Yilʼaadii Paul bił bééhózingo, Séítan yóóʼánihidoolóósígíí tʼáá íiyisí báhádzid. Ákondi daʼoodlání díí báhádzidígíí doo bił béédahózin da. Łaʼ Kórinthdi, sheʼoodląʼ ayóó bidziil, doo Séítan yóóʼashidínóoʼááh da, danízin. (1 Corinthians 10:12) Éí biniinaa Paul kóní: “Níłchʼi bidaʼiiníziinii binanitʼaʼí binahagiz yee átsé asdzą́ą́ Íiv yiʼdeezloʼ yę́ęgi átʼéego nihintsíkees tʼááłáʼíígíí bee Christ nihił danilíinii bitsʼą́ąjįʼ tʼáá ádzaagóó anihidiyooʼishii éí nihá binásdzid.”—2 Corinthians 11:3.

Paul ánínígíí tʼáadoo ayóó ádaa dzíínóhdlíhí nihił ííshjání áyiilaa. Nihił bééhózin, haneʼ yóóʼanihidínóoʼáhígíí éí báhádzid, áko éí baa ádahwiilyą́ą doo. Éigi átʼéego Séítan bikʼeh didiidleeł.

Yóóʼanihidínóoʼáhígíí éí diné ádaʼałʼínígíí dóó bintsíkeesígíí yinaʼaloʼgo choyoołʼı̨́. Naaltsoos Propaganda and Persuasion binahjįʼ, yóóʼanihidínóoʼáhígíí éí “doo éʼélʼínígíí, téʼéłʼínígíí, dóó inaʼadloʼ” ádaatʼé. Diné éí “yoochʼííd, nahagiz, dóó hániʼ neigiz” saad kótʼéego chodayoołʼı̨́.

Yóóʼanihidoolóósígíí éí báhádzid, tʼáadoo baa ákoniidzingo nihintsékeesígíí tʼáá hazhóʼógo łahgóó átʼéego nihitsʼą́ą́ʼ íidoolííł. Níłchʼi atínihidoolíłígíí nahalingo, doo yitʼı̨́į da áádóó doo halchin da. Vance Packard, bílaʼashdlaʼii átʼínígíí neiłkaahgo, yóóʼabidoolóósígíí bikʼehgo íʼiilʼínígíí “doo baa ákoniidzin da” ní. Łaʼ  báʼóltaʼí yóóʼánihiʼdoolóósígíí diné atídaʼałʼı̨́įgo, dóó doo ákótʼéego ádaʼałʼı̨́, ní. Éí biniinaa ałʼąą dineʼé nideełtseed, anaaʼ dóó ałʼąą dineʼé doodaiiʼ ałʼąą daʼoodląʼígíí atídabiʼdilʼı̨́.—Easily Led—A History of Propaganda.

Yee yóóʼanihidínóoʼáhígíí Séítan aláahgo adiʼoolkąąhígíí tʼáá íiyisí báhádzid. Séítan éí bílaʼashdlaʼii áłtsé ályaadóó wóshdę́ę́ʼ, diné atʼíinii haisííd. Kʼad “nihokáaʼgi tʼáá átʼéé nítʼééʼ” bee bóhólnííh, áko biyoochʼííd yee kʼeeʼąąn áyoolííł. (1 John 5:19; John 8:44) Séítan bintsíkeesígíí éí tʼóó ahayóí diné “dabíniʼ yił chʼaa yishchı̨́,” éí kʼad “nahasdzáán tʼáá siʼą́ą́ nítʼééʼ” yiʼooloh. (2 Corinthians 4:4; Revelation 12:9) Haitʼéego Séítan bikʼijįʼ nihidziilgo ádiʼdíílnííł?

Jesus díí nanihineeztą́ą́ʼ: “Tʼáá aaníinii nihił béédahodoozįįł, índa tʼáá aaníinii nihéédeididoochił.” Díí bikʼeh íʼiilʼı̨́įgo, Séítan doo yóóʼanihidoolóos da. ( John 8:​31, 32) Daʼahijigą́ągo, anaʼí biyoochʼííd bee yóóʼahidínóoʼááh, áko siláołtsooí haitʼéego bikʼeh áʼdoolníłígíí yaʼólíigo choidoołtʼeeł. Naʼnitinígíí baʼíínílíigo háadish bikʼídíníitááł? Jiihóvah éí Bizaad nihainílá. Diyin Bizaad choilʼı̨́įgo, Séítan bikʼeh didiidleeł.—2 Timothy 3:16, 17.

Díí Séítan bił bééhózin. Nihookáaʼgi bił nidahaztʼiʼii bee bóhólnííh, áko Diyin Bizaad deiyíníiltaʼgo dóó bídahwiilʼaahgo éí nihá nantłʼago áyósin. Séítan “binahagiz” tʼááká yóóʼanihidínóoʼááh lágo! (Ephesians 6:11) Diyin Bizaad tʼáá áłchʼı̨́dígo bikʼizhdiʼdootı̨́įłgo, éí doo bíighah da. Yéigo bindeiilnish, áko Diyin Bizaad hazhóʼó bikʼidiʼdiitı̨́ı̨́ł. (Ephesians 3:18) Noam Chomsky ání “Háiida tʼáá aaníinii haneʼígíí éí hatsiighąąʼ, doo yiih dooził da. Éí tʼáá ni bikʼídíníitááł.” Áko “tʼáá ákwíí jı̨́ Diyin God bizaad bee akʼedaʼashchínígíí” naniłkaahgo, “tʼáá ni bikʼídíníitááł.”—Acts 17:11.

Séítan éí tʼáá aaníinii bíhwiiniłʼą́ʼígíí doo hazhóʼó bikʼidiʼdiitı̨́ı̨́ł da, yinízin. Haʼátʼíísh biniinaa? Haneʼ yóóʼadabiʼdínóoʼáhígíí diné deidiitsʼı̨́įhgo “bąąh nináháłkaʼ,” háálá tʼáá íídą́ą́ʼ yaa bíniʼ. (Media and Society in the Twentieth Century) Tʼáadoo tʼáá ałtso diitsʼı̨́hígíí yinídlání, áłtsé hazhóʼó baa nitsíníkees. (Proverbs 14:15) God éí “yáʼátʼéehii áádóó doo yáʼátʼéehii nił bééhózingo” dóó “hódzą́ . . . nił bééhózingo” yee diníʼą́,  áko neʼoodląʼ bidziil áyósingo choidííłʼįįł.—Proverbs 2:10-15; Proverbs 3:21.

Siláołtsooí haneʼ yóóʼadabiʼdínóoʼáhígíí dayoodlą́. Áko yiniinaa bił daayééʼ daaleeh. Haneʼ yóóʼadabiʼdínóoʼáhígíí tʼáá bí atídaʼahílʼı̨́įgo daʼahigą́ éí doodaiiʼ łaʼ siláołtsooí dahiinéłígíí bitsʼąą tʼáá sahdii nidaʼahiltéh. World War I yę́ędą́ą́ʼ, German siláo binaatʼáanii áníigo éí haneʼ yóóʼadabiʼdíneesʼáaʼgo, biniinaa Germany tʼáadoo honeesná da. Éí áníigo yóóʼadabiʼdíneezʼáaʼgo dayoosdląąd biniinaa bikʼíhooldohgo baa honeezná. Séítan tʼáá ákótʼéego ałdóʼ Daʼoodlání łáʼí ídlı̨́įgo yidoołchxǫǫł. Brothers chʼééh ałkʼijįʼ áyósin. Jiihóvah bił nidahazʼánígíí doo tʼáá ákwíí ádaaníiłii nitsíʼiiłkees, áko Daʼoodlání yitsʼéidoonił yinízin.

Nihinóóʼááł lágo! Jiihóvah Bizaad bikʼehgo yínááł. Nihibrothers tʼáá áníiltso bił daniidlı̨́. Diyin Bizaad ánihiłní “doo ákwii ádaʼahołʼı̨́ı̨́ nítʼéeʼii ahá yóóʼadahidohʼaah” áádóó tsxı̨́įłgo kʼé náʼahididooʼniił. (Colossians 3:​13, 14; Matthew 5:23, 24) Bił áłah nídeidleehígi tʼáadoo tʼáá sahdii naʼádiltéh. (Proverbs 18:⁠1) Séítan haneʼ yóóʼanihidínóoʼáhígíí biniyé hashtʼeʼ ádíínílzingo, bikʼijįʼ nidziil doo. Áda naʼídílkid, ‘Áłtséédą́ą́ʼ brother łaʼ saad doo aanínígíí yee shichʼįʼ haadzííʼ, haash yisdzaa? Jiihóvah daatsʼí bił hózhǫ́ áshłaa doodaiiʼ Séítan daatsʼí?’—Galatians 5:16-26; Ephesians 2:2, 3.

Siláołtsooí binaatʼáanii doo yaʼólíi da biniinaa daʼahijigánę́ę doo áhoodzaa da. Anaʼí éí haneʼ yóóʼanihidínóoʼáhígíí chodayoołʼı̨́įgo, éí siláołtsooí binaatʼáanii yadaʼólíhígíí íidoołdįįł. Siláo binaatʼáanii nidaʼiisíihgo, biʼanaʼí kódadidooniił: “Doo baʼíínílíi da doo!” dóó “Doo éí azanidoolóós da!” Séítan ałdóʼ ákótʼéego naalnish. Háíshı̨́ı̨́ Jiihóvah bidineʼé yooʼishígíí, baʼíínílíhígíí yidoołchxǫǫł yinízin.

Haitʼéego ádá áhályą́? Yéigo ánítʼı̨́įgo, Jiihóvah bił nidahazʼánígíí bikʼeh ánítʼé. Jiihóvah bidineʼé yooʼishígíí bikʼeh ánítʼé dóó bikééʼ sínízı̨́, azhą́ shı̨́ı̨́ nidaʼiisííh ndi. (1 Thessalonians 5:12, 13) Jiihóvah yikʼijįʼ danilínígíí dóó dabiyoochʼíídígíí éí Jiihóvah bił nidahazʼánígíí bikʼijįʼ nidaalnish. (Titus 1:10) Ádaanínígíí éí tʼáá aaníí nahalingo ádeileʼ. Tʼáadoo tsxı̨́įłgo “tʼáá aaníí  ání danohsiní.” (2 Thessalonians 2:2) Paul éí Timothy yichʼįʼ chʼíhoníʼánígíí, bikʼeh ánítʼı̨́įgo: “Bíhwiiniłʼą́ʼígíí . . . bee sínízı̨́” dóó “bitsʼą́ą́dóó bíhwiiniłʼą́ąʼii” béénílniih. (2 Timothy 3:14, 15) Ląʼí nááhaigo, Jiihóvah éí baʼahódlíigo naalʼaʼí choyoosʼįįdgo, tʼáá aaníinii yee nanihinitin. Éí naʼnitinígíí haʼátʼíísh binahjįʼ baʼíínílíi doo, baa nitsíníkees.—Matthew 24:45-47; Hebrews 13:7, 17.

Séítan atíʼoolʼı̨́įłii yee honaalnishgo, haʼátʼííshı̨́ı̨́ daatʼínígíí yee nikʼijįʼ kwííłʼı̨́. Łahda níjíldzidgo áhósin łeh. Ałkʼidą́ą́ʼ yóóʼanihidínóoʼáhígíí éí atíʼílʼı̨́ choyoołʼı̨́. (Easily Led—A History of Propaganda) Asíriya éí diné bikʼeʼíyéeʼgo haneʼ yóóʼadabiʼdíneesʼáaʼgo choyoosʼįįd, éí biniinaa biʼanaʼí doo dabidziil da daazlı̨́ı̨́ʼ. Éí Philip M. Taylor, British naʼnitiní yikʼeʼashchı̨́. Séítan éí náhádzidígíí choyoołʼı̨́. Éí diné bééníldzid, atíʼílʼı̨́, dóó anoonééł bééníldzid, áko Jiihóvah bá nanilʼaʼgo niʼ kódíílííł nihóʼní.—Isaiah 8:12; Jeremiah 42:11; Hebrews 2:15.

Séítan éí tʼáadoo áhónóóhlééh lágo! Jesus ání: “Atsʼíís dayiiłhééhdóó bikʼijįʼ tʼáadoo ánáádayódleʼí da łeígíí éí diné tʼáadoo béédaałdzidí.” (Luke 12:4) Tʼáá íiyisí Jiihóvah baʼíínílíigo éí yee ádee haadzííʼ yę́ę, naa áhályą́ą doo. Séítan nikʼijįʼ naabaahgo, “tsʼídá aláahdi átʼéego adziil nilíinii” Diyin God bitsʼą́ą́dę́ę́ʼ yee níká análwoʼ doo.—2 Corinthians 4:7-9; 1 Peter 3:⁠14.

Łahda nitah doo hináa da doodaiiʼ náníldzid. Béénílniih, Jiihóvah saad yee áhóhoneedlínígíí Jáshowa yee yił hólneʼ: “Nidziilgo íʼdííʼnílzin áádóó chánah íʼdííʼnílzin; tʼáadoo náníldzidí, doodaiiʼ tʼáadoo ádił nisindáhí, háálá Bóhólníihii niDiyin God éí tʼáá hidínááhgóó nił hólǫ́.” (Joshua 1:9) Nidaʼdiiłʼáhígíí, tsxı̨́įłgo Jiihóvah bichʼįʼ sodilzin. “God bitsʼą́ą́dę́ę́ʼ bee achʼįʼ hózhǫ́ náhásdlı̨́įʼii, . . . bee nihijéí índa nihintsékees yaa áhályą́ą doo,” nił tʼáá aaníí dooleeł. Séítan haneʼ yóóʼanihidínóoʼáhígíí bikʼijįʼ nidziilgo bee sínízı̨́į doo.—Philippians 4:6, 7, 13.

Rábshakeh haneʼ yóóʼadabiʼdínóoʼáhígíí choyoosʼįįdgo, God bidineʼé béédaasdzííd, díísh béénílniih? Jiihóvah ndi Asíriya yitsʼą́ą́dę́ę́ʼ doo yisdá hodoonił da, dayoodlą́ągo yinízin. Rábshakeh ájíníigo, Jiihóvah yił hólneʼ éí Asíriya dineʼé Jerúsalem ádabiʼdidooldįįł. Jiihóvah haʼátʼíísh nátʼą́ą́ʼ ánídooʼniid? “Asíriya dineʼé aláahgo binanitʼaʼí bá nidaalʼaʼí baaʼihgo shá hadaasdzíiʼgo disínítsʼą́ʼígíí tʼáadoo bikʼee nił yéʼí.” (2 Kings 18:22-25; 19:6) Łáʼatłʼééʼ, Jiihóvah bidiyingo naalʼaʼí łaʼ ayííłʼaad, 185,000 Asíriya dineʼé ałtso neistseed!—2 Kings 19:35.

Łaʼísh naʼalkidí níníłʼı̨́įgo, háiida diné yindaʼadloʼ ndi doo bił bééhózin da? Hadidíílwoshísh: ‘Tʼáadoo yinídlání! Dabiyoochʼííd!’ Díigishąʼ átʼéego diyingo ndaalʼaʼí nił halneʼgo: “Séítan ninóóʼááł lágo!”

Séítan haneʼ yóóʼánihidoolóósígíí tʼáadoo íísíníłtsʼą́ʼí. (Proverbs 26:24, 25) Jiihóvah yísíníłtsʼą́ą́ʼ dóó tʼáá átʼé áníłʼínígíí yéigo baʼíínílíi doo. (Proverbs 3:5-7) Ayóóʼánóʼní dóó nánookąąh: “Shiyeʼ, honíyą́ áádóó shijéí bił hózhǫ́ǫgo ánílééh.” (Proverbs 27:11) Díí áníléehgo, nitsékeesígíí doo atídooníił da, áko hodinííłnééł!