1. Nooséełii haʼátʼíísh yaa nitsídaakees doo? Nooséełii baa nááhákaʼgo, haʼátʼíísh bíká adoolwoł? (Áłtsé eelkidígíí níníłʼı̨́.)

NOOSÉŁÍGÍÍ háajigo shı̨́ı̨́ dah doohkahgo hazhóʼó ádá nidahóʼá. Iiná éí chʼaazhdeiyaago nahalin, áádóó tʼah ániid nanináhídą́ą́ʼ éí díníyáago bá hashtʼeʼ ádidíílnííł. Ákondi ádá nidahaʼáago éí nanitłʼah. Heather éí kóní: “Tʼáá hó hweʼiinaʼ náás hashtʼezhdoolííł baa nitsíjíkeesgo tʼóó báhádzid.” Ákónítʼéego ádaa nitsíníkeesgo, béénílniih, Jiihóvah kóní: “Tʼáadoo yéego nąąh nááhákaʼí, háálá niDiyin God nishłı̨́; nidziilgo ándeeshłííł; tʼáá aaníí, níká adeeshwoł.”—Isaiah 41:10.

2. Nił hózhǫ́ǫgo ádá nihoʼáago Jiihóvah ná yinízin, haitʼéego nił bééhózin?

² Tʼahídoo hazhóʼó ádá nidahoʼáago éí Jiihóvah ná íinízin doo. (Ecclesiastes 12:1) Nił hózhǫ́ǫgo nihá yinízin. Díí nihił béédahozin: daatʼíinii, dadíitsʼaʼii dóó daalkanii tʼáá átʼé nizhónígo nihá áyiilaa. Náánáłaʼ  nihídéétʼiʼgo Jiihóvah nihaa áhályą́. Bibee naʼnitinígíí niheʼiinaʼ yáʼátʼéehgo yiiltʼihgo nihaa áhályą́. Diné éí Jiihóvah doo bikʼeh dahółʼı̨́ı̨́góó, doo bił yáʼátʼéeh da. Díí éí doo dadíistsʼą́ʼígíí kwííłní: “Shoo, shá nidaalʼaʼí bił nidahoozhǫǫh doo, nidi nihí ádaa yádanohdzin doo; shoo, shá nidaalʼaʼí bijéí bił dahózhǫ́ǫgo dahataał doo.” (Isaiah 65:12-14) Yáʼátʼéehgo niheʼiinaʼ íilʼı̨́įgo, Jiihóvah baa dahwiiʼniih łeh.—Proverbs 27:11.

3. Nahóʼáhígíí Jiihóvah haʼátʼíísh ná yinízin?

³ Nahóʼáhígíí Jiihóvah haʼátʼíísh ná yinízin? Jiihóvah bééhodíísįįł dóó bá nanilʼaʼ, éí bee nił hózhǫ́ǫ doo. Díigi átʼéego Jiihóvah éí bílaʼashdlaʼii áyiilaa. (Psalm 128:1; Matthew 5:3) Naaldlooshii tʼóó daʼayą́, daʼadlą́ dóó daʼahiilchiih. Ndi Jiihóvah éí yáʼátʼéehgo dóó nił hózhǫ́ǫgo ádá nihóʼá ná yinízin. Íʼiilaii éí “Diyin God ayóóʼóʼóʼníinii” nilı̨́, éí bílaʼashdlaʼii “tʼáá bí bináłtʼéego áyiilaa.” (2 Corinthians 13:11; Genesis 1:27) God ayóóʼóʼóʼníinii beʼiiłʼı̨́įgo éí nił hózhǫ́ǫ doo. Diyin Bizaad ání: “Tʼáadoo leʼé azhʼníláii éí haa yílyáii bilááh átʼéego baa hózhǫ́.” (Acts 20:35) Tʼáá íídą́ą́ʼ shı̨́ı̨́ díí nił bééhózin. Díí éí iináanii tʼáá aaníí bił nítʼiʼ. Jiihóvah éí bí dóó náánáłaʼ ayóóʼííníʼníinii bee ádá nahóʼá ná yinízin.—Matthew 22:36-39 yíníłtaʼ.

4, 5. Haʼátʼíísh biniinaa Jesus bił hóózhǫǫd?

⁴ Jesus bintsékees bedaʼiilʼínígíí, éí ániid nidaakaiígíí yił ííshjání áyiilaa. Ashkii yázhí jílı̨́įgo, ayóó shı̨́ı̨́ nijizneʼ ńtʼééʼ. Jó, God Bizaad áníigo “dloh hasin baa hwiilzhíísh” dóó “azhish baa hwiilzhíísh.” (Ecclesiastes 3:4) Jesus éí Jiihóvah yił ahą́dí nilı̨́įgo naaltsoos yisdisii tʼáá ákwii jı̨́ hazhóʼó jółtaʼ. Jesus naakitsʼáadah binááhaigo, “akʼizhdiʼyiitįįhígíí índa tʼą́ą́ʼ háádziidziihígíí” éí bee nidaʼnitinígíí hakʼee tʼóó bił adahayóí.—Luke 2:42, 46, 47.

⁵ Jesus neiyáago, God yikʼeh hółʼı̨́įgo yił hóóshǫǫd. God yinízingo Jesus éí “badahojoobáʼíígíí éí haneʼ yáʼátʼéehii” yee yił hoolneʼ, dóó “doo daʼooʼínígíí daʼooʼı̨́” áyiilaa. (Luke 4:18) Jesus yaa nitsíkeesígíí éí Psalm 40:8 yee nihił halneʼ: “ShiDiyin God nílíinii, íinínízinii baa nideeshaałgo baa shił nihoozhǫǫh.” (Luke 10:21 yíníłtaʼ.) Łaʼ asdzą́ą́ tʼáá aanííjí naʼalʼaʼígíí yił hólneʼgo bikéédóó, Jesus éí bídahoołʼaahii yidííniid: “Shiníłʼaʼii yee íinízinii binaashnishgo łaʼyishłéhígíí, éí shichʼiyąʼ átʼé.” (John 4:31-34) Jesus éí God dóó diné ayóóʼáyóʼníigo biniinaa bił hóózhǫǫd. Jesus beʼíłʼı̨́įgo, ni ałdóʼ nił hózhǫ́ǫ doo.

6. Haʼátʼíísh biniinaa náánáłaʼ ninahoʼahígíí bił hólneʼ doo?

⁶ Łaʼ Oodlání ániid nidaakai yę́ędą́ą́ʼ, alą́ąjįʼ nahalneʼii dajílı̨́įgo bił dahóózhǫǫd. Ániid danohłíinii ádá nidahóʼáago  éí Daʼoodlání bee bichʼįʼ yádaałtiʼ. “Kótʼéego daaníinii tʼóó adahayóigi biniyé ádahatʼíinii dabidziilgo hashtʼedaalneʼ.” (Proverbs 15:22) Díí Oodlání alą́ąjįʼ halneʼii binahjįʼ naʼnitinígíí nee dooleeł, éí níká adoolwoł yee nił hodoolnih. Jesus tʼahdoo nihookáaʼgi hijinaa yę́ędą́ą́ʼ, Bizhéʼé bitsʼą́ą́dóó yíhoołʼą́ą́ʼ. Nihookáaʼgi nahojilneʼgo, tʼah íhojoołʼaah ńtʼééʼ. Haneʼ yáʼátʼéehii diné yił halneʼgo bił hózhǫ́. Azhą́ shı̨́ı̨́ tiʼhoozniiʼ ndi, Jesus haʼólníigo Jiihóvah yikʼeh hóółʼįįd. (Isaiah 50:4 yíníłtaʼ; Hebrews 5:8; 12:2) Jiihóvah bá nijilʼaʼ alą́ąjįʼ ájósingo, haitʼéego nił hózhǫ́ íidoolííł baa nídadíitʼįįł.

7. Ániid nidaakaiígíí éí ídahoołʼaahii ádeiléehgo, haʼátʼíísh biniinaa bił yáʼádaatʼééh?

⁷ Jesus ánihidííniid: Nílá “ídahoołʼaahii danilı̨́įgo ádaahłeʼ,” dóó nidaʼnohtin. (Matthew 28:19, 20) Díí naanish tʼáá áłahjįʼ áníłʼı̨́įgo, baa nił hózhǫ́ǫgo God baa hoʼniih. Naanish hazhóʼó ájíłʼı̨́įgo, éí bíhojoołʼaah índa jiichįįh jileeh. Nihibrother Timothy ániid nijigháago, alą́ąjįʼ nahalneʼii jizlı̨́ı̨́ʼ. Éí ání: “Jiihóvah alą́ąjįʼ bá naashʼaʼ íinisin, áko ayóóʼííníshʼníigo bichʼįʼ ííshjání áshʼı̨́. Áłtséedi, nabídínéeshtįįłígíí chʼééh łaʼ hanishtá. Ndi łahgóó hanáánááshnaago, índída nabídínéeshtįįłígíí shee hazlı̨́ı̨́ʼ. Łaʼ nabíníshtinígíí éí Kingdom Halldi yah hanádáh silı̨́ı̨́ʼ. Bible School for Single Brothers ííłtaʼ bikéédóó, naanish shaa náádeitʼą́, áadi dı̨́įʼgo diné ninaanishtin. Diné ayóóʼííníshʼníigo nanishtin. Níłchʼi diyinii éí beʼiinaʼ hashtʼeyiileehgo shił bééhózin.” * (Footnote níníłʼı̨́.)—1 Thessalonians 2:19.

8. Diné bichʼįʼ nidahalneʼgo, haʼátʼíísh ániid nidaakaiígíí binaanish ádayiilaa?

⁸ Łaʼ ániid nidaakaiígíí náánáłaʼ saad bee yátiʼígíí yídahoołʼą́ą́ʼ. Jacob, North Americadę́ę́ʼ naaghá, díí yikʼeʼashchı̨́: “Tsostsʼid shináahaigo, tʼóó ahayóí Vietnamese bił daʼííłtaʼ. Jiihóvah baa haneʼígíí bee bił dahodiishnih niizı̨́ı̨́ʼ. Áko bizaad bíhodeeshʼááł nisin ńtʼééʼ. Naaltsoos Bee Haʼídéesʼı̨́įʼii éí bílágáanaa kʼehjí dóó Vietnamese kʼehjí wóltaʼígíí bił ałhąąh naashʼnilgo bíhoołʼą́ą́ʼ. Áádóó Vietnamese áłah nidaadleehígi shikʼis ádeishłaa. Tseebíítsʼáadah shinááhaigo, alą́ąjįʼ nahalneʼii sélı̨́ı̨́ʼ. Éí bikéédóó Bible School for Single Brothersjí ííłtaʼ. Díí alą́ąjįʼ nahashneʼgo shinaanish íishłaaígíí yee shíká eelwod. Vietnamese yah hanajahígíí tʼáá shí tʼéiyá elder nishłı̨́. Bizaad bíhoołʼą́ąʼgo, biniinaa ląʼígo Vietnamese dineʼé tʼóó bił adahayóí. Łahda yahináá dashiłníigo, Diyin Bizaad bee bił hashneʼ. Łaʼ éí baptize ádabiʼdiilyaa.”—Compare Acts 2:7, 8.

9. Ídahoołʼaahii ádeilnéehgo, haʼátʼíísh yee nanihinitin?

⁹ Ídahoołʼaahii hazhóʼó nidanohtingo éí ninaanish yáʼátʼéehgo ádaałʼı̨́į doo. Áko naanish bíinishghah nínízin, dóó diné hazhóʼó bichʼįʼ yádaałtiʼ doo. (Proverbs 21:5; 2 Timothy 2:24) Díí naanish baa hózhǫ́, éí biniinaa Diyin  Bizaad bee naʼnitingo bíhwiiniłʼą́ą́ʼ. Áádóó Jiihóvah áhą́dígo bił nanilnishgo, bíhoołʼaah doo.—1 Corinthians 3:9.

10. Azhą́ shı̨́ı̨́ nanitłʼah ndi, haitʼéego ídahoołʼaahii áníléehgo nił hózhǫ́ǫgo ánítʼı̨́į doo?

¹⁰ Azhą́ shı̨́ı̨́ tʼáá díkwíí diné Diyin Bizaad yídahodoołʼááł danízin ndi, ídahoołʼaahii ádanileʼgo nił hózhǫ́ǫ doo. Ídahoołʼaahii ádaahłéehgo, áłah nídaadleehgi ahił nidaałnish. Azhą́ shı̨́ı̨́ tʼááłáʼígo brother doodaiiʼ sister éí íhoołʼaahii yikʼínínitą́ąʼ ndi tʼáá ániitʼé baa nihił dahózhǫ́. Tʼáá díkwíí diné Diyin Bizaad yídahoołʼaahdi, Brandon éí náhástʼéí nááhai alą́ąjįʼ nahalneʼii jílı̨́ı̨́ ńtʼééʼ. Éí kóní: “Haneʼ yáʼátʼéehii nahashneʼgo shił yáʼátʼééh. Éí naanish Jiihóvah nihaidiníʼą́. Ałtso niʼníłtaʼgo, nahashneʼígíí éí shinaanish íishłaa. Brothers ániid nidaakaiígíí ‘yéigo ádaatʼı̨́įgo’ bił hashneʼ, dóó diyin kʼehgo dayííkáahgo shił yáʼátʼééh. Bible School for Single Brothersgi niʼníłtaʼgo, nahashneʼígíí náánáłahjįʼ anaashiʼdooltʼeʼ. Tʼáá aaníí łaʼ Diyin Bizaad bił yíníłtaʼígíí tʼahdoo baptize ábiʼdilnéeh da. Ndi náánáłaʼ Oodlání éí diné yikʼídaneeztą́ąʼgo, baptize ádabiʼdiilyaa. Ídahoołʼaahii ádeilééhígíí shinaanish íishłaago shił yáʼíítʼééh.”—Ecclesiastes 11:6.

11. Jiihóvah bá naʼalʼaʼgi ániid nidaakaiígíí, haʼátʼíí ádeiłʼı̨́įgo bił dahózhǫ́?

¹¹ Jiihóvah bá nideilʼaʼgo tʼóó ahayóigo nihá bohónéedzą́. Ániid nidaakaiígíí éí Jiihóvah bá naʼalʼaʼgi ádeiłʼı̨́įgo yee áká anídaajah. Kingdom Halls ádaaniidígíí yídin danilı̨́. Ákweʼé éí Jiihóvah baa dahaʼniih, áko Kingdom Hall álnéehgo áká anánílwoʼgo baa nił hózhǫ́ǫ doo. Áádóó nibrothers dóó nisisters bił nanilnishgo baa nił hózhǫ́ǫ doo. Índa, hazhóʼó naʼanish dóó nioverseer nizhónígo bił nanilnish bíhwiidííłʼáałgo átʼé.

12. Haitʼéego alą́ąjįʼ nahalneʼgo éí náánáłaʼ naanishígíí ná bohónéedzą́ą doo?

¹² Nihibrother Kevin ání: “Tʼáá ánístsʼísí yę́ędą́ą́ʼ, Jiihóvah bá naashʼaʼ alą́ąjįʼ íinisin. Ńtʼééʼ náhástʼéítsʼáadah shinááhaigo alą́ąjįʼ nahalneʼii sélı̨́ı̨́ʼ. Łaʼ brother léiʼ kin ííłʼíní jílı̨́įgo, part-time bá naashnish. Kin bikááʼdę́ę́ʼígíí, tsésǫʼígíí dóó dáádílkałígíí anídahaʼníiłgo bíhoołʼą́ą́ʼ. Áádóó hurricane relief team atah nishishnish. Éí Kingdom Halls dóó nihibrothers dabighanígíí anídeilyaa. South Africa éí Kingdom Halls bídin hóyéeʼgo, biniyé haʼdiishłaa. Áádóó hágo shiʼdooʼniid. Kʼad éí Africadi tʼóó ahayóí Kingdom Hall ádaalyaa. Bił nidaashnishígíí éí shighan hazʼą́ągi nahalingo ałhiiʼ danihighan,  dóó Diyin Bizaad hazhóʼógo baa daʼíiníiltaʼ. Áádóó nihibrothers bił nahashneʼgo baa shił hózhǫ́. Tʼáá ánístsʼísí yę́ędą́ą́ʼ binahashʼá baa hoolzhiizhgo íishłaa, éí yéigo baa shił hózhǫ́.”

13. Haʼátʼíísh biniinaa ániid nidaakaiígíí, Bétheldi Jiihóvah yá nidaalʼaʼgo bił dahózhǫ́?

¹³ Łaʼ alą́ąjįʼ nahalneʼii danilínę́ę éí kʼad Bétheldi nidaalnish. Tʼáá ałtso íilʼínígíí Bétheldi nijilnishgo Jiihóvah tʼéiyá bá íilʼı̨́, éí hweʼiinaʼ hoł hózhǫ́ǫgo joołtʼih doo. Bétheldi nidaalnishígíí éí Diyin Bizaad dóó nihinaaltsoos ádeiłʼı̨́, áko diné éí Jiihóvah yéédahodoosįįł. Bétheldi łaʼ naalnishígíí, Dustin ání: “Náhástʼéí shinááhaigo Jiihóvah bá naashʼaʼ alą́ąjįʼ íinisingo niizı̨́ı̨́ʼ, dóó niʼníłtaʼdóó alą́ąjįʼ nahalneʼii sélı̨́ı̨́ʼ. Łaʼ nááhai bikéédóó, Bétheldę́ę́ʼ hágo shiʼdooʼniid. Áadi printing presses dóó computer programming binaashnishgo bíhoołʼą́ą́ʼ. Díí baa shił hózhǫ́, daʼníłtsʼą́ą́góó ídahoołʼaahii ádajiléehgo baa ákoniizı̨́ı̨́ʼ. Kweʼé naashnishgo shił nizhóní. Díí ádeilʼínígíí diné, Jiihóvah ayóóʼádayóʼníigo bee bíká anéijah.”

14. Tʼáá áłahjįʼ nahólneʼgo, haitʼéego bá hashtʼeʼ ádidiiʼniił?

¹⁴ Tʼáá áłahjįʼ nahólneʼgo, haitʼéego  bá hashtʼeʼ ádidiiʼniił? Jiihóvah bá nanilʼaʼgo tʼáá bee bíninilʼánígíí, éí Oodlání bee ánítʼéhígíí bíhodííłʼááł. Diyin Bizaad tʼáá áłahjįʼ yíníłtaʼ, dóó hazhóʼó nabikʼítsíníłkees, áádóó áłah nídaʼadleehígi neʼoodląʼ bee háánídzih. Tʼah ííníłtaʼgo, náánáłaʼ éí haneʼ yáʼátʼéehii hazhóʼó bichʼįʼ yáníłtiʼgo bíhodííłʼááł. Diné bíninidlı̨́įgo hazhóʼó bichʼįʼ yáníłtiʼ, dóó hazhóʼó yíísíníłtsʼą́ą́ʼ. Áádóó Kingdom Hallgi hashtʼe daʼałʼı̨́ dóó nidahazhchxǫʼígíí hashtʼée daalneʼ bee bíká anánílwoʼ. Diné aʼohgo danilínígíí dóó tʼáá bí ádeinízingo nidaalnishígíí éí Jiihóvah bił hózhǫ́ǫgo choyoołʼı̨́. (Psalm 110:3 yíníłtaʼ; Acts 6:1-3) Hastóí oodlání yá naazíinii “yáʼátʼéehgo Timothy yaa chʼídahwiiʼaah,” éí biniinaa yilʼaadii Paul éí Timothy, diné bił nahwiilneʼ doo, biłní.—Acts 16:1-5.

15. Naanish hanítáago haʼátʼíí ádíílííł?

¹⁵ Ląʼí Jiihóvah bá ndaalʼaʼígíí alą́ąjįʼ ájósingo, honaanish hólǫ́ǫgo bee ádá áhojilyą́ą doo. (Acts 18:2, 3) Áłtsʼísígo baa náʼídíiltah, áko part-time naanish hadíníítaałgo yee níká adoolwoł. Circuit overseer dóó alą́ąjįʼ dahalneʼii éí bee nahóʼáhígíí bił hodiilnih dóó bínaʼídíłkidígíí yee níká adoojah. Áádóó Diyin Bizaad ání: “Ninaanish danilíinii Bóhólníihii baa hidíʼaah, áko binahóʼáii daniłdzilgo ná ádoolnííł.”—Proverbs 16:3; 20:18.

16. Haitʼéego Jiihóvah bá naalʼaʼígíí alą́ąjįʼ ájósingo, naanish bee hąąh siláago bá hashtʼeʼ ádiilnííł?

¹⁶ Jiihóvah éí “tʼáá aaníí iináanii deizdoołtsoł” nihá yinízin. (1 Timothy 6:18, 19 yíníłtaʼ.) Jiihóvah bá ndaalʼaʼígíí alą́ąjįʼ ádajósinígíí bił nanilnishgo, áko Oodlání neeyánígíí nilı̨́į doo. Áádóó łaʼ ániid nidaakaígíí Jiihóvah bá ndaalʼaʼígíí alą́ąjįʼ ádajósingo, éí ałhaazhnitʼazhígi yee háká eelwod. Tʼahdoo daʼjiiyé yę́ędą́ą́ʼ, éí alą́ąjįʼ dahalneʼii dajílı̨́, áádóó daʼjizyehgo éí tʼáá ájíłá tʼahdii nidahojilneʼ.—Romans 16: 3, 4.

17, 18. Haitʼéego nahóʼáhígíí nijéí bídéétʼiʼ?

¹⁷ Psalm 20:4 éí Jiihóvah yaa halneʼgo ání: “Nijéí yídin nilíinii bikʼehgo neidóʼááł, índa ninahatʼaʼ tʼáá ałtso ná bohoolníiłgo áyósin leʼ!” Ádá nahóʼáago, haʼátʼííshı̨́ı̨́ neʼiinaʼ bee ádíílíłígíí baa nitsíníkees doo. Dííshjı̨́įdi Jiihóvah átʼínígíí dóó haʼátʼíí bá ádííníłígíí éí baa nitsíníkees. Áádóó Jiihóvah bá nanilʼaʼgo, bee baa haʼniih doo.

¹⁸ Jiihóvah bá nanilʼaʼgo dóó baa haʼniih éí baa nił hózhǫ́ǫgo neʼiinaʼ hazhóʼó choiníłʼı̨́į doo. “Áádóó ałdóʼ Bóhólníihii baa nił nihoozhǫǫh, áko nijéí bee bídin nílíinii neidiyiiʼaah doo.”—Psalm 37:4.