“NIHOOGHÁAHJĮʼ yoołkáałgo” bichʼįʼ hoolzhish niheʼiinaʼ ndanitłʼa silı̨́ı̨́ʼ éí biniinaa hadaʼííníilníi doo daniidzin. (2 Timothy 3:1-5) Ląʼí diné nihináágóó doo hadaʼólníi da. Tʼáá bí tʼéí ádaa nitsídaakees, saad dahółǫ́, dóó ádaa áhályą́ biʼoh danílı̨́. Díí bee naʼadidiilkił: ‘Náánáłaʼ dineʼé shinaagóó doo hadaʼólníi da ákóníshtʼé daatsʼí? Tʼáá aaníí haʼahóní haʼátʼíísh áhyiłní? Haitʼéego haʼahóní éí bee áníshtʼée doo?’

Diyin Bizaad biiʼ “haʼahóní” choyoosʼįįdígíí haʼátʼíísh áhyiłní? Díí doo łaʼ hachʼįʼ anáhóótʼiʼ bichʼįʼ haʼjólní tʼéiyá áhyiłníi da. Diné łaʼ haʼahónínígíí éí chánah bił chohooʼı̨́įgo yáʼátʼéhígíí áhodoonííł nízin. Doo tʼáá bí tʼéí ádaa nitsídaakees da. Azhą́ shı̨́ı̨́ tʼóó bá dahodoonih doodaiiʼ doo ákóshiilaa da ndi. Tʼahdii hakʼis nídoodleeł jinízingo baa hoł chohooʼı̨́. Diyin Bizaad ání, haʼólní éí ayóóʼóʼóʼniʼ bitsʼą́ą́dę́ę́ʼ. * (Footnote níníłʼı̨́.) (1 Corinthians 13:4) Haʼahóní éí “níłchʼi diyinii bineestʼąʼ”bił ahídéétʼiʼ. (Galatians 5:22, 23) Haitʼéego hadaʼííníilníi doogo ádaʼdiilnííł?

Jiihóvah biníłchʼi diyinii éí haʼahóní bíká sodadiilzingo nihíká adoolwoł, yadaʼólíigo yídayókeedígíí yeidiyiiʼaah. (Luke 11:13) Díí níłchʼi diyinii ayóó bitsxeʼ ndi tʼah sodiilzin bikʼeh ádaniitʼée doo. (Psalm 86:10, 11) Díí átʼéego haʼahóní ázhdoolíłígíí éí tʼáá ákwii jı̨́ ííshjání íilʼı̨́ dóó bee ádaniitʼée doo. Łaʼda doo ákódeiitʼı̨́į da. Haʼátʼíí yee nihíká adoolwoł?

Jesus tʼéiyá bikʼeh ádaʼiilʼı̨́į doogi nizhónígo nihá íʼiilaa áko baa ídahwiilʼaah. Íídą́ą́ʼ Yilʼaadii Paul yaa yáłtiʼgo “iiná ániidíii biih dahisoohkai”, éí haʼahóní bee chánah ánihósin: “Christ bitsʼą́ą́dę́ę́ʼ bee achʼįʼ hózhǫ́ náhásdlı̨́įʼii bíniʼ nihijéí biiʼ bóhólníih leʼ.” (Colossians 3:10, 12, 15, New World Translation) Ákódeitʼı̨́įgo éí Jesus bedaʼiilʼı̨́ bikééʼ deiyíníikáahgo badaʼííníidlí tʼáá áajįʼ anáhálzhishgo God hashtʼeʼ ánéidoodlííł. Badaʼííníidlí nihee dahólǫ́ǫgo, éí nihee hadaʼahóní doo nahjįʼ kódadiilníił da, haʼátʼíí shı̨́ı̨́ nihináágóó baa nidaʼaldeeh ndi.​—John 14:27; 16:33.

Nahasdzáán ániidíii áńdoolnííł éí tʼáá tsxı̨́įłgo baa hodoolzhish chʼééh daniidzin. Jiihóvah nihichʼįʼ haʼólníigo baa nitsíikeesgo nihí ałdóʼ hazhóʼó hadaʼííníilníigo bídahwiilʼaah. Diyin Bizaad ání: “Bóhólníihii [Jiihóvah] kóhodoonííł nínę́ę doo hąh yiʼdoolíił da lá. Nidi yee haadzíiʼii tsʼídá yiʼdoolíiłgo yee hasʼą́. Jó, nízaadgóó nihichʼįʼ haʼólní, tsʼídá doo łaʼ ázhdoodįįł da nízingo, nidi tʼáá ádzíłtso łahgo átʼéego tsíńdazdookosgo habąąhági átʼéii bitsʼáhizhdookah hóʼní.” (2 Peter 3:9) Jiihóvah nihichʼįʼ haʼólníinii baa nitsíikeesgo, áko nihí ałdóʼ  náánáłahjįʼ bichʼįʼ hadaʼííníilníi doo. (Romans 2:4) Hahgo dóó háadi hadaʼííníilníi doo?

Tʼáá ákwii jı̨́ ląʼí nihichʼįʼ anídahwiiztʼiʼ bichʼįʼ hadaʼííníilníi doo daniidzin. Łaʼda ałchʼįʼ yáłtiʼgo doo biláahdi hahiidziih da bee díníiłtłʼah éí bee ádaa ákwiiniidzin doo. (James 1:19) Łaʼda tʼóó bá hodoonihgo bichʼįʼ hadaʼííníilníi doo daniidzin. Jiihóvah dóó Jesus áátʼįįd yę́ę béénílniih éí nidaʼiizíhígíí doo bichʼįʼ danihidziil ndi nihichʼįʼ haʼólní. Tʼáá kóníshéhé nidaʼiilzíihii ndi doo tʼáá éí tʼéí yee nihiníłʼı̨́į da. Ákondi, yáʼátʼéehgo bee ániitʼéhígíí yiníłʼı̨́ dóó yáʼátʼéehgo áʼdiilníłʼígíí yibaʼ átʼé.​—1 Timothy 1:16; 1 Peter 3:12.

Azhą́ shı̨́ı̨́ náánáłaʼ doo yáʼátʼééhgóó háínídzííʼ doodaiiʼ doo yáʼátʼééhgóó íinidzaa nihiłní ndi bichʼįʼ haʼííníilníi doo. Áłtsé daatsʼí bichʼįʼ sháhóóchįįd dóó achʼą́ yéiiltiʼ doo. Diyin Bizaad éí łahgo átʼéego yee nihichʼįʼ yáłtiʼ: “Ádaa hodzódlí biláahgo haʼahónííjígo yáʼátʼééh. Tʼáadoo hání síníʼání, háálá diné doo ádahalyáanii áháchįʼ biiʼ dahólǫ́.” (Ecclesiastes 7:8, 9) Azhą́ shı̨́ı̨́ nikʼehatahígíí doo ákótʼée da ndi hadaʼííníilníi doo áádóó hazhóʼó baa nitsídíikos. Jesus doo ákótʼéégóó bikʼihodiitʼą́ągo ákódzaa.​—Matthew 11:19.

Azhéʼé dóó amá baʼáłchíní yichʼįʼ haʼólníigo hazhóʼó yichʼįʼ yádaałtiʼ dóó hazhóʼó yaa nitsídaahkeesgo yee yíká anídaahjah. Mattias éí Scandinavia Béthelgi atah ájiilaa yę́ę baa chʼíhootʼą́. Mattias ániid nijighá yę́ędą́ą́ʼ, bił daʼjółtaʼígíí hweʼoodląʼ biniinaa há nidahałtʼiʼ ńtʼééʼ. Hazhéʼé dóó hamá ákóhootʼéhígíí doo bił bééhózin da. Beʼoodląʼ bił naaki nílı̨́įgo yee yáłtiʼgo yaa ákozhniizı̨́ı̨́ʼ. Gillis éí Mattias bizhéʼé ání, díí ákódzaago hweʼasdzą́ą́ bił yéigo bichʼįʼ haʼjólníigo ázhdólzin ńtʼééʼ. Mattias éí díí ádaatʼéhígíí yínaʼádíłkid: “Háísh éí God átʼé? Diyin Bizaad doo daatsʼí God bitsʼą́ą́dę́ę́ʼ da? Díí haitʼéego nihił bééhózin God éí íiyisí ádiilníłígíí nihaiyinizin?” Ałdóʼ bizhéʼé neídíłkid: “Haʼátʼíí biniinaa neʼoodląʼ bee náshiʼdinitaah, doo nigi ákótʼéego baa nitséskees da?”

 Gillis ájíní: “Łahda nihiyáázh báháchįįhgo naʼídíłkid, bimá dóó shí doo nihichʼįʼ báháchįʼ da, ndi tʼáá ánínígíí yikʼijįʼ báháchįʼ, éí hweʼiinaʼ yiníłtłʼa.” Haitʼéego Gillis biyeʼ yíká eelwod? “Shiyeʼ nízáágóó bił achʼįʼ yáshtiʼ.” Gillis éí Mattias yiyíistsʼą́ą́ʼ łeh áádóó yinahjįʼ akʼidiʼdootı̨́įłii haʼátʼíí yaa nitsékeesígíí yaa naʼádíłkid łeh. Łahda Gillis biyeʼ haʼátʼíí shı̨́ı̨́ yee yił halneʼígíí áłtsé tʼóó baa nitsíníkees áádóó baa yanaadiiltih néidiʼniih. Náánáłahdi, Gillis tʼáá bí ałdóʼ tʼah hazhóʼó baa tsínáádideeskos áádóó índa baa nínáádíitʼįįł. Łaʼda éí Gillis haʼátʼíí shı̨́ı̨́ hayeʼ yínaʼádíłkidígíí hazhóʼó baa nitsísíkééz łeh áko índa baa yánáájíłtiʼ łeh. Mattias éí nihikʼé nináʼílyáagi yikʼídiitą́ dóó Jiihóvah ayóóʼánihóʼníinii yikʼídiitą́ éí nihikʼi hooʼááł bee bóhólnííh bee bikʼizhʼdiitą́. Bizhéʼé ání: “Tʼáá hodiinaʼ, áádóó hoł nantłʼa ndi, tʼáá hazhóʼó Jiihóvah ayóóʼáyóʼníinii bijéí yidiisnááʼ. Shí dóó shichʼooní ayóó baa nihił hózhǫ́ bichʼįʼ haʼííníilníigo nihiyáázh ániid naagháádę́ę́ʼ bíká ánéilwoʼgo bee naʼniitinígíí bijéí yidiisnááʼ.”

Gillis dóó bichʼooní yił haʼólníigo biyáázh yíká ahiʼnoolchą́ą́ʼ éí Jiihóvah yaʼólíigo bíká eelwod. Gillis ání: “Mattias áháłní nihee ayóóʼóʼóʼní nimá dóó shí nihijiisnááʼ wołí bee sodiilzingo Jiihóvah bíká adoolwołgo bikʼidiʼdíítı̨́ı̨́ł.” Díí azhéʼé dóó amá haʼjólníigo tʼáadoo nahjįʼ kójiilaa da éí yéigo baa hoł hózhǫ́!

Nihí ałdóʼ hadaʼííníilníigo danihikʼéí doodaiiʼ danihikʼis nidzaago bitsʼíís bichʼįʼ anídahaztʼiʼ baa ádahwiilyą́ą doo. Ellen * (footnote níníłʼı̨́) baa haneʼígíí baa nitsíníkees, éí Scandinaviadi kééhojitʼı̨́.

Tseebíí nááhai yę́ędą́ą́ʼ, Ellen bahastiin éí naakidi hatsiighąąʼ bá dahooʼaʼ. Éí biniinaa, ił hózhǫ́, doo ił hatsʼíi da, índa ił hojoobaʼ doo baa ákozhnízin da jizlı̨́ı̨́ʼ. Díí tʼáá íiyisíí Ellen bá nantłʼa silı̨́ı̨́ʼ. Éí ájíní: “Bichʼįʼ haʼííníshníigo dóó tʼáá ahąąh sodiszingo shíká eelwod.” Éí ánáázhdíʼní: “Diyin Bizaad ayóó shił yáʼátʼééh éí baa haʼííníshníigo yee shíká análwoʼ éí Philippians 4:13, éí ání: ‘Shidziilgo ásósinii bee tʼáá ałtsoní ádeeshłíiłgo bíneeshʼą́.’” Jiihóvah bibee adziil dóó háká análwoʼgo bee bichʼįʼ haʼjólní.​—Psalm 62:5, 6.

Jiihóvah éí aláahdi haʼahóníigo ííshjání áyósin. (2 Peter 3:15) Diyin Bizaad biiʼ yíníiltaʼ Jiihóvah aláahdi bibee haʼahóní baa íhwiilʼaah. (Nehemiah 9:30; Isaiah 30:18) Jiihóvah éí Sádam ádeeshdįįł níigo yee haadzííʼ yę́ę éí Éíbraham ląʼígo naʼídééłkid, éísh béénílniih? Jiihóvah éí tʼáá hazhóʼógo Éíbraham yíístsʼą́ą́ʼ. Azhą́ neeznáá diné tʼáá ákogi ádaatʼéhígíí kéédahatʼı̨́į ndi doo Sádam íidoołdįįł da ní. (Genesis 18:22-33) Jiihóvah tʼáá áłahjįʼ íistsʼą́ą́ʼ, doo yilááh áyósin da!

Haʼahóní éí íiyisí ílı̨́ éí Oodlání iiná ániidíii yiih dahaaskai. Nihizhéʼé Jiihóvah haʼahónínígíí éí náásgóó baa dahwiiʼniih áádóó nihí ałdóʼ “daʼoosdląądgo hadaʼólníigo Diyin God aidiníʼáanii” bí dadooleeł bitah dahoniidlǫ́ǫ doo.​—Hebrews 6:10-12.