1. Nihikʼéíshąʼ haʼátʼíí shóidoołtʼeeł bá daniidzin?

NIHISISTER Pauline ání: “Tʼáá aaníinii bíhoołʼą́ą́ʼdóó bikʼijįʼ, shikʼéí tʼáá ałtso kéyah ayóó áhonóolingi bił honishłǫ́ǫ doo nisin. Shahastiin, Wayne, dóó shiyáázh ałdóʼ Jiihóvah yá naalʼaʼ doo nisin.” * Ni ałdóʼ nikʼéí tʼahdoo Jiihóvah yá ndaalʼaʼ daásh? Paulinegi átʼéego shı̨́ı̨́ nitsíníkees.

2. Haʼátʼíísh baa nídadíitʼįįł?

² Nihikʼéí haneʼ yáʼátʼéehii shóidoołtʼeełgo doo bíniilchéeh da. Ákondi Diyin Bizaad yaa nitsídaakees doo índa nízhdidooléełgo bee bíká adiijahgo átʼé. (2 Tim. 3:​14, 15) Haʼátʼíísh biniyé nihikʼéí tʼáá aaníinii bił dahwiilneʼ doo? Haʼátʼíísh biniyé ajoobaʼ ííshjání ádeíníilzin doo? Haitʼéego nihikʼéí Jiihóvah ayóóʼáyóʼníi doo bee bíká adiilwoł? Áádóó haitʼéego bił yah anéijahígíí nihíká adoojah?

3. 2 Peter 3:9 binahjįʼ, haʼátʼíísh biniyé nihikʼéí tʼáá aaníinii bee bił dahwiilneʼ doo?

³ Tʼáadoo hodiinaʼí, Jiihóvah éí díí nihił hoogáłígíí néidoołtʼih. “Iiná doo ninítʼiʼii biniyé nídabiʼdiisdláʼígíí daʼoosdląąd” tʼéiyá yisdáhidookah. (Acts 13:48) Kééhwiitʼínígi, doo béédahoniilzinígíí ląʼígo bił nidahwiilneʼ, áko  nihikʼéí ałdóʼ Jiihóvah yá ndaalʼaʼ doo bá daniidzin. Nihizhéʼé Jiihóvah “tsʼídá doo łaʼ ázhdoodįįł da nízingo, nidi tʼáá ádzíłtso łahgo átʼéego tsíńdazdookosgo habąąhági átʼéii bitsʼáhizhdookah hóʼní.”—2 Peter 3:9 yíníłtaʼ.

4. Nihikʼéí bił nahwiilneʼgo haʼátʼíí bee ádił ájisiih?

⁴ Béénílniih, hazhóʼó nidahwiilneʼ ndi doo ákótʼéégóó baa chʼíhooʼaah lágo. Azhą́ diné doo béédahoniilzinígíí hazhóʼó bił dahwiilneʼgo, ndi łahda nihikʼéí tʼáá naʼníleʼdii bichʼįʼ yádeiltiʼ łeh.

5. Nihikʼéí tʼahdoo tʼáá aaníinii bee bił nidahwiilneʼgo haʼátʼíísh béédeilniih doo?

⁵ Nátʼą́ą́ʼ nitsídeikeesgo, nihikʼéí bichʼįʼ haiidzííʼ yę́ęgi łahgóó átʼéego bichʼįʼ hadeisdzih ńtʼééʼ lá daniidzin łeh. Yilʼaadii Paul éí Oodlání kwííłní: “Tʼáá áłahjįʼ ajoobaʼ saad éí áshįįh halnihígi átʼéego bee yádaałtiʼ, ákódaahtʼı̨́įgo diné tʼááłáʼí nítínígo bichʼįʼ tʼą́ą́ʼ hááʼdoodzihgi nihił béédahózin doo.” (Col. 4:​5, 6) Nihikʼéí bichʼįʼ yádeiltiʼgo, díí naʼnitinii béédeilniih doo. Bee ádaa ákoniidzin bíká adiilwoł dóó adiiʼnínígíí biʼdiiłʼáa doo.

6-7. Haʼátʼíí biniinaa nichʼooní doo oodlání nílínígíí baa jiiníbaʼ doo? Łaʼ baa chʼíhoníʼaah.

⁶ Ajoobaʼ ííshjání ánílééh. Pauline ání: “Áłtséedi, shahastiin éí God dóó Bizaad tʼéiyá bił hodeeshnih nisin. Tʼáá ákwíí jı̨́ áhooníiłii doo ayóó ałchʼįʼ yéiiltiʼ da ńtʼééʼ.” Hahastiin Wayne éí doo ayóó Diyin Bizaad bił bééhózin da. Áko Pauline hoł hólneʼígíí doo bikʼizhdiitįįh da. Wayne éí hweʼasdzą́ą́ hweʼoodląʼ tʼéí yaa nitsékees jinízin. Pauline oodląʼ báhádzidígíí yidiiyá, biʼdeesdloʼ jinízin.

⁷ Pauline éí bibrothers dóó bisisters Jiihóvah yá ndaalʼaʼígíí tʼáá áłahájįʼ yił  naakai—éí áłah nídaʼadleehdi, bił nahojilneʼgo, dóó ahíndéekahdi. Pauline ání: “Wayne hooghandi nináhádáahgo, doo naagháhí da doo hoł hatsʼíid da jizlı̨́ı̨́ʼ.” Tʼáadoo bahatʼaadí, Wayne éí beʼasdzą́ą́ dóó biyeʼ yáhasááh. Yił naakaiígíí doo bééhojísin da, dóó Pauline bikʼis daazlı̨́ʼígíí aláahdi áyósin. Wayne éí Pauline bichʼįʼ háhóóchįįd, ałtsʼá diitʼash yidííniid. Haitʼéego Pauline aa hojoobaʼgo yaa ákonízin doo ńtʼééʼ?

8. 1 Peter 3:​1, 2 binahjįʼ, nihikʼéí haʼátʼíísh yee nihaa ákodadínóodzįįł?

⁸ Yáʼátʼéehgo ánítʼı̨́. Azhą́ nihikʼéí tʼáá aaníinii bił nidahwiilneʼ ndi, yáʼátʼéehgo ádeitʼínígíí tʼáá íiyisíí yaa ákodanízin doo. (1 Peter 3:​1, 2 yíníłtaʼ.) Pauline éí baa ákozhniizı̨́ı̨́ʼ. Kójíní: “Wayne ayóóʼánihóʼní, ałtsʼáʼítʼaash doo tʼáá aaníí yinízin da shił bééhózin. Ákondi ałtsʼáʼítʼaash bee shichʼįʼ hajoodzíʼígíí éí Jiihóvah bikʼehgo oodáłígíí bikʼeh áshʼı̨́į doo niizı̨́ı̨́ʼ. Shahastiin bił, sheʼoodląʼ doo ayóó baa yáshtiʼ da, ndi áshtʼíngíí bee yáʼátʼéehgo íʼdeeshłííł.” Pauline éí Wayne doo ayóó Diyin Bizaad yił yaa yáłtiʼ da, ndi tʼáá ákwíí jı̨́ áhooníiłii bee ahił hojilneʼ. Wayne éí Pauline ił hodlí hwee hazlı̨́ı̨́ʼ yaa ákoniizı̨́ı̨́ʼ, dóó hayeʼ ayóó baa áhwiinítʼı̨́ jizlı̨́ı̨́ʼ ałdóʼ yaa ákonízin. (Prov. 31:​18, 27, 28) Wayne, Diyin Bizaad haghan hazʼą́ągi yáʼátʼéehii áyiilaa yaa ákozhniizı̨́įʼgo, hajéí dóó hantsíkees Diyin Bizaad baa haneʼígíí há ąą ájiilaa.—1 Cor. 7:​12-14, 16.

9. Haʼátʼíísh biniyé tʼáá áłahájįʼ nihikʼéí bíká ánéilwoʼ doo?

⁹ Nikʼéí tʼáá áłahájįʼ bíká anílyeed. Jiihóvah  áátʼįįłígíí bedaʼiilʼı̨́į doo. “Tʼáá áłahjįʼ” bílaʼashdlaʼii haneʼ yáʼátʼéehii dóó hoolʼáágóó iiná yá hoołʼaʼ. (Jer. 44:​4, NW) Yilʼaadii Paul éí Timothy ííłní, diné tʼáá áłahájįʼ bíká anílyeed. Haʼátʼíísh biniinaa? Éí tʼáá hó yisdáʼázhdílteeh dóó dabíistsʼą́ą́ʼígíí yisdáhidookah doo biniinaa. (1 Tim. 4:16) Nihikʼéí ayóóʼádeíníiʼní, éí binahjįʼ Diyin Bizaad biyiʼ góneʼ tʼáá aaníinii bił béédahodoozįįł bá daniidzin. Pauline saad yee yáłtiʼii dóó áátʼįįdígíí éí hakʼéí dayiiłtsą́, dóó éí bił yáʼádaatʼééh daazlı̨́ı̨́ʼ. Kʼad éí hwił hózhǫ́ǫgo hahastiin bił Jiihóvah bá nijilʼaʼ. Tʼáá ájíłah pioneer jílı̨́, dóó Wayne éí elder nilı̨́.

10. Haʼátʼíísh biniyé nízaadgóó hadaʼíiniilníi doo?

¹⁰ Haʼíínílní. Jiihóvah bá nideilʼaʼgo, Diyin Bizaad binahjįʼ niheʼiinaʼ dóó niheʼoodląʼ bikʼehgo deíníikááh. Nihikʼéí shı̨́ı̨́ bá ndanitłʼah doo. Nahaghá baa nidaʼaldeehígíí dóó politics bił ahídéétʼiʼígíí doo bił atah daniidlı̨́į da, éí shı̨́ı̨́ nihikʼéí baa ákodanízin. Tʼáá hooshchʼįʼ nihikʼéí łaʼ nihichʼįʼ bádahachįʼ doo. (Matt. 10:​35, 36) Ákondi nihikʼéí bíniʼdii nidaakai tʼáadoo daniidzin doo. Nihikʼéí niheʼoodląʼ yikʼidiʼdootı̨́įłgi doo bíká iilyeedgóó, éí hoolʼáágóó iiná shóidoołtʼeeł yę́ę bitsʼąą kódeiitʼı̨́ nahalin. Jiihóvah éí ánihwiitʼaahii doo nihąąh niiníláa da, ndi éí Jesus bídéétʼiʼ. (John 5:22) Nízaadgóó hadaʼííniilníigo, nihikʼéí éí baa dahwiilneʼígíí danihíistsʼą́ąʼgo átʼé.—“ NihiWebsite Chodeiniilʼı̨́įgo Bee Nidaʼniitin Doo” níníłʼı̨́.

11-13. Alice áátʼįįdígíí haʼátʼíísh bitsʼą́ą́dóó bíhwiiniłʼą́ą́ʼ?

¹¹ Neʼoodląʼ bee sínízı̨́, ndi hazhóʼó yáníłtiʼ. (Prov. 15:2) Alice áátʼįįdígíí baa nitsíníkees. Alice éí hazhéʼé dóó hamá nízaadi kééhatʼı̨́įgo, áadi Jiihóvah baa íhojiiłʼą́ą́ʼ. Ákondi hazhéʼé dóó hamá éí politics ayóó bił ílı̨́ índa diyin doo yoodlą́ą da. Yáʼátʼéehii bóhojiiłʼą́ʼígíí, tʼáá tsı̨́įłgo hazhéʼé dóó hamá bił hozhdoolnih baa ákozhniizı̨́ı̨́ʼ. Alice ání: “Neʼoodląʼ dóó íʼoolʼįįłígíí doo tsı̨́ı̨́ł nínízingo baa chʼíhodííʼááł, nikʼéí éí tʼóó bił adahayói doo.” Bizhéʼé dóó bimá naaltsoos yichʼįʼ íʼiilaa, éí Diyin Bizaad binaʼnitinígíí yił yíneedlı̨́ jinízingo yichʼįʼ íʼiilaa. (1 Cor. 13:​1-13) Hazhéʼé dóó hamá yinoosą́ dóó yaa áhólyą́ągo hoolzhiizh yaa ahééh jinízin dóó ahéheeʼ yidííniid, áádóó gift yichʼįʼ áyiilaa. Hazhéʼé dóó hamá bighangóó ninájídzáago, hamá yił hooghangi háká ajoolwod. Áłtséedi, hazhéʼé dóó hamá éí Alice beʼoodląʼ doo bił yáʼátʼéeh da.

¹² Alice éí hazhéʼé dóó hamá bighandi sidáago, Diyin Bizaad jółtaʼígíí doo niʼ kóyiilaa da. Alice ání, “Díí binahjįʼ shimá Diyin Bizaad wóltaʼígíí shił nilı̨́įgo yaa ákoniizı̨́ı̨́ʼ.” Áádóó Alice bizhéʼé éí Diyin Bizaad yíhoołʼaah doo jinízin, háálá bitsiʼ haʼátʼíísh biniinaa łahgóó átʼéego nitsíkees silı̨́ı̨́ʼ bił bééhodoozįįł niizı̨́ı̨́ʼ. Ákondi Diyin Bizaad biiʼ tʼáá bee akʼíhátʼáhígíí chʼééh łaʼ házhdéezʼı̨́ı̨́ʼ. Alice ání: “Shizhéʼé éí Diyin Bizaad baa níʼą́ dóó saad bee haʼahóníinii łaʼ bikááʼ áshłaa.” Haash yidzaa? Azhą́ Alice bizhéʼé ákʼíhátʼááh háidéezʼı̨́ı̨́ʼ ńtʼéeʼ ndi, Diyin Bizaad jółtaʼgo tʼáá íiyisíí bidiisnááʼ.

¹³ Azhą́ atídanihiʼdilʼı̨́į ndi, niheʼoodląʼ bee siidzı̨́įgo hazhóʼó yádeiiltiʼ doo. (1 Cor. 4:12b) Alice éí haʼólní háálá hamá hweʼoodląʼ yikʼijįʼ nilı̨́. “Baptize áshiʼdiilyaa yę́ędą́ą́ʼ, shimá ‘doo áhónílyą́ą da!’ shiłní.” Alice haash yidzaa? “Saad hazhóʼó chʼíhonishʼą́, Jiihóvah Yá Dahalneʼé  nishłı̨́ índa doo naaki nishłı̨́į da bidishní. Áádóó shimá ayóóʼííníshʼní bidishní. Ńtʼééʼ tʼóó yiicha, dóó nizhónígo bá chʼiyáán áshłaa. Éí bikééʼdóó, Diyin Bizaad éí asdzání yáʼátʼéehii nishłı̨́į doo yee shíká eelwod, éí shimá yaa ákoniizı̨́ı̨́ʼ.”

14. Azhą́ nihikʼéí łahgóó átʼéego tsínízdookos danóʼníi ndi, haʼátʼíísh biniyé doo bikʼeh dahoniilʼı̨́į doo?

¹⁴ Haʼátʼíí biniyé Jiihóvah bá nideilʼaʼ, nihikʼéí doo tsı̨́ı̨́ł yikʼidadootı̨́įł da. Alice pioneer jizlı̨́įʼgi, hazhéʼé dóó hamá naanish ílíinii shóizhdoołtʼeeł há yinízin yę́ę doo yíká déezʼı̨́įʼ da silı̨́ı̨́ʼ, hamá náánáácha. Ákondi Alice tʼahdii doo naaki nilíní da. Alice kójíní: “Nikʼéí tʼááłáhídi łahgóó átʼéego tsínízdookos danóʼní, áádóó éí bikʼeh honíłʼı̨́įgo nikʼéí náádaałaʼgóó ałdóʼ łahgóó átʼéego baa nitsíníkees doo danóʼníi doo. Ákondi neʼoodląʼ bee sínízı̨́įgo dóó nikʼéí hazhóʼó bichʼįʼ yáníłtiʼgo éí łaʼ daníistsʼą́ąʼ doogo átʼé.” Éí Alice ákójiidzaa. Kʼad hazhéʼé dóó hamá pioneers nilı̨́, dóó hazhéʼé éí elder silı̨́ı̨́ʼ.

15. Matthew 5:​14-16 dóó 1 Peter 2:12 binahjįʼ, Jiihóvah bá ndaalʼaʼii haitʼéego ‘yáʼátʼéehgo ádeiłʼínígíí’ nihikʼéí yíká adoolwoł?

¹⁵ Jiihóvah éí bá ndaalʼaʼígíí ‘yáʼátʼéehgo ádeiłʼínígíí’ choyoołʼı̨́įgo diné ádíchʼįʼ kwííłʼı̨́. (Matthew 5:​14-16; 1 Peter 2:12 yíníłtaʼ.) Azhą́ nichʼooní doo Jiihóvah Yá Dahalneʼé nilı̨́ı̨́góo ndi, diné nił yah anájahígíísh yééhósin? Pauline éí brothers dóó sisters bighangóó wóshdę́ę́ʼ yiłníigo, áko bahastiin Wayne yéédahodoosįįł. Jiihóvah Yá Dahalneʼé háísh tʼáá  íiyisíí ádaatʼı̨́ éí brother łaʼ Wayne bichʼįʼ ííshjání áyiilaa. “Brother łaʼ day off áyiilaa dóó football game bił nééłʼı̨́ı̨́ʼ. Áko ‘tʼáá yeeʼ shígi átʼée lá!’ niizı̨́ı̨́ʼ.”

16. Haʼátʼíísh biniyé nihikʼéí Kingdom Hallgóó nihaa díínááł bidiiʼníi doo?

¹⁶ Nihikʼéí bíká iijeehgo, Kingdom Hallgóó nihaa díínááł bidiiʼníi doo. (1 Cor. 14:​24, 25) Wayne tʼahdoo meeting łaʼ yah ííyáa da ndi Memorial biniyé Kingdom Halldi yaa níyá, háálá éí nidaʼiizhnish góneʼ baa nídiildeeʼ dóó doo nízaadgóó haneʼ da. Wayne ání: “Haneʼ tʼáadoo bikʼidiitą́ą da ndi, diné yah anáhjahígíí éí béénáshniih. Éí diné shaa hakááh, shílákʼee dahidilníh dóó yáʼátʼééh nihainíyá dashiłní. Tʼáá aaníí ádaaníigo baa ákoniizı̨́ı̨́ʼ.” Joe dóó Irene éí meetingsdi dóó hootahgóó nahaneʼdi tʼáá íiyisíí Pauline yíká anáhiʼnilcheeh. Éí hayáázh yikʼi déezʼı̨́ı̨́ʼ. Áko Wayne éí Pauline beʼoodląʼ hazhóʼó yikʼidiʼdeeshtı̨́ı̨́ł niizı̨́ı̨́ʼ, éí binahjįʼ Joe Diyin Bizaad bíhwiideeshʼááł yiłní.

17. Haʼátʼíísh tʼáadoo bee akʼíhwiitʼáhí, ndi haʼátʼíísh biniinaa nihikʼéí tʼáadoo bíniʼdii nidaakai níníziní?

¹⁷ Nihikʼéí tʼáá ałtso Jiihóvah yá ndaalʼaʼ doo daniidzin. Ákódzaago, tʼáá bí bee bídahólnííh tʼáadoo bee nihikʼíhótʼahí. Háálá niheʼoodląʼ doo háiida bíniilchéeh da. Ákótʼée ndi, nił hózhǫ́ǫgo Jiihóvah bá nanilʼaʼgi nikʼéí dayooʼı̨́. Éí bintsékees łahgóó átʼéego íidoolíiłgo átʼé. Bá sodilzin. Índa hazhóʼó bichʼįʼ yáníłtiʼ. Tʼáadoo bichʼįʼ tʼą́ą́ʼ kónítʼéhí! (Acts 20:20) Yáʼátʼéehgo áníłʼínígíí Jiihóvah nikʼijidlíi doo. Nikʼéí daníistsʼą́ąʼgo, éí yisdáhidookah!