1. Nihisister Yoshiko éí Isaiah 41:10 haitʼéego bidiisnááʼ?

NIHISISTER beʼoodląʼ ayóó bidziilii nilı̨́įgo Yoshiko wolyé, éí doo yáʼátʼééhgóó haneʼ bee hoł hóoneʼ. Hweʼazeeʼííłʼíní éí doo ląʼí nee nínáádidooził da hodííniid. Áko haa jiidzaa? Éí Isaiah 41:10 (Yíníłtaʼ.) bééjoolniiʼ. Áádóó hweʼazeeʼííłʼíní ábizhdííniidgo díí doo bikʼee shił yéeʼ da, háálá Jiihóvah shílaʼ yótąʼ. * Díí saadígíí nihisister Yoshiko éí Jiihóvah yéigo yaʼólíigo ábiilaa. Nihí ałdóʼ kótʼéego yéigo nihichʼįʼ hodiiʼnáahgo díí saadígíí bee nihił hodéezyéelgo ánihidoolííł. Kótʼéego nihił hodéezyéel dooleełgo, áłtsé éí haʼátʼíí biniyé Aizéíyah éí Diyin kóbidííniidgi baa nídadíitʼįįł.

2. Isaiah 41:10 háí bá hashtʼeʼniitʼą́?

² Jiihóvah éí Aizéíyah kótʼéego saad bikʼi nidíínił yidííniid, éí íídą́ą́ʼ Jew dineʼé Bábilangóó bidisʼnáah dooleełgo díí saad yinahjįʼ yee hadaʼólníinii doo biniyé áyiilaa. Ndi, Jiihóvah éí doo Jew dineʼé tʼéiyá yá áyiilaa da, ndi nihá hashtʼeʼniiníʼą́ągo diné tʼáá ałtso bá dooleełgo áyiilaa. (Isa. 40:8; Rom. 15:4) Dííshjı̨́įdi ‘yéego achʼįʼ nahwiiʼnáago’ kééhwiitʼı̨́, áko Aizéíyah binaaltsoos biiʼdę́ę́ʼ tsʼídá yéigo bee hadaʼíiniilníi doo.—2 Tim. 3:1.

3. (a) Isaiah 41:10 haʼátʼíí nihiłní? (b) Díí bee ádee haʼoodzíʼígíí haʼátʼíí biniyé hwiindzin?

³ Isaiah 41:10 bitsʼą́ą́dóó Jiihóvah yee ádaa hadoodzííʼ yę́ę binahjįʼ tááʼ ałʼąą átʼéego baa nídadíitʼįįł. Éí (1) Jiihóvah  nihił hólǫ́ǫ doo, (2) nihiDiyin nilı̨́, áádóó (3) nihíká adoolwoł. Yoshiko ádzaa yę́ęgi átʼéego, Diyin kónihiłníigo yiniidlą́ą doo, * háálá ayóó átʼéego nihichʼįʼ nídahodiiʼnááh. Áádóó doo yáʼátʼééhgóó nihił hoogáłígíí biniinaa bee nihichʼįʼ nidahwiiʼná. Łaʼ éí bílaʼashdlaʼii binahatʼá bił nahazʼą́ą́góó ayóó átʼéego atídaboolííł. Díí táaʼgo bee ádee hadoodzíiʼii tʼáá ałkééʼ baa nídadíitʼįįł.

4. (a) Jiihóvah tsʼídá áłtsé yee haadzíʼígíí éí haʼátʼíí? (Footnote ałdóʼ níníłʼı̨́.) (b) Jiihóvah nihaa nitsékeesgi haitʼéego yee haadzííʼ? (c) Diyin kótʼéego naa nitsékeesgi haitʼéego baa nitsíníkees?

⁴ Jiihóvah éí tʼáá aaníí ádíshní, níigo áłtsé kótʼéego haadzííʼ: “Tʼáadoo nił yéʼí, háálá nił honishłǫ́.” * Jiihóvah kónihiłníigo éí tʼáá ałtsojįʼ nihíísístsʼą́ą́ʼ áádóó ayóóʼánihóshʼní níigo ání. Ayóóʼánihóʼníigo nihaa aʼááh nízingo kóní: “Shił anílı̨́įgo áádóó ił nílı̨́įgo índa ayóóʼánííníshʼníigo” naa nitséskees. (Isa. 43:4) Jiihóvah bá ndaalʼaʼii ayóóʼáyóʼníigi tsʼídá ádin tʼáadoo łaʼda hatsʼą́ąjįʼ kwíidoolíłí da. (Isa. 54:10) Jiihóvah bibee ayóóʼóʼóʼniʼ índa bikʼis ídlı̨́įgi bee danihidziil. Bikʼis Éíbram (Éíbraham) yaa áhályą́ą́ ńtʼééʼ yę́ęgi átʼéego nihí ałdóʼ tʼáá ákótʼéego nihaa áhályą́ą doo. Jiihóvah kóháłní: “Tʼáadoo nił yéʼí, Éíbram; shí ninaageʼ [áchʼą́ą́h naalyéii] nishłı̨́.”—Gen. 15:1.

5-6. (a) Jiihóvah nihíká adeeshwoł nízingi haitʼéego nihił bééhózin? (b) Yoshiko ájíítʼįįdgi haʼátʼíí bitsʼą́ą́dóó bídahwiilʼaah?

⁵ Nihił béédahózingo bee nihichʼįʼ nidahwiiʼnáanii éí Jiihóvah bee nihíká adeeshwoł nízin, háálá kótʼéego bidineʼé yichʼįʼ ádee hadoodzííʼ. “Tó biyiʼgóó chʼíhínáahgo nił honishłǫ́ǫ doo, áádóó tooh danílíinii biyiʼgóó chʼíhínáahgo doo nikʼi didoolkǫǫł da; kǫʼ biyiʼgóó chʼíhínáahgo doo nididoohłił da, doo nidi kǫʼ dah nídínoʼii nídínaad da doo.” (Isa. 43:2) Díí éí haʼátʼíí níigo ání?

⁶ Jiihóvah éí nidaʼníłtłʼaii nihá nahjįʼ kódeeshłííł, doo níi da, ndi éí “tooh  danílíinii,” éí achʼįʼ anáhóótʼiʼii danílínígíí doo nihikʼi didoolkǫǫł da, doodaiiʼ “kǫʼ,” bee nanihíhontaahii doo nihididoołił dago nihá áyósin doo. Tʼáá aaníí ádíshní nihił honishłǫ́ǫgo díí ádaatʼéii nidaʼníłtłʼaii “biyiʼgóó chʼíhínáahgo” bee níká adeeshwoł nihiłní. Éí haitʼéego ádoonííł? Éí doo néiildzidgóó ánihósin doo, éí azhą́ daʼdootsaał ndi, doo bitsʼádíníichéeł da. (Isa. 41:13) Yoshiko baa chʼíhootʼánę́ę díí tʼáá aaníigo átʼéego bił bééhoozin. Bichʼéʼéké ádaaní: “Nihimá éí ayóó átʼéego áhodéeszéeʼgo baa ákódaniidzı̨́ı̨́ʼ. Éí Jiihóvah hoł hodéesyéelgo áhoolaa. Éí ájídinjįʼ azeeʼííłʼíní índa azeeʼálʼíní góneʼ ndahaztánígíí éí Jiihóvah áádóó yee ádee hahaasdzíiʼii bee bichʼįʼ yájíłtiʼgo ahóyííłką́. Yoshiko ájíítʼįįdgi haʼátʼíí bitsʼą́ą́dóó bídahwiilʼaah? Diyin éí “nił honishłǫ́ǫ doo” nihiłníigi yéigo yiniidlą́ągo éí bee achʼįʼ nidahwiiʼnáanii bichʼįʼ nihidziil doo.

7. Haʼátʼíí baa nínáádadíitʼįįł, áádóó éí haʼátʼíí níigo ání?

⁷ Naaki góneʼ Aizéíyah ánááyiidlaaígíí éí: “Tʼáadoo yéego nąąh nááhákaʼí, háálá niDiyin God nishłı̨́.” Ąąh nááhákaʼí níigo haʼátʼíí ní? Kweʼé díí saad “nąąh nááhákaʼí” éí tʼóó áłtséedi Hííbrewjí saad choozʼįįd yę́ę, “éí łaʼda doodaiiʼ báhádzidii atíhodoolíiłgo tʼáá ałhąąh bíká tʼą́ą́ʼ nízhdétʼįįhgo,” doodaiiʼ “tsízdoolyiz áádóó nijighalgo,” óolyé.

8. (a) Jiihóvah éí Jew dineʼé daasnáá yę́ę, haʼátʼíí biniyé ‘tʼáadoo yéego nihaa náádahakaʼí’ yiłní? (b) Isaiah 46:​3, 4 góneʼ haʼátʼíí hodooʼniidgo bee hadziil nídajísdlı̨́ı̨́ʼ?

⁸ Jiihóvah éí Jew dineʼé Bábilangóó bidisʼnáahgo haʼátʼíí biniyé tʼáadoo ‘nihaa náádahakaʼí’ yidííniid? Jó éí diné ákwíí kéédahatʼínígíí nídadooldzíiłgo bił bééhózin. Éí haʼátʼíí bikʼee nídazhdooldzííł? Jew dineʼé éí 70 nááhaijįʼ dahoʼdisnáahgi bee níłką́ągo Bábilan éí Míídiya dóó Pérzha hakʼiidoojah. Jiihóvah éí díí dineʼé choidoołʼįįłgo bidineʼé Bábilandę́ę́ʼ bééʼdoolnih. (Isa. 41:​2-4) Bábilan dineʼé dóó łahdę́ę́ʼ náá dadineʼé íídą́ą́ʼ kéédahatʼínę́ędą́ą́ʼ bił béédahózingo biʼanaʼí bichʼįʼ yinééł, áko “chánah danohłı̨́” daaníigo yéigo dabidziilgo ádá dólzin ńtʼééʼ. Áádóó edaʼalyaaii hachʼą́ą́h dahólǫ́ǫ doo dazhnízingo ádá ánáádajidleʼ. (Isa. 41:​5-7) Ndi Jiihóvah éí Jew dineʼé dabisnááh yę́ę dabijéí dahódéesyéełgo áyiilaago kwííłní: “Ízrel nílíinii, . . . shinaalʼaʼí nílı̨́. . . . Tʼáadoo yéego nąąh nááhákaʼí, háálá niDiyin God nishłı̨́.” (Isa. 41:​8-10) Baa ákonínízingo Jiihóvah éí ání: “NiDiyin God nishłı̨́.” Jiihóvah éí bá ndaalʼaʼí ííłníigo doo niheisénah da, tʼahdii nihiDiyin nishłı̨́, áádóó tʼahdii shidineʼé danohłı̨́ níigo ání. Éí kwííłní: “Tʼáá shí naa áháshyą́ągo yisdánídeeshtééł.” Jew dineʼé dahodisnáá yę́ę Jiihóvah kóháłníigo bee dahadziil náádajísdlı̨́ı̨́ʼ.—Isaiah 46:​3, 4 yíníłtaʼ.

9-10. Haʼátʼíí biniyé tʼáadoo nídeildzidí doo? Łaʼ chʼíníʼaah.

⁹ Kʼad éí tʼóó tsé ádin diné nitséédaaltłiʼgo bił ndahazʼą́. Nihí ałdóʼ tʼáá ákódaniitʼé. Ndi tʼáadoo nídeildzidí doo. Jiihóvah ánihiłní: “NiDiyin God nishłı̨́.” Kónihiʼdiʼníigo bidziilii át’éego haʼátʼíí biniyé binahjįʼ doo ntsinéiiltłiʼ da?

¹⁰ Díí baa nitsíníkees: Jim dóó Ben éí chidí naatʼaʼí biiʼ dah jizké, éí ayóó átʼéego níyolgo hoł dah nayiiłhan. Ńtʼééʼ łaʼ hajoodzííʼ: “Bíniʼ áchʼą́ą́h sis tʼáá nihaa naazlá. Díí níyol biiʼ nihił ootʼahgo  hodidoonaał.” Jim éí ayóó átʼéego nitsíjiltłah. Ndi naʼałtʼaʼí ánáádooʼniid: “Tʼáadoo nitséédaałtłiʼí. Díí nihá oołtʼahii ání.” Áko Jim doo ayóó hoł aaníígóó ájíní, “Niʼjiłtʼahgi haitʼéego jiichįįhgo ájíní?” Ńtʼééʼ Ben baa ákozhniizı̨́įʼgo doo ndi bił yééʼgóó dah sídá. Áko ábijiní: “Haʼátʼíí biniinaa doo nił yééʼgóó dah sínídá?” Ben éí tʼóó yidlohgo áháłní: “Díí naʼałtʼaʼí ayóó bééhasin. Éí shizhéʼé átʼé!” Áádóó ánáázhdíʼní: “Shizhéʼé bee nił hashneʼ. Éí naʼałtʼaʼgi ayóó yiyiichįįhgo nił bééhózingo ni ałdóʼ doo nił yéeʼ da doo.”

11. Jim dóó Ben baa haneʼgi haʼátʼíí bitsʼą́ą́dóó bíhooʼaah?

¹¹ Díí haʼátʼíí bitsʼą́ą́dóó bíhooʼaah? Bengi átʼéego yééʼ bikʼee doo ntsinéiiltłiʼ da, háálá yáʼąąshdę́ę́ʼ Nihizhéʼé Jiihóvah tsʼídá yéigo béédahoniilzin. Éí díí ayóó átʼéego níyolgo biiʼ deíníikááh nahalinígíí biiʼ góneʼ chʼínihidooʼishgo nihił béédahózin. (Isa. 35:4) Jiihóvah badaʼííníidlíigo doo ntsinéiiltłiʼ da doo, ndi diné nihináágóó éí ayóó átʼéego nídaaldzid. (Isa. 30:15) Ben ádzaaígi átʼéego nihí ałdóʼ God badaʼííníidlíigi náánáłaʼ bee bił dahwiilneʼ. Áko bí ałdóʼ éí bee bichʼįʼ nidahwiiʼnáanii yichʼįʼ dabidziil doogo God bíká análwoʼ dooleełgi deidoodląął.

12. (a) Tááʼ góneʼ éí haʼátʼíí baa nídadíitʼįįł? (b) Jiihóvah bibee adziil níigi haʼátʼíí áhyiłní?

¹² Tááʼ góneʼ Aizéíyah ánááyiidlaaígíí éí: “Nidziilgo ándeeshłííł; tʼáá aaníí, níká adeeshwoł.” Aizéíyah éí tʼáá íídą́ą́ʼ kótʼéego Jiihóvah bidineʼé dabidziilgo íidoolííł níigo chʼíiníʼą́. Éí kóní: Jiihóvah “ayóó ábóodziilgo doogááł, bibee adziilii bá nantʼáa dooleeł.” (Isa. 40:10) Áko  áníigo éí Jiihóvah ayóó átʼéego Naatʼáanii nilı̨́ nihiłní. Éí bibee adziilii doo bikʼé hodidleehii bá ndaalʼaʼí yee yichʼą́ą́h hólǫ́ǫgo hoolzhiizh, áádóó tʼahdii tʼáá ákótʼéego bidineʼé yichʼą́ą́h hólǫ́.—Deut. 1:​30, 31; Isa. 43:​10, New World Translation biiʼ footnote níníłʼı̨́.

13. (a) Jiihóvah éí hahgo danihidziilgo ánihidoolííł? (b) Haʼátʼíí éí adziilii índa baʼahódlíi dooleełgo deiniidlą́?

¹³ Íiyisíí éí nihiʼanaʼí atídanihiłʼı̨́įgo Jiihóvah éí “nidziilgo ándeeshłííł” nihiłníigi tʼáá aaníí ání. Łaʼ kéyah dah nahazʼą́ą́góó éí nihiʼanaʼí danilíinii wołí bee ádaatʼı̨́įgo nidahwiilneʼ yééʼgóó chʼééh nihitsʼą́ą́ʼ neʼ ádeilééh. Ndi díí éí doo bikʼee nihił daayéeʼ da. Háálá Jiihóvah éí adziilii índa baʼahódlíi dooleełgi deiniidlą́. Éí kónihiłní: “Bee naʼabaahii niniyé ályaaígíí tʼáá ałtso doo nidídóołniił da.” (Isa. 54:17) Díí kóníigi éí tááʼ ałʼąą átʼéego bee bééhániih.

14. God biʼanaʼí éí nihikʼijįʼ dadooleełgi haʼátʼíí biniinaa doo bikʼee tsídiilyis da?

¹⁴ Áłtsé éí Christ bikʼéé yiidáałii niidlı̨́įgi éí nihiʼjoodláa dooleełgo átʼé. (Matt. 10:22) Jesus éí bídahoołʼaahii díí nihoogháahdi yoołkáałgo yéigo atídanihiʼdilʼı̨́į dooleeł níigo tʼáá íídą́ą́ʼ yił hoolneʼ. (Matt. 24:9; John 15:20) Naaki góneʼ éí Aizéíyah ałdóʼ tʼáá íídą́ą́ʼ yaa hoolneʼgo éí nihidaʼanaʼí doo tʼóó danihijoołáa da doo, éí bee naʼabaahii ałʼąą ádaatʼéii nihikʼijįʼ chodayoołʼı̨́į doo. Díí bee naʼabaahii ádaatʼéii éí yoochʼííd badaaʼihii bee aa nidahalneʼ áádóó tʼáá aaníí nahalingo ádeileʼ doo, doodaiiʼ tʼáá naʼníleʼdii atídaʼałʼı̨́į doo. (Matt. 5:11) Jiihóvah éí díí nihiʼanaʼí kótʼéego nihikʼijįʼ nidaalnishgi doo nihá yichʼą́ą́h nidoogáał da. (Eph. 6:12; Rev. 12:17) Ndi, tʼáadoo nihił daayéʼí doo. Haʼátʼíí biniyé?

15. Tááʼ góneʼígíí haʼátʼíí béédeilniih doo, éí Isaiah 25:​4, 5 haʼátʼíí ní?

¹⁵ Tááʼ góneʼígíí éí Jiihóvah áníigo “bee  naʼabaahii” nihikʼijįʼ chooʼínígíí ádin “doo [łaʼ] nidídóołniił da.” Tʼóó báhádzidgo niyol bił nahałtingo kin bá ahénátłʼinii bineʼ aʼniichééh nahalingo Jiihóvah éí ‘diné báádahadzidii nihaatįįh nájahii’ nihá yichʼą́ą́h sizı̨́. (Isa. 25:​4, 5) Nihiʼanaʼí éí doo tʼáá hoolʼáágóó atídanihijiłʼı̨́į da doo.—Isa. 65:17.

16. Nihikʼijįʼ danilíinii éí Isaiah 41:​11, 12 haa dahodiʼdoolnííł ní?

¹⁶ Jiihóvah badaʼííníidlíigi nihá bidziilgo áyósingo “tʼáá ałtso nichʼįʼ bádahachįʼii” kódoolnííł nihiłní. (Isa. 41:​11, 12 yíníłtaʼ.) Tsʼídá wołí bee nihikʼijįʼ dajílı̨́ı̨́ ndi kódahodiʼdoolnííł: Éí God biʼanaʼí tʼáá ałtso “tʼáadoo nídandlíní da doo índa yéego nichʼįʼ nidaaldzilii ádadoodįįł.”

17-18. (a) Diyin Bizaad yíníiltaʼgo éí haitʼéego God yéigo baʼahódlíigo áʼdoolííł? Łaʼ chʼíníʼaah. (b) 2019 saad bá nidiitʼánígíí haitʼéego hazhóʼó nabikʼítsíilkeesgo nihíká adoolwoł?

¹⁷ Jiihóvah yéigo badaʼííníidlíi dooleełgo éí hazhóʼó bił ahéédahodiilzįįł. Tsʼídá tʼááłaʼígo éí Jiihóvah Bizaad hazhóʼó deíníiltaʼgo áádóó nabikʼítsíilkeesgo tʼéiyá yéigo béédahodiilzįįł. Bizaad baʼahódlíigo bikʼidaʼashchı̨́, éí bidineʼé yichʼą́ą́h tádííyáhádą́ąʼgi baa haneʼ. Áko éí binahjįʼ dííshjı̨́įdi nihí ałdóʼ tʼáá ákótʼéego nihichʼą́ą́h naagháa dooleełgo deiniidlą́.

¹⁸ Aizéíyah éí Jiihóvah nihichʼą́ą́h naagháagi nizhónígo nihił ííshjání áyiilaaígíí baa nitsíníkees. Jiihóvah éí naʼniłkaadii nilı̨́ áádóó bá ndaalʼaʼí éí dibé yázhí nahalingo chʼíiníʼą́. Aizéíyah éí Jiihóvah kwííłní: “Bigaan yee dibé yázhí áłah ánáyoodlííł, áádóó bijéítsʼiin yíyółtąʼgo neiijaah.” (Isa. 40:11) Kótʼéego Jiihóvah bigaan ayóó ábóodziilii yee ádinihółtąʼgo, éísh bee hashtʼediniitʼéego átʼé? Achʼįʼ nidahwiiʼná ádaatʼéii dahólǫ́ǫ ndi, baʼahódlíigo índa hóyą́ągo naalʼaʼí éí Isaiah 41:10 góneʼ saadígíí 2019 biiʼ yihahígíí yá nídeidiiʼą́. Éí “Tʼáadoo yéego nąąh nááhákaʼí, háálá niDiyin God nishłı̨́” wolyé. Díí yéigo nabikʼítsíníłkees doo. Díí saadígíí éí haʼátʼíí shı̨́ı̨́ nidaʼnóltłʼaii nihidáahdi dahodooleełii yéigo bichʼįʼ nihidziilgo ánóhsin doo.