1. Baptize áhoʼdilnéehgo haʼátʼíí biniyé ílíinii átʼé? (Áłtsé eelkidígíí níníłʼı̨́.)

TʼÁÁ nináháhááh bikʼeh Diyin Bizaad yídahoołʼaahii baptize ádaalneʼ. Ląʼí éí tʼáá hooghangi bimá dóó bizhéʼé Jiihóvah yee nidabineeztą́ą́ʼ, áko baptize ádaalneʼ. Niísh atah baptize ándiilyaa? Éí nizhónígi íinidzaa doo. Tʼáá ałtso Oodlání baptize ádoolnííł. Háálá baptize áhoʼdilʼįįhgo bee yisdáhóótʼiʼ dóó hoolʼáágóó jiináa doo.—Matthew 28:​19, 20; 1 Peter 3:21.

2. Jiihóvah baa ádidíítʼáałgi, haʼátʼíí biniyé doo tʼą́ą́ʼ jílı̨́į da doo?

² Baptize ándiilyaago Jiihóvah éí tʼóó ahayóígóó yee nikʼihadlíigo bee hahoolzhiizh. Ndi naanish nąąh niilyá. Éí haitʼéego ádzaa? Baptize ándiilyaa yę́ędą́ą́ʼ bijı̨́ nihibrother achʼįʼ haadzííʼ yę́ę kóníigo naʼídééłkid: “Jesus Christ nááʼádiisniiʼígi binahjįʼ, doo yáʼádaashxóonii baa  nanináhą́ą́ yóóʼadííníʼą́ áádóó Jiihóvah íinínízinii ááshníił doo bidiníigoósh baa ádíínítʼą́?” Áko aooʼ dííníniid niʼ. Jiihóvah ayóóʼííníshʼníi doo áádóó bá naashʼaʼ dooleełgi ayóó ílíinii átʼéego baa nitséskees doo diníigo bee ádee hadíínídzííʼ. Kótʼéego ádee hadíínídzíiʼgo haʼátʼíí lá biniyé ákódííniidísh nínízin doo? Nda shı̨́ı̨́! Jiihóvah niyoołáał dooígi tʼáadoo biniyéhí da, doo niidzin da doo. Jiihóvah doo yéédahósinígíí éí Séítan binahatʼaʼ yikééʼ naazı̨́. Éí Séítan doo yaa joobaʼ da, ni ałdóʼ. Jiihóvah yóóʼadííníʼą́ągo áádóó Séítan bikééʼ nííníyáago biniinaa hoolʼáágóó iiná naa náádiilyáago yaa bił hózhǫ́ǫ doo.

3. Jiihóvah baa ádíínítʼą́ągi haitʼéego nikʼihasdliʼ?

³ Jiihóvah nikʼihasdliʼgi baa nitsíníkees, háálá baa ádíínítʼą́ągo baptize ándiilyaa. Neʼiinaʼ Jiihóvah baa dííníʼą́, áko díí yiniidlą́ągo kódíní: “Bóhólníihii [Jiihóvah] shichʼijí nilı̨́; doo násdzid da doo. Dinéshąʼ, haa dashizhdoolííł?” (Psalm 118:6) God bichʼijí ídlı̨́įgo baa hózhǫ́ áádóó nihaa bił hózhǫ́.

4, 5. (a) Jiihóvah bił kʼé ahidiʼníigi haʼátʼíí biniyé tʼáá nihí bee ádaa áhwiilyą́ą doo? (b) Tʼáá áníiltso éí haʼátʼíí bee nihichʼįʼ hodiiʼnááh?

⁴ Tʼáá ni Jiihóvah bił kʼé ahidiʼníigi éí nimá dóó nizhéʼé doo bee baʼjólíi da doo. Azhą́ nimá dóó nizhéʼé tʼahdii bił nighan ndi, Jiihóvah bił kʼé ahidiʼníigi tʼáá ni bee ádaa áhólyą́. Díí haʼátʼíí biniyé bééhániih doo? Haitʼéego niheʼoodląʼ bee nanihíhodínóotahgi tʼáá áníiltso doo nihił bééhózin da. Ni shı̨́ı̨́ éí tʼah doo teenager nilééhgóó baptize ándiilyaa. Ndi kʼad éí teenager sínílı̨́ı̨́ʼ, áko kʼad éí łah átʼéego nitsíníkees dóó ániidíii bee nichʼįʼ anáhóótʼiʼii dahazlı̨́ı̨́ʼ. Atʼééd łaʼ teenager nilı̨́įgo ání: “Tʼah áłchíní yázhí jílı̨́įgo éí azhą́ óltaʼdi birthday cake doo jidooyı̨́įł daaígi éí Jiihóvah Yá Halneʼé jílı̨́įgi doo tʼą́ą́ʼ ájítʼée da łeh. Ndi tʼah náásídóó éí ił eshtéézh bidázhnoolní jileehgo éí Jiihóvah bibee hazʼáanii bikʼeh ájítʼééjí há yáʼátʼéehgi tsʼídá yéigo joodlą́ą doo.”

⁵ Ániid nidaakaii tʼéiyá doo bichʼįʼ anídahaztʼiʼ da. Dahóyáanii daazlı̨́įʼgo baptize ádaalyaa ndi, doo nidayólíí yę́ęgi átʼéego bedaʼoodląʼ bee bídahonitááh. Éí ahéʼéskéegi, atsʼíís, doodaiiʼ binaanish ííłʼı̨́įgi bee bídahonitááh. Tʼáá áníiltso éí tʼóó ahayóígóó bee naʼíhonitaah ádaatʼéii bee nihichʼįʼ hodiiʼnáahgo éí Jiihóvah doo bitsʼá diidáał da.—James 1:​12-14.

6. (a) Jiihóvah bichʼįʼ bee ádee hadíínídzííʼ yę́ę haitʼéego béénílniih doo? (b) Philippians 4:​11, 12, haʼátʼíí bitsʼą́ą́dóó bíhwiidííłʼááł?

⁶ Jiihóvah tʼáá bikééʼ sínízı̨́į doogo éí bichʼįʼ bee ádee hadíínídzííʼ yę́ę béénílniih, éí łaʼda shikʼijįʼ dajílı̨́į dooleeł ndi bichʼįʼ shidziil doo. (Psalm 27:10) Tʼáá ałtso bee nichʼįʼ hodiiʼnáahgo Jiihóvah bichʼįʼ bee ádee hadíínídzííʼ yę́ę beʼeshʼı̨́įgo shá íínísin bidiníigo bichʼįʼ sodilzin.—Isaiah 12:2; Philippians 4:​11, 12 yíníłtaʼ.

7. “Dadíínóhsingo índa bąą ádaa dasoohtiʼgo” tʼáá nihí yisdáʼdadidoołtéełgi bindaałnish níigo haʼátʼíí áhyiłní?

⁷ Jiihóvah éí shikʼis nílı̨́į doo nóʼní. Ndi Jiihóvah bikʼis ídlı̨́įgo bidziilgo óolzingi dóó tʼáá nihí yisdáʼádiʼdííltéełgi  ayóó binaʼanishii átʼé. Philippians 2:12 ání: “Yisdánihiʼdooʼnilígíí łaʼdooníiłgi dadíínóhsingo índa bąą ádaa dasoohtiʼgo bindaałnish.” Díí áníigo éí tsʼídá haʼátʼíí shı̨́ı̨́ bee nihichʼįʼ anáhóótʼiʼ dooleeł ndi Jiihóvah áhánígo bił niidlı̨́įgo díníilzin dooígi hazhóʼó baa nitsíikees doo. Ádeeshníiłgo shı̨́ı̨́ átʼé, doo tʼóó niidzin da doo. Béénílniih łaʼ tʼáá níléídę́ę́ʼ Jiihóvah yéigo yikééʼ naazı̨́ı̨́ ńtʼééʼ ndi Jiihóvah yitsʼá heeskai. Tʼáá ni yisdáʼádiʼdííltéełgi haʼátʼíí níká adoolwoł?

8. Haʼátʼíí tʼáá nihí ádá íhwiinilʼaahgi bił nítʼiʼ? Haʼátʼíí biniyé ílíinii átʼé?

⁸ Jiihóvah bikʼis niidlı̨́į dooleełgo éí yísíníiltsʼą́ą́ʼ dóó bichʼįʼ yéiiltiʼ doo. Jiihóvah yísíníiltsʼą́ąʼgo éí Bizaad baa íhwiilʼaah doo. Éí Diyin Bizaad dóó naaltsoos binahjįʼ bee naʼnitingo ádaalyaaígíí yíníiltaʼ áádóó yíníiltaʼ yę́ę nabikʼítsíilkees doo. Diyin Bizaad baa íhojiiłʼaahgo éí ajółtaʼgi test biniyé hashtʼezhdineehgo doo nahalin da. Ndi éí bóhoneedlı̨́įgo Jiihóvah baa íhooʼaahii átʼé. Áko áhánígo God bił hojílǫ́ǫ doo, áádóó God áhánígo hoł nilı̨́į doo.—James 4:8.

9. Tʼáá ni ádá íhwiinilʼaahgi haʼátʼíí níká eelwod?

⁹ Jiihóvah bidineʼé naaltsoos ádeiłʼínígíí ląʼí bitsʼą́ą́dóó bee íhwiidooʼáałii dahólǫ́ǫgo ádeiłʼı̨́. Éí łaʼ bilagáana kʼehjí jw.org biiʼdę́ę́ʼ “Teenagers” wolyéhígíí biyáádóó áádóó “Bible Study  Activities” biyiʼ góneʼ Diyin Bizaad biiʼ dahaneʼ bitsʼą́ą́dóó íhooʼaahii níká adoolwołii dahólǫ́. Áádóó nááʼáłdóʼ “Study Guides” wolyéego éí “What Does the Bible Really Teach?” binaaltsoos bitsʼą́ą́dóó íhooʼaahii hólǫ́. Díí t’áá átʼé níká análwoʼgo neʼoodląʼ bidziil doo áádóó yinídlánígíí baa nahólneʼ doo. Naaltsoos Awake! April 2009 yę́ę biiʼdóó ałdóʼ “Young People Ask . . . How Can I Make Bible Reading Enjoyable?” wolyéhígíí ałdóʼ níká adoolwoł. Íhojiiłʼaahgo áádóó jííłtaʼ yę́ę nabikʼítsíilkeesgo éí bee tʼáá ni yisdáʼádiʼdííltééł.—Psalm 119:105 yíníłtaʼ.

10. Oodlání baptize ályaaígíí haʼátʼíí biniyé sozdilzin doo?

¹⁰ Diyin Bizaad bíhwiilʼaahgo Jiihóvah yísíníiltsʼą́ą́ʼ áádóó sodiilzingo bichʼįʼ yéiiltiʼ. Sodizin bee shichʼijí aztą́ągo tʼáá ałtsoní shá łaʼ hoonííł doo jinízingo baa nitsíjíkees da doo. Sohodizin éí Ánihiilaii tʼáá aaníigo bichʼįʼ yátiʼii átʼé. Jiihóvah éí haʼátʼíí shı̨́ı̨́ didííniiłgi ná dideestsʼı̨́ı̨́ł nízin! (Philippians 4:6 yíníłtaʼ.) Áko haʼátʼíí shı̨́ı̨́ biniinaa ádił nitsééníltłiʼgo Diyin Bizaad áníigo “bee nide áhootʼéhígíí Bóhólníihii [Jiihóvah] baa diníʼaah.” (Psalm 55:22) Ląʼí nihibrothers dóó nihisisters díí yídaneeztą́ą́ʼ, ni ałdóʼ níká adoolwołgo átʼé!

11. Haʼátʼíí biniyé tʼáá áłahájįʼ Jiihóvah bichʼįʼ ahééh nínízin doo?

¹¹ Jiihóvah bichʼįʼ sodideeszįįłgo tʼóó shíká adoolwoł tʼéiyá biniyé, doo niidzin da doo. Diyin Bizaad ání: “Ahééh danohsin.” (Colossians 3:15) Bee nihichʼįʼ anídahaztʼiʼii tʼéiyá łahda baa nitsíikeesgo yáʼádaatʼéehii nihee dahólónę́ę baa nídayiiʼnah. Díí bínítááh: Tʼáá ákwíí jı̨́, táaʼgo baa ahééh nínízinígíí baa nitsíníkees áádóó Jiihóvah bichʼįʼ baa ahééh díníizįįł. Teenager nilı̨́įgo Abigail 12 binááhaigo baptize ályaago ání: “Náánáłaʼda biláahdi Jiihóvah bichʼįʼ ahééh hwiindzin doogo baa nitsískees. Tʼáá ałtsoní nihainíláhígíí bee bichʼįʼ ahééh niidzin doo.” Abigail díí naʼídíkid łah jidiiztsʼą́ąʼ, áko baa nitsíjíkees łeh: “Díísh jı̨́ Jiihóvah bichʼįʼ baa ahééh nisinii, éí yiską́ągo tʼáásh éí tʼéiyá shee hólǫ́ǫ doo?”

12, 13. Jiihóvah éí yáʼátʼéehii nilı̨́įgi haitʼéego tʼáá ni baa ákoninizı̨́ı̨́ʼ, dóó Jiihóvah níká eelwodgi haʼátʼíí biniyé baa nitsíikees doo?

¹² Naatʼáanii David éí ląʼígóó bichʼįʼ anáhóótʼiʼ ńtʼééʼ, áko haʼjólníi doo biniyé Jiihóvah háká eelwod. Áko éí bąą David tʼáá bí bił bééhózingo binahjįʼ ání: “Dasoolįhgo Bóhólníihii [Jiihóvah] yáʼátʼéehii jílı̨́įgo nihił béédahodoozįįł! Bóhólníihii beijólíii éí hakʼihojidlí!” (Psalm 34:8) Díí áníigo éí Jiihóvah yáʼátʼéehii nilı̨́įgi tʼáá nihí nihił bééhodoozįįł. Diyin Bizaad dóó naaltsoos binahjįʼ naʼnitinii ádaalyaaígíí yíníłtaʼgo dóó áłah náʼádleehgi nánídáahgo  éí diné bibeʼoodląʼ dabidziil doogo God éí haitʼéego yíká eelwodgi baa íhwiidííłʼááł. Tʼáá ni sínízı̨́įgi Jiihóvah bił kʼé ahidiʼníigi bidziil áálíiłgo Jiihóvah níká análwoʼgi baa ákonínízin doo. Jiihóvah éí yáʼátʼéehii nilı̨́įgi tʼáá ni haitʼéego nił bééhoozin?

¹³ Oodlání tʼáá ałtso éí tʼááłáhígo Jiihóvah yáʼátʼéehii nilı̨́įgi bił béédahoozin, éí tʼááłaʼí niitínígo Bí dóó Biyeʼ áhánígo nihił nilı̨́įgo ánihiilaa. Jesus ání: “Diné doo łaʼ shaa doogáał da, aTaaʼ shiníłʼaʼígíí shaa honílóozgo tʼéiyá.” (John 6:44) Jiihóvah áhánígo bił nilı̨́įgo ániilaaísh nínízin? Doodaiiʼ ‘Jiihóvah éí shimá dóó shizhéʼéjígo áhánígo yił nilı̨́, áko shí tʼóó akééʼgóó áníshtʼé,’ nínízinísh? Béénílniih, Jiihóvah baa ádíínítʼą́ągo baptize ándiilyaa yę́ędą́ą́ʼ éí tʼáá ni Jiihóvah bił kʼé ahidiʼníigi bee háátʼiʼ. Diyin Bizaad ání: “Tʼáá háiida Diyin God ayóóʼáyóʼníigo tʼáá éí Diyin God bééhósin.” (1 Corinthians 8:3) Jiihóvah bił hazʼą́ągi ná hoołʼaʼgi áłahjįʼ nił nilı̨́įgo baa nitsíníkees.

14, 15. Diyin Bizaad baa nahólneʼgo haitʼéego neʼoodląʼ bidziil íidoolííł?

¹⁴ Jiihóvah yáʼátʼéehii nilı̨́įgi ałdóʼ nił bééhoozingo éí neʼoodląʼ baa nahólneʼgi doo tʼą́ą́ʼ nilı̨́ı̨́góó yee níká análwoʼ. Bił daʼjółtaʼígíí Diyin Bizaad bee bił nahojilneʼgo ayóó nantłʼaii átʼé. Haʼátʼíí lá dashididooniił shı̨́ı̨́ nínízin łeh. Diné ląʼí bidááhdóó hweʼoodląʼ baa hojilneʼgo hoł yéeʼ łeh. Áko haʼátʼíí níká adoolwoł?

¹⁵ Yinídlánígíí haʼátʼíí biniyé yinídlą́ągi baa nitsíníkees. Website jw.org biiʼdę́ę́ʼ “Study Guides” wolyéhígíí saad bee yáníłtiʼígíí bee ályaago choiníłʼı̨́. Éí haʼátʼíí yinídlą́ągi, haʼátʼíí biniyé yinídlą́ągi, dóó yinídlánígíí haitʼéego łaʼda hazhóʼó bee bił hodíílnihgi yee níká adoolwoł. Yéigo iisínídląądgo áádóó biniyé hashtʼedinidzaago, Jiihóvah baa nahodeeshnih díníízįįł.—Jeremiah 20:​8, 9.

16. Neʼoodlą́ baa nahólneʼgo haitʼéego íʼiiłʼı̨́įgo doo nił yéeʼ da?

¹⁶ Azhą́ tʼáá íídą́ą́ʼ biniyé hashtʼedinidzaa ndi, neʼoodląʼ baa náhodíilnihgi bikʼee nił yéeʼ doo. Nihisister łaʼ 13 binááhaigo baptize ályaa, kʼad éí 18 binááhaigo ání: “Yinishdlánígíí shił bééhózin, ndi baa nitsíkeesígíí saadjįʼ ánídeeshdlíiłgo łahda shá nantłʼa łeh.” Áko Diyin Bizaad baa ahozhniilnihgo éí tʼóó chʼíjiʼááh. Kójíní: “Bił daʼííníshtaʼígíí ádaatʼįįdígíí yee ahił dahalneʼ łeh. Áko shí ałdóʼ áátʼįįd yę́ę łaʼ chʼídeeshʼááł nisin łeh. Éí, ‘Diyin Bizaad bee naʼnishtin ńtʼéeʼgo . . .’ dishniih. Áádóó biniyé baa hashneʼgi bee bił dahashní. Azhą́ Diyin Bizaad éí doo íiyisíí baa hashneʼ da ndi, Diyin Bizaad bee naʼnishtingi shił bééhodoozįįł daniizįįh. Áko łahda yíndashídíłkiʼ. Díí átʼéego Diyin Bizaad baa hashneʼgo doo nantłʼa da silı̨́ı̨́ʼ. Áádóó bikéédóó ayóó baa hózhǫ́!”

17. Diyin Bizaad baa hodíílnihgi haʼátʼíí doo łaʼ níká adoolwoł?

 ¹⁷ Łahdę́ę́ʼ diné éí shaa hojoobaʼ dóó ił ídlı̨́ bee shaa nitsáhákees nízingo éí ni áádóó neʼoodląʼ nátʼą́ą́ʼ bił danilı̨́į doo. Olivia tʼah áłtsʼísígo baptize ályaa, kʼad éí 17 binááhaigo ání: “Łaʼda bił ahił nidahashneʼgo Diyin Bizaad chʼídeeshʼáałgi ayóó bikʼee shił yééʼ, éí haʼátʼíísh jiní, dashóʼní nisin łeh.” Áádóó łah átʼéego baa tsízdeezkééz. Éí bééjíldzidgi doo baa nitsískees da doo, jinízingo kójíní: “Ląʼí ániid nidaakaii Jiihóvah Yá Dahalneʼé doo ayóó yéédahósin da. Tʼáá nihí tʼéiyá Jiihóvah Yá Halneʼé daniidlı̨́įgo yéédahósin. Áko ádeitʼįįłgi binahjįʼ niheʼoodląʼda yíndaʼídíłkid doo. Ákoshąʼ ayóó yánízingo doodaiiʼ niheʼoodląʼ bee hadiidzihgi nihá nantłʼago doodaiiʼ hadiidzihgi baa yáhásin yeeʼ, niidzingo haʼátʼíí nihiʼdoʼníi doo? Éí diné binááł kóniitʼéego Jiihóvah Yá Halneʼé niidlı̨́įgi doo baa ahééh niidzin da, danihóʼníi doo. Iiniidlą́ągi doo yáʼátʼééhgóoda yee nihá hadadoodzih. Ndi niheʼoodląʼ éí hazhóʼó baa yéiiltiʼ, bił ahił nidahwiilneʼígíí bił chʼínéetʼáahgo, éí ił ídlı̨́ yee danihinéłʼı̨́į doo.”

18. Tʼáá ni yisdáʼádiʼdííltéełgi haitʼéego binaʼanishii átʼé?

¹⁸ Tʼáá nihí yisdáʼádiʼdííltéełgi binaʼanishgo ílíinii átʼéii átʼéego bídahwiilʼą́ą́ʼ. Éí Diyin Bizaad yíníiltaʼ doo áádóó yíníiltaʼ yę́ę nabikʼítsíilkees, Jiihóvah bichʼįʼ sodiilzin, áádóó tʼáá ni sínízı̨́įgi Jiihóvah yee níká eelwodígíí yéigo baa nitsíníkees doo. Kótʼéego íʼiiłʼı̨́įgo éí Jiihóvah nikʼis nilı̨́įgi yéigo yinídlą́ą doo. Áko éí neʼoodląʼ náánáłahjįʼ diné bee bił hólneʼ nínízin doo.—Psalm 73:28 yíníłtaʼ.

19. Haʼátʼíí biniyé yisdáʼádiʼdííltéełgi yéigo bineilnish doo?

¹⁹ Jesus ání: “Diné tʼáá háiida shikééʼ dashdiigháhígíí éí ádeizhdiyooʼnah, áko hatsin . . . nízhdidootı̨́ı̨́ł áádóó shikééʼ joogáał doo.” (Matthew 16:24) Jesus bikééʼ joogáał dooleełgo Oodlání éí Jiihóvah baa ázhdidootʼáałgo baptize áhodiʼdoolnííł. Díí éí kʼad iiná baa hózhóonii bee deeztʼiʼii átʼé, áádóó God ániidígo ánáhoodlaa góneʼ bee yah ahóótʼiʼ. Áko tʼáá ni yisdáʼádiʼdííltéełgi yéigo binanilnish!