JESUS bídahoołʼaahii haitʼéego haneʼ yáʼátʼéhígíí yee neineeztą́ą́ʼ. Diné doo tʼáá ałtso danihíistsʼą́ą́ʼ da doo. (Luke 10:3, 5, 6) Nidahwiilneʼgo ałdóʼ tʼáá aaníí ákótʼé. Diné bił nidahwiilneʼgo łaʼ tʼáá naʼníleʼdii hachʼįʼ haadzih doodaiiʼ bádahachįʼ łeh. Éí biniinaa bá dajiiniibaʼgo bił nidahodiilnih yę́ę nihá nantłʼa.

Diné joobaʼígíí náánáłaʼ bichʼįʼ anáhóótʼiʼ dóó haʼátʼíí shı̨́ı̨́ yídin nilínígíí yiyiiłtsą́ągo, éí bíká adeeshwoł niizįįh. Diné bá dajiiniibaʼgoósh bił nidahwiilneʼ daniidzin? Ajoobaʼ tʼáágéedgo diné doo bíká adeeshwoł daniidzin da. Bídazhneedlı̨́įgo éí kǫʼ diltłiʼ nahalin łeh. Kǫʼ chizh ląʼígo biishdiiniiłgo éí bitsʼą́ą́dóó yéigo bitsʼaʼdinídíín. Tʼáá ákótʼéego, nidahwiilneʼ bídaniidlı̨́įgo nihee ajoobaʼ bidziilgo bee ádaʼiilʼı̨́!​—1 Thessalonians 5:19.

Nihee ajoobaʼ hólǫ́ǫ doogo ayóó nantłʼa. Haʼátʼíísh nihee ajoobaʼ yee nihíká adoolwoł? Jiihóvah, Jesus, dóó yilʼaadii Paul ádaatʼįįdígíí bitsʼą́ą́dóó bídahwiidiilʼááł.

Tʼáá ałkʼidą́ą́ʼ Jiihóvah ádzaago yaa ndahalneʼ. Ákondi tʼahdii “doo ahééh danízinii índa doo yáʼádaashóonii yaa joobaʼ.” (Luke 6:35) Haitʼéego bá áʼáhwiinítʼı̨́ ííshjání áyósin? Tʼáá ałtso nihichʼįʼ haʼólní. Jiihóvah íinízin “diné tʼáá ałtso” yisdádookah. (1 Timothy 2:3, 4) God éí doo yáʼátʼéhígíí yijoołxá. Ákondi Jiihóvah diné ayóóʼáyóʼní. Doo łaʼda dadootsaał da nízin.​—2 Peter 3:9.

Séítan ayóó binaʼadloʼ éí diné yóóʼayiiʼéeshgo Jiihóvah bił bééhózin. (2 Corinthians 4:3, 4) Ląʼí tʼáá áłchíní danilı̨́ı̨́dę́ę́ʼ doo ákótʼéégóó God bee bił dahólneʼ. Éí biniinaa tʼáá ánínígíí bikʼididootı̨́łígíí bá ndanitłʼah. Jiihóvah bíká adeeshwoł hóʼní. Haitʼéego nihił béédahózin?

Jiihóvah Níneveh dineʼé yaa nitsékeesgo bił haitʼé ńtʼééʼ. Diné ayóó ádaa dahachįʼ ńtʼééʼ. Jiihóvah éí Jónah áyidííniid: “Daʼ ákoósh Níneveh ayóó átʼé kin haalʼáii doo baa aʼááh dínéesįįł da? Jó, ákweʼé tʼááłáhídi neeznádiindóó baʼaan naadiindi mííl bilááh ánéelą́ąʼgo áłchíní [hastóí, NW] tʼah doo ákodaniizįįhígíí nishʼnáajigo índa nishtłʼajigo nitsáhákees doo bił béédahózin da?” (Jonah 4:11) Jiihóvah baa aʼááh nízin biniinaa tʼáá ánínígíí doo bił béédahózin da. Áko Jónah hachʼįʼ yiyiiłʼaad.

Nihídóʼ tʼáá ákótʼéego. Diné ayóóʼádeíníiʼní. Jiihóvah nahalingo, yaa dahadoosįįł niidzin azhą́ shı̨́ı̨́ tʼáá ánínígíí naʼnitin bá ndanitłʼah ndi.

 Łahda diné bił dahwiilneʼ doo bił yáʼádaatʼéeh da. Éí biniinaanii nihił béédahodoozįįł daniidzin. Łaʼ daatsʼí Oodlání nishłı̨́ daaníigo doodaiiʼ Diyin Bizaad yinishdlą́ daaní ákondi doo yáʼátʼéhígíí yaa nidaakai. Łaʼ éí Jiihóvah Yá Dahalneʼé doo ákótʼéégóó yaa dahalneʼ. Náánáłaʼ éí diné yił kéédahatʼínii shándahałtʼiʼ doo danízingo yéédaaldzid.

Łaʼ diné bił nidahwiilneʼ atídabiʼdilʼínígíí éí bidaʼdiiłʼá yikʼeh doo ákódaatʼée da. Kim éí missionary jílı̨́įgo ájíní diné bił nahojilneʼgo tʼóó ahayóí atídabiʼdiilyaa, anaʼí éí hináago daʼahijoogą́ą́ʼ, ałtso haa náádiilyá. Hweʼiinaʼ yę́ę doo bídazhneedlı̨́į da. Doo bił chodahooʼı̨́įgo diné doo yadaʼólíi da daazlı̨́ı̨́ʼ. Jiihóvah Yá Dahalneʼé dajílínígíí nidahojilneʼgóó tʼáadoo nidahołneʼé dahałní. Kim éí nahojilneʼgóó, łaʼ atídahoolaa.

Haitʼéego Kim bił hojoobaʼ? Yéénálnihgo Proverbs 19:11, ání: “Diné hóyą́ągo nitsíkeesii doo hah báháchįįh da.” Nahojilneʼgi áhóótʼįįdígíí éí baa nitsídzíkeesgo diné hoł bahojoobáʼígo bee háká análwoʼ. Diné bił nahojilneʼii doo tʼáá ałtso baa ádahwiinítʼı̨́į da. Tʼáá ákweʼé nahojilneʼgo łaʼ bił yáʼádaatʼéehgo baa níjídááh.

Díí naʼádílkid: ‘Jiihóvah Yá Dahalneʼé łaʼ shaa níyáago shił ahoʼniilneʼgo haash deeshnííł?’ Díí baa nitsíníkees, dahalneʼé éí tʼóó ahayóí doo ákótʼéégóó baa hosidiitsʼą́ą́ʼ haash díínííł? Nihí shı̨́ı̨́ ałdóʼ tʼáá ákótʼéego tsídidiikos ákondi nihee ajoobaʼígíí bee baa dajiiniibaʼ doo. Jesus ání diné hachʼįʼ ádaaníił leʼ danohsinígi átʼéego nihígo yeeʼ bichʼįʼ ákódaahníił leʼ. Náánáłaʼ yaa nitsídaakeesii hazhóʼó bikʼidaʼdiitįįh dóó bichʼįʼ hadaʼííníilníi doo.​—Matthew 7:12.

Yilʼaadii Paul ajoobaʼ ííshjání ííłʼı̨́ azhą́ shı̨́ı̨́ atídabiłʼı̨́į ndi. Haʼátʼíísh biniinaa? Ájíítʼįįd yę́ę nibééhéshniih biniinaa. Éí ání: “Tʼah doo ooshdląąh yę́ędą́ą́ʼ Jesus tʼóó baaʼihgo baa yááłtiʼ áádóó atííłʼįįd índa yéédzííʼ, nidi Diyin God shaa aʼááh niizı̨́ı̨́ʼ, háálá doo ooshdlą́ą́góó índa doo shił bééhózingóó íítʼįįd.” (1 Timothy 1:13) Jiihóvah dóó Jesus tʼah ndi Paul yaa aʼááh nízin ńtʼééʼ. Éí bééjílniih. Diné tʼáadoo nidahołneʼé bijiní yę́ę bikʼizhʼdiitą́, hó tʼáá ákójítʼı̨́ ńtʼééʼ biniinaa.

Diné tʼáá bí bibee oodląʼ dahólónígíí Paul éí yichʼįʼ yáłtiʼ. Haitʼéego yaa nitsékees? Acts 17:16 góneʼ deiyíníiltaʼ éí Áthenzdi nijigháago “kin haalʼáagi tʼáá átʼéé nítʼééʼ edaʼalyaii  bichʼįʼ nidahadláá lágo jiiłtsą́ągo doo hoł ákótʼée” da. Paul éí edaʼalyaii choyoołʼı̨́įgo bee akʼiʼdidootı̨́įłgo tʼáá aaníinii yee naʼneeztą́ą́ʼ. (Acts 17:22, 23) Yaa nahodoolnihígíí łahgo átʼéego ánáyoodlííł dóó diné tʼáá ałtso yichʼįʼ yáłtiʼ ‘yisdáhodoonił biniyé tʼáá hó ádajítʼéhígi átʼéego íʼdiishyaa.’​—1 Corinthians 9:20-23.

Laʼ diné bił nidahwiilneʼgo nihichʼįʼ bádahachįįh łeh. Náánáłaʼ tʼáá bí bibee oodląʼ dahólǫ́. Haitʼéego éí Paul bedaʼiilʼı̨́į doo? Yaa nitsídaakeesii hazhóʼó bikʼidaʼdidiitı̨́įłgo “haneʼ baa hózhóonii bitsʼą́ą́dóó yáʼádaatʼéehii” bee bíká ádadiijah. (Isaiah 52:7) Nihisister léiʼ Dorothy wolyé ání: “Nidahwiilneʼgóó, ląʼí éí God doo ajoobaʼ da bee nidabidiʼneestą́ą́ʼ. Diné dabidziilgo God deiyoodlánígíí éí baa hashniih. Áádóó Diyin Bizaad ánínígíí bichʼįʼ ííshjání ádaashłeʼ éí Jiihóvah ayóóʼóʼóʼní dóó náásgóó iiná yee nihá haadzííʼ.”

Nihibrothers dóó nihisisters saad yáʼátʼéhígíí bee bichʼįʼ yádeiltiʼgo hadaʼólníigo nidahojilneʼ doo. Jessica ání nidahojilneʼgo łaʼ doo ákótʼéégóó ádahóótʼįįdígíí, éí doo yahalneʼ da. Ákondi haneʼ yáʼátʼéhígíí éí baa hojilneʼ. Nahojilneʼgo yáʼátʼéehgo ádahóótʼįįdígíí baa hojilneʼ.

Łahda nidahwiilneʼígíí nihá nantłʼa łeh éí Jiihóvah bił bééhózin. Jiihóvah bił hózhǫ́ǫgo bidaʼiilʼı̨́įgo yaa aʼááh nízin! (Luke 6:36) Diné hoolʼáágóó bąąhgi ádaatʼéii baa nidajikaígíí éí Jiihóvah doo haa joobaʼ da índa doo hachʼįʼ haʼólníi da. Nihodoogááł éí bił bééhózin. Aláahdi ílı̨́įgo haneʼígíí baa dahwiilneʼ. (2 Timothy 4:2) “Diné tʼáá ałtso” baa dajiiniibaʼgo bídaniidlı̨́įgo bił nidahwiilneʼ.