PHILIPPINESDI Baguio City hoolyéegi chʼikę́ę́h nidiltʼéego daʼíníísh bá nahazʼą́ą́góó jooʼash. Ńtʼééʼ public witnessing cart léiʼ jiiłtsą́, ndi tʼáadoo baa níjístʼįįd da. Nihisister Helen éí ákwii cart bíighahgi jizı̨́įgo bił hózhǫ́ǫgo hachʼįʼ yidlohgo honééłʼı̨́ı̨́ʼ. Ndi tʼóó náás jooʼash, Helen bił hózhǫ́ǫgo hachʼįʼ yidlohgo honééłʼı̨́įʼgi doo baa jiyoonéeh da.

Tʼahádóó chʼikę́ę́h nidiltʼéhígíí éí haghangóó bus bee níjootʼashgo Kingdom Hall siʼánígi sign ayóó áníłtso jw.org bikáaʼgo jiiłtsą́. Bééjoolniiʼgo witnessing cart jiiłtsánę́ę tʼáá ákótʼéego bikááʼ. Áádóó adajiiʼáazhgo Kingdom Hallgóó jiníʼáázh. Éí áłah nídaʼadleehígíí bischedule dabikáʼígíí jinéełʼı̨́ı̨́ʼ.

Áádóó chʼikę́ę́h nidiltʼéhígíí éí áłah nááʼádleehgi jiníʼáázh. Áko áadi jiníʼáazhgo, háí jiiłtsą́? Helen! Éí bił hózhǫ́ǫgo hachʼįʼ yidlohgo jiiłtsánę́ę átʼı̨́įgo tʼáá íídą́ą́ʼ bééhojoosįįd. Helen ájíní: “Éí shichʼįʼ niníʼáazhgo tʼóó shił hóyééʼ. Haalá yisdzaa niizı̨́ı̨́ʼ.” Ndi chʼikę́ę́h nidiltʼéhígíí hazhóʼó hoł hoolneʼ.

Áłah azlı̨́įʼgi índa ajítahgo baa hoł hózhǫ́. Ałtso áłah azlı̨́ı̨́ʼdóó bikʼijįʼ hashtʼehalnéehgo baa ákozhniizı̨́ı̨́ʼ, áádóó áká ahiʼniilchéehgoósh tʼáá áko jiní. Chʼikę́ę́h nidiltʼéhígíí łaʼ éí náánáłahjįʼ kéyahgóó ajííyá, ndi łaʼígíí éí áłah néidleehgi nádááh áádóó Diyin Bizaad bóhojiiłʼaah, háálá ił hózhǫ́ǫgo achʼįʼ oodlohgo bąą!