1. Haʼátʼíí biniyé Jiihóvah éí tʼáá ałtsoní daabí diiʼníi doo? (Áłtsé eelkidígíí níníłʼı̨́.)

TʼÁÁ ałtsoní dahólóonii Jiihóvah daabí! “Yádiłhił áádóó yótʼááh biláahdi yáʼąąshii índa niʼ nidahoneesʼą́ąjįʼ biiʼ dahólóonii” Jiihóvah daabígo bee bóhólnííh. (Deuteronomy 10:14; Revelation 4:11) Jiihóvah éí bílaʼashdlaʼii áyiilaago bąą tʼáá áníiltso bííʼ daniidlı̨́. (Psalm 100:3) Ndi éí bitsʼą́ą́dóó Jiihóvah tʼáá bí łaʼ ádá néidiiʼnil.

2. Diyin Bizaad áníigo Jiihóvah éí háí tʼáá bí łaʼ ádá néidiiʼnil?

² Psalm 135 góneʼ éí ałkʼidą́ą́ʼ Ízrel dineʼé Jiihóvah deidísin yę́ę “ádá néidiiʼnil” yiłníigo yee yiyíízhiʼ. (Psalm 135:4) Hosea ałdóʼ éí łaʼ doo Ízrel dineʼé danilı̨́ı̨́góó Jiihóvah bidineʼé dadooleeł ní. (Hosea 2:23) Díí éí bohoolyaa, Jiihóvah éí yáʼąąshdi Christ yił dahwéeʼaah doo biniyé, doo Ízrel dineʼé danílíinii náyiizlááʼ. (Acts 10:45; Romans 9:23-26) Díí níłchʼi diyinii bee dabiʼdoolzı̨́įʼii éí “dineʼé diyinii” bee yééjiʼgo Jiihóvah ‘bííʼ  dajizlı̨́ı̨́ʼ.’ (1 Peter 2:9, 10) Ákoshąʼ Jiihóvah doo yitsʼá daakáahii Oodlání nahasdzáán bikááʼ hoolʼáágóó dajiináa dooleełígíí? Jiihóvah éí “shidineʼé” dóó “náháláaʼii” yiłní.​—Isaiah 65:22.

3. (a) Háí éí tʼáá sahdii átʼéego áhánígo Jiihóvah yił kʼé daʼahidiʼní? (b) Haʼátʼíí baa nídadíitʼįįł?

³ ‘Dibé áłchʼídí,’ díí yáʼąąshdi hoolʼáágóó kéédahatʼı̨́į doo, áádóó ‘dibé náánáłaʼígíí,’ díí nahasdzáán bikááʼ hoolʼáágóó kéédahatʼı̨́į doo, éí ‘tʼááłáhígóó shijéeʼgo’ Jiihóvah yichʼįʼ dahodísin. (Luke 12:32; John 10:16) Jiihóvah éí tʼáá sahdii átʼéego áhánígo bił kʼé ahidiʼníigi baa ahééh niidzingo ííníilzin doo. Éí díí haitʼéego baa ahééh niidzin dooígi baa nídadíitʼįįł.

4. Haitʼéego Jiihóvah bichʼįʼ ahééh daniidzin doo, áádóó haitʼéego Jesus ałdóʼ ákódzaa?

⁴ Jiihóvah baa ádiniitʼą́ągo áádóó baptize ánihiʼdiilyaago éí bichʼįʼ ahééh niidzingo íitʼı̨́į doo. Éí Jiihóvah bííʼ niidlı̨́ índa tʼáá nihí íiniidzingo bikʼehgóó ániitʼéego diné tʼáá ałtso bił ííshjání íilyaago átʼée doo. (Hebrews 12:9) Jesus baptize ályaa yę́ędą́ą́ʼ ałdóʼ tʼáá kóníigo Jiihóvah yaa ádeetʼą́. Azhą́ shı̨́ı̨́ Jesus éí tʼáá íídą́ą́ʼ bidineʼé tʼáá dah yikah ńtʼééʼ Jiihóvah yaa ádaʼdeestʼą́ą ndi, tʼáá bí sizínígi Jiihóvah yaa ádeetʼą́. Jesus éí kóníigo ání: “ShiDiyin God nílíinii, íinínízinii baa nideeshaałgo baa shił nihoozhǫǫh.”​—Psalm 40:7, 8.

5. Jesus baptize ályaago Jiihóvah haʼátʼíí ní?

⁵ Jesus baptize ályaago Jiihóvah haitʼéego bidiisnááʼ? Diyin Bizaad ání: “Jesus tó bee hoʼdoolzı̨́įʼgo táyiʼdę́ę́ʼ háádzísdzá, nítʼééʼ jóʼakon yáʼąąsh ąą ádzaa, áádóó Diyin God biníłchʼi diyinii hasbídí nahalingo Jesus bikʼijįʼ hadahooleełgo áádóó bikʼi dah neezdáago jiiłtsą́. Áádóó yáʼąąshdę́ę́ʼ iinééʼ diistsʼą́ąʼgo ání, Díí shiYeʼ ayóóʼóóshʼníinii jílı̨́, tʼáá íiyisí hąą shił hózhǫ́.” (Matthew 3:​16, 17) Jesus éí tʼáá íídą́ą́ʼ Jiihóvah bííʼ jílı̨́. Jiihóvah éí Jesus yaa bił hózhǫ́, háálá Jesus éí tʼáá ní tʼéiyá ná naashʼaʼ doo níigo haa ádeetʼą́. Nihí ałdóʼ Jiihóvah baa ádiniitʼą́ągo nihaa bił hózhǫ́, áádóó nihikʼihozhdoodliił.​—Psalm 149:4.

6. Jiihóvah baa ádiitʼą́ągi haitʼéego yaa nitsíkeesgi haʼátʼíí haneʼígíí łaʼ binahjįʼ bikʼidiʼdiitı̨́ı̨́ł?

⁶ Ndi Jiihóvah éí tʼáá ałtsoní daabí! Áko haʼátʼíí baa diilyééł? Hastiin léiʼ éí chʼilátah hózhóón bidáʼákʼeh biiʼ hólǫ́. Bitsiʼ yázhí éí díí chʼilátah hózhóón yę́ę łaʼ néidiiłjoolgo hainíłjool. Azhą́ shı̨́ı̨́ díí chʼilátah hózhóón éí tʼáá hó ndi, azhéʼé jílínígíí kótʼéego hatsiʼ haʼníláago baa hoł hózhǫ́. Hatsiʼ ayóóʼáhóʼníigi yee ííshjání áyiilaa. Díí chʼilátah hózhóón ląʼígíí bitahdóó hatsiʼ hainíłjoolígíí ayóó ílíinii átʼé jinízin. Tʼáá ákótʼé, tʼáá nihí íiniidzingo Jiihóvah baa ádiitʼą́ągo yaa bił hózhǫ́.​—Exodus 34:14.

7. Jiihóvah bá naashʼaʼ doo danízinii haitʼéego Jiihóvah nabiiłná?

⁷ Malachi 3:16 yíníłtaʼ. Jiihóvah baa ádeetʼą́ągo baptize ánihiʼdiilyaago haʼátʼíí biniyé ílíinii átʼé? Tʼóó atsą́ądi hosinílı̨́ı̨́ʼ yę́ędą́ą́ʼ tʼáá íídą́ą́ʼ éí Jiihóvah bííʼ nilı̨́. Jiihóvah bikʼeh honíłʼı̨́įgo yínáałgo bił honishǫ́ǫ doogo átʼé!  (Proverbs 23:15) Tʼáá bí ádeinízingo Jiihóvah yá ndaalʼaʼii yééhósin, áádóó éí “naaltsoos bee ééhániihii” yiiʼ bízhiʼ yá ádeeleʼ.

8, 9. Jiihóvah “naaltsoos bee ééhániihii” yisʼánígíí bízhiʼ biiʼ daasdzohígíí haʼátʼíí hoł nayólí?

⁸ Jiihóvah éí “naaltsoos bee ééhániihii” yisʼánígíí tʼáá nihízhiʼ biiʼ yisdzoh dooleeł niidzingo éí Jiihóvah díníilzin doo, áádóó bízhiʼ nabikʼítsíilkees doo. Łaʼda doodaiiʼ haʼátʼíí shı̨́įda bichʼįʼ nahwiidláago éí Jiihóvah binaaltsoos biyiʼdę́ę́ʼ nihízhiʼ kʼééʼdoolchxǫǫł!​—Exodus 32:33; Psalm 69:28.

⁹ Jiihóvah íinízinii ááshníił doo áádóó baptize áshidiʼdoolníił jiníigo bee ádee hajoodzíiʼgi doo tʼáá éí tʼéiyá bee yisdádiidáał da. Díí éí tʼááłáʼídi áʼjiiłʼįįh, ndi Jiihóvah bichʼįʼ hodílzingi éí iiná átʼé. Tʼáá ákwíí jı̨́ nizhʼníłdįįd bijı̨́įjįʼ Jiihóvah íinízinii bikʼehgo jiináa doo.​—1 Peter 4:1, 2.

10. Jiihóvah yá ndaalʼaʼii índa doo yá ndaalʼaʼii haʼátʼíí bee tʼáá béédahóziní?

¹⁰ Baa ídahwiilʼą́ąʼgo Kéin, Sálaman dóó Ízrel dineʼé éí Jiihóvah bichʼįʼ dahodíníilzin daaníi ndi, Jiihóvah doo yikééʼ naazı̨́į da ńtʼééʼ. Díí hatsʼą́ą́dóó ídahwiilʼą́ąʼgo éí Jiihóvah bichʼįʼ hodíínísin doo tʼóó jidóneʼ átʼée da. Doo yáʼádaatʼéehii jiniidláa doo, áádóó yáʼádaatʼéehii ayóóʼííníiʼníi doo. (Romans 12:9) Jiihóvah áníigo éí “tʼáá ákogi ádaatʼéii áádóó tʼáá íiyisí doo yáʼádaashóonii ałʼąą ádaatʼéego, doodaiiʼ Diyin God yá nidaalʼaʼígíí áádóó doo yá nidaalʼaʼígíí ałʼąą ádaatʼéego” tʼáá béédahóziní doo.​—Malachi 3:18.

11. Haitʼéego éí tʼáá bééhózinígo Jiihóvah bichʼijí niidlı̨́įgo bee nihiʼdootʼı̨́į doo?

¹¹ Baa ahééh daniidzin Jiihóvah éí bidineʼé daniidlı̨́įgo nánihidiinil! Áko doo nantłʼagóó tʼáá bééhózinígo éí Jiihóvah bichʼijí niidlı̨́į doo. (Matthew 5:16; 1 Timothy 4:15) Díí baa nitsíníkees: ‘Wołí bee Jiihóvah bikééʼ sézı̨́įgi, dinéésh yee shaa ákodanízin? Jiihóvah Yá Halneʼé nishłı̨́ dishníigo bee ádééhonísdzingi, éísh doo baa yánísin da? Shí éí Jiihóvah bííʼ nishłı̨́ didiiʼniiłgi baa yániidzingo éí Jiihóvah yikʼee haitʼée doo?’​—Psalm 119:46; Mark 8:38 yíníłtaʼ.

12, 13. Jiihóvah Yá Halneʼé nilı̨́įgi haitʼéego łaʼ doo béédahózin da?

¹² Jiihóvah Yá Dahalneʼé łaʼ, “doo daʼoodlání nitsídaakeesígi átʼéego” nitsídaakees. Áko biniinaa Jiihóvah doo deidísinii tʼáá bił ahédajíłtʼé. (1 Corinthians 2:12) “Doo daʼoodlání nitsídaakeesígi átʼéego” éí tʼáá bí yidádanoolníinii yíchą́deídéelniʼgo ádabósin. (Ephesians 2:3) Éí kódaatʼéhígíí łaʼ, ééʼ bidaałtʼéii bee ééʼ nishoojééʼ danihidiʼníi ndi, łaʼ ééʼ doo yáʼádaatʼéehii yee háádadiitʼįįh.  Éí ééʼ béédahídéezdon áádóó bighádahootʼínígíí Oodlání ałhínéikahgóó yee háádadiitʼįįh. Doodaiiʼ tʼáá bitaʼígi átʼéego bitsiiʼ nideichʼąąh. (1 Timothy 2:9, 10) Áko díí biniinaa Jiihóvah Yá Halneʼé daatsʼí danilı̨́įgi doo béédahózin da.​—James 4:4.

¹³ Náánáłahgo ałdóʼ éí Jiihóvah Yá Halneʼé daatsʼí nilı̨́įgi doo bééhózin da łeh. Éí honeení biniyé łahda ahíʼiildahgo éí daʼalzhishgi dóó ádaatʼįįłgi doo Oodlání átʼínígi átʼéego aʼdilʼı̨́į łeh. Łaʼ éí abiʼdiiskid yę́ęígíí dóó kótʼé níigo yałtiʼgo social media biiʼjįʼ yee ííshjání íʼdiilʼįįh łeh. Éí shı̨́ı̨́ doo tʼáá yéigo doo yáʼáshóonii baa nijiyáa ndi, tʼahdii áłah náʼádleehgi yah anijílwoʼgo átʼé. Ákondi habrothers dóó hasisters éí bidádahonooníinii wołí bee yitsʼą́ąjįʼ ádaatʼéego ádá dólzin yę́ęgi bitsʼą́ą́ʼ bee bihozhdidoołtʼih.​—1 Peter 2:12 yíníłtaʼ.

14. Jiihóvah nihikʼis nilı̨́įgi haitʼéego baa áhwiilyą́ą doo?

¹⁴ Tʼáá ałtsoní nihináágóó dahólóonii éí “atsʼíís yidánoolníinii, áádóó anááʼ yidánoolníinii áádóó iiná bee ádaa hodzódlíii” dooleełgo ádaalyaa. (1 John 2:16) Nihí éí Jiihóvah bííʼ daniidlı̨́, áko łah ádaniitʼé. Nihí éí “nihokáaʼgi doo Diyin God kʼehgo iináanii índa tsʼísee kʼehgo adáhonooníinii yóóʼadahidiitʼaah, áádóó hazhóʼó ádaa ádahwiilyą́ągo tsʼídá tʼáá ákogi átʼéego índa Diyin God kʼehgo” dahiniiʼná. (Titus 2:12) Niheʼiinaʼ siláagi, éí yéeltiʼgi, íídą́ągi, doodlı̨́įłii doodlı̨́įłgi, ééʼ siitʼı̨́įgi, dóó neiilnishgi díí tʼáá átʼé bee ániitʼéego bééhózingo Jiihóvah bííʼ daniidlı̨́.​—1 Corinthians 10:31 yíníłtaʼ.

15. Haʼátʼíí biniyé nihibrothers dóó nihisisters baa dajiiniibaʼgo ayóóʼádeíníiʼníi doo?

¹⁵ Nihibrothers dóó nihisisters haitʼéego baa nitsíikeesgi éí Jiihóvah bił kʼé niidzingi ílíinii átʼéego bee ííshjání íilʼı̨́. Éí tʼáá nihígi átʼéego bí ałdóʼ Jiihóvah bííʼ danilı̨́. Díí bénéiilniihgo éí baa dajiiniibaʼgo ayóóʼádeíníiʼníi doo. (1 Thessalonians 5:15) Díísh ílíinii átʼé? Jesus éí bikééʼ ndaakai yę́ę kwíidííniid: “Ayóóʼádaʼahíínóhʼníigo shídahoołʼaahii danohłı̨́įgo diné tʼáá ałtso bił béédahózin doo.”​—John 13:35.

16. Jiihóvah bidineʼé ayóóʼáyóʼníigi éí bee hazʼáanii Mózes baa deetʼánę́ę binahjįʼ haʼátʼíí bitsʼą́ą́dóó bíhooʼaah?

¹⁶ Áłah néidleehgi bił yah anéijahígíí haitʼéego baa nitsídeikeesgi éí bee hazʼáanii Mózes baa deetʼánę́ę biiʼdę́ę́ʼ łaʼ binahjįʼ nihíká adoolwoł. Níbaal biiʼ hodílzinii tʼáá ałtso chodaoʼíinii Líívai dineʼé áká anídaalwoʼii baa ádahojilyą́ą dooleełgi tʼáá bééhózinígo há ádaalyaa. Áko łaʼda doo bikʼehgóó áʼjiilaago éí hodiʼyoolyééł. (Numbers 1:50, 51) Hodílzingi chodaoʼíinii haitʼéego baa nitsáhákeesgi Jiihóvah yaa ákonízin, áko bidineʼé baa ádaʼdeetʼą́ągo bikééʼ naazíinii ałdóʼ haitʼéego baa nitsáhákeesgi yaa ákonízin! Jiihóvah ayóóʼánihóʼníigo biniinaa kóní: “Tʼáá háiida nideelchidígíí éí shinázhiin bizhdeelchid nahalin.”—Zechariah 2:8, NW.

17. Jiihóvah éí haʼátʼíí haisííd dóó yiyíistsʼą́ą́ʼ?

¹⁷ Malachi áníigo éí Jiihóvah dabidósinii haitʼéego ‘ałchʼįʼ yádaałtiʼgi, índa yiyíistsʼą́ą́ʼ.’ (Malachi 3:16) Jiihóvah  éí “daabíhígíí yééhósin.” (2 Timothy 2:19) Tʼáá ałtsoní íitʼįįłgi dóó bee hahiidziihii bił bééhózin. (Hebrews 4:13) Nihibrothers dóó nihisisters doo baa jiiniibaʼgóogo Jiihóvah yooʼı̨́. Ndi nihił hadleeʼgo, kʼé nidiiʼníigo, índa jiiniibaʼgo Jiihóvah nihá yooʼı̨́.​—Hebrews 13:16; 1 Peter 4:8, 9.

18. Jiihóvah bidineʼé daniidlı̨́įgo ánihiilaagi haitʼéego bichʼįʼ baa ahééh niidzin doo?

¹⁸ Jiihóvah bííʼ daniidlı̨́įgi bichʼįʼ baa ahééh daniidzin doo. Nihił béédahózingo éí Jiihóvah baa ádaʼdeetʼą́ągi baa honiidzą́ągo íidzaaii átʼé. Azhą́ shı̨́ı̨́ “bindaʼadloʼgo doo tsʼííd átʼéégóó ahoolchíłígíí bitahdi” kééhwiitʼı̨́ ndi, “tʼáadoo bee nihikʼídahótʼahígóó índa nihaʼátʼeʼ ádaadingo” éí “nahasdzáán bikáaʼjįʼ adiníłdíinii nahalingo daʼdíínółdíín.” (Philippians 2:15) Áko wołí bee ádeitʼı̨́įgo Jiihóvah yijoołáaii bitsʼąą ádaniitʼée doo. (James 4:7) Nihibrothers dóó nihisisters nihił danilı̨́įgo ayóóʼádeíníiʼní, háálá éí bí ałdóʼ Jiihóvah bííʼ danilı̨́.​—Romans 12:10.

19. Jiihóvah daabíhígíí haitʼéego yikʼihadlí?

¹⁹ Diyin Bizaad ání: Jiihóvah éí “bidineʼé doo yóóʼiidoołkał da [doo yóóʼiidóʼááł átʼéégóó átʼé, NW].” (Psalm 94:14) Díí éí tʼáá aaníí. Tsʼídá tʼáadoo Jiihóvah yitsʼá nihóníłí da. Dahsiitsą́ą ndi, doo nihaidiyoonah da. (Romans 8:38, 39) “Dahiniiʼnáago Bóhólníihii bá dahiniiʼná, índa daniiʼnéego Bóhólníihii bá daniiʼné. Éí bąą dahiniiʼnáago, éí doodaléiʼ daniiʼnéego Bóhólníihii bííʼ daniidlı̨́.” (Romans 14:8) Jiihóvah éí bikʼis bikééʼ naazı̨́ı̨́ ńtʼééʼ yę́ę iiná yaa néidiyoodléełgo bíká dah díníitʼı̨́ı̨́ʼ. (Matthew 22:32) Kʼad ndi Nihizhéʼé ayóó átʼéego nihaa áhályą́. Diyin Bizaad ánínígi átʼéego, Jiihóvah “bidiyin ádayósinii éí bikʼidahojidlí, áádóó bííʼ danilı̨́į doo biniyé náyiizláaʼii éí ałdóʼ bikʼidahojidlí!”—Psalm 33:12.