1, 2. Haʼátʼíí biniyé badahojoobáʼígíí tʼáá áłahjįʼ nihitaadaakai doo?

DÍÍSHJĮ́ĮDI ayóó átʼéego achʼįʼ nidahwiiʼná. Ániid nidaakaiígíí naanish bá ádaadin. Łaʼ éí náánáłahgóó kéyah ayóó átʼı̨́ hwiindzingóó naanish biniyé adaʼiildééh. Éí kéyah ayóó daʼatʼínígíí yeeʼ diné ląʼí badahojoobaʼíii kéédahatʼı̨́įgo átʼé. Nahasdzáán bikááʼgóó daʼatʼíinii daʼatʼı̨́įgo nidahwiileeh, badahojoobaʼíii éí badahojoobaʼígo nidahwiileeh. Kótʼéego łaʼ haneʼ, nahasdzáán bikááʼ tʼáá díkwíhí ayóó átʼéego daʼatʼíinii bibéeso ahíiʼnilgo áádóó tsʼídá tʼáá ałtso diné bibéeso ahíiʼnilgo t’áá aheenéeltʼeʼ. Diné ląʼí dabibéeso, éí díkwíidi shı̨́ı̨́ ałkʼi náʼiyoochííłgóó bíighahgo bibéeso dahólǫ́, ndi tsʼídá tʼóó ahayóí éí diné baa dahojoobaʼí. Jesus bił bééhózingo ání: “Háálá badahojoobáʼíígíí tʼáá áłahjįʼ nihitaadaakai.” (Mark 14:7) Haʼátʼíí biniyé áko doo ahehoołtʼéégóó nihił hazʼą́?

² Jesus bił bééhózingo éí dííshjı̨́įdi naalyeʼé nidahaniihgóó God biNahatʼaʼ tʼéiyá łah átʼéego hazhóʼó hashtʼeidoolííł. Diyin Bizaad áníigo éí “diné baa nidaʼiiniihii” dóó bílaʼashdlaʼii binahatʼaʼ índa sodizin bił nahazʼą́ą́góó éí Séítan binahatʼá biyaadóó sinil. (Revelation 18:3) God bidineʼé éí bílaʼashdlaʼii binahatʼaʼ dóó sodizin bił nahazʼą́ą́dę́ę́ʼ  yitsʼá heeskai. Ndi, ląʼígo God bidineʼé éí naalyeʼé nidahaniihgóó doo tʼáá íiyisíí yitsʼą́ąjįʼ dahidiikah da.

3. Haʼátʼíí naʼídíkid shı̨́ı̨́ baa nídadíitʼįįł?

³ Oodlání éí naalyeʼé nidahaniihgóó haitʼéego baa nitsíjíkeesgi bee ádizhnélʼı̨́į doo. Éí díí baa nitsíikees doo: ‘God díínísin doogo éí shinaalyeʼé haitʼéego choinishʼı̨́į doo? Naalyeʼé nidahaniihgóó haitʼéego doo ayóó bee anishtah da doo? God bidineʼé badaʼólíigo haitʼéego bitsʼą́ą́dóó íhooʼaah?’

4, 5. (a) Naalyeʼé yaa áhályáanii Jesus yaa hólneʼ yę́ę haidzaago baa haneʼ? (b) Jesus éí bikééʼ naakaiígíí haa dadoonííł yidííniid?

⁴ Luke 16:1-9 yíníłtaʼ. Jesus éí díí naalyeʼé yaa áhályáanii doo ákwii áátʼįįdígíí yaa hoolneʼ yę́ę binahjįʼ hazhóʼó baa nitsíikees doo. Díí naalyeʼé yaa áhályáanii éí naalyeʼé tʼóó yóóʼayiinííł bidiʼníigo bee bikʼíhástʼah, áko binanitʼaʼí éí shinaalyeʼé doo baa ánááhólyą́ą da doo hodííniid. * (Footnote níníłʼı̨́.) Áko naalyeʼé yaa áhályáanii éí hojíyánígi ájiidzaa. Binaanish tʼah doo yitsʼághááhgóó, tʼahádóó diné łaʼ bíká adoolwołígíí bikʼis áyiilaa. Jesus éí bídahoołʼaahii doo ákwii ádaatʼı̨́ı̨́góogo díí bee yisdáhóótʼiʼii átʼée dooleeł, doo níigo díí haneʼ áyiilaa da. Dííshjı̨́įdi diné kótʼéego deíkááh. Ndi, Jesus éí díí haneʼ binahjįʼ nanítingo áyiilaa.

⁵ Jesus bił bééhózingo éí díí naalyeʼé yaa áhályáanii anáhóótʼiʼgo bił hooʼaʼígi átʼéego, Jesus bikééʼ deíkáhígíí ałdóʼ ákótʼéego hoł dahwiidooʼaał. Jesus áníigo naadeełii bee atʼı̨́ bee nihikʼis ádá ádaałneʼ. Éí haʼátʼíí biniyé? Áko atʼı̨́ ásdįįdgo nihikʼis ádeilyaaígíí, éí Jiihóvah dóó Jesus, ‘hoolʼáágóó kééhótʼı̨́įgo nihaa hodidooʼááł.’ Kweʼé Jesus binaʼnitin haʼátʼíí bitsʼą́ą́dóó bídahwiidiilʼááł?

6. Naadeełii bee béeso ląʼí bee álʼı̨́į doogo God doo nihá yinahazʼą́ą daaígi, haitʼéego nihił bééhózin?

⁶ Diyin Bizaad áníigo naadeełii bee béeso ląʼí bee álʼı̨́į doogo éí ákótʼéego God doo nihá yinahazʼą́ą da. Jiihóvah éí Ádam dóó Íiv Ííden dáʼákʼehgi tʼáá ałtsoní há niinílá. (Genesis 2:15, 16) Tʼahádóó God éí anoint ádaalyaaígíí biníłchʼiʼ diyinii yee níláago, “tʼáadoo leʼé bee dahólóonii tʼáadoo, tʼáá sáhí shí dooleeł, dadííniid da, nidi tʼáá ałtso aheełtʼéego chodayoosʼįįd.” (Acts 4:32) Aizéíyah ání, bikʼíhodoolzhish bílaʼashdlaʼii éí nahasdzáán bikááʼ hááhinootʼı̨́įłii tʼáá bí deinízinígíí chodayoołʼı̨́į doo. (Isaiah 25:6-9; 65:21, 22) Áko kʼad éí tʼóó bibaʼ ániitʼéego Jesus bikééʼ deíníikáahgo dahoniidzą́ągo ádaʼíilníił doo. Naadeełii ádaatʼéii hazhóʼó chodeiniilʼı̨́į doo, áádóó tʼáá bił God bił dahoniilzhǫ́ǫ doo.

7. Luke 16:​10-13 góneʼ Jesus haitʼéego yee naʼnítin?

⁷ Luke 16:​10-13 yíníłtaʼ. Jesus éí naalyeʼé yaa áhályáanii yaa hoolneʼ yę́ę bikʼis áyiilaago binahjįʼ bíká eelwod. Jesus éí bikééʼ nidaakaígíí yáʼąąshdi hakʼis  hólǫ́ǫgo ádazhdoolííł hóʼní ndi tʼáadoo nátʼą́ą́ʼ bikʼeh shaʼdoodiłí hwiinidzin doo. Hazhóʼó nihił bééhózin doo biniyé, Jesus éí naadeełii bee atʼı̨́ hazhóʼó chooʼı̨́įgi éí God baʼahódlíigi bee bééhózinígo íilʼı̨́į doo. Haitʼéego ákwíitʼı̨́į doo?

8, 9. Naadeełii yee daʼatʼínígíí haitʼéego łaʼ yee áká ánídaalwoʼ?

⁸ God baʼahódlíigo éí nahasdzáán nidahoneesʼą́ą́góó nidahwiilneʼ doo níigo Jesus yaa chʼíhoníʼánę́ęgi nihinaalyeʼé bee áká anéiilwoʼ doo. (Matthew 24:14) Índiyadi atʼééd yázhí léiʼ tsitsʼaaʼ áłtsʼísígo béeso yázhí yá yisʼą́. Daanéʼé doo njiiłniih da. Tsitsʼaaʼ yázhí hazhdééłbįįdgo, béeso tʼáá átʼé biih jiznil yę́ę ałtso ndahaneʼgóó bee bíká ajoolwod. Nihibrother nilı̨́įgo Índiyadę́ę́ naagháago coconut nínéiniłtʼı̨́ı̨́h. Malayalam hoolyéegi atah náhaneʼgo biʼoonish bił hazʼą́ągi díí coconut tʼóó ahayóí tʼáá jííkʼe bichʼįʼ kójiilaa. Háálá ákwii oonishígíí éí coconut łaʼ nidahidiilnih danízin, áko béeso bee azhdoolwoł ndi coconutígíí bee eeshwodgo ílı̨́į doo jinízin. Díí éí baa hojíyą́ągo ájiilaii átʼé. Tʼáá ákótʼéego Gríisdi, nihibrothers éí áliv bikʼah, géeso, áádóó ałʼąą chʼiyáán ádaatʼéii Béthelgi nidaalnishígíí tʼáá ahą́ą́h yee yíká ánídaalwoʼ.

⁹ Áłah nídaʼadleeh dóó assemblies áádóó full-time Jiihóvah yá ndaalʼaʼí dabighan doo biniyé Sri Lanka hoolyéedi nihibrother nilı̨́įgo bikéyah bikááʼ yá hasʼą́. Díí kéyah bitsʼą́ą́dóó yee atʼı̨́į dooleeł yę́ęniʼ, ałtso ninéidiníʼą́. Ákótʼée ndi, Jiihóvah Yá Nidahalneʼii yaa bił dahózhǫ́, háálá bibéeso doo daaląʼí da. Kéyah dah naaznilgóó Diyin Bizaad baa nahaneʼgi bichʼįʼ baa hóchįʼgi, nihibrothers dabighan éí Kingdom Hall átʼéego chooʼı̨́. Áko pioneers dóó bibéeso doo daaląʼígíí kin doo bikʼeh azláágóó binahjįʼ áłah nídajidleeh.

10. Nihił hadleeʼgo haʼátʼíí yee nihíká adoolwoł?

¹⁰ God bidineʼé kótʼéego “tʼáá kóníshéhí nidi bee baʼahódlí.” (Luke 16:10) Éí binaalyeʼé yaa daadleeʼgo yee áká anájah. Áko Jiihóvah dabikʼis kótʼéego binaalyeʼé ninádeidiyiiʼą́ągo haitʼéego yaa nitsídaakees? Éí bił dahadleeʼgo yaa bił dahózhǫ́. Yáʼąąshdi atʼı̨́ “tʼáá aaníinii” bí nidahaleeh, háálá bił bee dahózingo Jiihóvah bił yáʼátʼééh dóó yikʼihadlí. (Luke 16:11) Nihisister nilı̨́įgo éí nahaneʼgi tʼáá ahą́ą́h béeso bee anijílwoʼ, ńtʼééʼ ájíní: “Shinaalyeʼé bee shił hadleeʼgo diné bichʼįʼ áníshtʼé yę́ęgi łah átʼé silı̨́įʼgo baa ákoniizı̨́ı̨́ʼ. Á yóóʼanáhidíshʼaah, diné bił haʼííníshní, diné shąąh nidahwiiłkaad ndi shił hózhǫ́ dóó shichʼįʼ haʼadzihgo baa shił hózhǫ́.” Ląʼí bił dahadleeʼgo  ayóó átʼéego bitsʼą́ą́dóó bíká oʼoowod.—Psalm 112:5; Proverbs 22:9.

11. (a) Nihił hadleeʼgo haitʼéego baa honiidzą́ągo ádíínílzin? (b) God bidineʼé dííshjı̨́įdi haʼátʼíí yaa naakai? (Áłtsé eelkidígíí níníłʼı̨́.)

¹¹ Nihinaalyeʼé bee nihił hadleeʼgo baa honiidzą́ągo bee anéiilwoʼ doo. Éí full-time Jiihóvah bá naʼalʼaʼgi doodaiiʼ nahalneʼii bídin hóyéeʼgi atah nidiilnish dooleełígi doo nihá bíighahgóogo łahdóó áká anéiilwoʼ doo. (Proverbs 19:17) Béeso bee anéiilwoʼígíí kótʼéégóó chooʼı̨́: Éí hojoobaʼígo nahazʼą́ą́góó naaltsoos ádaalʼı̨́įgi áádóó nahaneʼgi tʼóó ahayóí diné Diyin Bizaad yídahołʼaah. Kódahoolyéégóó, Congo, Madagascar, dóó Rwanda éí Diyin Bizaad nahidoonihgi ayóó átʼéego daʼílı̨́įgo átʼé. Diyin Bizaad nahidoonihgi damóojįʼ doodaiiʼ nídeezidjįʼ béeso biniyé naʼazhnish bíighahgo łahda bą́ą́h ílı̨́į łeh. Nihibrothers éí chʼiyáán doodaiiʼ Diyin Bizaad daatsʼí nahidoonih hwiindzin łeh ńtʼééʼ. Kʼad éí béeso bee aheełtʼéego ahaa nitsáhákeesgo bąą Jiihóvah Yá Dahalneʼé éí Diyin Bizaad łahjįʼ saad bee ánídeidleʼ dóó nideiniih. Éí tʼáá ałtso hooghandóó dah oonéłígíí dóó Diyin Bizaad yídahołʼahígíí tʼáá jííkʼe yaa dayiinííł. (2 Corinthians 8:13-15 yíníłtaʼ.) Áko aa daʼiiníiłii dóó baa daʼiidéełii éí Jiihóvah bikʼis nidahaleeh.

12. Éíbraham éí God baʼjólíigi haitʼéego bee ííshjání ájiilaa?

¹² Naadeełii tʼáadoo ayóó bíká ádeitʼíní doo, ndi atʼı̨́ “t’áá aaníinii” bíká ádeitʼı̨́įgo éí Jiihóvah bikʼis dadiidleeł. Éíbraham ayóó oodlą́ą́ʼ ńtʼéeʼgo ákódzaa. Jiihóvah yikʼeh hółʼı̨́įgo Er hoolyéedi ayóó átʼéego atʼı̨́ bił hazʼą́ą́dę́ę́ʼ chʼízhníná. Éí níbaal biiʼ haghango tázhdííná, háálá Jiihóvah shikʼis dooleeł jiníigo ájítʼı̨́. (Hebrews 11:​8-10) God éí tʼáá áłahájįʼ yaʼólíí ńtʼééʼ, naadeełii éí ndagaʼ. (Genesis 14:22, 23) Jesus éí ákótʼéego oodląʼ bee ádanohtʼé níigo diné yee yichʼįʼ hanádzih ńtʼééʼ. Łah éí diné léiʼ ániid naagháago ayóó atʼı̨́įgo ííłní: “Tsʼídá tʼáá ákogi áníshtʼée doo nínízingo, nílááh nídídáahgo nee hólónígíí tʼáá ałtso naa nahóniihgo, bee shóisíníłtʼeʼígíí badahojoobáʼíígíí bitaa díínih, áko yáʼąąshdi naalyeʼé ílíinii nee hólǫ́ǫ dooleeł, ákohgo índa dah diináahgo shikééʼ yínááł.” (Matthew 19:21) Díí dinééh éí Éíbraham bibeʼoodląʼ átʼéé ńtʼééʼ yę́ęgi doo ájítʼée da. Ndi God yaʼólíinii dahólǫ́ǫgo átʼé.

13. (a) Paul haʼátʼíí níigo Timothy yichʼįʼ haadzííʼ? (b) Paul yee haadzííʼ yę́ę haitʼéego bikʼeh ádaniitʼée doo?

¹³ Timothy éí diné beʼoodląʼ hólóonii nilı̨́ı̨́ ńtʼééʼ. Paul éí Timothy kwíidííniid, “Jesus Christ bisiláo hayóii nílı̨́,” áádóó Paul ánááháłní: “Diné łaʼ siláo nilíinii éí siláo ábiilaii yił hóshǫ́ǫ dooleełgo yidiilkaal łeh, doo siláo ídlı̨́ı̨́jí baa naʼaldeehii doo yee ádiníltłʼa da doo.” (2 Timothy 2:3, 4) Dííshjı̨́įdi Jesus bikééʼ deíkáhígíí Paul ádííniid yę́ę  yikʼeh ádaanííł. Éí bíchą́dahwíídéeniʼgo bídaʼoolkąąhii wołí bee yitsʼą́ąjįʼ ádaatʼé. Díí bee naʼnitinii yéédaalniih: “Diné baʼílyáii haʼníláhígíí bá nijilʼaʼ.” (Proverbs 22:7) Séítan éí wołí bee naadeełii bíká yilnish doo nihóʼní. Łaʼ éí hooghan, chidí, óltaʼ, doodaiiʼ áʼdoogehgi ląʼí béeso biniyé badaʼiiʼnííł. Díí doo hazhóʼó bee ádaa áhwiilyą́ą́góó béeso bee nihaa hááʼáago ląʼí nídoohah. Tʼóó bikiinígo niheeʼiinaʼ íilyaago, ąąh hadaazʼá bitsʼąą ániitʼéego, dóó béeso bąą hą́ą́h niidzingo éí honiidzánígi íidzaa doo. Áko tʼáadoo tʼą́ą́ʼ kónihósinígo God bá nideiilʼaʼ doo, naadeełii doo binaalteʼ daniidlı̨́į da doo.—1 Timothy 6:10.

14. Haʼátʼíí éí wołí bee ániitʼéego ádiilnííł? Łaʼ baa hólneʼ.

¹⁴ Tʼóó bikiinígo dahiniiʼnáago éí God biNahatʼaʼ áłtsé ádeiyíníilzin doo. Ahastiin dóó eʼasdzą́ą́ jílı̨́įgo éí nitsaago béeso bee ląʼí ájíłʼı̨́įgo há naʼanish. Ákondi full-time Jiihóvah bá oonishgi ánáá íilʼı̨́į doo jinízin. Há oonish yę́ęgi, hó tsinaaʼeeł yę́ę, dóó honaalyeʼé yę́ę haa nahaazniiʼ. Áádóó Warwick, New York world headquarters bidaʼíníishgi volunteer áʼjíłʼı̨́įgo jideeshnish. Díí ayóó baa hoł hózhǫ́, háálá Béthelgi hweʼawééʼ dóó haa daaní bił jideeshnish. Áádóó ahastiin há oonishgi haa naʼiizniiʼ yę́ę éí hazhéʼé dóó hamá díkwíí shı̨́ı̨́ damóo azlı̨́įʼjįʼ Warwickgi bił nidajishnish. Coloradodę́ę́ʼ nihisister pioneer nilı̨́įgo béeso bá hooghangi part-time deeshnish. Nizhónígo nijilnishgo bá jideeshnishígíí haa ádá honiizı̨́ı̨́ʼ, áko full-time nihá didíílnish áádóó táaʼdi ahą́ą́h nániilyáago nichʼįʼ nidaʼiiyiilyéego ná ádadiilnííł, dahodííniid. Díí ayóó bidáhoneení, ndi díí éí Jiihóvah bá nahaneʼgi hatsʼą́ą́ʼ yidínóołtłʼah jinízingo biniinaa tʼáadoo naanish nízhdiiláa da. Jiihóvah bá ndaalʼaʼí kódaatʼéégóó ląʼí ninádeidiyiiʼaah. Wołí bee God biNahatʼaʼ áłtsé ííníilzingo éí God bikʼis ídlı̨́įgi dóó atʼı̨́ t’áá aaníinii éí naadeełii biláahdi ayóó ílı̨́įgo baa nitsíikees.

15. Haʼátʼíí bee atʼı̨́įgo ayóó átʼéego ił hóshǫ́?

¹⁵ Azhą́ naadeełii bee ajitʼı̨́į ndi, God éí bił yáʼátʼéehgo yee hakʼihadlí, doo níi da. God éí ląʼígo yáʼátʼéehgo óʼooʼnííł yaa nidaahkaígíí yikʼihadlí. (1 Timothy 6:17-19 yíníłtaʼ.) Nihisister Lucia wolyéego éí Albania hoolyéedi nahalneʼii bídin hóyééʼ lágo bił bééhózin. * (Footnote níníłʼı̨́.) Áko 1993 yę́ędą́ą́ʼ Ítalidę́ę́ʼ ákǫ́ǫ́ jiníná. Naanish éí doo łaʼ hwee hólǫ́ǫ da, ndi Jiihóvah baʼjólíigo ákǫ́ǫ́ jiníná. Albania bizaad bóhojiiłʼą́ąʼgo 60dóó biʼáán diné Jiihóvah yaa ádaa dadidootʼáałgi bee bíká ajoolwod. Tʼáá nihí nidahwiilneʼgóó, doo shı̨́ı̨́ kótʼéego nihá ashjaʼáhooníił da. Ndi haʼátʼíí shı̨́ı̨́ bee anéiilwoʼgo, diné éí Jiihóvah yéédahodoosįįł dóó bikʼis dazhdooleełgi éí hoolʼáágóó baa nihił dahózhǫ́ǫ doo.—Matthew 6:20.

16. (a) Dííshjı̨́įdi naalyeʼé nidahaniih yę́ęgóó haa doolnííł? (b) Áko naadeełii haitʼéego baa nitsíikees doo?

¹⁶ Jesus áníigo éí dííshjı̨́įdi naalyeʼé nidahaniih yę́ęgóó nidootʼih. Éí kóní: “atʼı̨́ ásdįįdgo,” doo éí atʼı̨́ ásdįįd ládą́ą́ʼ, doo níi da. (Luke 16:9)  Dííshjı̨́įdi béeso bá dahooghan yę́ęgóó łaʼ ádaadįįł áádóó łaʼ kéyah danahasʼą́ą́góó ayóó átʼéego béeso bee bichʼįʼ nidahwiiʼná. Ndi tʼóó tséʼédin áhodooníiłgo koshídę́ę́ʼ hoolzhish. Bílaʼashdlaʼii binahatʼá, sodizin bił nahazʼą́ą́góó índa naalyeʼé nidahaniihgóó éí Séítan binahatʼá biyaadóó sinilígíí ádoodįįł. Iizííkiyel dóó Zefanáíyah éí óola dóó béésh łigaii, éí naalyeʼé nidahaniihgóó, tʼáadoo bą́ą́h ílíní da dooleeł níigo yee haadzííʼ. (Ezekiel 7:19; Zephaniah 1:18) Haitʼéego baa nitsíikees doo, niheʼiinaʼ nidootʼihgo baa hoolzhiizhgo, ńtʼééʼ atʼı̨́ t’áá aaníinii éí naadeełii bee atʼı̨́ bidiníná ninádiiníʼą́ą́ lágo baa ákoniidzı̨́įʼgo shąʼ? Díí nahoniidlin doo, hastiin léiʼ béeso ląʼí ádeeshłííł nízingo tʼáá yilnishgo hoolzhiizh, ńtʼééʼ béeso yikʼeh naashnish yę́ę tʼóó beʼelyaa lá. (Proverbs 18:11) Tʼáá ałtso naadeełii dahólónígíí ádoodįįł. Áko ninaalyeʼé bee anánílwoʼgo yáʼąąshdi nikʼis hólǫ́ǫ doo. Jiihóvah dóó biNahatʼaʼ haʼátʼíí shı̨́ı̨́ bá íilʼı̨́įgo ayóó baa nihił hózhǫ́ǫ doo.

17, 18. God bikʼis haʼátʼíí yíká dadéezʼı̨́ı̨́ʼ?

¹⁷ Chʼiyáán ląʼí dahólǫ́ǫ doo. Azeeʼííłʼíní ádaadin doo, áádóó azeeʼ doo ádaalneʼ da doo. Háálá God biNahatʼaʼ biyaadóó kééhoniitʼı̨́įgo éí doo bikʼeh ásiilyáhí da doo, doodaiiʼ doo béeso nihaʼiiʼníił da doo. Jiihóvah bikʼis danilínígíí nahasdzáán bikááʼ nidaniseʼii yee nídaʼaldįįh doo. Tsʼídá yáʼádaatʼéehii tsin, tsé dóó béésh éí hooghan ayóó ánoolingo bee ádoolníiłii dahólǫ́ǫ doo. Danihikʼis éí níká iishyeed daaníi doo. Nahasdzáán bikááʼ nidaniseʼii bee áłká anéiijah doo.

¹⁸ Yáʼąąshdi nihikʼis ádeilyaago bee nihikʼihozhdoodliiłii áłtsʼísígo chʼétʼą́. Nahasdzáán bikááʼ Jiihóvah yikʼehgo deíkáhígíí ayóó átʼéego bił dahózhǫ́ǫgo dadilwosh doo, háálá éí Jesus yee haadzíʼígíí deididootsʼı̨́ı̨́ł: “ShiTaaʼ nihikʼijidlíii, hágo, aláahgo bee óhólníihgo bił hazʼáanii nahasdzáán niitʼą́ą́dę́ę́ʼ nihá hashtʼeelyaaígíí nihííʼ ádaahłééh.”—Matthew 25:34.