1. David éí Jiihóvah aʼohgo áʼdólzingi haʼátʼíí yiłní?

JIIHÓVAÁSH aʼohgo átʼé? Aooʼ. David kóníigo áʼiilaa: “Nibee yisdáʼiildééh ałdóʼ shaa dííníʼą́, . . . nibee aʼohgo éʼétʼéii bee ayóó áníshtʼéego áshiinilaa.” (2 Sam. 22:​36, New World Translation) David éí Ízrel bidineʼé binaatʼáanii náádoodleeł biniyé Sámuel hazhéʼé yaa níyáhą́ądą́ą́ʼ díí shı̨́ı̨́ baa nitsíjíkeesgo áʼjiilaa. David éí tseebíí ashiiké tʼááłaʼ háájéeʼgo akéédę́ę́ʼ nijighá; éí Naatʼáanii Saul bitséskʼeh góneʼ Jiihóvah nihodoołtééł biniyé náhodiiłtı̨́.—1 Sam. 16:​1, 10-13.

2. Haʼátʼíí baa nídadíitʼįįł?

² David éí psalmist łaʼ kótʼéego Jiihóvah yaa haadzíiʼgo tʼáá aaníí nízin: “Éí yaa ánátʼįįhgo yádiłhił áádóó nahasdzáán yinéłʼı̨́. Badahojoobáʼíii łeeshtahdóó néidiyiiłjeeh, áádóó . . . bidineʼé yá naatʼáanii danilíinii yitahdóó nidaháaztą́ągo ádeiileʼ.” (Ps. 113:​6-8) Haitʼéego Jiihóvah aʼohgo áʼdólzingo nihił ííshjání áyiilaagi áłtsé bídahodiilʼááł. Áádóó bikéédóó éí Naatʼáanii Saul, Daniel, índa Jesus éí haitʼéego aʼohgo ádaʼdólzin ńtʼéeʼgi ałdóʼ baa ídahwiidiilʼááł.

3. Jiihóvah éí haitʼéego nihaa nitsíkees, áádóó éí haʼátʼíí bee bééhózin?

³ Jiihóvah éí bílaʼashdlaʼii nidaʼiisíihii bichʼįʼ dahodísinii haitʼéego yaa nitsékeesgi bééhózinígo éí aʼohgo nitsékeesgo átʼé. Éí bichʼįʼ dahodóhsingi bił yáʼátʼééh índa bikʼis  danilı̨́įgo ałdóʼ yaa nitsíkees. (Ps. 145:18) Áko bikʼis dadiidleeł biniyé Jiihóvah bí áłtsédę́ęʼgo ádzaago éí nidaʼiyiilzíihgi biyeʼ nihá ninéidiníʼą́. Dooládóʼ Diyin ayóó aa aʼááh nízin da lá!

4. Jiihóvah haʼátʼíí nihainílá, éí haʼátʼíí biniyé?

⁴ Jiihóvah éí náánáłahgo aʼohgo yee átʼéegi dadíníilʼįįł. Jiihóvah Íʼiilaii nilı̨́įgo éí bídaniiltʼéego ánihiilaa áádóó tʼáá nihíniikʼeh ádá nitsíikeesgo [free-will] nihainílá. Bílaʼashdlaʼii kóníshéhíii niidlı̨́į ndi, éí Jiihóvah bá neilʼaʼ doo nihóʼní, háálá ayóóʼííníiʼní índa bikʼeh hóʼı̨́įgi nihá yáʼátʼéehgo baa ákodaniidzin. (Deut. 10:12; Isa. 48:​17, 18) Áko Jiihóvah éí aʼohgo átʼéegi baa ahééh niidzin!

5. Aʼohgo éʼétʼé dooleełgi Jiihóvah haitʼéego yee nanihinitin? (Naaltsoos bikááʼdę́ʼígíí níníłʼı̨́.)

⁵ Jiihóvah nihaa nitsékeesgi éí aʼohgo éʼétʼé dooleełgi yee nanihinitin. Jiihóvah éí yádiłhił biiʼ adahwiisʼáágóó hódząʼ yee átʼé. Azhą́ łaʼda kótʼéego bididooniiłii ádin ndi, kótʼéegoshąʼ haʼníigi tʼáá yiyíistsʼą́ą́ʼ. Éí łahgo, biYeʼ bíká eelwodgo tʼáá ałtsoní yił áyiilaa. (Prov. 8:​27-30; Col. 1:​15, 16) Azhą́ Jiihóvah éí ayóó ábóodziilii nilı̨́į ndi, éí łaʼda óhólnííh yąąh niyiiléego átʼé. Éí biNahatʼaʼ siʼą́ągi Jesus yiNaatʼáanii áyiilaa. Áádóó 144,000go Jesus yił dahwéeʼaah dooleełígíí ałdóʼ haashı̨́ı̨́ níłtsogo óhólnííh yąąh niinílá. (Luke 12:32) Jiihóvah éí Jesus Naatʼáanii dóó Aláahdi Nááʼiiłniihii dooleełgi yee neineeztą́ą́ʼ. (Heb. 5:​8, 9) Jesus yił dahwéeʼaah dooleełígíí ałdóʼ neinitin, ndi kótʼéego yeeʼ naanish ádadoołííł, doo yiłníi da. Éí bí íinízinii yedaʼdoolííł nízingo yee haa dzólí.—Rev. 5:10.

6-7. Yáʼąąshiidę́ę́ʼ Nihizhéʼé éí óhólnííh ąąh niyiiléegi haitʼéego yee naʼnitin?

 ⁶ Yáʼąąshiidę́ę́ʼ Nihizhéʼé éí łaʼda bíká adoolwołgi doo bohónéedzą́ą da. Ákótʼée ndi, óhólnííh ąąh niyiiléego átʼé. Áko bedaʼiilʼı̨́į doo! Hooghangi á naazíinii doodaiiʼ elder daatsʼí nílı̨́. Jiihóvah beʼíłʼı̨́įgo éí náánáłahjįʼda óhólnííh bąąh nihíléego, éísh kótʼéego áʼdíílííł bidiníi łeh? Ndi Jiihóvah beʼíłʼı̨́įgo naanish ádoolníiłgi łaʼda óhólnííh bąąh hidíʼaahgo éí yídaneedlı̨́įgo naanish ádeiłʼı̨́įgo łaʼdeileʼ. (Isa. 41:10) Áko óhólnííh bąąh nidahaasyaii haʼátʼíí ałdóʼ Jiihóvah bitsʼą́ą́dóó bídahojiiłʼaah?

⁷ Diyin Bizaad ííshjání ííłʼı̨́įgo Jiihóvah éí bidiyingo ndaalʼaʼí ádaaníigi yá yiyíistsʼą́ą́ʼ. (1 Ki. 22:​19-22) Azhéʼé índa amá danohłíinii, haitʼéego Jiihóvah bedaʼołʼı̨́? Haitʼéego naanish łaʼdoolnííł nínízin, bidohníigo nihaʼáłchíní nabídółkid. Áádóó bíighah ládą́ą́ʼ éí bí ádííniidígíí bikʼeh áʼdoolnííł.

8. Jiihóvah éí Éíbraham dóó Sárah haitʼéego yichʼįʼ haʼólníí ńtʼéeʼ?

⁸ Jiihóvah éí aʼohgo átʼé áádóó haʼólní. Éí yee nihodiiʼaahii bá ndaalʼaʼí łaʼ doo bił yáʼádaatʼééhgóogo ił ídlı̨́ yee bichʼįʼ hadaadzih, díí Jiihóvah yichʼįʼ haʼólní. Éíbraham éí daʼ Sádam índa Gomárah áníłdįįhgo, éísh doo ákwii ádííníił da, yidííniid Jiihóvah, áko hodiiztsʼą́ą́ʼ. (Gen. 18:​22-33) Éíbraham bichʼooní Sárah éí Jiihóvah haa tsídeezkééz yę́ęgi béénílniih. Éí Sárah hastihgo adííłchííł biʼdooʼniidgo yaa chʼídeeldloʼgo biniinaa Jiihóvah doo bikʼee báhóóchįįd da. (Gen. 18:​10-14) Ndi, Sárah hoł nilı̨́įgo baa tsízdeezkééz.

9. Azhéʼé dóó amá danohłíinii índa elders haʼátʼíí Jiihóvah bitsʼą́ą́dóó íhwiidooʼááł?

⁹ Azhéʼé dóó amá danohłíinii índa elders haʼátʼíí Jiihóvah bitsʼą́ą́dóó íhwiidooʼááł? Nihodííníʼą́ągoda naʼáłchíní doodaiiʼ brothers índa sisters łaʼ doo bił yáʼátʼééhgóogo bikʼee haa nítʼéego ándoolííł? Tʼóósh díí tʼáá aaníígóó ádíshní, diníi doo? Doodaiiʼ haʼátʼíí lá biniinaa kótʼéego nitsídaakeesísh díníizįįł? Óhólnííh bąąh naazláii éí Jiihóvah yedaʼałʼı̨́įgo hooghangi dóó brothers índa sisters bíká análwoʼ. Jiihóvah éí aʼohgo átʼéegi baa ídahwiilʼą́ą́ʼ. Diyin Bizaad biiʼ baa haneʼii aʼohgo ádaatʼéé ńtʼéeʼii baa nídadíitʼįįł.

10. Diyin Bizaad haitʼéego nihíká análwoʼ?

¹⁰ “Aláahdi ayóó átʼéii naʼnitinii” Jiihóvah tʼáá bí Bizaad biiʼdóó nizhónígo nihinááł ádaʼiilaii dahólǫ́ǫgo áyiilaago bitsʼą́ą́dóó yee nanihinitin. (Isa. 30:​20, 21, NW) Diyin yee átʼéii, índa aʼohgo éʼétʼé yedaʼiilaagi hazhóʼó baa nitsíikeesgo bitsʼą́ą́dóó íhwiilʼaah. Áádóó tʼáadoo yedaʼiilaa daaígíí ałdóʼ bitsʼą́ą́dóó íhooʼaah.—Ps. 37:37; 1 Cor. 10:11.

11. Saul doo yáʼátʼéhígi áátʼįįdgi haʼátʼíí bitsʼą́ą́dóó bíhooʼaah?

¹¹ Naatʼáanii Saul ádzaagi baa nitsíníkees. Éí tʼah dinééh nilı̨́įgo doo ayóó átʼéego ádaa nitsíkees da ńtʼééʼ. Tʼáá ałtsoní doo ayóó bíneeshʼą́ą da nízin índa naanish danitsaaígíí íidoolíiłgi yichʼįʼ tʼą́ą́ʼ nilı̨́. (1 Sam. 9:21; 10:​20-22) Ndi, Saul éí naatʼáanii jizlı̨́įʼgo tʼáadoo hodiinaʼí ádeijódlí jizlı̨́ı̨́ʼ. Naanish doo hódéétʼiʼii ájiilaa. Éí łah Sámuel chʼééh bibaʼ ájítʼéego doo haʼjoosníiʼ da. Jiihóvah baʼjólíigo diné bá ájítʼée dooleeł yę́ęgi doo hódéétʼiʼii didlidgo nááhániihii náájiisniiʼ. Biniinaa  Jiihóvah doo honiizı̨́įʼ da áádóó naatʼáanii ídlı̨́įgi doo tʼáá yíłtʼih da doo, hoʼdooʼniid. (1 Sam. 13:​8-14) Baa honiidzą́ągo díí bitsʼą́ą́dóó bíhwiidiilʼáałgo éí áʼdoolníiłii doo nihídadéétʼiʼii bitsʼąą ádaa áhwiilyą́ą doo.

12. David éí haitʼéego aʼohgo áʼdólzin ńtʼééʼ?

¹² Prophet Daniel éí doo Saulgi ájítʼée da ńtʼééʼ, ndi éí yáʼátʼéehgo áátʼįįd. Éí aʼohgo átʼéego Jiihóvah yaʼólíigo yá naalʼaʼgo hoolzhiizh. Nébukadnézzar yaa nayiizyeel yę́ęgi Jiihóvah chohoosʼįįdgo éí áhyiłníigi hazhóʼó bee bił hojoolneʼ. Díí éí Diyin bitsʼą́ą́dóó ííshjání ályaii átʼé bizhdííniid. Áko éí bee Jiihóvah baa hojiznih. (Dan. 2:​26-28) Díí haʼátʼíí bitsʼą́ą́dóó bíhooʼaah? Nihitalk íilʼı̨́įgo nihibrothers ayóó yídaneedlı̨́įgo doodaiiʼ nahaneʼgi yáʼátʼéehgo íilʼı̨́įgo éí Jiihóvah beego nihá ákótʼé. Jiihóvah baa hwiiʼniih dooleełgi bénéiilniih doo. (2 Cor. 4:7) Áko éí Jesus nizhónígo nihinááł áʼiilaa yę́ęgi ałdóʼ beʼiilʼı̨́įgo átʼé. Éí haitʼéego Jesus beʼiilʼı̨́į doo?

13. John 5:​19, 30 áníigi Jesus éí aʼohgo áʼdólzingi haʼátʼíí bitsʼą́ą́dóó bíhooʼaah?

¹³ Azhą́ Jesus éí Diyin biYeʼ doo niʼiisíihii jílı̨́į ndi, Jiihóvah yéigo baʼjólíí ńtʼééʼ. (John 5:​19, 30 yíníłtaʼ.) Bizhéʼé bee bóhólníihii tʼáadoo bee ádíhojoosníiʼ da. Jesus ání John 6:38gi, ‘Doo tʼáá shí íinisinígi átʼéego ádeeshníił da, ndi shiníłʼaʼii íinízinígíí beʼdeeshłííł biniyé níyá.’ AYeʼ akʼeh hółʼíinii jílı̨́įgo Jesus éí biʼoh jílíinii bee ádaa ákozhnízin índa Hazhéʼé bóhólníihgi hoł nilı̨́.

14. Jesus éí doo bee bóhólníihii haitʼéego tʼáadoo ádeideetʼą́ą da?

¹⁴ Jesus éí bóhoołʼaahii James dóó John áádóó bimá yił íhólnííh bídayííkeedgo éí haʼátʼíí náhoʼdooʼniid yę́ęgi baa nitsíníkees. Jesus tʼáadoo tʼą́ą́ʼ nilínígo éí Diyin biNahatʼaʼ biiʼ nishʼnáájí índa nishtłʼahjí dah asdáa dooleełgi deínóhkeedígíí éí Shizhéʼé tʼéiyá bee bóhólnííh bizhdííniid. (Matt. 20:​20-23) Jesus yiʼohgo átʼéii ííshjání áyiilaago éí aʼohgo áʼdiilyaa. Jiihóvah yee bóhólníihii tʼáadoo ádeideetʼą́ągo yee ádíhoosníiʼ da. (John 12:49) Haitʼéego Jesus bedaʼiilʼı̨́į doo?

15-16. 2 John 9 éí haitʼéego bikʼehgóó ániitʼée doo?

 ¹⁵ Jesus aʼohgo áʼdólzin yę́ęgi bedaʼiilʼı̨́įgo 2 John 9 áníigi bikʼehgóó ániitʼée doo. Éí ání: ‘Tʼáá háiida Christ binaʼnitin doo biláahgo bee nazhʼnitin da doo.’ Áko łaʼda haitʼéego lá áʼdeeshlííł níigo, éí tʼáá nihí baa nitsíikeesii doodaiiʼ tʼóó tsı̨́įłgo kótʼéego lą́ą, doo didiiʼniił da. Ndi tʼóó hazhóʼó éí Diyin Bizaad índa binahjįʼ naʼnitingo naaltsoos ádaalyaaígíí biyiʼdóó áká adoolwołgo átʼé didiiʼniił. Kótʼéego áʼiilyaago éí tʼáadoo leʼé tʼáá biʼoh niidlı̨́įgo ániitʼéiigi ííshjání íilyaa doo. Aʼohgo ániitʼéego éí Ayóó Átʼéii “tʼáá ákogi ááníiłii” bee baa hwiiʼniih.—Rev. 15:​3, 4.

¹⁶ Jiihóvah baa haʼniihgo tʼáá bił éí aʼohgo éʼétʼé dooleełgi ałdóʼ biniyéii dahólǫ́. Aʼohgo éʼétʼéego éí haitʼéego ił hózhǫ́ bił nítʼiʼgi índa diné bił ahíhodínéenáagi éí kʼad baa nídadíitʼįįł.

17. Aʼohgo áʼdííníilzingo éí haʼátʼíí biniyé nihił hózhǫ́ǫ łeh?

¹⁷ Aʼohgo áʼdííníilzingo éí haʼátʼíí biniyé nihił hózhǫ́ǫ łeh? Haʼátʼíí shı̨́ı̨́ biʼoh niidlíinii bee ádaa ákoniidzingo éí łaʼda níká iishyeed nihiłníigo baa ahééh niidzingo baa nihił hózhǫ́ǫ łeh. Jesus éí diné 10 yiltʼéego łóód bee bąąh dahazʼą́ągo yíká eelwod yę́ęgi baa nitsíníkees. Éí tʼááłaʼígo nátʼą́ą́ʼ nádzáago Jesus nábiiłdzíiʼgi yichʼįʼ ahééh niizı̨́ı̨́ʼ, háálá éí bił bééhózingo tʼáá bígo éí bitsʼíís doo ádá néidoołdzih da. Díí hastiin aʼohgo áʼdólzingo éí hadaałtʼé ánáhoʼdiilyaago baa ahééh jiniizı̨́įʼgo Diyin baa hojiznih.—Luke 17:​11-19.

18. Aʼohgo éʼétʼéegi éí haitʼéego náánáłahjįʼ ayóó bił ahídiníilnáago áyiiłʼįįh? (Romans 12:10)

 ¹⁸ Haʼátʼíí biniinaa diné aʼohgo ádaatʼéii éí diné náánáłahjįʼ ayóó yił ahídineelnáago ayóó daʼahílkʼis daaleeh? Jó, haʼátʼíí shı̨́ı̨́ biʼoh niidlíinii bee ádaa ákoniidzingo éí ahééh niidzin índa nihił hózhǫ́ǫ łeh. Diné aʼohgo átʼéii éí łaʼda yinaalnishii bá łaʼhooníiłgo yá yaa bił hózhǫ́ǫgo yee yaa haniih łeh.—Romans 12:10 yíníłtaʼ.

19. Haʼátʼíí biniinaa ádaa hodzódlí bitsʼąą ániitʼée doo?

¹⁹ Ndi ádaa dzódlíii éí łaʼda yáʼátʼéehgo áánííł yididooníiłgi bá nantłʼa, háálá éí shí yeeʼ shaa hodooʼnih nízin łeh. Éí tʼóó łahjįʼ diné yił ádíchʼįʼ naʼádíltʼeʼgo shí haláahdi áníshtʼé nízingo nitsékees łeh. Nazhnitin índa naanish bichʼįʼ ajiłʼáa dooleeł yę́ęgi éí doo bí bikʼehgóó éʼélnéehgo kójíníi łeh. Hazhóʼó ádeeshłííł jinízingo tʼáá ni ánílééh. Ádaa dzódlíii éí akʼee diniih índa oołchʼı̨́įd łeh. (Gal. 5:26) Diné kótʼéhígíí éí doo ayóó bikʼis dahólǫ́ǫ da łeh. Kóniitʼéego bee ádaa ákoniidzingo Jiihóvah shíká anilyeedgo ‘shíniʼ ániidíii ánánídlééh’ bidiiʼníigo néiniikąąh doo. Áko doo tʼóó tséʼádin ákóniitʼée da doo.—Rom. 12:2.

20. Haʼátʼíí biniyé aʼohgo ádaʼdííníilzin doo?

²⁰ Dooládóʼ Jiihóvah nihinááł átʼéegi baa ahééh daniidzin da! Éí aʼohgo átʼéego bá ndaalʼaʼí nizhónígo yił naalnishgi áádóó éí bedaʼiilʼı̨́į doo daniidzin. Áádóó Diyin Bizaad biiʼdóó diné aʼohgo ádaʼdólzingo Diyin yił yíkaigo baa dahóoneʼ yę́ę bedaʼiilʼı̨́į doo daniidzin. Áko tʼáá áłahájįʼ Jiihóvah baa dahwiiʼniih. Háálá éí bí Íʼiilaii nilı̨́. (Rev. 4:11) Áko bílaʼashdlaʼii aʼohgo ádaʼdólzinii ayóóʼóʼóʼníinii Nihizhéʼé bił yiikah doo.