1. Jiihóvah éí ląʼí diné áłah nilı̨́įgo Jesus Daaztsą́ągi Bééhániih ádaʼaleʼgo haitʼéego yaa nitsékees? (Naaltsoos bikááʼdę́ʼígíí níníłʼı̨́.)

JIIHÓVAH éí tsʼídá tʼóó ahayóí diné áłah nilı̨́įgo Jesus Daaztsą́ągi Bééhániih ádaʼaleʼgo yinéłʼı̨́įgo baa nitsíníkees. Éí diné tʼáá yílʼáá ńtʼééʼ doo yinéłʼı̨́į da, ndi tʼááłaʼí nítínígo ákwii niheeskaígíí yinéłʼı̨́. Tʼáá nináháhááh bikʼeh ákwii nídaakahígíí yaa ákonízin. Łaʼ shı̨́ı̨́ yéigo bichʼįʼ nidahwiiʼnáa ndi, ákwii neheeskai. Łaʼ éí áłah nídeedleehígi doo ahąąh nádáah da, ndi Jesus Daaztsą́ągi Bééhániih ánáʼálʼįįhígíí éí ílíinii átʼéego yaa nitsékeesgo ákwii nádááh. Jiihóvah éí índída ákwii níyáhígíí ałdóʼ yaa ákonízin, éí haʼátʼíí lá baa naʼaldeeh nízingo shı̨́ı̨́ níyá.

2. Haʼátʼíí baa nídadíitʼįįł?

² Jesus Daaztsą́ągi Bééhániih ánááʼálnéehgi ląʼí neheeskaigo Jiihóvah yaa bił hózhǫ́. (Luke 22:19) Ndi Jiihóvah éí ákónéelą́ą́ʼ niʼiisdeeʼígíí doo yaa nitsíkees da. Íiyisíí biniyé jiníyáagi yaa nitsíkees. Díí naʼídíkid baa nídadíitʼįįł. Jesus Daaztsą́ągi Bééhániih ánáʼálʼįįhgi néiidááh, áko haʼátʼíí biniyé tʼáá damóo náʼoodleeł áłah náʼádleehígíí ałdóʼ néiidáah doo?

3. Haʼátʼíí biniyé áłah néiidleehgóó ałnánéiidááh?

³ Áłah néiidleehgi biniyé néiidáhígíí éí Jiihóvah bee bichʼįʼ hodíníilzin. Áádóó ákweʼé Jiihóvah nanihinitin. Diné ayóó ádaa nitsídaakeesí éí shíísh haʼátʼíí biniyé nashiʼdínóotįįł danízin łeh. (3 John 9) Ndi nihí éí Jiihóvah tʼáá bí  índa bidineʼé dah yikahígíí nidanihidínóotįįł daniidzingo bíká dadíníitʼı̨́įʼ łeh.—Isa. 48:​17, 18; John 6:45.

4. (a) Áłah néiidleehgóó ałnánéiidáahgo haʼátʼíí bee nihééhoʼdílzin? (b) 1 Corinthians 11:​23-26 áníigi haʼátʼíí biniyé Jesus Bééhániihgi néiidááh?

⁴ Áłah néiidleehgi néiidáahgo éí aʼohgo íʼdííníilzingo átʼé, háálá éí nashiʼdínóotįįł niidzin. Jesus Daaztsą́ągi Bééhániih álnéehgi éí ílíinii átʼéii átʼéego ákwii néiidááh. Áádóó Jesus éí “bee shéédaałniih dooleeł” nihiłnínę́ęgi bikʼeh dahoniilʼı̨́įgo ádeiitʼı̨́. (1 Corinthians 11:​23-26 yíníłtaʼ.) Díí kótʼéego biniyé áłah néiidleehgo ił chohooʼı̨́ bidziil nihá ánáyoodlííł áádóó Jiihóvah ayóóʼánihóʼníigi yéénihiyiiłnííh. Jiihóvah tʼááłáhídi nanihineeztą́ąʼgo doo bee danihidziil da dooleełgo bił bééhózin. Áko tʼáá damóo náʼoodleeł bikʼeh áłah néiidleeh doogo nihá niiníʼą́, ákwii nánídááh nihiłní. Aʼohgo íʼdííníilzingo akʼeh honiilʼı̨́įgo éí ákwii néiidáah doo. Tʼáá damóo náʼoodleeł áłah néiidleehígíí bá hashtʼéédadiitʼįįh áádóó áadi siidáa łeh.

5. Jiihóvah wóshdę́ę́ʼ nanihinishtin nihiłníigi haʼátʼíí biniyé aʼohgo ádaʼdólzinii nashiʼdínóotı̨́ı̨́ł danízin?

⁵ Jiihóvah wóshdę́ę́ʼ nanihinishtin níigo éí aʼohgo ádaʼdólzinii nashiʼdínóotı̨́ı̨́ł danízin. (Isa. 50:4) Éí Jesus Daaztsą́ągi Bééhániih ánáʼálʼįįhgi nídaakahgo yaa bił dahózhǫ́, áádóó łaʼígíí áłah néiidleehígíí ałdóʼ nídaakah daaleeh. (Zech. 8:​20-23) Áko tʼáá áníiltso índa nihaa nídaakah daazlı̨́ʼígíí bił Jiihóvah ‘nihíká análwoʼii nilı̨́ áádóó háánihiiłteehii nilı̨́’ éí nanihinitingo baa nihił dahózhǫ́. (Ps. 40:17) Jiihóvah dóó biYeʼ ayóóʼáyóʼníinii nihiníiʼgi hólǫ́ǫgo nihínootı̨́įłgo ayóó baa hózhǫ́ǫgo nídadiilyá.—Matt. 17:5; 18:20; 28:20.

6. Aʼohgo ázhdólzingo éí haitʼéego háká eelwodgo Jesus Daaztsą́ągi Bééhániih ánáʼálʼįįhgi jiníyá?

⁶ Jesus Daaztsą́ągi Bééhániih ánáʼálʼįįh tʼáá nináháhááh bikʼeh ląʼí diné nihaa díínááł dabidiiʼní. Ląʼí bíká aʼoowodgo átʼé. Ła’ kótʼéego baa haneʼ: Tʼah hodiinaʼ yę́ędą́ą́ʼ hastiin léiʼ éí Jesus Daaztsą́ągi Bééhániihgo éʼélnéehdi nihaa díínááł bidooʼniidgo naaltsoos beíltsooz. Ndi doo shá bíighah da jidííniid. Ńtʼééʼ éí bitłʼééʼ éʼélnéehgo Kingdom Halldi yah ííyá. Ákwii jiníyáago diné ayóó hachʼįʼ báʼádahwiinítʼı̨́įgo biniinaa tʼáá damóo bikʼeh áłah néiidleehgi níjídáahgo baa nízhdiidzá. Éí łaʼ nááhaijįʼ tʼáá tádidí jisiih. Haʼátʼíí biniinaa áłah néiidleehgi náshdáah doo jiniizı̨́ı̨́ʼ? Aʼohgo ázhdólzingo áłah aleehgóó deeshááł jiniizı̨́įʼgo ákǫ́ǫ́ jiníyá. Nihibrother nihaa díínááł níigo naaltsoos yeiníłtsooz yę́ę ání, “Éí hastiin aʼohgo ádaa nitsékeesii nilı̨́.” Jiihóvah éí díí hastiin ádíchʼįʼ kóyiilaago baptize ábiʼdilyaa kʼad nihibrother nilı̨́.—2 Sam. 22:28; John 6:44.

7. Áłah néiidleehdi bídahwiilʼą́ʼígíí índa Diyin Bizaad deíníiltaʼígíí haitʼéego aʼohgo ádadííníilzin?

⁷ Áłah néiidleehdi bídahwiilʼą́ʼígíí índa Diyin Bizaad deíníiltaʼgo aʼohgo ádadííníilzingo ánósin. Jesus Daaztsą́ągi Bééhániih ánáʼálʼįįhígíí bichʼįʼ hoolzhishgo éí Jesus áátʼįįd yę́ę áádóó aʼohgo áʼdólzingo beʼiiná nihá ninéidiníʼą́ągi éí áłah néiidleehgi baa ndahanih. Díí áʼdoolnííł bichʼįʼ hoolzhishgo Jesus daaztsą́ągi áádóó náábiʼdiilzáagi baa haneʼígíí Diyin Bizaad biiʼ baa daʼíínółtaʼ danihidiʼníi łeh. Kótʼéego áłah néiidleehgi áádóó Diyin Bizaad biiʼ baa ííníiltaʼgo éí Jesus nihá nááʼádiisniiʼígi ayóó baa ahééh niidzingo ánáʼoodlííł. Azhą́ nihá nantłʼa ndi, Jesus aʼohgo áʼdólzingi bedaʼiilʼı̨́ índa Jiihóvah íinízinii ádeiʼnííł.—Luke 22:​41, 42.

8. Jesus éí haitʼéego doo bił yééʼgóó áʼdiilyaa?

⁸ Jesus átʼéhę́ęgi átʼéego bedaʼiilʼı̨́. Bidiʼyoolyééł bichʼįʼ hoolzhishgo Jesus éí doo bił yéeʼ da ńtʼééʼ. Hweʼanaʼí éí baa yáhásinígi átʼéego nídahodínóołhał áádóó dahodiyoołhéełgo hoł bééhózin. (Matt. 20:​17-19) Ákótʼée ndi, dazhdootsaałgi hoł lą́. Gethsémaniidi hódahoołʼaahii bił nijíiztą́ągo ábijiní: “Nídoohjeeh, kʼad yiikah doo; jóʼakon, nináshideeʼaahígíí aadę́ę́ʼ yigááł.” (Matt. 26:​36, 46) Dahwiidoołtsoł biniyé dadeeníinii dayíjáahgo diné haa niná. Jesus éí hachʼįʼ niníyáago shí éí áshtʼı̨́ hałní, áádóó siláo éí shídahoołʼaahii bíniʼ nidaakai bizhdííniid. (John 18:​3-8) Jesus éí doo bił yééʼgóó áʼdiilyaa! Anoint ádaalyaaígíí áádóó dibé náánáłaʼígíí éí tʼáá Jesusgi ákótʼéego doo bił daayéeʼ da. Éí haitʼéego ákódaatʼé?

9. (a) Haʼátʼíí biniyé áłah néiidleehgóó ałnánéiidáah doo? (b) Áłah náʼádleehgóó ałnáádeikahgo nihibrothers awáalyaadi nidaháaztánígíí haitʼéego yee hadaʼólní?

⁹ Azhą́ ląʼígóó daʼníłtłʼaii dahólǫ́ǫ ndi, nihidziilgo íʼdííníilzingo áłah néiidleehgóó ałnánéiidááh. Nihibrothers dóó nihisisters éí chʼééná, bíniʼ deiʼaʼ, doodaiiʼ bitsʼíís bee bichʼįʼ anídahwiiztʼiʼ ndi, áłah néiidleehgóó ałnáádaakah. Łaʼ éí bikʼéí doodaiiʼ bídahólníihii yéigo bikʼijįʼ danilı̨́į ndi, doo bił daayééʼgóó ałnáádaakah. Kótʼéego ląʼígóó daʼníłtłʼaii dahólǫ́ǫ ndi, wołí bee ádeiitʼı̨́įgo ałnáádeikahgo nihibrothers awáalyaadi nidaháaztánígíí yee hadaʼólní. (Heb. 13:3) Kódeiitʼı̨́įgo nihaa dahodiitsʼaʼgo éí bedaʼoodląʼ, doo bił daayéeʼ da, índa Jiihóvah doo yóóʼadeidiʼaahgóó bidziilgo ádabósin. Yilʼaadii Paul kótʼéego bił hooʼaʼ. Éí Romedi awáalyaadi sidáago habrothers tʼahdii God yikééʼ naazı̨́įgo baa hozhdiitsʼaʼgo hoł hózhǫ́ǫgo áhósin. (Phil. 1:​3-5, 12-14) Paul éí kʼadę́ę doodaiiʼ ániid chʼééhodeeltʼeʼgo Hííbrew Oodlání danilínígíí kwííłníigo naaltsoos yichʼįʼ áyiilaa, “Christ bee tʼáá łaʼ haoojéeʼgo ayóóʼádaʼahíínóhʼníi doo,” áádóó áłah nádleehígíí tʼáadoo nidahosíhí.—Heb. 10:​24, 25; 13:1.

10-11. (a) Jesus Daaztsą́ągi Bééhániih ánáʼálʼįįhgi, háí nihaa díínááł bididiiʼniił? (b) Ephesians 1:7 haʼátʼíí biniyé ákódíínííł nihiłní?

¹⁰ Nihikʼéí, bił nideiilnishii, índa bił kééhwiitʼíinii éí Jesus Daaztsą́ągi Bééhániih ánáʼálʼįįhígíí nihaa díínááł bidííniidgo doo tʼą́ą́ʼ niidlı̨́ı̨́góó átʼé. Haʼátʼíí biniyé nihaa díínááł bidiiʼníi łeh? Jiihóvah dóó Jesus nihá áátʼįįdgi baa ahééh daniidzingo biniyé íitʼı̨́. Jiihóvah “bibee ajoobaʼ yee” náádanihiʼdiizniiʼgi éí diné ałdóʼ bíká adoolwołgi yaa ídahwiidoołʼááł daniidzin.—Ephesians 1:7 yíníłtaʼ; Rev. 22:17.

¹¹ Tʼáadoo tʼą́ą́ʼ niidlínígo áłah néiidleehgi éí náánáłahgo ałdóʼ bee ánáániitʼé. Éí Diyin dóó biYeʼ yéigo yee átʼéego íʼdiilyaa.

12. (a) Áłah néiidleehígíí éí haitʼéego Jiihóvah dóó Jesus ayóóʼííníiʼníigo ánihidoolííł? (b) 2 Corinthians 5:​14, 15 éí haitʼéego Jesus bedaʼiilʼı̨́į doo nihiłní?

¹² Jiihóvah dóó Jesus ayóóʼííníiʼníigo ákwii atah honiidlǫ́. Áłah néiidleehgi bídahwiilʼaahígíí Jiihóvah dóó Jesus yéigo ayóóʼádeíníiʼníigo ánánihoodlííł. Tʼáá áłah nihá áátʼįįdgi béédeilniihgo ánihósin. (Rom. 5:8) Jesus Daaztsą́ągi Bééhániih ánáʼálʼįįhígíí éí Jiihóvah dóó Jesus ayóóʼánihóʼníigi bee béédeilniih, tʼah doo ayóó yaa ahééh danízin daaleeh daígíí ałdóʼ ayóóʼáyóʼní. Ayóó ahééh niidzingo éí tʼáá ákwíí jı̨́ Jesus bedaʼiilʼı̨́įgo deíníikááh. (2 Corinthians 5:​14, 15 yíníłtaʼ.) Áádóó nidanihiiłnáago Jiihóvah náánihiisniiʼgi bee baa dahwiiʼniih. Łahgo baa dahwiiʼniih doogo éí áłah néiidleehgi comment ánáʼiilʼįįh doo.

13. Haitʼéego Jiihóvah dóó biYeʼ ayóóʼííníiʼníi doo?

¹³ Jiihóvah dóó biYeʼ ayóóʼííníiʼníigo éí tʼáadoo leʼé bá nináhiditʼaah doo. Áłah néiidleehgóó áłahájįʼ ałnánéiidáahgo díkwíígóó shı̨́ı̨́ ałʼąą ádaatʼéii nináhiditʼaah łeh. Ląʼígóó áłah nídaadleehgóó tʼáá ndaʼanish bee eʼeʼaah góneʼ chʼééh adeesdeeʼ ndi, áłah néiidleeh. Laʼ áłah nináánéiidleehígíí éí Damóo Yázhí dóó Damóo góneʼé łeh. Azhą́ chʼééh deedzáa ndi, ákǫ́ǫ́ ałnánéiidáahgo, éísh Jiihóvah yee nihaa ákonízingo átʼé? Aooʼ, ákótʼé! Áko wołí bee ádeiitʼı̨́įgo ałnánéiidáahgo éí Jiihóvah ayóóʼííníiʼníigo yaa ahééh nízin.—Mark 12:​41-44.

14. Jesus éí ayóóʼóʼóʼníigo beʼiinaʼ ninéidiníʼánígíí haitʼéego nihá ííshjání áyiilaa?

¹⁴ Jesus ayóóʼóʼóʼníigo beʼiinaʼ ninéidiníʼánígíí ííshjání áyiilaa. Éí hódahoołʼaahii bá dazhdootsaał jinízingo ájítʼı̨́, éí áłtsé baa nitsíjíkees, hó akééʼdóó naʼízhdíltʼeʼ. Azhą́ chʼééshdeeyá, yínííł jílı̨́į ndi, hódahoołʼaahii bił ahiníjiikah. (Luke 22:​39-46) Áká adeeshwoł nízin, áádę́ę́ʼ shaʼnizhʼdoodléeł doo nízin da. (Matt. 20:28) Jiihóvah dóó nihibrothers ayóóʼádeíníiʼníigo éí Jesus Daaztsą́ągi Bééhániih ánáʼálʼįįhgi áádóó tʼáá ałtso áłah néiidleehgi neiidáa doo.

15. Háí éí íiyisíí bíká adiilwoł?

¹⁵ Nihibrothers dóó nihisisters bił  niidlı̨́, áádóó baa nihił dahózhǫ́ǫgo náánáłahdę́ę́ʼ diné nihaa díínááł dabidiiʼní. Ndi “oodląʼ binahjįʼ nihikʼéí danilíinii” éí nahaneʼgi índa áłah náʼádleeh yitsʼádínóodzáhígíí íiyisíí bíká adiilwoł. (Gal. 6:​10, NW) Éí ayóóʼádeíníiʼníigo áłah néiidleehgi nihaa nánídááh dabidiiʼní, íiyisígíí éí Jesus Daaztsą́ągi Bééhániih ánáʼálʼįįhjįʼ nihaa díínááł dabidiiʼníi doo. Díí łaʼ atsʼádínóodzáhígíí Nihizhéʼé Jiihóvah yaa nádzáago, ayóó átʼéego naʼiiłnáago átʼé. Jiihóvah dóó Jesus átʼéhígi átʼéego baa nihił dahózhǫ́.—Matt. 18:14.

16. (a) Haitʼéego ałhee daniildzil, áádóó áłah néiidleehígíí haitʼéego nihíká adoolwoł? (b) John 3:16 éí haʼátʼíí biniyé ílı̨́įgo baa nitsáhákees?

¹⁶ Jesus Daaztsą́ągi Bééhániih ánáʼálʼįįhígíí éí Nidaʼiiníísh kʼadę́ę eʼeʼaahgo, April 19, 2019 góneʼ ánááʼálnéeh doo. Éí ląʼí diné nihaa díínááł dabididiiʼniił. (“ Nihaa Díínááłísh Bididííniił?” níníłʼı̨́.) Áłah náʼádleehgi tʼáá ałhąąh néiidáahgo ahidiníłnáago dah ahiniildzilgo ádaʼdííníilzin doo, háálá díí Jiihóvah nihá niiníʼą́. Díí hoogáłígíí nidootʼihgo bichʼįʼ hoolzhish, áko díí áłah néiidleehígíí éí aʼohgo ádadííníilzin, doo nihił daayéeʼ da, áádóó ayóóʼádaʼííníiʼní dooleełgi yee nihíká análwoʼ. (1 Thess. 5:​8-11) Jiihóvah dóó Jesus éí ayóóʼánihóʼníigi, haaíshą́ʼ nihí ałdóʼ ayóóʼádeíníiʼníigi bił ííshjání ádeilʼįįh doo!—John 3:16 yíníłtaʼ.