DINÉ ayóó ahééh nízinii nishłı̨́ nínízingoósh ádaa nitsíníkees? Díí naʼídíkid tʼáá áníiltso baa nitsídeiikees doo. Diyin Bizaad éí tʼáá íídą́ą́ʼ diné doo ahééh danízin da dooleeł níigo yaa chʼíhoníʼą́. (2 Tim. 3:2) Tʼáadoo leʼé tʼóó shá álʼı̨́ doodaiiʼ tʼóó shaa haʼnííł danízinígíí shı̨́ı̨́ diné łaʼ bééhonísin. Dineʼé ákódaatʼéii éí ahééh nisin danízin. Diné kódaatʼéhígíí bił hojílǫ́ǫgo ayóó doo hoł yáʼátʼéeh da łeh.

Ndi Jiihóvah bidineʼé éí “ahééh danohsin” dabidiʼní. Áko nihí éí ‘tʼáá ałtsojįʼ ahééh daniidzin.’ (Col. 3:15; 1 Thess. 5:18) Ahééh hwiindzingo nihá yáʼátʼééh. Ląʼígóó baa ahééh hwiindzinii dahólǫ́ǫgo átʼé.

Ahééh hwiindzingo éí doo tʼóó diné tʼéiyá bee bił honiilzhǫ́ǫ da. Ndi nihí ałdóʼ bee ádił honiilzhǫ́. Éí haʼátʼíí biniyé? Ahééh niidzingo éí diné yáʼátʼéhígíí átʼéé lá danízingo danihinéłʼı̨́į doo. Łaʼda níká adeeshwoł niizı̨́įʼgo éí tʼáá ákónéehee shíká iilyeed lá nínízin doo. Kótʼéego nitsíníkeesgo éí díí baa nił hózhǫ́ǫgo ánósin doo. Ruth ákotʼéego baa haneʼ. Éí Bóʼaz baa aʼááh niizı̨́įʼgo baa haneʼ. Áko éí bééhózinígo Ruth ayóó yaa bił hózhǫǫd.—Ruth 2:​10-13.

Diyin bichʼįʼ ahééh niidzin doo. Tsʼídá tʼóó ahayóígóó Jiihóvah naa yiizláhígíí, índa tʼahdii naa yiníiłii, áádóó náásgóó yee níká anáádoolwołii łahda baa nitsíníkees łeh. (Deut. 8:​17, 18; Acts 14:17) Ndi díí tʼáadoo łáháda tʼéiyá baa nitsíníkeesí. Éí tsʼídá tʼóó ahayóígóó Diyin yee nikʼijisdliʼii tsʼídá yéigo baa nitsíníkees doo. Áko kótʼéego Diyin naa joobaʼgi áádóó baa ahééh hwiindzingi yéigo bidziil dooleeł, áadi índa ayóóʼánóʼní áádóó naa ahééh nízingi ayóó baa ákonínízingo ná íidoolííł.—1 John 4:9.

Ndi Diyin bił hadleeʼgi áádóó akʼihadlíigi doo tʼáá éí tʼéiyá bee baa nitsíikees da dooleeł. Éí Diyin Jiihóvah yáʼátʼéehii nilı̨́įgi bichʼįʼ baa ahééh niidzin doo. (Ps. 100:​4, 5) Áháʼníi łeh, “Ahééh hwiindzingo éí ił hóshǫ́.”

Ahééh hwiindzingi nihá yáʼátʼééh, háálá éí ałkʼis ídlı̨́įgi bidziil áyósin. Áádóó tʼáá áníiltso nihaa ahééh hwiindzin daniidzin łeh. Łaʼda tʼáadoo leʼé yáʼátʼéehii yee háká iilwoʼgo ahéheeʼ bijiníigo éí tʼáá ájíłah yéigo ałkʼis jileeh. (Rom. 16:​3, 4) Diné ahééh danízinii éí náánáłahjįʼ bíká anáádeeshwoł danízin łeh. Yáʼátʼéhígi ánítʼé bidiʼníigo binahjįʼ bił yáʼátʼéehgo éí nátʼą́ą́ʼ áká anáánálwoʼ. Aooʼ, áká aníjílwoʼgo yee ił hóshǫ́. Éí Jesus ádííniid yę́ęgi átʼéego “tʼáadoo leʼé azhʼníláii éí haa yílyáii bilááh átʼéego baa hózhǫ́.”—Acts 20:35.

Robert Emmons, University of California professor nilı̨́įgo ání: “Ahééh hwiindzin dooleełgo éí ahidiníłná ałhá ahódlíi dooleełgi baa ákoniidzin doo. Łahda áká anéilwoʼ áádóó łahda nihíká éʼéwoʼ.” Tʼáá aaníigo éí hiniiʼnáagi índa nihił hózhǫ́ǫ doogo éí náánáłahjįʼ ląʼígóó bee baʼííníidlíi doo. Éí chʼiyáán doodaiiʼ azeeʼ yee nihíká adoojahgoda átʼé. (1 Cor. 12:21) Ahééh nízinii éí bíká anáʼáwoʼgo yaa ahééh nízin łeh. Áko díí ákótʼéego, níká anáʼáwoʼgo, niísh éí áłahjįʼ ahééh nínízingo áʼdííníldzin?

Náánáłahgo ahééh hwiindzin dooleełgo éí yáʼádaatʼéhígíí baa nitsíjíkees doogo yee háká análwoʼ. Éí doo yáʼádaatʼéhígíí nahjįʼ yigháiiniiłdééh nahalin. Áádóó yáʼádaatʼéhígíí baa ákoznízingo éí bee achʼįʼ anídahaztʼiʼii doo ayóó baa nitsáhákees da. Tʼáá yéigo ahééh jinízingo éí yáʼádaatʼéhígíí jooʼı̨́, áko éí binahjįʼ nátʼą́ą́ʼ ayóó ahééh jinízin jileeh. Tʼáadoo leʼé baa ahééh jinízingo éí yilʼaadii Paul ádííniid yę́ęgi ádiiʼníi doo: “Tʼáá áłahíjįʼ Bóhólníihii bee nihił dahózhǫ́.”—Phil. 4:4.

Ahééh jinízingo éí doo tʼáá ádzaago nitsídzíkees da. Ajoołchʼı̨́įdgo, índa doo hoł hózhǫ́ǫ́góogo, doodaiiʼ háháchįʼgo éí ahééh jinízin dooleeł yę́ęgi nantłʼago hatsʼą́ą́ʼ áyósin łeh. Diné ahééh nízinii éí naadeełii doo ayóó yichą́yídéelniʼ da łeh. Haʼátʼíí shı̨́ı̨́ tʼáá íídą́ą́ʼ bee hólóonii yaa ahééh niidzin łeh.—Phil. 4:12.

Nihił béédahózingo Séítan éí bee achʼįʼ nidahwiiʼnáanii bikʼee ił hózhǫ́ ádin índa yínííł ídlı̨́į doo nihóʼní. Díí ádaatʼéii baa saad honiidlǫ́ǫgo yaa bił hózhǫ́ǫ doo. Ákóniitʼéego éí nizhónígo nahaneʼ yę́ęgi doo hazhóʼó íilʼı̨́į da doo. Ahééh hwiindzingo éí Diyin biníłchʼi diyinii bineestʼąʼ ádaatʼéii tʼáá ahánígo bił ahídéétʼiʼ. Éí Diyin nihaa yiiníłígíí baa nihił hózhǫ́, áádóó yee ádee hahasdzíiʼii deiniidlą́.—Gal. 5:​22, 23.

Jiihóvah bidineʼé ídlı̨́įgi kótʼéego ahééh hwiindzin haʼníigo tʼáásh aaníí nínízingo baa nitsíníkees. Ndi, ahééh hwiindzingi índa yáʼátʼéehgo tsóhodookosgi tʼáá nantłʼago átʼéego baa ákonínízin. Díí biniinaa tʼáadoo bikʼee yínííł nílíní. Ahééh jinízin jidooleełgo átʼé. Éí haitʼéego ákódíínííł? Haʼátʼíí shı̨́ı̨́ nee hólóonii baa ahééh nínízinígíí tʼáá ákwíí jı̨́ baa nitsíníkees, áko ayóó ahééh nínízin dííleeł. Áádóó bee achʼįʼ nidahwiiʼnáanii tʼéiyá yaa nitsídaakeesii bilááh átʼéego nihił dahózhǫ́ǫ doo. Diyin índa diné yáʼátʼéehii yee ádaaníiłgi baa nitsíníkees. Naaltsoos bikáaʼda ádanileʼ. Éí bijı̨́ naakigo baa ahééh nínízinígíí bikááʼ ádíílííł.

Ndaʼałkaahii łaʼ ádaaníigo éí “áłahjįʼ ahééh jinízingo éí yáʼátʼééhjí bee nitsáhákees áyósingo bee ił hózhǫ́.” Diné ahééh nízinii éí ayóó bił hózhǫ́ǫ łeh. Yáʼádaatʼéehii bee naa hojoosbaʼígíí baa nitsíníkees, yáʼátʼéehgo nichʼįʼ áhóótʼįįdii baa nił hózhǫ́ áádóó áłahjįʼ ahééh nínízin. Haaʼíyeeʼ Jiihóvah “bichʼįʼ ahééh danohsin, háálá yáʼátʼéehii nilı̨́.” Aooʼ, “tʼáá ałtsojįʼ ahééh danohsin.”—1 Chron. 16:34; 1 Thess. 5:18.