1. Haitʼéego nihaa nitsáhákees doo niidzin?

HÁIDA bééhósinígíí tʼáadoo nééhoosįįdgóogo bikʼee haa nítʼée doo? Haʼátʼíí biniinaa díí bikʼee doo ákójítʼée da łeh? Jó tʼáá áníiltso éí shééhoʼdílzin doo niidzin łeh. Éí nihízhiʼ tʼéiyá bee nihééhoʼdílzingo doo niidzin da. Íiyisíí ániitʼéiigi dóó haʼátʼíí shı̨́ı̨́ íilyaago bee nihééhoʼdílzin doo niidzin.​—Numbers 11:16; Job 31:6.

2, 3. Łaʼda shééhoʼdílzin doo nízingo, haitʼéego bee ádaa áhwiilyą́ą doo? (Áłtsé naashchʼąąʼígíí níníłʼı̨́.)

² Ákondi díí átʼéego nitsáhákees bee ádaa áhwiilyą́ą doo. Séítan hooʼáłígíí biyáádóó éí ayóó anishłı̨́įgo yéigo shééhoʼdílzin dooleeł niidzingo ánihidoolííł. Ádaa hodzódlí siidlı̨́įʼgo éí yáʼąąshiidę́ę́ʼ Nihizhéʼé Diyin Jiihóvah doo bichʼįʼ hodíníilzin da doo.​—Revelation 4:11.

³ Jesus naagháhą́ądą́ą́ʼ éí hastóí ánaazíinii yę́ę ayóó shééhoʼdílzin doo danízin ńtʼééʼ. Jesus éí bídahoołʼaahii  ííłní: “Bee hazʼáanii yíndaʼniłtinii bitsʼąą ádaa ádahołyą́, éí biʼééʼ danineezgo nidaakaigo bił yáʼádaatʼééh, áádóó nidaʼiiniihgóó kʼé dabidiʼníigo bił ayóó ádaatʼé, áádóó kin biiʼ áłah nídaʼadleehí dabiyiʼgóó índa ádaʼazįįdgóó aląąjįʼ naazíinii bá nidahazʼą́ą́góó bił ayóó ádahootʼé.” Áádóó ánáádíʼní: “Éí tʼah aláhídi átʼéego bikʼeʼashchʼíiʼgo bá nidahodootʼááł.” (Luke 20:46, 47) Ndi łahjįʼgo éí asdzání bąąh áhásdįįdii bahojoobáʼí léiʼ béeso tsʼídá aʼohgo ílínígíí naaki ayíínilgo yiyiiłtsą́. Díí asdzání ádzaagi tʼáadoo łaʼda biiłtsání da. (Luke 21:1-4) Jesus éí hastóí ánaazíinii yę́ę nitsídaakeesígi átʼéego doo nitsíjíkees da. Jiihóvah yaa nitsíkeesdę́ęʼgo éí haitʼéego hazhóʼó hwééhoʼdílzin dooígi baa ídahwiidiilʼááł.

4. Hwééhoʼdoolzįįhgo yáʼátʼéhígíí éí haʼátʼíí óolyé?

⁴ Hwééhoʼdoolzįįhgo yáʼátʼéhígíí éí haʼátʼíí óolyé? Ayóó ájíiłtaʼgo, naanish ayóó átʼéii bíjíyoolwołgo, habéeso tʼóó ahayóigo, ayóó hwééhoʼdílzingi ádaatʼéii éí ndagaʼ. Diyin Bizaad biiʼdę́ę́ʼ Paul áníigo: “Kʼad Diyin God béédahosoosįįd, doodaiiʼ Diyin God bídę́ęʼgo agháago nihééhoosįįdgo, haʼátʼéego lá nahadlá átsé bee nidanihidiʼneestą́ąʼii éí doo bee adziil da nidi, áádóó tʼáadoo nánídlíní da nidi bichʼįʼ tʼą́ą́ʼ dah nídaahkah lá? Éí binaalteʼ nídadiidleeł daatsʼí danohsin?” (Galatians 4:9) Baa nitsíníkees: “Diyin God bídę́ęʼgo agháago nihééhoosįįdgo” ayóó baa hózhóonii átʼé! Jiihóvah nihééhósin, ayóóʼánihóʼní, índa shikʼis dííleeł nihóʼní.​—Ecclesiastes 12:13, 14.

5. God nihééhósin doogo haʼátʼíí ádiiʼnííł?

⁵ Nihił béédahózingo Mózes éí Jiihóvah ayóó bikʼis ńtʼééʼ. Jiihóvah náyookąąhgo ííłní: “Ánítʼéii shił ííshjání ánílééh.” Jiihóvah ánábidooʼniid, “Díí baa yáníłtiʼígíí bikʼehgo ádeeshnííł, háálá ajoobaʼ bee . . . nąąh tsídíkéezgo nízhiʼ bee nééhasin.” (Exodus 33:​12-17) Nihí ałdóʼ Jiihóvah ayóó nihééhósin doogo átʼé. Áko haʼátʼíí íidzaago éí Jiihóvah bikʼis diidleeł? Éí ayóóʼííníiʼníi doo, áádóó niheʼiinaʼ bee baa ádidiitʼááł.​—1 Corinthians 8:3 yíníłtaʼ.

6, 7. Jiihóvah bił ałkʼis niidlı̨́ yę́ęgi, haʼátʼíí nihitsʼą́ą́ʼ yidoołchxǫǫł?

⁶ Jiihóvah éí tʼáá nihikʼisgo ííníilzin doo. Ałkʼidą́ą́ʼ Oodlání Galéíshiyadi kéédahatʼínę́ęgi átʼéego nihí ałdóʼ éí “tʼáadoo nánídlíní da” ádaatʼéii áádóó átʼı̨́į dooleełígi tʼáadoo binaalteʼ daniidlíní doo. (Galatians 4:9) Díí íídą́ą́ʼ oodlání yę́ę tʼáá íídą́ą́ʼ God yéédahósin áádóó God hwééhósin. Áko Paul éí tʼáadoo nánídlíní da ádaatʼéii “bichʼįʼ tʼą́ą́ʼ dah nídaahkah” yiłníigo ání.

⁷ Nihí ałdóʼ ákódadiiʼníiłgo átʼé. Jiihóvah bééhosiilzįįdgo Séítan biyáádóó bił nidaaztʼiʼii ałtso nahjįʼ kwíilyaa. (Philippians 3:7, 8 yíníłtaʼ.) Scholarships doodaiiʼ naanish ílíinii nahjįʼ nidiniitʼą́. Sin doodaiiʼ jooł bee naʼaʼnéegi ayóó yiichįįhgo binahjįʼ béeso ląʼí ádoonííł shı̨́ı̨́ ńtʼéeʼ ndi, bitsʼą́ąjįʼ dah diidzá. (Hebrews 11:24-27) Díí tʼáá átʼé shee hólǫ́ǫgo sheʼiinaʼ yáʼátʼéeh  doo ńtʼééʼ tʼáadoo niidziní doo! Kwíiniidzingo Séítan bił nidaaztʼiʼii biyaa anídíítłish. Éí “tʼáadoo nánídlíní da” ádaatʼéii niidzinígíí bíká neiilnish doo.

8. Jiihóvah éí yéigo shééhósin doo nínízingo haʼátʼíí bee bidziilgo ádíílííł?

⁸ Jiihóvah éí yéigo shééhósin dooísh nínízin? Kótʼéego nitsíikeesgo éí naakigo íiyisíí ílíinii baa nitsíikees doo. Áłtsé éí Jiihóvah doo yitsʼádaakááhgóó yá ndaalʼaʼii áłahjįʼ yaa bił hózhǫ́, índa ayóóʼáyóʼní. (Hebrews 6:10 yíníłtaʼ; 11:6) Áko Jiihóvah há ndaalʼaʼii baa jiyooznahgo éí doo “tʼáá ákogi” éʼélʼíinii átʼé jinízin. Jiihóvah éí “daabíhígíí [áłahjįʼ] yééhósin.” (2 Timothy 2:19) “Tʼáá ákogi ádaatʼéii bá honítʼiʼjí,” índa yisdáyiiníiłgi Jiihóvah bił bééhózin.​—Psalm 1:6; 2 Peter 2:9.

9. Jiihóvah éí bidineʼé haitʼéego yaa bił hózhǫ́ǫ́ ńtʼéeʼgi łaʼ chʼíníʼá.

⁹ Jiihóvah éí bidineʼé yaa bił hózhǫ́ǫgo hoolzhiizh. (2 Chronicles 20:20, 29) Łaʼ baa nitsíníkees, Féro ayóó átʼéii bisiláo bikééʼ yinéełgo Tónteel Łichííʼ siyínígi Jiihóvah éí bidineʼé yisdáyíínil. (Exodus 14:21-30; Psalm 106:9-11) Díí áhóótʼįįdígíí éí 40 nááhaigo tʼahdii daʼníłtsʼą́ą́ʼgóó baa yádaatiʼ. (Joshua 2:9-11) Jiihóvah éí bidineʼé ayóóʼáyóʼníigo bibee adziilii yee yisdáyiiznil yę́ęgi bénéiilniihgo nihá yáʼátʼéeh doo. Díí haʼátʼíí biniyé bénéiilniih doo? Jó, Gag of Méígag bidiʼnínígíí nihaa tiih dookahgo bichʼįʼ hoolzhish. (Ezekiel 38:8-12) Ákogo díí baa hoolzhiizhgo tʼáá ákónéehee God nihaa bił hózhǫ́ǫgo íilyaa lá doo, bílaʼashdlaʼii éí tʼáadoo da.

10. Haʼátʼíí ałdóʼ baa nitsíikees doo?

¹⁰ Naaki góneʼ baa nitsíikees dooleełígíí éí Jiihóvah nihaa ahééh nízingi nihił ííshjání íidoolíiłgo átʼé. Łaʼda yáʼátʼéehii ádaatʼįįhgo bee shaa hodooʼnih danízin łeh, ndi Jiihóvah éí doo haʼdooléeł da. Haʼátʼíí biniinaa? Jesus ádííniid yę́ęgi átʼéego, diné haa dahaniihgo éí tʼáá íídą́ą́ʼ haa dahaznihgo átʼé. (Matthew 6:2 yíníłtaʼ.) Ndi éí áká anánílwoʼgo doo bee naa haʼnihgóogo éí Jiihóvah ‘yooʼı̨́įgo’ átʼé. Ááníiłii yaa ákonízingo Bí naʼdoolééł. (Matthew 6:4) Áádóó Jiihóvah éí bá ndaalʼaʼí tʼáadoo nidayólíhígíí yę́ę yee yikʼihadlí. Díí łaʼ baa nídadíitʼįįł.

11. Jiihóvah éí haitʼéego Mary yaa ákoniizı̨́ı̨́ʼ?

¹¹ Jiihóvah éí asdzání doo ayóó ádaa nitsíkeesí nilı̨́įgo Jesus bimá jidooleeł biniyé néidiiłtı̨́. Mary éí Názarethgi haghan, éí Jerúsalemdóó tʼáá nizaad. (Luke 1:26, 27 yíníłtaʼ.) Jiihóvah éí haʼátʼíí biniyé Mary néidiiłtı̨́? Diyingo naalʼaʼí Géíbriyel éí Mary, ní éí “God bił nílı̨́ sínílı̨́ı̨́ʼ [yáʼátʼéehgo  naa tsídeezkééz],” hodííniid. (Luke 1:28, 30) Hakʼéí Elízabeth bił hojoolneʼ yę́ęgi bee bééhózingo Mary éí Jiihóvah bił áhánígo ałkʼis jílı̨́ı̨́ ńtʼééʼ. (Luke 1:46-55) Jiihóvah éí Mary yaa ákonízingo índa doo hatsʼą́ąjįʼ dah diighááhgóó biniinaa díí doo nijólíi da ńtʼéeʼgo yee hakʼihasdliʼ.

12, 13. Jesus biʼdizhchı̨́įgo áádóó Mary éí sodizin bá hooghangóó yił niʼáazhgo haitʼéego baa hasʼnih?

¹² Jesus biʼdizhchı̨́įgo, Jiihóvah éí háí yił hoolneʼ? Jerúsalem índa Béthlehemgi naatʼáanii ílíinii dajílínígíí éí ndagaʼ. Ndi, Jiihóvah éí doo ayóó ádaa nitsídaakeesii danilı̨́įgo nidaʼniłkaadii Béthlehem bitsʼá honíʼáadi dibé yaa ádahalyą́ągo diyingo ndaalʼaʼí yichʼįʼ ayííłʼaʼ. (Luke 2:8-14) Áádóó díí nidaʼniłkaadii éí awééʼ ániid yizhchíinii yeíkai. (Luke 2:15-17) Mary dóó Jóseph éí kótʼéego Jesus baa hasʼnihgo yikʼee sodoolyiz. Jiihóvah éʼéłʼínígi dóó Séítan éʼéłʼı̨́įgi doo aheełtʼée da. Séítan éí astrologers danilínígíí éí Jesus índa bimá dóó bizhéʼé baa dookah yidííniid yę́ęgi áádóó Jerúsalemgi kéédahatʼíinii éí Jesus biʼdizhchı̨́įgo yaa dahodiiztsʼą́ąʼgo biniinaa nitsidaastłah. (Matthew 2:3) Áko binaagóó áłchíní yázhí ląʼí nidabiʼdistseed.​—Matthew 2:16.

¹³ Jiihóvah éí Ízrel dineʼé bee hazʼáanii yeiníláhą́ą áníigo ashkii jiłchíihgo éí 40 yiłkáahgo amá jílínígíí éí Jiihóvah bichʼįʼ nááʼjiiłnih. Áko Mary éí Jóseph dóó Jesus yił Béthlehemdóó hastą́ądi tsin sitą́ Jerúsalemdi kin biiʼ nááʼiiniihgóó jíkai. (Luke 2:22-24) Mary éí náádaʼiiłniihii haʼátʼíida shąʼ Jesus yá ádaʼdoolííł jinízin. Jiihóvah éí haitʼéego Jesus yénálniih doo? Jiihóvah éí Símiyan, “tsʼídá tʼáá ákogi ájítʼé,” índa hozhdísin, áádóó asdzání 84 binááhaigo God yá halneʼé nilı̨́įgo Anna, néidiiłtı̨́įgo éí Jesus éí Mesáíyah [Christ] dooleeł jiníigo baa nahodzisneʼ.​—Luke 2:25-38.

14. Jiihóvah éí haʼátʼíí yee Mary yikʼihasdliʼ?

 ¹⁴ Mary éí Jesus yáʼátʼéehgo baa áhojilyą́ągo biyaa hojiiłʼaʼgi, Jiihóvaásh tʼáá haa ahééh nízingo hoolzhiizh? Aooʼ, éí ákódzaa. Jiihóvah éí Mary ájíítʼįįdgi índa saad bee hajiisdzííʼ yę́ęgi Diyin Bizaad biiʼ bá bikʼi nidooʼniłgo yá áyiilaa. Mary éí Jesus tááʼ nááhaidóó baʼaan naʼałnííʼ nahasneʼ yę́ęgóó tʼáadoo bił tázhdííʼáazh dagi átʼé. Éí shı̨́ı̨́ asdzání bąąh áhásdįįdii jílı̨́įgo biniinaa haghandi Názarethdi dzizdá. Áko ląʼígóó diné nizhónígo dabiinááł yę́ęgóó tʼáadoo hwíínáał da. Ndi Jesus daaztsą́ągo éí ákwii nijigháá ńtʼééʼ. (John 19:26) Tʼahádóó éí Jesus bídahoołʼaahii tʼah doo níłchʼi diyinii bee dabiʼdilzįįh yę́ędą́ą́ʼ Jerúsalemdi bił nijikai. (Acts 1:13, 14) Áhwiindzingo éí ídahoołʼaahii bił níłchʼi diyinii bee hoʼdoolzı̨́ı̨́ʼ. Áko éí yáʼąąshdi hoolʼáágóó Jesus bił hojílǫ́ǫ dooleeł. Díí éí tsʼídá nizhónígo átʼéii bee hakʼihojisdliʼii átʼé!

15. Jiihóvah éí Jesus yaa bił hózhǫ́ǫgi haitʼéego yaa haadzííʼ?

¹⁵ Jesus éí hastóí ánaazíinii índa naatʼáanii dajílíinii shaa dahojiniih dooleełgi doo jinízin da. Ndi táaʼdi Jiihóvah éí biYeʼ ayóóʼííníshʼní yiłníigo yáʼąąshdę́ę́ʼ haadzííʼ. Díí shı̨́ı̨́ ayóó átʼéego Jesus yaa bił hóozhǫǫd! Jesus éí Jórdan tooh nílínígíí biiʼ taah hoʼdooltı̨́ı̨́dóó Jiihóvah ání: “Díí shiYeʼ ayóóʼóóshʼníinii jílı̨́, tʼáá íiyisí hąą shił hózhǫ́.” (Matthew 3:17) John Taah Iiníiłii tʼéiyá díí átʼéego haʼoodzíʼígíí yidiiztsʼą́ąʼgi átʼé. Áádóó Jesus éí nináánááhaigo bidiʼyoolyéełgo, táaʼgo bídahoołʼaahii Jiihóvah éí Jesus kwííłníigo deidiiztsʼą́ą́ʼ: “Díí shiYeʼ ayóóʼóóshʼníinii jílı̨́, tʼáá íiyisí hąą shił hózhǫ́; dahwíísółtsʼą́ą́ʼ.” (Matthew 17:5) Áádóó nááʼáłdóʼ Jesus bidiʼniilyı̨́įjįʼ tʼáá díkwíí jíní hadziihgo Jiihóvah éí yáʼąąshdę́ę́ʼ biYeʼ yichʼįʼ hanáánáádzííʼ.​—John 12:28.

16, 17. Jesus tʼáadoo nayólíii, Jiihóvah haʼátʼíí yee hakʼihasdliʼ?

 ¹⁶ Jesus éí God bikʼijįʼ yáníłtiʼ hodiʼníi doo, áádóó baa yáhásinígi átʼéego dazhdootsaałgo bił bééhózin. Ákótʼée ndi God íinízinígíí ádoonííł, shí íinisinígíí éí dooda jiníigo sozdoolzin. (Matthew 26:39, 42) “Yáhásin nilíinii doo yaa náʼáhodíltʼı̨́ı̨́góó tsin . . . bąąhjįʼ haʼólníigo tiʼhooʼnííh yikʼóoyá,” háálá Hazhéʼé éí haa hodoonih biniyé, bílaʼashdlaʼii éí ndagaʼ. (Hebrews 12:2) Jiihóvah éí haitʼéego Jesus yaa haznih?

¹⁷ Jesus éí nahasdzáán yikááʼ naagháhą́ądą́ą́ʼ éí yáʼąąshdi bee nił honishłǫ́ǫ́ ńtʼéʼígíí bee ayóó áníshtʼéego áshílééh níigo sodoolzin. (John 17:5) Diyin Bizaad éí doo haaʼígi da áníigo Jesus éí díí biláahgo tʼáadoo yíyííkeed da. Nahasdzáán bikááʼ Bizhéʼé íinízinii yinaashnishgo éí bikʼeh biláahgo shá doolyééł tʼáadoo niizı̨́įʼ da. Ndi Jiihóvah haidzaa? Éí Jesus tʼáadoo nayólíii yee yikʼihasdliʼ. Jesus éí Jiihóvah nááhodiisáago “aghánáhóóʼáadi dah honeesdá.” Áádóó níłchʼi jílı̨́įgo iiná doo óodįįh átʼéii hainílá, díí éí tsʼídá doo łaʼda kótʼéego iiná beilyée da ńtʼééʼ! * (Footnote níníłʼı̨́.) (Philippians 2:9; 1 Timothy 6:16) Jiihóvah éí Jesus tʼáadoo hatsʼą́ąjįʼ dah diiyáágóó biniinaa ayóó átʼéego bikʼihodzisdliʼ!

18. Jiihóvah tʼáá nihaa nitsékees doo niidzingo haʼátʼíí nihíká adoolwoł?

¹⁸ Jiihóvah tʼáá nihaa nitsékees doo niidzingo haʼátʼíí nihíká adoolwoł? Éí Jiihóvah doo yitsʼádaakáahii áłahjįʼ yaa ákonízin áádóó tʼáadoo naólníinii tʼáá ałhąąh yikʼihadlíigi baa nitsíikees doo. Níléí náasdi Jiihóvah yee nihikʼihwiizhdoodliiłígíí baa nitsíikees doo! Kʼad éí bee achʼįʼ nidahwiiʼnáanii bichʼįʼ haʼííníilníi doo, háálá díí tʼáá ałtso bidádahoníinii bił yóóʼahodoogááł. Áko haʼátʼíí shı̨́ı̨́ bee shééhoʼdílzin doo hwiindzinii ałdóʼ bił yóóʼahodoogááł. (1 John 2:17) Nihizhéʼé Jiihóvah éí bá nideilnishgi dóó bízhiʼ ayóóʼádeíníiʼníigo doo nihaidiyoonah da, háálá bí éí “Diyin God tʼáá ákogi” éʼéłʼíinii nilı̨́. (Hebrews 6:10) Tsʼídá tʼáadoo naólníinii yę́ę yee nihikʼi hozhdoodliił!