JÁSHOWA éí kéyah bee ádee haʼoodzííʼ yę́ę góneʼ Ízrel dineʼé adííʼish hoʼdooʼniid. Díí éí yéigo há nantłʼa doołeeł. Ndi, Jiihóvah éí hadziilgo áhoolaa áádóó áháłní: “Nidziilgo íʼdííʼnílzin áádóó yéego chánah íʼdííʼnílzin.” Jáshowa ííłníigo bee hazʼáanii baa ííníłtaʼ áádóó bikʼeh ánítʼéego éí yáʼátʼéehgo ná áhooníiłgo hinínáago ádiʼdíílnííł, índa baa nanináhígíí tʼáá ałtso yáʼátʼéehgo łaʼ danileʼ doo.—Joshua 1:​7, 8.

Kʼad “yéego achʼįʼ nahwiiʼnáa doo” haʼnínę́ę biiʼ kééhwiitʼı̨́, áko iiná ádoolníiłgi nantłʼa. (2 Timothy 3:1) Jáshowagi ániitʼée doogo éí Jiihóvah bidííniid yę́ęgi nihí ałdóʼ bikʼehgóó ániitʼée doo. Éí tʼáá ahąąh Diyin Bizaad yíníiltaʼ, áádóó bitsʼą́ą́dóó baa íhwiilʼą́ʼígíí bee yáʼátʼéehgo ádá nahwiitʼáa doo.

Ndi łaʼ shı̨́ı̨́ éí adíhodiyiilʼaahgi doo bééhoniilzin da, doodaiiʼ doo bíniidlı̨́į da. Ákondi Diyin Bizaad bíhojiiłʼaahgo ílíinii átʼéii átʼé. “ Díí Łaʼ Bínítááh” bikááʼígi yíníłtaʼgo éí adíhodiyiilʼaahgo índa ayóó bínindlı̨́įgo ándoolíiłgo yee níká adoolwoł.

Psalm ání: “Nibikʼeh óʼooʼníiłii bikʼehgo shiyííłááł, háálá éí baa shił nihoozhǫǫh.” (Psalm 119:35) Ni ałdóʼ baa nił hózhǫ́ǫgo ánóhsin doo. Diyin Bizaad bíhoołʼaahgo hazhóʼó nitsáhákees baa íhwiidííłʼááł.

Jáshowa bidineʼé tʼóó ahayói chʼíiníʼeezh yę́ęgi, ni éí doo nił ákóhootʼée da ndi, łaʼgóó bee nichʼįʼ anáhóótʼiʼii hólǫ́ǫgo átʼé. Áko Jáshowa nahalingo Diyin Bizaad bee adíhodiyiilʼaah áádóó bikʼehgóó ánítʼé. Ákónítʼéego éí honíyą́ągo ádá nahóʼáa doo, índa baa nanináii tʼáá ałtso yáʼátʼéehgo łaʼ danileʼ doo.