1. Tʼah doo áhánééh yę́ęgi átʼéego dííshjı̨́įdi haitʼéego łah áhootʼé?

TʼAH DOO áhánééh yę́ęgi átʼéego dííshjı̨́įdi łah áhootʼé. Diyin Bizaad ánínę́ęgi átʼéego Jiihóvah éí “ałʼąą dineʼé bił dah nidahazʼą́ą́dę́ę́ʼ tʼáá ałtso, ałʼąą dineʼé áádóó nihokááʼ dineʼé danilíinii índa bizaad ałʼąą ádaatʼéii tʼáá ałtso dabitahdę́ę́ʼ,” áłah áyoolííł. Éí díí diné “miil nídoodleeł” áádóó tseebíidi damíiltsoh (8,000,000) biláahdi bił dahózhǫ́ǫgo God “yá nidaalʼaʼgo iʼiiʼaah áádóó niyiiłkaah.” (Revelation 7:​9, 15; Isaiah 60:22) Tsʼídá tʼah doo kónéelą́ą́ʼ diné éí God áádóó diné ayóóʼádayóʼníigo yídahoołʼaah da.

2. Doo God dabikʼisígíí haitʼéego doo éída ayóóʼádayóʼní? (Áłtsé nidaashchʼąąʼígíí níníłʼı̨́.)

² Diyin Bizaad tʼáá íídą́ą́ʼ áníigo éí ayóóʼííníshʼní haʼníi doo, ndi doo éída ayóóʼádayóʼníi doo. Éí God doo yikʼis danilı̨́į da. Yilʼaadii Paul éí diné kódaatʼée doo níigo áʼiilaa, “diné ayóóʼádadóʼníi doo, béeso yíchą́deídéelniʼ doo,” áádóó “Diyin God ayóóʼádayóʼníi doo yę́ęgi honeenida yíchą́dayídéelniʼ doo.” (2 Timothy 3:​1-4) Díí átʼéego doo  éída ayóóʼádayóʼníigo éí God ayóóʼóóʼníigi doo bił ahidiitʼiʼ da. Tʼáá shí nisinígíí háshtʼı̨́į doo jinízin łeh, éí azhą́ shił hóshǫ́ǫ doo jinízin ndi, ił hózhǫ́ doo bił nítʼiʼ da. Díí átʼéego nitsáhákees éí shí yeeʼ hwiindzingo hazʼą́ dóó iiná nantłʼago áyoolííł.

3. Haʼátʼíí baa nídadíitʼįįł? Haʼátʼíí biniyé baa nídadíitʼįįł?

³ Yilʼaadii Paul éí ląʼí diné doo éída ayóóʼádayóʼníi dadooleełgo tʼáá íídą́ą́ʼ bił bééhózin, díí Oodlání doo bá yáʼátʼéeh da doo. Éí diné kódaatʼéhígíí “bitsʼąą” ádaa ádahołyą́, yidííniid. (2 Timothy 3:5) Áko haitʼéego bitsʼąą ádaa áhwiilyą́ągo Jiihóvah, Diyin ayóóʼóʼóʼníinii, bił honiilzhǫ́ǫgo ííníilzin doo? Ayóóʼóʼóʼní God nihá yinízinígíí dóó 2 Timothy 3:​2-4 góneʼ yee nítʼínígíí díí éí ałʼąą átʼéego átʼéegi baa nídadíitʼįįł. Áádóó tʼáá nihí ádiníilʼı̨́įgo ayóóʼííníʼníi dooleełígíí nihił hózhǫ́ daatsʼí ánihidooleełgi ałdóʼ dadíníilʼįįł.

4. Łahgóó ayóóʼíʼdííníiʼníi doogoósh tʼáá ákótʼé?

⁴ Paul ání: “Diné ayóóʼádadóʼníi doo.” Díí áníigoósh doo ayóóʼázhdóʼníi da doo? Ndagaʼ. Łahgóó ayóóʼíʼdííníiʼníi dooleełgo Jiihóvah ánihiilaa. Jesus ání: “Tʼáá ni ádííníʼnínígi átʼéego bił kééhótʼíinii ayóóʼííníʼní.” (Mark 12:31) Doo ayóóʼíʼdííníiʼníígóó éí diné doo ayóóʼííníiʼníi da doo. Diyin Bizaad ałdóʼ ání: “Ahastiin tʼáá bí bitsʼíís ayóóʼádayóʼnínígi átʼéego beʼasdzą́ą́ ayóóʼádayóʼníi doo. Beʼasdzą́ą́ ayóóʼáyóʼnínígíí tʼáá bí ałdóʼ ayóóʼíʼdóʼní. Jó, diné doo łaʼda tʼáá hó hatsʼíís jijoołáa da, nidi hatsʼíís biʼjiisą́ índa baa áhojilyą́.” (Ephesians 5:​28, 29) Díí binahjįʼ bee bééhózingo éí łahgóó ayóóʼíʼdííníiʼníi doo.

5. Łaʼda ayóó átʼéego ayóóʼíʼdóʼníigo haitʼée łeh?

⁵ 2 Timothy 3:2 éí ayóóʼíʼdóʼní yee nítʼínígíí doo nihá yáʼátʼéeh da. Éí tʼáá hó tʼéiyá ádaa nitsíjíkeesii átʼé. Łaʼda ayóó átʼéego ayóóʼíʼdóʼníigo éí aláahgo ádaa nitsíkees yileeh. (Romans 12:3 yíníłtaʼ.) Tʼáá bí sizı̨́įgi tʼéiyá ádaa nitsíkees, łahjįʼ diné doo yaa nitsíkees da. Haada hootʼįįhgo tʼáá íídą́ą́ʼ łahdę́ę́ʼ diné yikʼíháʼááh. Diné díí átʼéhígíí éí diné doo shichʼįʼ nidaakaí doo nízingo bighan binaa ayóó ánízáád góde ádinaʼátłʼı̨́ı̨́h. Tʼáá sáhí sédáa doo nízingo átʼı̨́. Diné kódaatʼéhígíí ił hózhǫ́ bee ádaadin.

6. God ayóóʼínííʼníigo haʼátʼíí yáʼátʼéehii bitsʼą́ą́dóó dadeeztʼiʼ?

⁶ 2 Timothy 3 góneʼ, Paul éí ayóóʼíʼdóʼní áłtsé chʼíiníʼą́. Diyin Bizaad nideiłkaahii ádaaníigo Paul kótʼéego áʼiilaagi éí kójítʼéego doo yáʼádaatʼéehii bee ájítʼéego yee áhoołʼįįh. Ndi God éí ayóóʼóʼóʼní bee ániitʼée doogo nihá yinízin, éí ił hózhǫ́, hashtʼehodítʼé, nízaadgóó haʼahóní, ajoobaʼ, yáʼátʼéehii, aʼahódlí, aʼohgo éʼétʼé, áádóó ádaa áháyą́. (Galatians 5:​22, 23) Psalm ání: “Bóhólníihii  [Jiihóvah] biDiyin God ádayósinii bił dahózhǫ́!” (Psalm 144:15) Jiihóvah éí Diyin bił hózhóonii nilı̨́ áádóó bidineʼé ałdóʼ bił dahózhǫ́. Diné ayóó átʼéego ayóóʼíʼdóʼníigo, dóó shaʼdoodił danízinígíí ił hózhǫ́ bee ádaadin, ndi Jiihóvah bá ndaalʼaʼí bił dahózhǫ́ háálá diné yíká anídaajah.—Acts 20:35.

7. Haʼátʼíí naʼídíkid éí God ayóóʼííníiʼníigi bee baa nitsíikees doo?

⁷ Ayóóʼíʼdííníiʼní siidlı̨́įʼgo éí God ayóóʼííníiʼníi dooleeł yę́ęgi biláahdi íilʼı̨́įgo haitʼéego baa ákodíníizįįł? Díí baa nitsíníkees: “Ałchʼą́ą́h naʼaʼnaʼ áádóó ádaa hodzódliʼ bee tʼáadoo haʼátʼíhída baa nidaahkaaí, nidi aʼohgo nitsáhákees bee náánáłaʼ nihiláahdi ádaatʼéego baa nitsídaahkees. Tʼáá ádíighahígo tʼáadoo leʼé tʼáadoo ádá baa nitsídaahkeesí, nidi tʼááłáʼí nootínígo náánáłaʼ yídaneedlíinii ałdóʼ bá baa nitsídaahkees.” (Philippians 2:​3, 4) Kwíiniidzin doo: ‘Díísh bikʼeh áníshtʼé? God kótʼéego ánítʼı̨́ shiłníigiísh bikʼeh ááshnííł? Kingdom Hallgi bił yah anáshjahígíí dóó nahashneʼgóó haaígi lá łaʼ bee áká adeeshwoł?’ Áká azhdoolwołgi tʼáá nantłʼago átʼé. Éí ayóó binaʼanish dóó bízhneedlínígíí yę́ę łaʼ nahjįʼ nízhdidooʼááł. Nihił hózhǫ́ǫ doo éí tʼáá ałtsoní bee Bóhólníihii nihaa bił hózhǫ́!

8. Oodlání łaʼ God ayóóʼádayóʼníigi haʼátʼíí ádaadzaa?

⁸ God ayóóʼádayóʼníigo ląʼígóó bá naashʼaʼ doo danízingo biniinaa Oodlání łaʼ binaanish béeso tʼóó ahayóí yee ádeiłʼı̨́ı̨́ ńtʼéeʼgo, ninádeidiyiizʼą́. Ericka éí azeeʼ ííłʼíní nilı̨́, ndi pioneer áshʼı̨́į doo niizı̨́ı̨́ʼ. Éí bá hastiin yił díkwíígóó  shı̨́ı̨́ kéyah dah naaznilgóó nahojilneʼgo tázhdííʼáázh. Kójíní: “Díí éí náánáłah saad bee yádaatiʼ Diyin Bizaad bee naʼniitingo áká anáhiʼniilchéehgo, dóó nihikʼis ląʼígóó dahazlı̨́įʼgo ałdóʼ, éí niheʼiinaʼ yéigo yáʼátʼéehgo áyiilaa.” Ericka éí tʼahdii azeeʼ ííłʼíní jílı̨́, ndi Jiihóvah bee nazhnitin dóó habrothers dóó hasisters bíká aníjílwoʼgi áłtsé ájósin. “Ayóó átʼéego ił hózhǫ́ dóó bee hwiih jílı̨́,” jiní.

9. Béeso ayóóʼáyóʼníinii haʼátʼíí biniinaa ił hózhǫ́ bee ádin łeh?

⁹ Paul áníigo akʼeʼashchı̨́, diné éí “béeso yíchą́deídéelniʼ doo.” Tʼah hodiinaʼdą́ą́’ Ireland holyéedi pioneer nilı̨́įgo hastiin léiʼ éí God yee yił hodoolnih yiniyé yaa níyá. Áko ńtʼééʼ hastiin éí bibéeso bizis ąą áyiilaago bibéeso hayíínilgo ání: “Díí éí shidiyin átʼé!” Diné doo ayóó áko daaníi da ndi, ákódeinízin. Béeso áádóó bee nahidoonihii ałdóʼ ayóóʼádayóʼní. Ndi Diyin Bizaad ání: “Béeso ayóóʼájóʼníinii éí béeso doo bee hwiish dooleeł da, áádóó naalyeʼé bilááh yileełii ayóóʼájóʼníinii doo bee hwiish dooleeł da.” (Ecclesiastes 5:10) Béeso ayóóʼáyóʼníinii éí ląʼí nááhwiindzingo bíchą́hwíídéeniʼ łeh. Yéigo naashnishgo áko ląʼí shibéeso hólǫ́ǫ doo nízin łeh. Áko biniinaa “yínííł tʼóó ahayóí bijéí yee ahidayiishíísh.”—1 Timothy 6:​9, 10.

10. Atʼı̨́ dóó téʼéʼı̨́ Diyin Bizaad haʼátʼíí níigo yaa halneʼ?

¹⁰ Tʼáá aaníí éí béeso daniidzin. Éí áchʼą́ą́h naalyéii átʼé. (Ecclesiastes 7:12) Ndi tʼóó bikiinígo habéeso hólǫ́ǫgoósh nihił hózhǫ́ǫ doogo átʼé? Aooʼ! (Ecclesiastes 5:12 yíníłtaʼ.) God bá naalʼaʼí łaʼ kóní: “Téʼéʼı̨́ áádóó jitʼíinii shaa dóóʼááł lágo; tʼáá ákónéehee chʼiyáán danilíinii shiyísą́.” Díí hastiin éí haʼátʼíí biniyé téʼéʼı̨́ doo jinízin da? Éí doo adínéeshʼı̨́įł da, háálá éí God bízhiʼ doo ílı̨́ı̨́góó bee ádeeshłííł jiní. Ndi haʼátʼíí biniyé doo ashtʼı̨́į da doo jinízin? Kójíní: Éí “hwiih nishłı̨́įgo doo shídíínítʼiʼgóó ándeeshłíiłgo ádideeshniił, Háísh éí Bóhólníihii [Jiihóvah] nilı̨́?” (Proverbs 30:​8, 9) Diné yee atʼíinii yaa dadzólíhígíí, ndi God éí doo yaa dadzólíi daígíí shı̨́ı̨́ łaʼ bee honisin.

11. Jesus éí haʼátʼíí níigo béeso yaa haadzííʼ?

¹¹ Béeso ayóóʼáyóʼníinii éí God doo bił hojíshǫ́ǫ da. Jesus ání: “Diné łaʼda doo tʼáá łahjįʼ naatʼáanii naaki bá nijólʼaʼ átʼée da, háálá łaʼ bikʼeezhdiniih doo, łaʼ éí ayóóʼájóʼníi doo, éí doodaléiʼ łaʼ doo nahdi jóʼníi da doo, łaʼ éí jijoołáa doo. Diyin God índa atʼı̨́ doo tʼáá łahjįʼ bá nijólʼaʼ átʼée da.” Áádóó ałdóʼ ání: “Nahasdzáán bikáaʼgi chʼosh ałchozhii hólǫ́ǫgi, áádóó tʼáadoo leʼé nídahidiniichxíihgi, índa aniʼįįhii kin yighá daʼanilgo daʼniʼįįhgi, nihinaalyeʼé daʼílíinii tʼáadoo ádá hashtʼeʼ nidahidohʼníłí, nidi yáʼąąshdi chʼosh ałchozhii ádindi, áádóó tʼáadoo leʼé doo nídahidiniichxíihgi, índa aniʼįįhii doo kin yighá daʼanilgo daʼniʼįįhdi, nihinaalyeʼé ádá hashtʼeʼ nidahidohʼnííł.”—Matthew 6:​19, 20, 24.

12. Tʼóó bikiinígo hweʼiinaʼ ájíłʼı̨́įgo haitʼéego God bá nijilʼaʼ doo? Łaʼ baa hólneʼ.

¹² Jiihóvah yá ndaalʼaʼí ląʼígo éí tʼóó bikiinígo beʼiinaʼ dahólǫ́ǫgo ádayósin. Áko éí ląʼígóó Jiihóvah yá nináádaalʼaʼ.  Bił béédahóyoozįįhgo éí díí bee ił hózhǫ́. Jack éí United States yiiʼ kééhatʼı̨́. Éí hweʼasdzą́ą́ bił pioneer éʼéshʼı̨́į doo jinízingo haghan ayóó áníłtsxo áádóó naanish bíjíyoołwołígíí haa nahaazniiʼ. Kójíní: “Nihighan dóó nihikéyah ayóó ánoolinígíí bąąh yíníił ndi yóóʼadiitʼą́.” Ląʼí nááhai, honaanish biniinaa ayóó átʼéego bikʼee doo hoł hózhǫ́ǫ́góó hooghandi ninájiidááh ńtʼééʼ. Ájíní: “Sheʼasdzą́ą́ éí pioneer nilı̨́, áko tʼáá áłahájįʼ bił hózhǫ́. Kóníi łeh niʼ, ‘Shinaatʼáanii ayóó átʼé!’ Kʼad éí tʼáá ániidlah pioneer íʼiilʼı̨́, áko tʼáá łaʼígíí bá neiilnish, Jiihóvah.”

13. Béeso baa nitsíikeesgi hazhóʼó bee ádiníilʼı̨́įgo haʼátʼíí nihíká adoolwoł?

¹³ Béeso éí baa nitsíikeesgi hazhóʼó bee ádiníilʼı̨́įgo díí bee naʼídílkid: ‘Diyin Bizaad éí béeso yeinítʼı̨́įgi yinishdlą́ągo sheʼiinaʼ siláagiísh bee ííshjání íínísin? Béeso ląʼí ádoolníiłgiísh áłtsé séłʼą́? Diné dóó Jiihóvah bił kʼé ahidishʼníigiísh biláahdi naalyeʼé ádaatʼééjí áłtsé baa nitséskees? Jiihóvah éí shíká adoolwołgo átʼéegiísh yéigo yinishdlą́?’ Jiihóvah yichʼįʼ dadéezʼı̨́įʼgo yaa dadzólíhígíí éí tʼáá aaníí yíká adoolwoł!—Matthew 6:33.

14. Honeeni haitʼéego baa nitsíikees doo?

¹⁴ Diyin Bizaad ałdóʼ áníigo nihoogháahdi yoołkáałgo diné éí “honeenida yíchą́dayídéelniʼ doo.” Yáʼátʼéehgo ádaa nitsáhákees dóó há béeso hólǫ́ǫgo índa iiná bee náʼíldįįhgo tʼáadoo átʼéhí da. Diné łaʼ ádeinízingo éí honeeni doo yáʼátʼéeh da. Jiihóvah éí doo ákwíinízin da. Diyin Bizaad éí God bá ndaalʼaʼí kwííłní: “Nílááh, nił hózhǫ́ǫgo nibááh niyą́, nijéí bił hózhǫ́ǫgo niwáin nidlą́.”—Ecclesiastes 9:7.

15. Haʼátʼíí óolyé honeeni ayóóʼájóʼní?

¹⁵ 2 Timothy 3:4 éí honeeni tʼéiyá ayóóʼádayóʼníigo God yę́ę nahjįʼ kódayiilaa níigo yaa yáłtiʼ. Kweʼé doo kóníi da, diné éí honeenihígíí God biláahdi ayóóʼádayóʼní. Ndi kweʼé éí “Diyin God ayóóʼádayóʼníi doo yę́ęgi,” ní. Diyin Bizaad neiłkaahii łaʼ áníigo kweʼé doo kóníi da, éí God tʼįįhdígo ayóóʼádayóʼní. Éí áníigo diné éí God tsʼídá doo ayóóʼádayóʼníi da. Áko honeeni ayóóʼádayóʼníinii díí bee ádaa ádahojilyą́ą doo. Háálá Diyin Bizaad áníigo éí diné ákódaatʼéhígíí ił honeeni “hakʼeh dadeesdlı̨́įʼgo” átʼé.—Luke 8:14.

16, 17. Jesus éí honeeni yaa nitsíkeesígi haitʼéego nihinááł yeʼiilaa?

¹⁶ Jesus éí “iigeh” dóó “ádaʼíísįįd” léiʼgi níyá. (John 2:​1-10; Luke 5:29) Iigehgi wáin ásdįįdgo áko Jesus éí tó wáin bee ájiilaa. Áádóó náánáłahgo Jesus éí ajiyą́ągi dóó łaʼ joodlą́ągi biniinaa diné yee haa nídaastʼįįd. Áko Jesus éí díí ádajinínígíí doo hazhóʼó baa nitsídajikees dago biniinaa yee haadzííʼ. (Luke 7:​33-36) Jesus bééhózinígo áyiilaa éí iiná hazhóʼó bee honeeni doo.

 ¹⁷ Ndi Jesus éí honeeni doo aláahdigo yaa nitsíkees da ńtʼééʼ. Jiihóvah áłtségo áyósin dóó diné yíká eelwod. Ádeideetʼą́ągo tsin bikáaʼjįʼ tiʼhoozniiʼgo diné yisdádookah yiniyé yá daaztsą́. Jesus éí háíshı̨́ı̨́ bikééʼ yigáał doo nízinígíí ííłní: “Shiniinaa diné danihódziihgo índa atídanihiłʼı̨́įgo índa woochʼííd badaaʼihii tʼáá ałtso yee nihaa nidahalneʼgo nihikʼidahojidlí. Tʼáá íiyisí baa nihił dahózhǫ́ǫgo nihił dahózhǫ́, háálá yáʼąąshdi ayóó átʼéii nihaa dahidoolyééł, háálá tʼáá ákótʼéego Diyin God yá dahalneʼii yę́ę tʼáá nihítséedi atídayííłʼįįd.”—Matthew 5:​11, 12.

18. Haa níłtsogo honeeni ayóóʼííníiʼníigi haʼátʼíí binahjįʼ bee níilʼı̨́į doo?

¹⁸ Haa níłtsogo honeeni ayóóʼííníiʼníigi haʼátʼíí binahjįʼ bee níilʼı̨́į doo? Díí bee naʼídílkid doo: ‘Áłah néiidleehgóó dóó nahaneʼgóó, honeenijígoósh aláahgo shił ayóó átʼé? God bá naashʼaʼ doo nisingo bídaneeshdlínígíísh nahjįʼ kódeeshłííł nisin? Bee ákʼihashtaʼígíí dóó baa shił honeeninígíí baa naasháago Jiihóvaásh yaa bił hózhǫ́ǫgo íinisin?’ God ayóóʼííníiʼníigo bił hózhǫ́ǫgo ííníilzin doo niidzin. Áko doo ádaalʼı̨́į daaígíí nihił bééhózin, éí tʼéiyá doo nahjįʼ kwíilʼı̨́į da, ndi Jiihóvah doo yaa bił hózhǫ́ǫ da doo niidzinígíí ałdóʼ.—Deuteronomy 11:1 yíníłtaʼ.

19. Háísh éí ił hózhǫ́ doo yee hwiih daaleeh da?

¹⁹ Séítan binahatʼá biyaadóó diné tiʼdahooníihgo kʼad 6,000dóó baʼaan náhááh. Kʼad díí nihoogháahjįʼ yoołkáłígíí éí béeso dóó honeeni índa shí tʼéiyá hwiindzingo nihił hazʼą́. Nídidoolyéełii dóó tʼáá bí deinízinii tʼéiyá baa nitsáhákees. Diné kódaatʼéhígíí ił hózhǫ́ doo yee hwiih daaleeh da! Ndi Diyin Bizaad éí ání: “Jéíkab biDiyin God nilíinii háká análwoʼii áádóó haDiyin God Bóhólníihii [Jiihóvah] bee hoł chohooʼíinii éí hakʼihojidlí.”—Psalm 146:5.

20. God ayóóʼííníʼníigi haitʼéego nił hózhǫ́ǫgo ániilaa?

²⁰ Jiihóvah bá ndaalʼaʼí ayóóʼádabóʼní. Áádóó tʼáá nináháhááh bikʼeh diné tʼóó ahayóí béédahoyoosįįhgo ayóóʼádabóʼní. Díí binahjįʼ nihił béédahózingo God biNahatʼaʼ hooʼááł, áádóó ayóó átʼéego nihikʼi hozhdoodlíiłgo bichʼįʼ hoolzhish! Jiihóvah bikʼeh dahoniilʼı̨́įgo bił hózhǫ́ǫgo ádeíníilzin dóó ayóó átʼéego ił hózhǫ́ nihee hólǫ́. Jiihóvah ayóóʼádayóʼnínígíí éí hoolʼáágóó bił dahózhǫ́ǫ doo! Díí bikééʼdóó éí ayóóʼíʼdóʼní éʼétʼéegi éí doo yáʼátʼééhgóó ánihidoolíiłgi baa nídadíitʼįįł. Áádóó Jiihóvah bá ndaalʼaʼí yáʼádaatʼéehii yee ádaatʼéii bił ałchʼįʼ nidadiiʼniłgo bee dadíníilʼįįł.