1, 2. (a) Nihibrothers dóó nihisisters éí God biníłchʼi diyinii bidayoołáałgo haitʼéego yaa nitsídaakees? (b) Haʼátʼíí baa nídadíitʼįįł?

NIHISISTER Canadadę́ę́ʼ naagháago áníigo God biníłchʼi diyinii hoyoołáałgo hoł hózhǫ́ǫgo áhoolaa áádóó hweʼiinaʼ siláagi yee háká eelwod. Nihibrother łaʼ Brazildi bighan, éí 23 nááhai ajiyéehgo, áníigo God biníłchʼi diyinii hoyoołáałgo hweʼasdzą́ą́ bił hózhǫ́ǫgo áhoolaa. Nihibrother Philippinesdę́ę́ʼ naagháago God biníłchʼi diyinii hoyoołáałgo hontsékees hashtʼedítʼé dóó habrothers dóó hasisters daʼníłtsʼą́ą́dę́ę́ʼ bił ahídazhdínéelná jizlı̨́ı̨́ʼ.

² God biníłchʼi diyinii nihiyoołáałgo ląʼígóó nihíká adoolwoł. Ákóniitʼéego haʼátʼíí bee áádóó ákódaatʼéégóó baa hózhǫ́ǫ doo? Áłtsé Diyin Bizaad áhyiłníigi diné éí God biníłchʼi diyinii bidayééłáałgi baa íhwiidooʼááł. Díí Jiihóvah nitsíkeesígi átʼéego nitsídaakees. Díí baa nídadíitʼįįł: (1) God biníłchʼi diyinii hoyoołáałgo haʼátʼíí óolyé? (2) Haʼátʼíí nihinááł ádaatʼįįdii binahjįʼ God biníłchʼi diyinii nihiyoołáał  doo? (3) “Christ bintsíkees bee nitsídeiikees” ádadííníilzingo haitʼéego God biníłchʼi diyinii nihiyoołáał doo?

3. Tsʼísee kʼehgo nitsíkeesii dóó God biníłchʼi diyinii biyoołáałii Diyin Bizaad haitʼéego ałʼąą átʼé ní?

³ Yilʼaadii Paul éí “níłchʼi diyinii hwiiʼ hólóonii [éí hoyoołáałii]” dóó “níłchʼi diyinii doo hwiiʼ hólóonii [éí tsʼísee kʼehgo yigáałii]” bee ałʼąą átʼéegi ííshjání áyiilaa. (1 Corinthians 2:14-16 yíníłtaʼ.) Tsʼísee kʼehgo nitsíkeesii éí “Diyin God biníłchʼi diyinii yee akʼijidlíii doo hwee haleeh da. Éí tʼáá ádzaaí átʼé jinízin, áko doo hoł bééhoozı̨́ı̨́ʼ átʼée da.” Ndi God biníłchʼi diyinii biyoołáałii éí “tʼáá ałtsoní hazhóʼó nijiłkaah” dóó ‘Christ bintsíkees bee nitsíjíkees.’ Paul éí God biníłchʼi diyinii bíniʼdii nihiyoołááł nihiłní. Tsʼísee kʼehgo nitsíkeesii dóó God biníłchʼi diyinii biyoołáałii haʼátʼíí bee ałʼąą átʼé?

4, 5. Tsʼísee kʼehgo nitsíkeesii haʼátʼíí bee bééhózin?

⁴ Tsʼísee kʼehgo nitsíkeesii haitʼéego nitsíkees? Éí díí nihookáaʼgi bąąhági átʼéii bił nidahaztʼiʼii yikʼehgo nitsíkees, háálá tʼáá bí naazı̨́įgi tʼéiyá ádaa nitsídaakees. Paul kótʼéego yaa chʼíhoníʼą́, “Diné doo akʼeh dahółʼíinii yiyiʼ naalnishii bikʼehgo naałdeeh.” (Ephesians 2:2) Kótʼéego nitsáhákees éí ląʼí diné kótʼéego nitsídaakeesgo ádabiilaa. Díí yeeʼ tʼáá ákótʼé hwiindzingo ádaanííł, God bibee hazʼáanii yę́ę doo yaa nitsídaakees da. Tsʼísee kʼehgo nitsídaakeesii éí naadeełii, binaanish yótąʼgi, béeso, doodaiiʼ doo ákótʼéhígi áshiʼdiilyaa hwiindzingi tsʼídá áłtsé siʼáanii átʼé hwiindzingo baa nitsáhákees.

⁵ Tsʼísee kʼehgo nitsíkeesii baa joogáałii Diyin Bizaad kótʼéego yózhí “tsʼísee kʼehgo baa ooldahii.” (Galatians 5:19-21) Paul éí Kórinthdi Oodlání kéédahatʼínę́ę áłtsé naaltsoos yichʼįʼ áyiilaa yę́ę éí tsʼísee kʼehgo nitsídaakeesgo baa oodáałii chʼíiníʼą́. Éí ałghaʼditʼáahgi bee akééʼ nínáʼáwoʼ, ałtsʼáʼáldahgo ádeileʼ, tʼáadoo akʼeh honíłʼíní haʼní, naaltsoos ałhee neheʼnííł, bóhólníihii nilíinii tʼáadoo nił nilíní, dóó chʼiyáán dóó doodlı̨́įłii tʼéiyá baa nitsáhákees. Tsʼísee kʼehgo nitsíkeesii éí doo yáʼátʼéehii bíniʼ áyiiłʼįįhgo tʼóó yichʼįʼ háoghááh. (Proverbs 7:21, 22) Jude áníigo tsʼísee kʼehgo nitsíkeesii Jiihóvah biníłchʼi diyinii baa náádidoolyéełgo átʼé.​—Jude 18, 19.

6. God biníłchʼi diyinii biyoołáałii haʼátʼíí bee bééhózin?

⁶ God biníłchʼi diyinii biyoołáałii éí God yił k’é ahidíʼníigi ayóó ílı̨́įgo yaa nitsíkees. God biníłchʼi diyinii nabiiłáago áyósin dóó wołí bee Jiihóvah yeʼełʼı̨́. (Ephesians 5:1) Jiihóvah tʼáadoo leʼé yinéłʼı̨́ı̨́dę́ęgo dóó nitsíkeesígi yaa íhoołʼaah. God éí tʼáá aaníí hólǫ́ǫgo yaa nitsíkees. Tsʼísee kʼehgo nitsíkeesii doo átʼéhígi átʼéego tʼáá ałtsoní yaa naagháhígíí Jiihóvah bibee hazʼáanii yikʼehgóó yee átʼé. (Psalm 119:33; 143:10) “Tsʼísee kʼehgo baa ooldahii” doo ááníił da, ndi “níłchʼi diyinii bineestʼąʼ” yee ádinálnish. (Galatians 5:22, 23) God biníłchʼi diyinii hoyoołáałgo óolyéegi díí baa nitsíníkees: Łaʼda naanish biyoolwołgi ayóó yiyiichįįhgo éí naʼanishgi tʼéiyá bintsékees siláa łeh,  áko łaʼda éí God bichʼįʼ hodílzingi ayóó ílı̨́įgo yaa nitsíkeesgo éí God biníłchʼi diyinii biyoołáałii nilı̨́į łeh.

7. God biníłchʼi diyinii biyoołáałii éí Diyin Bizaad haʼátʼíí níigo yaa haadzííʼ?

⁷ Jesus ání, God biníłchʼi diyinii biyoołáałii bił hózhǫ́. Matthew 5:3 ání: “Diyin kʼehgo hojoobaʼ ádaatʼéego ádaa nitsídaakeesii bikʼidahojidlí, háálá yáʼąąshii bee bóhólníihgo bił hazʼáanii daabííʼ.” Romans 8:6 éí Jiihóvah nitsíkeesígi átʼéego nitsíikeesgo nihídéétʼiʼ ní: “Tsʼísee kʼehgo nidzinii éí aniné nináhádleeh, nidi níłchʼi kʼehgo nidzinii éí iiná índa achʼįʼ hózhǫ́ nináhádleeh.” Áko God biníłchʼi diyinii nihiyoołáałgo éí nihí dóó God bił honiilzhǫ́, dóó iiná doo ninítʼiʼii nihee hólǫ́ǫ doo.

8. God biníłchʼi diyinii nihiyoołáałgi haitʼéego nantłʼa?

⁸ Tʼáá íiyisíí doo yáʼáshxónígi átʼéego kééhwiitʼı̨́. God nitsíkeesígi átʼéego doo nitsáhákeesgóó kééhwiitʼı̨́, áko yéigo nihintsékees baa áhwiilyą́ą doo. Jiihóvah bintsékees doo ádiih jiiʼnííłgóó nihináágóó tsʼísee kʼehgo nitsáhákees nihintsékees yidoołchxǫǫł. Díí haitʼéego bee ádaa áhwiilyą́ą doo? Haitʼéego God baʼííníidlíi doo?

9. (a) God biníłchʼi diyinii nihiyoołáał dooígi haʼátʼíí bitsʼą́ą́dóó íhwiidiilʼááł? (b) Háí yáʼátʼéehgo nihinááł ádaatʼįįdii baa ídahwiidiilʼááł?

⁹ Áłchíní éí bizhéʼé dóó bimá yitsʼą́ą́dóó íhoołʼaahígi átʼéego yáʼádaatʼéehii tʼéiyá yedaalʼı̨́į łeh. Tʼáá ákótʼéego Jiihóvah yił kʼé daʼahidiʼníinii bedaʼiilʼı̨́į doo. God biníłchʼi diyinii nihiyoołáał dooígi dóó tsʼísee kʼehgo nitsídaakeesii yee ádaaníiłii doo íítʼįįd da dooleełígi bídahwiidiilʼááł. (1 Corinthians 3:1-4) Diyin Bizaad éí yáʼátʼéehgo índa doo yáʼátʼééhgóó ádaatʼįįdii yaa halneʼ. Łaʼ  yáʼátʼéehgo nihinááł ádaatʼįįdii bitsʼą́ą́dóó íhwiidooʼáłígíí dadíníilʼįįł: Éí Jéíkab, Mary, dóó Jesus.

10. Jéíkab éí God biníłchʼi diyinii hoyoołáałgi haitʼéego bee ííshjání ájiilaa?

¹⁰ Tʼáá nihígi átʼéego Jéíkab ałdóʼ beʼiiná bá nantłʼa ńtʼééʼ. Hánaaí Íísa, hodiyeeshxééł nízingo haa nitsíkees ńtʼééʼ. Baa daaní jílínígíí honaʼazloʼ. Ndi Jiihóvah éí hazhéʼé Éíbraham yichʼįʼ ádee hadoodzííʼ yę́ę yéigo joodlą́. Éí haʼáłchíní náás daʼahílchíihii binahjįʼ bohodoolníiłgo hoł bééhózin, áko haʼáłchíní ayóó baa áhojilyą́ą́ ńtʼééʼ. (Genesis 28:10-15) Azhą́ tsʼísee kʼehgo nitsídaakeesii hanaagóó kéédahatʼı̨́į ndi, Jiihóvah yee ádee hadoodzííʼ yę́ę doo beijidiyoonahgóó ázhdólzin. Łah éí hánaaí Íísa binásdzid jiníigo Jiihóvah níjookahgo kójíníigo bichʼįʼ sozdoolzin: “Ádííníniid niʼ, Tʼáá aaníí nikʼijishdlíi doo, índa naʼáłchíní náás daʼahílchíihii tónteel bibąąhgi séiigi átʼéego doo wóoltaʼ ánéelą́ąʼ da dooleeł.” (Genesis 32:6-12) Jéíkab éí Jiihóvah yee ádee hadoodzíiʼii joodlą́ągo hweʼiinaʼ siláagi bee ííshjání ájiilaa.

11. Haitʼéego nihił bééhózingo Mary éí God biníłchʼi diyinii biyoołááł ńtʼééʼ?

¹¹ Mary baa nitsíníkees. Jiihóvah éí díí asdzání Jesus bimá dooleełgo néidiiłtı̨́, háálá éí God biníłchʼi diyinii biyoołáałii nilı̨́. Mary éí bikʼéí Zakaráíyah dóó Elízabeth yaa níyáago ádííniid yę́ęgi baa íídííłtah. (Luke 1:46-55 yíníłtaʼ.) Mary éí Diyin Bizaad ayóóʼáyóʼní áádóó Diyin Bizaad Hííbrewjí ályaaígíí ayóó bił bééhózin. (Genesis 30:13; 1 Samuel 2:1-10; Malachi 3:12) Mary dóó Jóseph ahíjízyeh, éí Jesus yizhchı̨́ı̨́dóó bikʼijįʼ índa ałhaa nídzístʼįįd. God naanish hąąh niiníláhígíí ílíinii átʼéego baa nitsíjíkees bee hwiih ídlíinii biláahdi. (Matthew  1:25) Mary éí Jesus nooséełgo hajisíidgo bił áhootʼéegi baa ákozhnízin, dóó yee naʼneeztą́ʼígíí jíistsʼą́ą́ʼ ńtʼééʼ. Áko “díí kónínígíí tʼáá ałtso . . . bijéí biyiʼídi yaa nitsékees.” (Luke 2:51) God éí Mesáíyah yee haadzííʼ yę́ę bééhózinígo Mary yaa nitsíkeesgo áyiilaa. Ákoósh Mary bedaʼiilʼı̨́į doo, áádóó God kónínééh nihiłníigo bikʼeh íiʼníił doo?

12. (a) Jesus haitʼéego Bizhéʼé yeʼiilaa? (b) Haitʼéego Jesus bedaʼiilʼı̨́į doo? (Áłtsé eelkidígíí níníłʼı̨́.)

¹² Diné hodeezlı̨́ı̨́ʼdóó wóshdę́ę́ʼ Jesus tʼéiyá God biníłchʼi diyinii biyoołáałii nilı̨́. Nahasdzáán bikááʼ naagháhą́ądą́ą́ʼ éí Bizhéʼé beʼeshʼı̨́į doo nízingi ííshjání áyiilaa. Jesus nitsékeesgi, aʼóóʼníigi, dóó áátʼįįdgi Jiihóvah átʼéhígi yeʼiilaa. God íinízinii yeʼiilaa dóó bibee hazʼáanii bił nilı̨́įgo áyiilaa. (John 8:29; 14:9; 15:10) Isaiah éí Jiihóvah aa aʼááh nízin ní, dóó Mark éí Jesus aa aʼááh nízin ní, áko tʼáá áłah ahijíłtʼé. (Isaiah 63:9; Mark 6:34 yíníłtaʼ.) Łaʼda bichʼįʼ anáhóótʼiʼ haleehgo Jesus átʼéhígi átʼéiigo nihiísh ałdóʼ áká adiilwoł? Jesus nahalingo, nahwiilneʼgi dóó naʼniitingi éísh áłtsé siilʼą́ągo ííníilzin? (Luke 4:43) God biníłchʼi diyinii biyoołáałii aa aʼááh nízingo áká adeeshwoł nízin łeh.

13, 14. (a) God biníłchʼi diyinii bidayééłáałii haʼátʼíí bitsʼą́ą́dóó bíhooʼaah? (b) Łaʼ baa chʼíhoníʼaah.

¹³ Dííshjı̨́įdi ląʼí nihibrothers dóó nihisisters éí God biníłchʼi diyinii bidayééłáałgo Christ yedaalʼı̨́. Éí nidahalneʼgóó yídaneedlı̨́, bił dahadleeʼ, dóó aʼáhí danízingo shı̨́ı̨́ baa ákonínízin. Azhą́ nidaʼiisíih ndi, wołí bee ádaatʼéego yáʼádaatʼéehii yee ádaatʼé dóó Jiihóvah bichʼįʼ bíłʼáhígíí yikʼeh ádaanííł. Nihisister Brazildę́ę́ʼ naagháago Rachel ání: “Ééʼ doo yáʼádaatʼéhígíí bee háádiishtʼįįh ńtʼéeʼgo ayóó shił yáʼátʼééh. Diyin Bizaad tʼáá aaníigo yee naʼnitinii bóhoołʼą́ąʼgo éí God biníłchʼi diyinii shiyoołáał doo nisingo áshiilaa. Hazhóʼó hashtʼeʼnitsínáhákeesgi nantłʼa, ndi shił hózhǫ́ áshiilaa dóó biniyé iináagi shił bééhoozin.”

¹⁴ Reylene, éí Philippinesdę́ę́ʼ nihisister nilı̨́įgo łah átʼéego bichʼįʼ anáhóótʼiʼ. Hó éí tʼáá íídą́ą́ʼ Jiihóvah bééhojísin, ndi yéigo íídéeshtahgo naanish tsʼídá yáʼátʼéehii shaa didootʼááł jinízingo nitsíjíkees. Biniinaa Jiihóvah bá naʼaʼaʼgi binahatʼáagi doo hoł nilı̨́į da silı̨́ı̨́ʼ. Kójíní: “Shinaanish biláahdi łaʼ ílíinii átʼéego baa ákoniizı̨́ı̨́ʼ.” Áko Reylene hazhóʼó hashtʼeʼnitsínázhníkéezgo Jiihóvah bá naʼaʼaʼgi áłtsé jisʼą́ągo ájiilaa. Kʼad éí Matthew 6:33, 34 baʼjólíigo ájíní, “Tʼáá aaníí Jiihóvah shaa áhályą́ą doo!” Nibrothers dóó nisisters bił yah ananijáh ígíí ałdóʼ kódeinízin. Éí nihinááł Christ yedaalʼı̨́įgo nihí ałdóʼ bedaʼiilʼı̨́ niidzin doo.​—1 Corinthians 11:1; 2 Thessalonians 3:7.

15, 16. (a) Christ átʼéii ániitʼée doogo, haitʼéego beʼdiilnííł? (b) “Christ bintsíkees bee nitsídeiikees,” haitʼéego baa ídahwiidiilʼááł?

¹⁵ Haitʼéego Christ bedaʼiilʼı̨́į doo? 1 Corinthians 2:16 áníigo éí “Christ bintsíkees bee nitsídeiikees” doo. Romans 15:5 éí “Christ Jesus bikʼehgo aheełtʼéego nitsídaahkeesgo” ádaʼdíínółzin ní. Christ nitsékees dóó áátʼįįd yę́ęgi bee ániitʼéego baa ídahwiidiilʼááł.  Jesus éí God yił kʼé ahidiʼníigi tʼáá ałtsoní biláahdi ílíinii átʼéego yaa nitsíkees. Jesus átʼéhígi ániitʼéego Jiihóvah áhánígo bił niidlı̨́įgo ánihósin. Áko Jesus nitsíkeesígi átʼéego nitsíikeesgo bíhwiilʼaahgo ílíinii átʼéii átʼé.

¹⁶ Jesus bintsíkees bee nitsíikeesgo haitʼéego baa ídahwiidiilʼááł? Hódahoołʼaahii éí Jiihóvah bibee adziilii binááł bee nijishnish, diné tʼóó ahayóí nazhnitingo dahodiiztsʼą́ą́ʼ, diné daʼníłtsʼą́ą́dę́ę́ʼ deíkáahii baa jijoobaʼgo dahoołtsą́, dóó Jiihóvah bintsékees bikʼehgo tazhdigháahgo haa ádahoniizı̨́ı̨́ʼ. Éí kódaaní: “Baa nijiyáhígíí tʼáá ałtso nihí dabíínáałii daniidlı̨́.” (Acts 10:39) Jesus kʼad doo deiitʼı̨́į da. Ndi nitsékeesgi éí Matthew, Mark, Luke, dóó John biiʼ haa haneʼígíí yíníiltaʼgo nabikʼítsíilkeesgo bitsʼą́ą́dóó baa ídahwiidiilʼááł. Díí binahjįʼ “nihá áátʼįįdígíí bikʼehgo bikééʼ dayínóhkáah dooleeł,” áko “nihí ałdóʼ tʼáá ákótʼéego tiʼhooʼniih bídanołdzilgo nitsídaahkees” doo.​—1 Peter 2:21; 4:1.

17. Christ bintsíkees bee nitsíikeesgo haitʼéego nihíká adoolwoł?

¹⁷ Christ bintsíkees bee nitsíikeesgo haitʼéego nihíká adoolwoł? Chʼiyáán yáʼádaatʼéehii jiyą́ągo hatsʼíís bidziil áyiiłʼįįhígi átʼéego Christ bintsíkees bee nitsíikeesgo Jiihóvah bá daʼííníidlı̨́įgi bidziil íidoolííł. Nihidááhdóó nihwiileehii hashtʼedoolníiłgi baa íhwiilʼaah. Éí binahjįʼ baa honiidzą́ągo God yaa bił hózhóonii bee ádá nihodiyiitʼaah, dóó nihíniʼ bee hashtʼedítʼé. Daʼ ákoósh “Bóhólníihii Jesus Christ bee” ádílnéehgo binahjįʼ nihá yáʼátʼééh?​—Romans 13:14.

18. God biníłchʼi diyinii nihiyoołáałgi haʼátʼíí óolyéego baa íhwiiniłʼą́ą́ʼ?

¹⁸ God biníłchʼi diyinii nihiyoołáałgo óolyéegi baa ídahwiilʼą́ą́ʼ. Níłchʼi diyinii bídayééłááł ńtʼééʼ yę́ę nihinááł yáʼátʼéehgo ádaʼiilaagi bitsʼą́ą́dóó ídahwiilʼą́ą́ʼ. Áádóó ałdóʼ “Christ bintsíkees bee nitsídeiikees” haʼníigi éí Jiihóvah nitsíkeesígi átʼéego nitsíikees doogo áádóó áhánígo bił kʼé ahidiʼníigi yee nihíká eelwod. Ndi ląʼígóó baa ínááhooʼaahgo átʼé. Éí díí ádaatʼéii: Haitʼéego bééhózingo Jiihóvah badaʼííníidlı̨́įgi bidziil? Haʼátʼíí ádeitʼı̨́įgo Jiihóvah badaʼííníidlı̨́įgi bidziil dooleeł? Áádóó Jiihóvah bił kʼé ahidiʼníigi bidziil dooleełgo haitʼéego nihídéétʼiʼ? Díí bikééʼdóó baa nídadíitʼįįł.