ŁAʼDA nihaa joobaʼgo ayóó baa nihił hózhǫ́ǫ łeh. Nihaa joobaʼ lá niidzingo bee nihitah yáʼáhootʼéeh łeh. Kótʼéego diné nihaa dajoobaʼgo baa ahééh niidzingo, nihí éí haitʼéego jiiniibaʼ diidleeł?

Diné joobaʼii éí náánáłahjįʼ diné ayóó yaa aʼááh nízin áádóó bizaad yee índa ááníiłgi bee bééhózin. Éí doo tʼóó báʼáhwiinítʼı̨́į da. Ndi, diné yaa joobaʼ, háálá ayóóʼáyóʼní áádóó bitah áhootʼéegi yá yaa ákonízin. Ajoobaʼ éí níłchʼi diyinii bineestʼąʼígíí łaʼ átʼé. (Galatians 5:​22, 23) Jiihóvah éí jiiniibaʼ doo nihóʼní, áko bí índa biYeʼ joobaʼgi áádóó haitʼéego nihí ałdóʼ ákódaniitʼée dooleełgi baa nídadíitʼįįł.

Jiihóvah éí t’áá ałtso yaa joobaʼ, “doo ahééh danízinii índa doo yáʼádaashóonii” ndi, yaa joobaʼ. (Luke 6:35) Éí “doo yáʼátʼééh ádaaníiłii índa yáʼátʼééh ádaaníiłii bá hááʼátʼáahgo áyósin, áádóó tʼáá ákogi ádaaníiłii índa doo tʼáá ákogi ádaaníiłii bá nááháltı̨́įhgo áyósin.” (Matthew 5:45) Azhą́ diné éí Jiihóvah Íʼiilaii nilı̨́įgi doo dajoodlą́ą da ndi, haa joobaʼ áádóó hoł dahózhǫ́.

Ádam dóó Íiv éí Jiihóvah ayóó átʼéego haa joozbaʼ. Éí ajisiihdóó bikʼijįʼ “fig sikaadii bitʼąąʼ ahídazhdiiłkadgo” haʼééʼ bee ájiilyaa. Jiihóvah bił bééhózingo éí dáʼákʼeh Ííden tłʼóóʼdóó éí kʼad ééʼ bee hazhdidoonííł, háálá niʼ hóyéeʼgo bá haʼoodzíiʼgo “chʼil dadeeníinii índa hosh” hááhinootʼı̨́įł doo. Áko Jiihóvah éí “akágí ééʼ ájiilaa áádóó bee hazhdiilaa.”—Genesis 3:​7, 17, 18, 21.

Jiihóvah éí “doo yáʼátʼééh ádaaníiłii índa yáʼátʼééh ádaaníiłii” tʼáá áłah yaa joobaʼ, ndi bá ndaalʼaʼgo doo bitsʼá daakáahii éí íiyisíí yaa joobaʼ. Zekaráíyah éí Diyin yá halneʼé nílínę́ędą́ą́ʼ, diyingo naalʼaʼí łaʼ éí Jiihóvah bikin biiʼ sohodizin áńdeidlééh yę́ęgi Ízrel dineʼé yikʼi deeskaigo biniinaa yąąh bíniʼ. Áko Jiihóvah éí diyingo naalʼaʼí yiyíistsʼą́ą́ʼ, áádóó “ajoobaʼ saad índa saad bee haʼahóníinii” yee yichʼįʼ hanáádzííʼ. (Zechariah 1:​12, 13) Jiihóvah éí Iiláíjah ałdóʼ tʼáá kótʼéego yaa joozbaʼ. Éí Iiláíjah ayóó átʼéego yínííł bikʼee nijigháago biniinaa Jiihóvah sheʼiinaʼ tʼóó náádiidlé bizhdííniid. Jiihóvah éí Iiláíjah yínííł nilı̨́įgi yá yaa ákoniizı̨́ı̨́ʼ, áko yaa joozbaʼgo diyingo naalʼaʼí łaʼ hadziil ánáhodoodlííł biniyé hachʼįʼ ayííłʼaʼ. Áádóó doo t’áá sáhí nilı̨́į da yidííniid. Kótʼéego Jiihóvah haa joozbaʼgo Iiláíjah éí naanish haa deitʼánígíí tʼáadoo nahjįʼ kójiilaa da. (1 Kings 19:​1-18) Tsʼídá tʼáá ałtso Jiihóvah bá nidaasʼaʼ yę́ę, háiidígíí éí hweʼajoobaʼ ayóó átʼéego yeʼiilaa?

Jesus éí nahasdzáán yikááʼ naagháhą́ądą́ą́ʼ diné haa ákodanízingo ayóó jijoobaʼ ńtʼééʼ. Jesus éí ayóó báʼáhwiinítʼı̨́, hó íiznízinígíí ádajooníił doo, tʼáadoo niizı̨́įʼ da. Diné yaa joobaʼ, áko ání: “Dziil nihigháanii áádóó nihiyéél dandaazii tʼáá ánółtso hágo,  shaa hohkááh. . . . Háálá shiʼazéédéetání . . . ászólí.” (Matthew 11:​28-30) Ayóó átʼéego jijoobaʼgo biniinaa tʼáá nijigháágóó diné hakeeʼ naanááʼnééł. Diné yaa aʼááh nízingo biniinaa yanáʼáłtsoʼ, bąąh dah nidahazʼánígíí náádabizhdiyiisá, áádóó Hazhéʼé átʼéiigi ‘ląʼígóó’ bee nazʼneeztą́ą́ʼ.—Mark 6:34; Matthew 14:14; 15:​32-38.

Jesus éí diné ádaatʼéiigi yaa ákonízin, áko yaa joobaʼ ńtʼééʼ. Azhą́ łahda chʼééshdeeyáa ndi, tʼáá ałtso baa nídaakahígíí yaa joozbaʼ. (Luke 9:​10, 11) Asdzání léiʼ dił bigháńdiniiltał yę́ę baa haneʼgi baa nitsíníkees. Hadaałtʼé nídeeshdleeł nízingo Jesus biʼééʼ yideelchid. Bee hazʼáanii Mózes baa deetʼánę́ę áníigo éí díí asdzání doo kózhdooníił da ńtʼééʼ, háálá kótʼéego dił haghánílı̨́įgo éí nichxǫ́ʼíii jílı̨́. (Leviticus 15:​25-28) Áko Jesus éí haajiidzaa? Tʼáadoo yichʼįʼ báhóóchįįd da. Asdzání éí náldzidgo jiiłtsą́, háálá 12 nááhai bichʼįʼ nahwiiʼnáago, áko baa hojoobaʼígo jinéełʼı̨́ı̨́ʼ. Áádóó ábijiní: “Shitsiʼ, neʼoodląʼ bee doo ánítʼéhí da násínídlı̨́ı̨́ʼ; nił hózhǫ́ǫgo náádááł, áádóó nąąh dah hazʼą́ nítʼéʼígíí bitsʼą́ąjįʼ hadaníłtʼée doo.” (Mark 5:​25-34) Jesus ayóó átʼéego joozbaʼ!

Díí bitsʼą́ą́dóó baa ídahwiilʼą́ąʼgo éí jiiniibaʼ siidlı̨́įʼgo éí náánáłahjįʼ baa jiiniibaʼ doo. Jesus éí Samériya dineʼé léiʼ yáʼátʼéhígi áátʼįįd yę́ę yaa hoolneʼgo binahjįʼ jiiniibaʼgo ílíinii átʼé. Jew dineʼé nilı̨́įgo aghadaʼiiʼníiłii bizajííyáago atídahoolaago kʼasdą́ą́ʼ dahwiisxı̨́įgo atiingóó jiztı̨́. Azhą́ Samériya índa Jew dineʼé daʼahijoodláa ndi, Samériya dineʼé nilı̨́įgo hwíighahgi deeyáago haa aʼááh niizı̨́ı̨́ʼ. Hweʼajoobaʼ hodiisʼnáaʼgo díí hastiin atélyaa yę́ę bíká ajoolwod. Atíhoʼdiilyaa yę́ęgóó yąąh áʼiilaago daʼnjahgi hoł yah ííʼáázh. Daʼnjahgi yaa áhályánígíí díí hastiin baa áhólyą́, áádóó tʼáá haʼátʼíhída há ninááhíníłniiʼígíí éí ałdóʼ bikʼé nichʼįʼ nináʼdeeshdlééł yidííniid.—Luke 10:​29-37.

Joobaʼ naʼiiłná, áko nihizaad índa íiʼníiłgi bee hazhóʼó bee aa nitsíikees doo. Diyin Bizaad ání: “Diné bijéí biiʼ biʼdiiłʼáii hólǫ́ǫgo éí yikʼee yínííł sidáa łeh, nidi saad yáʼátʼéehii bee bichʼįʼ haʼadzihgo éí bił náhooshǫǫł.” (Proverbs 12:25) Joobaʼ saad bee yéiiltiʼgo bee ił honiilzhǫ́. * (Footnote níníłʼı̨́.) Jiniibaʼgo índa yáʼátʼéehii nanihiiłnáago éí diné baa aʼááh niidzin áádóó bee bichʼįʼ anáhóótʼiʼii doo bá nantłʼagóó bá ííníilzin.

Tʼáá áníiltso éí jiiniibaʼ doogo átʼé, háálá God éí tʼáá bí bináłtʼéego ánihiilaa. (Genesis 1:27) Júliyas, Rome bisiláo nilı̨́įgo éí yilʼaadii Paul Romegóó bił diiʼash hoʼdooʼniid, áko éí Sáídandi “Paul yá honíłdleeʼgo yichʼįʼ bá áhwiinítʼı̨́ʼígo, dahakʼisóó haa ádahalyą́ą doo biniyé yichʼįʼ hoʼníłniiʼ.” (Acts 27:3) Áádóó Paul éí náánáłaʼ diné bił hoł daʼíʼeełgo tsinaaʼeeł hatsʼą́ą́ʼ diitaaʼgo Málta hoolyéedi ákwii kéédahatʼíinii ‘tʼáá íiyisí nihichʼįʼ kʼé daniidzı̨́ı̨́ʼ,’ áádóó há dideideeshjéeʼgo ńdaʼjiidziil. (Acts 28:​1, 2) Díí diné éí yáʼátʼéhígi ádaadzaa. Jiihóvah bił honiilzhǫ́ǫ doogo éí tʼáá áłahájįʼ jiiniibaʼ doo.

Jiihóvah éí ajoobaʼ bee ániitʼéego hiniiʼnáa doo nihóʼní. Éí bąą “ałhaa dajiinohbaʼ” nihiłní. (Colossians 3:12) Ndi tʼáá áłahájįʼ jijoobaʼ dooleełgi tʼáá nantłʼago átʼé. Haʼátʼíí biniinaa? Ayóó shı̨́ı̨́ yániidzin, ádaa néiitʼı̨́, doodaiiʼ tʼáá nihí tʼéí ayóó ádaa nitsíikees. Éí doodaiiʼ doo yáʼátʼééhgóó nihaa nitsídaakeesii baa jiiniibaʼ dooleełgi nihá nantłʼa. Ákótʼée ndi níłchʼi diyinii bíká sodiilzin doo, áádóó Jiihóvah beʼiilʼı̨́į doo, éí bígo tʼéiyá jiiniibaʼ dooleełgi yee nihíká adoolwoł.—1 Corinthians 2:12.

 Díí baa nitsíikeesgo binahjįʼ ayóó jiiniibaʼ diidleeł: ‘Łaʼda shichʼįʼ yáłtiʼgo, éísh hazhóʼó yísístsʼą́ąʼgo binahjįʼ ájítʼéiigi bee haa ákonisin? Łaʼda bíká aʼdoowołgi, éísh bá baa ákonisin? Doo shikʼéí da doodaiiʼ doo shikʼisgóó, hádą́ą́ʼ lá ákéeʼdi łaʼ bíká eeshwod?’ Díí kótʼéego łaʼ baa jiideeshbaał nínízingo éí diné ninaagóó ndaakaiígíí, íiyisíí éí nibrothers dóó nisisters, hazhóʼó bééhonísįįh. Áko éí binahjįʼ bee bichʼįʼ anídahaztʼiʼii nił bééhoyoozįįh doo. Nááʼákóneʼ éí diné naa dajoobaʼ doo nínízinígi átʼéego ni ałdóʼ tʼáá ákótʼéego diné baa jiiníbaʼ. (Matthew 7:12) Nááná éí Jiihóvah shíká anilyeed bidiiʼní, áádóó éí jiiníbaʼ dííleełgo yee nikʼihozhdoodliił.—Luke 11:13.

Yilʼaadii Paul éí yáʼátʼéehgo nahalneʼii ídlı̨́į dooígi chʼíiníʼą́, łaʼ éí ajoobaʼ ní. (2 Corinthians 6:​3-6) Diné éí Paul yáʼátʼéehgo yaa nitsídaakees, háálá ajoobaʼ bee bizaad dóó ajoobaʼ yee átʼé, áádóó aa aʼááh nízingo haa nitsíkeesgo bił béédahózin. (Acts 28:​30, 31) Nihí ałdóʼ tʼáá ákótʼéego jiiniibaʼgo diné éí tʼáá aaníinii baa haneʼii bíhwiideeshʼááł dadínóozįįł. Azhą́ diné łaʼ doo yáʼátʼéhígi átʼéego nihaa nitsídaakees ndi, tʼáá ałtso baa jiiniibaʼ doo, éí binahjįʼ bidiyoołnáałgoda łah átʼéego tsíńdookosgo átʼé. (Romans 12:20) Tʼahádóoda Diyin Bizaad bíhwiideeshʼááł dínóozįįł.

Nahasdzáán ániidí ánályaago, éí diné tʼáá ałtso ałhaa dajoobaʼgo kéédahatʼı̨́į dooleeł. Daneeznánę́ę náábidiʼyiiljéeʼgo baa dajiiniibaʼ doo, łaʼ shı̨́ı̨́ éí índída áłtsé kótʼéego baa hojoobaʼ dooleeł. Áko díí binahjįʼ bí ałdóʼ dajoobaʼ dadooleeł. Tʼáá háiida doo joobaʼgóogo índa doo áká adeeshwoł da nízinii éí God biNahatʼaʼ doo biyáádóó kééhojitʼı̨́į da doo. Diné ayóóʼádaʼóʼníinii áádóó dajoobaʼii tʼéiyá nahasdzáán honóoshóní ánályaago ákwii kéédahatʼı̨́į doo. (Psalm 37:​9-11) Doo náhádzidgóó hodéezyéelgo diné kéédahatʼı̨́į doo. Ndi, díí tʼah doo kótʼéego nihił hooʼaahdą́ą́ʼ, ajoobaʼ nihíká adoolwołgo átʼé. Éí haitʼéego?

Diyin Bizaad ání: “Diné aa aʼááh nízinii bá yáʼátʼéehii hátʼı̨́.” (Proverbs 11:​17, NW) Diné joobaʼii bił hojílǫ́ǫgo éí haa joobaʼ łeh. Jesus ání: “Tʼáá łaʼ bá ídaʼnóołʼąąd yę́ęgi ánéeltʼeʼgo nihá ínídadíʼnóolʼąął.” (Luke 6:38) Áko diné joobaʼii éí yáʼádaatʼéehii bikʼisgo áyósin łeh.

Yilʼaadii Paul éí Éfesasdi áłah nídaadleeh yę́ę kwííłní, “Ahidiníłnáago ahaa dajiinohbaʼ, . . . ahaa aʼááh danohsingo ałchʼįʼ bąąhági ádaahníiłii ahá yóóʼanídahidohʼaah.” (Ephesians 4:32) Áłah nídeidleehgi tʼáá ájíłtso dajijoobaʼgo éí bidziilgo łáʼí ídlı̨́įgo siʼą́ą łeh. Éí kójítʼé, aseezı̨́, doodaiiʼ bikʼeʼashchʼíiʼgo aa oodloh tʼáadoo nihibrothers bee baa nídeitʼíní. Ndi, yáʼátʼéehii saad bee yádeiiltiʼ doo. (Proverbs 12:18) Tʼáá áníiltso nihił dahózhǫ́ǫgo Jiihóvah bá nideilʼaʼ doo.

Bídahwiilʼą́ąʼgo éí ajoobaʼ bee nihizaadgo índa haʼátʼíí shı̨́ı̨́ íiʼníiłgi bee bééhózin. Jiniibaʼgo éí Jiihóvah ayóóʼóʼóʼníigo bił hadleeʼii bedaʼiilʼı̨́į doo. (Ephesians 5:1) Bił áłah néidleehígíí bidziilgo siʼą́ą doo, áádóó náánáłahdę́ę́ʼ shí ałdóʼ Jiihóvah bá naashʼaʼ doo dadínóozįįłgoda átʼé. Wołí bee ádeitʼı̨́įgo, Jiihóvah Yá Dahalneʼé ayóó dajoobaʼ danízingo diné yee danihinéłʼı̨́į doo!