CONGREGATION bá naʼanish daatsʼí łaʼ bíká laanaa nínízin? Naanish nínízinígíí daatsʼí náánáłaʼ binaanish. Nahdę́ę́ʼ daatsʼí Jiihóvah bá nisínílʼaʼ? Kʼad éí náás sínílı̨́ı̨́ʼ, naa dahooʼaʼ, béeso bee nichʼįʼ anáhóótʼiʼ, doodaiiʼ nighan hazʼą́ągi anáhóótʼiʼ hazlı̨́įʼgo biniinaa Jiihóvah bá nanilʼaʼ yę́ę tʼáá ná biʼoh. Jiihóvah biorganization łah átʼéego ádaʼałʼı̨́ silı̨́įʼgo daatsʼí biniinaa binanilnish yę́ę ninádííníʼą́. Ląʼígóó Jiihóvah bá naashʼaʼ dooleeł shı̨́ı̨́ nínízin. Tʼáá aaníí łahda doo bikʼee ákójítʼée da łeh. Ákótʼée ndi, ąąh náhoniikaad, índa áháchįʼ ádaatʼéii haitʼéego bee ádaa áhólyą́ą doo? Haitʼéego éí nił hózhǫ́ǫgo íʼdíínílzin doo?

John Taah Iiníiłii bił hózhǫ́ǫ́ ńtʼéeʼgi ílíinii átʼéego bíhwiidooʼáałgo átʼé. John éí Jiihóvah ląʼígóó yá naasʼaʼ, ndi hweʼiinaʼ éí doo nijólíí ńtʼééʼ yę́ęgi ádzaa. Nahojilneʼgo łaʼ nááhai áádóó tʼáá ákónízahjįʼ daatsʼí awáalya jizdáá ńtʼééʼ, áko díí shı̨́ı̨́ éí doo ádá nijódlíi da ńtʼééʼ. Kótʼéego bił hazʼą́ą ndi, John éí bił hózhǫ́ áádóó tʼáá ákótʼéego abíyííłką́. Haʼátʼíí lá bíká eelwod? Azhą́ nihąąh nááhonikaʼ ndi, haʼátʼíísh nihił hóshǫ́ǫgo ánihósin doo?

29 C.E. dąągo John éí Mesáíyah bilą́ąjįʼ hojilneʼgo hahoolzhiizh. Kójíní: ‘Diyin God bichʼįʼ tsíńdahidohkees, háálá yáʼąąshii bee bóhólníihgo bił hazʼáanii bílátah dahashzhiizh.’ (Matt. 3:2; Luke 1:​12-17) Áko ląʼí nízaadę́ę́ʼ nehekáahgo haneʼ bił yáʼádaatʼééh, áádóó baptize ádabiʼdilneʼ. John doo yistiʼgóó hastóí ánaazíinii ádaa dadzódlíii Diyin doo yichʼįʼ tsíńdadikeesgóogo éí bibee atéʼélʼíinii habaʼ, yiłní. (Matt. 3:​5-12) 29 C.E. aakʼeego Jesus baptize ájiilaago éí ayóó átʼéii áʼjiilaaii átʼé. Áádóó diné éí Jesus, Mesáíyah nilínígíí, bikééʼ deínóhkááh bijiní.—John 1:​32-37.

John binaanish tʼáá sahdii átʼéhígíí biniinaa Jesus ábíłní: “Oochííł bitahdóó John Tó Yee Ası̨́įhii yiláahgo átʼéii tʼah doo łaʼ  nídiidáah da.” (Matt. 11:11) Bééhózínígo John bee bikʼihasdliʼii yaa bił hózhǫ́. John nahalingo dííshjı̨́įdi ląʼí ałdóʼ bikʼidahojidlí. Nihibrother Terry ákótʼé. Hweʼasdzą́ą́ Sandra bił Jiihóvah full-time bá nijilʼaʼgo 50dóó biʼáán nááhai. Ájíní: “Baa hózhǫ́ǫgo Jiihóvah ląʼígóó bá nisisʼaʼ. Pioneer, Béthelite, special pioneer, circuit índa district overseer nishłı̨́ı̨́ ńtʼééʼ áádóó kʼad éí special pioneer náánishdlı̨́.” Diyin bá naʼanish haadítʼáahgo baa hózhǫ́, ndi łah átʼéego hoł hooʼaahgo éí ił hózhǫ́ niłdzil yileeh. John ákótʼéé ńtʼééʼ, áko bitsʼą́ą́dóó ídahwiidiilʼááł.

John éí Diyin yá naalʼaʼgi bił nilı̨́ áádóó bił hóshǫ́ǫgo ahoolzhiizh. Díí baa nitsíníkees: Jesus baptize ájiilaa bikéédóó John nahojilneʼgi diniitłóóʼ, tʼáá bíighahdóó éí Jesus nahalneʼígíí ąą deeshzhiizh. John bídahoołʼaahii éí díí bidaʼdiiłʼáago ádabiłní: “Tʼáá éí [Jesus] tó yee ası̨́įhgo diné tʼáá ałtso baa hakááh.” (John 3:26) John áháłní: “Báʼdoogehii éí adooyehii bííʼ jílı̨́, áko iiyehii bikʼis jílíinii, bíighahgóó dzizı̨́įgo jíistsʼą́ąʼii éí adooyehii biinééʼ jidiitsʼaʼgo tʼáá íiyisí baa hoł hózhǫ́, díí bił ałkʼehgo tʼáá íiyisí shił hózhǫ́ǫgo áshiʼdiilyaa.” (John 3:29) John éí Jesus doo yoołchʼı̨́įd da ńtʼééʼ. Áádóó binijilnishígíí doo ílı̨́į da tʼáadoo jiniizı̨́įʼ da, háálá Jesus yinaalnishígíí éí ílı̨́. John éí “iiyehii bikʼis” jílı̨́įgi hoł nilı̨́įgo baa hoł hózhǫ́.

John éí hanaanish ląʼí ndi, yáʼátʼéehgo nitsíjíkeesgo hoł hózhǫ́. Tʼáá hoʼdizhchı̨́ı̨́dę́ę́ʼ Názarait jílı̨́, áko wáin índa tó diłhił doo jidlą́ą da. (Luke 1:15) Jesus áháłní: “John éí chʼiyáán índa daadláanii doo yíchą́ yídéelniʼgo níyáa da.” Díí éí tʼáadoo hwee hólónígóó jiináago ááhyiłní. Ákondi Jesus éí bídahoołʼaahii yił doo ákótʼéego bidaʼiinaʼ da ńtʼééʼ. (Matt. 11:​18, 19) John éí miracles tʼáadoo yee naashnish da, ndi hoł bééhózingo Jesus bídahoołʼaahii índa hakééʼ deíkááh ńtʼééʼ yę́ę éí díí baa dadeestʼą́. (Matt. 10:1; John 10:41) Azhą́ ákótʼée ndi díí doo hoʼdiiłʼáa da, tʼóó Jiihóvah bá nijilʼaʼgo bizhdiilkaal ńtʼééʼ.

Jiihóvah bá neelʼaʼgi ílı̨́įgo ííníilzingo nihił hózhǫ́ǫgi baa áhwiilyą́ą doo. Terry baa chʼíhootʼánę́ę ání: “Naanish shaa dadeestʼánę́ę yéigo binishishnish.” Díí baa nitsíjíkeesgo ájíní: “Tʼáá ákónéehee ákósdzaa lá.”

Diyin bá naʼanishgi ílíinii átʼéego baa nitsíikeesgo éí Diyin bá neelʼaʼgi ayóó baa hózhǫ́. Háálá “Diyin God bił neiilnish.” (1 Cor. 3:9) Ílíinii nijiléhígíí éí doochxǫǫłgi bitsʼąą baa áhojilyą́ą łeh. Tʼáá ákótʼé, éí Jiihóvah bił neiilnishgi ílíinii átʼé niidzingo nihił hózhǫ́. Jiihóvah yá nidaalnishígíí éí nihí bineilnishígíí tʼáadoo bił ałhąąh neiʼnilí doo. Naanish shaa deitʼánígíí doo ílı̨́į da tʼáadoo niidziní doo.—Gal. 6:4.

John éí nahojilneʼgi nidootʼihgo hoł bééhózin, ndi tʼáadoo kótʼéʼílíní nidootʼihgo doo nijólíi da. (John 3:30) Jesus baptize ájiilaadóó hastą́ą́ nídeezidgo éí 30 C.E. yihah góneʼ Naatʼáanii Hérad awáalya ahóółtʼeʼ. Ndi nahojilneʼgi tʼáadoo neʼ ájiilaa da. (Mark 6:​17-20) Kóhoʼdoolʼįįd ndi, haʼátʼíí háká análwoʼgo hoł hózhǫ́? Diyin kʼehgo ádaatʼéii alą́ąjįʼ ájósin.

Awáalyaadi John éí Jesus nahalneʼgi kʼeeʼąą yilzhishgo baa hozhdiitsʼaʼ. (Matt. 11:2; Luke 7:18) Jesus tʼáá aaníí Mesáíyah nilı̨́įgo éí haitʼéego tʼáá ałtso ázhdoolííł haʼnínę́ę bizhdoolííł shı̨́ı̨́ jinízin. Jesus naatʼáanii dooleeł haʼnínę́ęgi, kʼadísh baa hoolzhiizh? Ákoósh awáalyaadę́ę́ʼ hwééʼdoolnih? Jesus yindíílnishígíí hazhóʼó shił bééhodoozįįł jiniizı̨́įʼgo hóhoołʼaahii nidiltʼéego Jesus bichʼįʼ ajííłʼaʼ: “Daʼ niish doogááł haʼnínę́ę ánítʼı̨́, éí doodago náánáłaʼ daatsʼí bíká dadíitʼı̨́įʼ doo?” (Luke 7:19) Áádóó níjítʼáazhgo éí  bąąh dah nahazʼáanii Jesus neiłdzih áádóó díí John bee bił nahodoołnih hodííniid: “Doo daʼooʼínígíí daʼooʼı̨́ áńdaalneʼ, nidaʼniłhodígíí nidaakai áńdaalneʼ, łóód atsʼíís yiyáanii naałdzidii bee bąąh dah nidahazʼánígíí hadaałtʼé áńdaalneʼ, áádóó bijédaahkałígíí daʼdiitsʼaʼ áńdaalneʼ, daneeznánígíí nááhidiiljeeh, badahojoobáʼíígíí haneʼ yáʼátʼéehii bee bił dahaneʼ.”—Luke 7:​20-22.

John éí haneʼ yidiiztsʼą́ąʼgo bidziil ábiilaa. Jesus éí Mesáíyah ádeidoolííł haʼnínę́ę yiʼoolíiłgo bee bééhoozin. Jesus binahjįʼ awáalyaadę́ę́ʼ doo hwééʼdoolnih da ndi, éí God bá nijilʼaʼgi ílı̨́įgo baa nitsíjíkees. Doo yáʼátʼéehgo hoł hazʼą́ą ndi, hoł hózhǫ́.

John nahalingo diyin kʼehgo nitsáhákees alą́ąjįʼ ííníilzingo éí haʼííníilníigo nihił hózhǫ́ǫ doo. (Col. 1:​9-11) Áko Diyin Bizaad yíníiltaʼgo áádóó hazhóʼó nabikʼítsíilkeesgo Diyin bá neiilnishgi tʼáadoo biniyéhígóó íitʼı̨́, doo niidzin da doo. (1 Cor. 15:58) Sandra ájíní: “Tʼáá ákwíí jı̨́ Diyin Bizaad tʼááłaʼí chapter néíníshtahgo Jiihóvah áhánígo bił ídlı̨́įgo áshósin. Bijígo áłtsé íínísin, shijí éí ndagaʼ.” Jiihóvah biNahatʼaʼ bidaʼíníishgi baa dahaneʼígíí baa nitsíikeesgo éí nihił hazʼánígíí bilááhgóó díníitʼı̨́įʼgo yee nihíká análwoʼ, áko Jiihóvah áyoolíiłii baa ákoniidzin doo. “Tʼáá náhidizííd bikʼeh JW Broadcasting^® biiʼdę́ę́ʼ nihił nahanihgo ahił niidlı̨́ índa nihił dahózhǫ́ǫgo ánihósin,” ní Sandra.

John éí ‘Iiláíjah yee átʼéii índa yee bidziilii’ bee nijishnish áádóó Iiláíjah nahalingo “tʼáá nihígi átʼéé ńtʼééʼ,” yę́ęgi ájítʼéé ńtʼééʼ. (Luke 1:17; Jas. 5:17) John binaanish alą́ąjįʼ áyósin yę́ęgi bedaʼiilʼı̨́įgo éí haada hoodzaa ndi, Jiihóvah bá neiilʼaʼgi nihił dahózhǫ́ǫ doo.