į dooleełgi haʼátʼíí biniinaa bááhádzid?

10. James éí Oodlání haʼátʼíí bee bichʼįʼ anídahaztʼiʼii yee yichʼįʼ haadzííʼ?

¹⁰ Nihibrothers kótʼéego bee danihikʼisgo ałtsʼaʼaldahgo ádiilnííł. Ałkʼidą́ą́ʼ kótʼéego nihibrothers bił dahooʼaʼ. James kóníigo bikʼis yichʼįʼ áʼiilaa. (James 2:1-4 yíníłtaʼ.) Kótʼéego ałtsʼaʼaldah dooleełgo tʼáadoo bá hosiilʼání doo. Haitʼéego tʼáadoo kóniitʼéhí doo?

11. Diné bee hólóonii éí Jiihóvah yił kʼé ahidiʼníigi éísh bee níilʼı̨́į doo? Łaʼ baa chʼíhoníʼą́.

¹¹ Jiihóvah diné yaa nitsíkeesígi átʼéego nihí ałdóʼ ákótʼéego diné baa nitsíikees doo. Diné atʼı̨́įgo doodaiiʼ bahojoobáʼí ndi Jiihóvah éí ayóóʼáyóʼní. Jesus tʼáá aaníi áníigo éí “diné atʼíinii yáʼąąshii bee bóhólníihgo bił hazʼáanii yiih doogáłígíí bá niłdzil,” ndi éí doo há bohónéedzą́ą da, doo níi da. (Matthew 19:23) Ałdóʼ ání: “Nihadahojoobáʼíígíí nihikʼidahojidlí, háálá Diyin God bee bóhólníihgo bił hazʼáanii  éí danihííʼ.” (Luke 6:20) Jesus éí badahojoobáʼíii daʼíistsʼą́ąʼ doo, doo níi da. Ląʼí badahojoobáʼíii tʼáadoo Jesus yikééʼ dahidiikah da. Áko diné bee hólóonii éí Jiihóvah yił kʼé ahidiʼníigi doo bee níilʼı̨́į da doo.

12. Daʼatʼíinii índa badahojoobáʼíii Diyin Bizaad haitʼéego yee naʼnitin?

¹² Jiihóvah bidineʼé łaʼ daʼatʼı̨́ áádóó łaʼ badahojoobáʼí. Tʼáá átʼé éí Jiihóvah ayóóʼádayóʼníigo yá ndaalʼaʼ. Diyin Bizaad éí diné daʼatʼíinii kwííłní, “naalyeʼé áádįįłii tʼáadoo baa dadzíínóhłíhí, nidi Diyin God” baa dadzíínóhłí. (1 Timothy 6:17-19 yíníłtaʼ.) Áádóó ałdóʼ áníigo Jiihóvah yá ndaalʼaʼígíí tʼáá altso, daʼatʼíinii índa badahojoobáʼíii béeso tʼáadoo bíchą́deízhdéelniʼí doo. (1 Timothy 6:9, 10) Jiihóvah bidineʼé yaa nitsíkeesígi átʼéego nihí ałdóʼ ákótʼéego baa nitsídeikeesgo éí bee dahólóonii doo bee níilʼı̨́į da doo. Diné béédááhaígíí shąʼ? Éísh ałdóʼ bee níilʼı̨́į doo?

13. Náás daazlı̨́įʼii nihił danilı̨́į dooígi Diyin Bizaad haitʼéego yee naʼnitin?

¹³ Diyin Bizaad éí náás daazlı̨́įʼii nihił danilı̨́ nihiłní. Leviticus 19:32 ání: “Bitsiiʼ deigaii bidááhdóó nídaohdzįįh, áádóó hastóí hadaastihii nihił danilı̨́, índa nihiDiyin God dadíínóhsin; jó, shí Bóhólníihii [Jiihóvah] nishłı̨́.” Proverbs 16:31 ání: “Diné bitsiiʼ yiigaii éí naatʼá chʼah bee aa haʼniihii átʼé; éí tʼáá ákogi átʼéego honítʼiʼgóó hináago bééhózin.” Paul éí Timothy hastóí danilíinii nił nilı̨́ éí nizhéʼé danilı̨́ nahalingo bichʼįʼ yáníłtiʼ, yidííniid. (1 Timothy 5:1, 2) Azhą́ shı̨́ı̨́ Timothy éí hakʼis halą́ąjįʼ ndaakai ndi, ląʼígóó íhólnííh hąąh siláago tʼáá áłahájįʼ éí jijoobaʼ dóó hoł ílı̨́į doo.

14. Łaʼda tʼáá nihilą́ąjįʼ naagháago haitʼéego bíká adiilwoł?

¹⁴ Łaʼda tʼáá nihilą́ąjįʼ naagháago bąąhági ááníiłgoshąʼ? Áádóó náánáłaʼda tįʼ yiłníigo bąąhági átʼée ádiiʼnííł yiłníigo shąʼ? Isaiah 65:20 ání: “Bąąhági ááníiłii neeznádiin binááhaigo . . . hóyéeʼgo bá haʼoodzíiʼgo” átʼé. Iizííkiyel ałdóʼ tʼáá ákóní. (Ezekiel 9:5-7) Azhą́ náás dajizlı̨́įʼgo ił ídlı̨́ dahodóʼníi ndi, bąąhági ádajooníiłgi Jiihóvah doo tʼóó há yee hasʼą́ą da. Íiyisíí ílíinii éí Jiihóvah Asʼahdę́ę́ʼ Bíyoołkáałii nihił nilı̨́į doo. (Daniel 7:9, 10, 13, 14) Jiihóvah nihił nilı̨́įgo éí łaʼda díkwíí shı̨́ı̨́ binááhai ndi bąąhági ááníiłgo bichʼįʼ hadiidzihgo bíká adiilwoł.​—Galatians 6:1.

15. Paul éí ániid ndaakai nihił danílı̨́ nínę́ęgi haʼátʼíí bitsʼą́ą́dóó íhooʼaah?

¹⁵ Nihibrother nihikééʼdóó naagháagoshąʼ? Éísh ił ídlı̨́ bá hwiindzin? Aooʼ. Paul éí Timothy yichʼįʼ áʼiilaa: “Ániid nanináhígíí biniinaa tʼáadoo nílínígóó doo łaʼda naa nitsíkees da doo, nidi yáʼátʼéehgo yáníłtiʼ áádóó bohónéedzą́ągo áánííł, tʼáá ałtsojįʼ ayóóʼíʼííníʼníigo, . . . iinídlą́ągo, tsʼídá tʼáá ákogi ánítʼéego, kónítʼéego daʼoodlání yikʼehgo dayíkáah dooleełii bá íínísin.” (1 Timothy 4:12) Timothy shı̨́ı̨́ 30 binááhaigo Paul naanish  ílíinii hąąh niinílá. Haʼátʼíí bitsʼą́ą́dóó íhooʼaah? Nihibrothers ániid ndaakai béédááhaigi doo bee níilʼı̨́į da doo. Jesus índída 33 binááhaigo áátʼįįd yę́ę baa nitsíníkees!

16, 17. (a) Elders éí nihibrothers łaʼ bikʼi hodidooniiʼgo haitʼéego ádaʼiiłʼįįh? (b) Tʼáá nihí nitsíikeesgi doodaiiʼ nihee bee óʼoolʼįįłii bee haitʼéego Diyin Bizaad bikʼijįʼ niidlı̨́į doo?

¹⁶ Łahgóó éí ániid ndaakaii doo bił ídlı̨́į da. Áko biniinaa elders łaʼ díí ániid ndaakaii, azhą́ bá adahwiiztʼiʼ ndi, ministerial servant doodaiiʼ elder dooleeł yę́ęgi doo yá dahoołʼaah da. Diyin Bizaad éí brother kwíí binááhaigo índa ministerial servant doodaiiʼ elder dooleeł, doo áníi da. (1 Timothy 3:1-10, 12, 13; Titus 1:5-9) Elder éí bibee óʼoolʼįįłii yikʼehgo doodaiiʼ tʼah ániid nijíghá nízingo yee hasʼą́ągo ádeileʼgo éí Diyin Bizaad doo yikʼehgóó éʼéłʼı̨́į da. Elders éí Diyin Bizaad biiʼdóó bikʼeh ádajiłʼı̨́į doo.​—2 Timothy 3:16, 17.

¹⁷ Ministerial servants doodaiiʼ elders łaʼ bikʼi hodidoonihgi, elders dajílínígíí éí Diyin Bizaad doo bikʼehgóó ádajiłʼı̨́ı̨́góó éí nihibrothers bá adahwiiztʼiʼ yę́ęgi bá nidazhnohtłʼah dooleeł. Łahgo hazʼą́ągo ministerial servant nilı̨́įgo nizhónígo binaanish ííłʼı̨́, áádóó elders lą́ daʼasłı̨́įʼgo éí há bíighah elder jidooleełgi dadííniid. Ńtʼééʼ elders náás daazlı̨́ʼígíí łaʼ ádaaníigo éí yeeʼ tʼah ashkii jílı̨́, áko biniinaa tʼáadoo elder biniyé hakʼi hodiiniiʼ da. Díí nihibrother tʼah ániid nijighá hodiʼníigo biniinaa tʼáadoo elder áhoʼdilyaa da. Kótʼéego nitsáhákeesgo hazʼą́. Diyin Bizaad ánínígíí badaʼííníidlíi doo, tʼáá nihí nihintsékees doodaiiʼ nihee óʼoolʼįįłii éí dooda. Áko éí Jesus bikʼeh honiilʼı̨́, áádóó diné ánoolingi tʼáadoo bee baa nídeiitʼíní dooleeł.

18, 19. Jiihóvah éí diné yinéłʼı̨́įgi, nihí haitʼéego ákóniitʼée doo?

¹⁸ Tʼáá áníiltso nidaʼiyiilzííh, ndi Jiihóvah átʼéhígi átʼéego diné doo jiniidláa da doogo átʼé. (Acts 10:34, 35) Áko Diyin Bizaad ánínígíí áłahájįʼ bénéiilniih doo. Éí binahjįʼ Jesus ádííniid yę́ę bikʼeh honiilʼı̨́į doo, “tʼóó dzólníígóó tʼáadoo ándahoyohʼaahí.”​—John 7:24.

¹⁹ NihiNaatʼáanii Jesus Christ tʼáá ałtso diné yá nihodiyooʼaałgo bichʼįʼ hoolzhish. Éí God bibee hazʼáanii yikʼehgo nihodiyooʼaał, dayiiłtseʼígíí índa yidiitsʼaʼii bikʼehgo doo ánihwiiʼaah da dooleeł. (Isaiah 11:3, 4) Éí bíká dadíníitʼı̨́ı̨́ʼ!