1-2. (a) Matthew 28:​18-20 góneʼ Jesus yee haadzíiʼgi Oodlání haʼátʼíí íiyisíí bindaanish? (b) Haʼátʼíí baa nídadíitʼįįł?

JESUS éí daaztsą́ą́dóó bikʼijįʼ náábiʼdiilzáago éí bídahoołʼaahii Gáliliidi dził siʼánígíí bíighahgi shaa dookah yiłníigo yá nihoníʼą́. (Matt. 28:16) Díí shı̨́ı̨́ éí “ashdladi neeznádiindóó tʼah nówehgo tʼáá łahjįʼ bichʼįʼ yitʼíní ínáázhʼdiilyaa,” yę́ędą́ą́ʼ áhóótʼįįd. (1 Cor. 15:6) Jesus éí haʼátʼíí biniyé bídahoołʼaahii áadi shaa dookah yidííniid? Naanish yeididooʼááł biniyé: Éí “ałʼąą dineʼé tʼáá ałtso ídahoołʼaahii danilı̨́įgo ádaahłeʼ,” yidííniid.—Matthew 28:​18-20 yíníłtaʼ.

² Jesus bídahoołʼaahii díí saad deidiiztsʼą́ą́ʼ yę́ęígíí éí ałkʼidą́ą́ʼ Oodlání yę́ę bitahdóó atah daazlı̨́ı̨́ʼ. Éí íiyisíí bindaanish ńtʼééʼ yę́ęgi éí Christ yídahoołʼaahii łaʼ ánáádazhdoodlííł. * Dííshjı̨́įdi daʼníłtsʼą́ą́ʼgóó tsʼídá tʼóó ahayóí Oodlání áłah nádleehgo bił nahazʼą́, éí tʼáá ákótʼéego íhoołʼaahii ádaalneʼgi tʼáá ałtso bindaanish. Dı̨́įʼgo naʼídíkid baa nídadíitʼįįł: Íhoołʼaahii álnéehgi haʼátʼíí biniyé ílíinii átʼé? Díí haitʼéego binaʼanish? Oodlání tʼáá ájíłtsoósh íhoołʼaahii ádajileʼ doo? Íhoołʼaahii álnéehgi haʼátʼíí biniyé bił haʼííníilníi doo?

3. John 14:6 dóó 17:3 éí íhoołʼaahii álnéehgi haʼátʼíí biniyé ílíinii átʼé ní?

³ Íhoołʼaahii álnéehgi haʼátʼíí biniyé ílíinii átʼé? Jó, Jesus yídahoołʼaahii tʼéiyá Diyin bikʼis danilı̨́į doo. Áádóó Christ yikʼehgóó deíkáahii éí bidaʼiinaʼ yáʼátʼéehgo deíłtʼééh índa iiná doo niitʼéehii yee nídaʼdooldįįł. (John 14:6; 17:3 yíníłtaʼ.) Jesus éí naanish ílíinii nihąą niinílá, ndi doo tʼáá sáhí deíníilníish da. Yilʼaadii Paul éí “Diyin God bił deíníilníísh” níigo tʼáá bí ádá índa ahánígo yił naakai yę́ę kwííłní. (1 Cor. 3:9) Dooládóʼ shı̨́ı̨́ naanish yáʼátʼéehii Jiihóvah dóó Jesus nihainíláa da!

4. Ivan dóó Matilde haʼátʼíí bitsʼą́ą́dóó bóhooʼaah?

⁴ Íhoołʼaahii álnéehgi ayóó baa hózhǫ́. Ivan dóó bichʼooní Matilde éí Colombiadi, éí dinééh léiʼ Davier wolyéego yił nahalneʼgo kóbíłní: “Sheʼiinaʼ yishtʼihígíí hashtʼedeeshłííł nisin, ndi doo átʼı̨́į da.” Davier éí naʼahízníltsʼin bee ajítah, éí azeeʼ tsiʼnaʼiiłáii, ayóó ajidlą́, índa hweʼatʼééd Erika bił haghan. Ivan ání: “Atsʼáhoníʼą́ądi kin sinilgo áadi haghan. Éí atiin dah hashtłʼish, áádóó ląʼí nihee ahénínáʼálkiʼgo ákǫ́ǫ́ dziʼizí bee ałnánéiitʼash. Davier éí yáʼátʼéehgo nitsékees silı̨́įʼgo baa ákoniidzı̨́ı̨́ʼ, áko Erika ałdóʼ nihíiyáago Diyin Bizaad yíhoołʼaahgo yaa nídiidzá.” Davier éí azeeʼ tsiʼnaʼiiłáii, ayóó ajidlą́, índa naʼahízníltsʼin bee ajítah yę́ęgi nahjįʼ nizhdiníʼą́. Erika bił ahíjízyeh. Matilde ání: “Davier dóó Erika éí 2016 yę́ędą́ą́ʼ baptize álnéehgo Davier kónínę́ę bénéiilniih, ‘Sheʼiinaʼ yishtʼihígíí hashtʼedeeshłííł nisin, ndi doo átʼı̨́į da.’ Baptize áhoʼdiilyaago ayóó átʼéego baa nihił hózhǫ́ǫgo bikʼee yiicha.” Tʼáá aaníí éí łaʼda Christ yíhoołʼaahii yileehgo ayóó baa hózhǫ́.

5. Íhoołʼaahii álnéehgi haitʼéego áłtsé áʼdiilnííł?

⁵ Íhoołʼaahii álnéehgi áłtsé éí Jiihóvah baa íhwiideeshʼááł danízinii ‘hazhóʼó hadíníitaał.’ (Matt. 10:11) Diné tʼáá altso bił ałdááh néiidáhígíí Jiihóvah bee bił hwiilneʼgo éí tʼáá aaníí Jiihóvah Yá Halneʼé niidlı̨́į doo. Christ éí nidahołneʼ nihiłníigi bikʼehgóó ániitʼéego éí tʼáá aaníinii Oodlání niidlı̨́.

6. Nahólneʼgi diné daníistsʼą́ąʼ dooleełgo éí haitʼéego biniyé hashtʼéédiitʼįįh doo?

⁶ Łaʼ éí Diyin Bizaad bíhwiideeshʼááł danízin, ndi łaʼ éí shí doo shikʼehdii da danízin nidahalin łeh. Éí bá bíniidlı̨́įgo bíhwiideeshʼááł dínóozįįłgi bee bíká adiilwoł. Nahaneʼgi ayóó yiishchįįh doo nínízingo éí hazhóʼó biniyé hashtʼéédiitʼįįh. Baa hodoonihii hazhóʼó baa nitsíníkees. Áádóó kótʼéego bee áká adeeshwoł nínízingo ałkééʼ ninániʼnił.

7. Baa hodíílnihígíí haitʼéego hadííłtʼih? Haʼátʼíí biniyé ił ídlı̨́ bee hazhóʼó íísíníłtsʼą́ąʼ doo?

⁷ Kótʼéegoda naʼídíilkid doo: “Nańdíshkidgoósh tʼáá áko? Achʼįʼ nahwiiʼná éí tʼáá ałtsogóó diné beinítʼı̨́. Áko bílaʼashdlaʼii binahatʼaʼ haitʼéhígíí díí tʼáá altso nahjįʼ nihá kwíidoolííł, nínízin?” Áádóó Daniel 2:44 bił baa nídíitʼįįł. Doodaiiʼ kótʼéegoda naʼídídííłkił: “Áłchíní haʼátʼíí bee nanitingo éí hóyą́ągo dínóoyééł? Díí haitʼéego baa nitsíníkees?” Áádóó Deuteronomy 6:​6, 7 bił baa nídíitʼįįł. Haʼátʼíí shı̨́ı̨́ diné shá deididootsʼı̨́ı̨́ł nínízinígíí hazhóʼó  baa tsídííkos. Diyin Bizaad yee naʼnitinii yíhwiidoołʼáałgi éí haitʼéego lá bíká adoolwoł nínízingo bá baa nitsíníkees. Nichʼįʼ yáłtiʼgo hazhóʼó yísíníłtsʼą́ą́ʼ áádóó bí yaa nitsíkeesdę́ęʼgo bá baa ákonínízin. Áko éí binahjįʼ hazhóʼó bééhodíísįįł áádóó ninaʼnitin ná yiyíistsʼą́ąʼ doo.

8. Haʼátʼíí biniyé tʼáá ahą́ą́h łaʼda baa níjídáah doo?

⁸ Łaʼda éí Diyin Bizaad bíhwiideeshʼááł tʼah doo niizįįhgóogo éí áłtsé baa níjídáahgo binaʼanishii átʼé. Díí haʼátʼíí biniyé? Jó, éí baa nínáájídáahgo hooghangida doo naagháhí da łeh. Áádóó díkwíidida baazhniyáago Diyin Bizaad bíhwiideeshʼááł dínóozįįłgoda átʼé. Béénílniih, kʼizhdiléehgo éí tʼáá ahąąh tó bił nijiikáahgo dínísééh. Tʼáá ákótʼé, łaʼda éí Jiihóvah dóó Christ ayóóʼáyóʼníigi dínóoséełgo éí tʼáá ahą́ą́h Diyin Bizaad bee bił nahwiilneʼ doo.

9-10. Haʼátʼíí biniyé Oodlání tʼáá ájíłtso Diyin Bizaad bíhwiideeshʼááł danízinii atah bíkadazhnitáa doo?

⁹ Tʼáá aaníí Diyin Bizaad bíhwiideeshʼááł danízinii éí Oodlání tʼáá ájíłtso atah hadazhnitáa doo. Éí awééʼ yóóʼííyáago chʼééh haʼnitá nahalingo binaʼanishii átʼé. Éí haitʼéego? Ashkii yázhí léiʼ tʼáá bighandóó yóóʼííyá haʼníigo baa haneʼ yę́ę baa nitsíníkees. 500dóó baʼaan diné ánéelą́ąʼgo ashkii yázhí hadazneeztą́ą́ʼ. Éí 20 ahééʼílkidóó bikʼijįʼ índída dáʼákʼeh ałníiʼgi łaʼ bikʼíníyá. Díí akʼíníyáhígíí doo tʼáá sáhí bikʼíníyá da ní. “Niidląʼígo ahił nidashiilnishgo bikʼíniikai,” jiní.

¹⁰ Diné tʼóó ahayóí tʼáá éí ashkii yázhí átʼéhígi ádaatʼé. Éí yóóʼaheeskai. Ił chohooʼı̨́ bee ádaadin, áko shíká aʼdoowoł danízin. (Eph. 2:12) 8 million áníidlą́ą́ʼ éí  kódaatʼéhígíí bíkadaniitá. Ni shı̨́ı̨́ éí łaʼda Diyin Bizaad bíhwiideeshʼááł nízinii tʼah doo łaʼ bikʼínínáah da. Ndi, tʼáá ákwii nidahalneʼígíí shı̨́ı̨́ łaʼ yikʼíníyáago átʼé. Nihibrother doodaiiʼ nihisister łaʼ Christ yíhoołʼaahii silı̨́įʼgi yee yíká eelwodgo éí tʼáá ájíłtso atah akʼídazneeztą́ʼígíí tʼáá ákónéehee baa hoł dahózhǫ́ǫ doo.

11. Diyin Bizaad bee nanítinii nee ádin ndi, íhoołʼaahii álʼı̨́įgi haitʼéego łahdóó bee anánílwoʼgo átʼé?

¹¹ Kʼad shı̨́ı̨́ éí łaʼda Diyin Bizaad bee nanítinii nee ádin ndi, íhoołʼaahii álʼı̨́įgi łahdóó bee anánílwoʼ dooleeł. Éí łaʼda Kingdom Hallgi índída nihaa níyáago bił kʼé ahididííʼniiłgo bíká adiilwołda. Kótʼéego kʼé diníigo éí ayóóʼádaʼahííníiʼníigi bee nihééhoʼdílzinii bił ííshjání íinilaa doo. (John 13:​34, 35) Áłah néiidleehgi áłtsʼísígo comment aʼíinilaa ndi, díí ániid nihaa níyáhígíí éí kótʼéego niheʼoodląʼ ííshjání éʼélʼı̨́į dooleeł lá nízin doo. Áádóó tʼáá ániidígo nahalneʼé silı̨́įʼgo biłda nahodíilnihgo éí Diyin Bizaad yee naʼnitin dooleełgi bee bíká adiilwoł. Kwíitʼı̨́įgo éí Christ yeʼełʼı̨́į dooleełígi bee nanítingo átʼé.—Luke 10:​25-28.

12. Íhoołʼaahii dooleełgo bee naʼniitingo éísh ayóó yiichįįhgo tʼéiyá bohónéedzą́? Łaʼ chʼíníʼaah.

¹² Diné éí Christ yíhoołʼaahii dooleełgo bee nanítingo éí ayóó átʼéego jiichįįhgo tʼéiyá nihá bohónéedzą́ doo niidzin da doo. Éí haʼátʼíí biniyé ákohwiindzin? Faustina, Boliviadę́ę́ʼ naagháago baa haneʼ. Éí Jiihóvah Yá Dahalneʼé tʼóó bééhojoosįįdígo naaltsoos wóltaʼgi doo bééhojísin da. Áko kʼad éí tʼáá áłtsʼísígo naaltsoos jółtaʼgo bóhojiiłʼą́ą́ʼ. Kʼad éí baptize áhoʼdilyaago nazhnitingi ayóó bízhneedlı̨́. Tʼáá damóo náʼoodleeł 5 yiltʼéego Diyin Bizaad bee nazhnitin. Azhą́ díí nazhnitinígíí éí ayóó haláahgo naaltsoos dayółtaʼ ndi, éí 6 yiltʼéego nazneeztą́ʼígíí baptize ádaalyaa.—Luke 10:21.

13. Nihinaanish daaląʼí ndi, íhoołʼaahii álnéehgi haʼátʼíí bitsʼą́ą́dóó bee akʼihojidlí?

¹³ Oodlání ląʼígóó binaanish dahólǫ́. Ákondi Diyin Bizaad bee nidíʼnóotįįłgi yá ndahasʼą́ągo yee bił dahózhǫ́. Melanie baa haneʼgo éí Alaskadi bichʼéʼé 8 binááhaigo tʼáá sáhí yinisé. Full-time nijilnish áádóó hazhéʼé éí cancer bidoolnaʼgo baa áhojilyą́. Atsʼáhoníʼą́ądi kin sinilgo áadi haghan, éí tʼáá hó tʼéiyá ákwii Jiihóvah Yá Halneʼé jílı̨́. Deeskʼaaz bichʼįʼ shidziilgo nahashneʼ doo jiníigo bíká sozdilzin łeh, háálá łaʼda Diyin Bizaad bee nanishtin dooleeł jinízin. Ńtʼééʼ Sara bił áhééhojooszįįd, éí Diyin bízhiʼ hólǫ́ǫ́ lágo hoł bééhózingo baa hoł hózhǫ́. Éí tʼahádóó Diyin Bizaad  bíhwiideeshʼááł niizı̨́ı̨́ʼ. Melanie ání: “Fridayjįʼ iiłkáahgo ayóó chʼééh nídíshdááh, ndi shichʼéʼé bił Diyin Bizaad bínaʼniiltingóó ałnánéitʼashgo ayóó nihíká eelwod. Sara yínaʼádíłkidígíí bá research ánéílʼįįhgo ayóó bíniidlı̨́, áádóó Jiihóvah yikʼis silı̨́įʼgo ayóó baa nihił hózhǫ́.” Sara éí bichurch yitsʼá níyáago biniinaa bikʼijįʼ ídlı̨́ asdlı̨́įʼgo yichʼįʼ bidziilgo áʼdiilyaa, áádóó baptize ábiʼdilyaa.

14. (a) Íhoołʼaahii álnéehgi éí haitʼéego łóóʼ hajiileeh nahalin? (b) 2 Timothy 4:​1, 2 haitʼéego naniiłná?

¹⁴ Azhą́ łaʼda éí íhoołʼaahii deeshłeeł nízinii tʼah doo łaʼ bikʼínínáa da ndi, tʼááká bikʼidóónááł lágo. Shą́ą́ʼ Jesus éí íhoołʼaahii álnéehgi éí łóóʼ hajiileeh nahalin níigo yee haadzííʼ. Łaʼda łóóʼ hayiileehgo éí doo hąh da índída łóóʼ hailoh. Éí tłʼééʼ bíighah doodaiiʼ tʼah abíínígo yésdáah łeh, áádóó łahda éí ayóó ánízáágóó yiniyé bił nídíʼoł. (Luke 5:5) Tʼáá ákótʼéego íhoołʼaahii álnéehgi bił haʼólníigo “łóóʼ hajiileehgo” bijísdáhígi átʼé nahalin. Éí ląʼí ahééʼiilkeed, tłʼééʼ índa jı̨́įgo, áádóó daʼníłtsʼą́ą́ʼgóó biniyé nízhdídáah łeh. Haʼátʼíí biniyé ákótʼé? Jó, éí łaʼ bikʼínááʼdoodááł biniyé. Wołí bee kódaatʼínígíí éí haneʼ dideestsʼı̨́ı̨́ł danízinii yikʼídahakááh. Łaʼda bił nahodeeshnih nínízingo éí hooghangi nídaʼíistʼą́ągo doodaiiʼ diné dahólǫ́ǫ́góó diidáałgo, éísh bá ashjaʼ íínísin dooleeł?—2 Timothy 4:​1, 2 yíníłtaʼ.

15. Diyin Bizaad bee nazhʼnitingo haʼátʼíí biniyé haʼjólníi doo?

 ¹⁵ Diyin Bizaad bee nazhʼnitingo haʼátʼíí biniyé haʼjólníi doo? Naniitinígíí éí Diyin Bizaad hazhóʼó bee bíhwiidiyiilʼáałgo ayóóʼáyóʼníi doo. Diyin Bizaad Áyiilaii Jiihóvah ałdóʼ yééhodoosįįłgi bee bíká anéiilwoʼ doo. Jesus éí bídahoołʼaahii haʼátʼíí yá yee hasʼą́ągi, áádóó Oodlání ídlı̨́įgi éí haitʼéego hweʼiinaʼ joołtʼih dooleełígi ałdóʼ bee naniitin doo. Diyin Bizaad bikʼehgo oodáałii yiʼdoolíiłgi bee bichʼįʼ anáhwiitʼéehgo bił haʼííníilníigo bee bíká anéiilwoʼ doo. Łaʼ éí bintsékees índa áániił ńtʼééʼ yę́ęgi tʼáadoo hodinaʼí nahjįʼ niidiʼááh, łaʼ éí tʼáá bee dahodinaah.

16. Raúl baa haneʼgi haʼátʼíí bitsʼą́ą́dóó bóhooʼaah?

¹⁶ Perudi missionary nilı̨́įgo éí Diyin Bizaad yee neinitinii yił haʼólníigo yíká eelwod. Éí ání: “Raúl wolyéego naakigo naaltsoos bee Diyin Bizaad binahjįʼ nanétą́ą́ʼ. Ndi, Diyin Bizaad yiiʼdóó yíhoołʼaahígíí bikʼehgóó doogáałgi ayóó bá nantłʼa. Ahéʼáskéegi bichʼįʼ anáhóótʼiʼ, bizaad doo yáʼátʼéeh da, doo yáʼátʼéehii ájooníiłgo biniinaa haʼáłchíní doo ajílı̨́ı̨́góó haa nitsídaakees. Ndi, tʼáá ahą́ą́h áłah náʼádleehgi nádááh, áko baa náshdáahgo bighan bił hazʼą́ągi bíká anáshwoʼ. Tʼóó bééhosésįįdóó 3 nááhaigo éí baptize ábiʼdilyaa.”

17. Díí bikééʼdóó haʼátʼíí bídahwiidiilʼááł?

¹⁷ Jesus éí “ałʼąą dineʼé tʼáá ałtso ídahoołʼaahii danilı̨́įgo ádaahłeʼ,” nihidííniid. Díí beʼdoolníiłgo éí diné doo nihígi átʼéego nitsídaakeesii bił nidahwiilneʼ. Éí doo churchgóó ałnáádaakah da, doodaiiʼ Diyin doo hólǫ́ǫ da danízinii ádaatʼéii ałdóʼ bił nidahwiilneʼ. Díí bikééʼdóó éí diné daʼníłtsʼą́ą́ʼdę́ę́ʼ deíkáhígíí haitʼéego nizhónígo haneʼ bee bił dahwiilneʼ dooígi baa ídahwiidiilʼááł.