1. 3 John 3, 4 bikʼehgo haʼátʼíí nihił hóshǫ́?

YILʼAADII John díí łaʼ yíká eelwodgo tʼáá aaníinii yídahoołʼą́ą́ʼ índa tʼahdii yidadiilkaalgo Jiihóvah yá ndaalʼaʼgo dooládóʼ yaa bił hózhǫ́ǫ da ńtʼééʼ. Tʼóó ahayói bee bichʼįʼ anídahaztʼiʼ, áko John éí Oodlání baʼáłchíní nahalingo yaa nitsékees ńtʼééʼ, beʼoodląʼ dabidziil yá yinízingo yéigo yinaashnish. Tʼáá ákótʼé, éí nihaʼáłchíní doodaiiʼ bíká anéiilwoʼgo tʼáá aanííjí oodląʼ yíhoołʼą́ʼígíí Jiihóvah yaa ádítʼáahgo áádóó tʼáá yá naalʼaʼ yileehgo ayóó baa nihił hózhǫ́ǫ łeh.—3 John 3, 4 yíníłtaʼ.

2. John éí haʼátʼíí biniyé táaʼgo naaltsoos ádayiilaa?

² 98 C.E. yoołkááł yę́ędą́ą́ʼ, John éí Éfesasdi doodaiiʼ binaagóó daatsʼí kééhojitʼı̨́ı̨́ ńtʼééʼ, éí Pátmos awáalyaadę́ę́ʼ hwéédoochidgo áajįʼ jiníná. Kweʼé nahalzhiishgo Jiihóvah biníłchʼi diyinii bidiisnáaʼgo táaʼgo naaltsoos áyiilaa. Naaltsoos yiniyé áyiilaaígíí éí Oodlání danilíinii Jesus tʼáá dajoodlą́ą doo índa tʼáá aanííjí oodląʼ bee dajíkáah doo.

3. Haʼátʼíí ndaʼídíkid nihił ííshjání ádoolnííł?

³ Daalʼaadii danilínę́ę John tʼéiyá chʼééyá, doo tʼáá aaníí ndaʼnitinii congregations yidaʼdoolohgi baa hániʼ. * (1 John 2:​18, 19, 26) Apostates éí God béédahoniilzin daaníi ndi, Jiihóvah bibee hazʼáanii doo yikʼeh dahółʼı̨́į da. John yee naʼneeztą́ą́ʼ yę́ę kʼad baa nídadíitʼįįł. Táaʼgo ndaʼídíkid bichʼįʼ ééhodiilzįįł: Haʼátʼíísh ááhyiłní tʼáá aanííjí oodląʼ bikééʼ joogááł? Haʼátʼíísh nihitsʼą́ą́ʼ niʼ íidoolííł?  Bíká anéiilwoʼígíí haitʼéego tʼáá aanííjí oodląʼ doo yitsʼá doogáał da?

4. 1 John 2:​3-6 dóó 2 John 4, 6 éí haitʼéego tʼáá aanííjí oodląʼ bikʼehgo oodáał doo nihiłní?

⁴ Tʼáá aanííjí oodląʼ bikʼeh joogáałgo éí Diyin Bizaad biiʼdóó naʼnitin tʼáá aaníiniiígíí bíhwiidiilʼááł. Áádóó ‘Jiihóvah bibikʼeh óʼooʼníiłii tsʼídá bikʼeh dahoniilʼı̨́į doo.’ (1 John 2:​3-6; 2 John 4, 6 yíníłtaʼ.) Jesus éí Jiihóvah bikʼeh hólʼı̨́įgi tsʼídá nizhónígo áʼiilaa. Jiihóvah bikʼeh dahoniilʼı̨́įgo éí Jesus áʼiilaaígíí tʼáá bíniilʼánígi átʼéego bikʼehgo yiidáał doo.—John 8:29; 1 Pet. 2:21.

5. Haʼátʼíí éí nihił tʼáá aaníigo deiniidlą́ą doo?

⁵ Tʼáá aanííjí oodląʼ bikʼehgo joogáałgo Jiihóvah éí Diyin doo biyoochʼíidii nilı̨́įgi doo naaki nilı̨́ı̨́góó yiniidlą́ą doo. Bizaad biiʼdóó tʼáá ałtso yee nihił halneʼígíí éí tʼáá aaníigo yiniidlą́ą doo. Índa Jesus éí Mesáíyah baa hóoneʼ yę́ę bí átʼı̨́įgi yiniidlą́ągo díníilzin doo. Dííshjı̨́įdi tʼóó ahayói Jesus éí God biNaatʼáanii bikʼi hodiiniiʼgo anoint ályaagi doo dayoodlą́ą da. John éí “doo tʼáá aaníígóó nidaʼnitinii tʼóó ahayóí” diné yóóʼiidínóoʼahgi doo yiniyé hashtʼeʼ ádaʼdólzin da, ní. Díí Jiihóvah dóó Jesus baa haneʼgi tʼáá aaníí ákódzaa. (2 John 7-11) John áʼiilaa: “Háishąʼ biyoochʼíidii nilı̨́? Jesus éí doo Christ átʼı̨́į da, jinínígíí lą́ą.” (1 John 2:22) Yóóʼadaʼniiʼaahii bitsʼąą ániitʼée doogo éí Diyin Bizaad bíhwiilʼaahgo bidiilkaal doo. Kótʼéego tʼéiyá Jiihóvah dóó Jesus hazhóʼó bééhodiilzįįł. (John 17:3) Áko doo nihił naaki nilı̨́ı̨́góó tʼáá aanííjí oodląʼ nihee hólǫ́ǫ niidzin doo.

6. Oodlání ániid ndaakaii éí tʼáá aanííjí oodląʼ yigáałgi haʼátʼíí bidínóołtłʼah?

⁶ Tʼáá ałtso Oodlání danilíinii éí bílaʼashdlaʼii binaʼnitinii yóóʼahodínóoʼahgi bee ádaa áhojilyą́ą doo. (1 John 2:26) Ániid ndaakaii íiyisí bee ádaa ádahojilyą́ą doo. Nihisister Alexia * 25 binááhaigo ájíní: “Nooséłí nishłı̨́įgo nihookááʼ dineʼé yikʼiʼdadiitįįhii shiʼdiiłʼáago baa nitséskees. Éí evolution dóó bílaʼashdlaʼii binaʼnitin ádaatʼéii. Díí łahda yáʼátʼéehgo baa nitséskees łeh. Ndi Diyin Bizaad yee  naʼnitinígíí nahjįʼ kwíínísingo óltaʼdi bíhooshʼaahígíí aláahdi yideeshdląąłgi doo shił yáʼátʼéeh da.” Alexia éí naaltsoos Life—How Did It Get Here? By Evolution or by Creation? yiyííłtaʼ. Tʼáadoo díkwíí damóo aleehí doo hoł naaki hólǫ́ǫ da dzizlı̨́ı̨́ʼ. Ájíní: “Diyin Bizaad biiʼdóó tʼáá aanííjí naʼnitinii bóhoołʼą́ą́ʼ. Baa ákoniizı̨́ı̨́ʼ díí bikʼehgo yisháałgo tʼéiyá shił hózhǫ́ índa shił hodéezyéél.”

7. Haʼátʼíí bitsʼąą ániitʼée doo, éí haʼátʼíí biniyé?

⁷ Tʼáá ałtso Oodlání danilíinii, ániid naagháii doodaiiʼ náás daazlı̨́įʼii, éí Jiihóvah bá naʼaʼaʼgi doo tʼóó áhozhdilʼı̨́į da doo. John nihił ííshją́ą́ áyiilaago éí tʼáá aanííjí oodląʼ biiʼ oodáałgo éí doo yáʼádaashxóonii tʼáá bił doo baa oodáał da doo. (1 John 1:​5, 6) Jiihóvah nihaa bił hózhǫ́ǫ doo niidzínígo éí díí tʼáá áłahjįʼ bénéiilniih doo. Niʼiidzííh éí doo yitʼı̨́į da tʼáadoo niidziní doo, háálá Jiihóvah éí tʼáá ałtsoní yooʼı̨́.—Heb. 4:13.

8. Haʼátʼíí bitsʼąą ániitʼée doo?

⁸ Bílaʼashdlaʼii éí bąąhígi ádaatʼéii yaa nitsídaakeesígi nahjįʼ kwííníilzin doo. Yilʼaadii John áʼiilaago ání: “Bąąhági átʼéii nihiiʼ ádin dadiiʼníigo ádindaʼiidloʼ.” (1 John 1:8) John bíyoołkááł yę́ędą́ą́ʼ, apostates éí bąąhígi ádaatʼéii tʼáá ájooníił ndi, God tʼáá bikʼis jílı̨́į doo daaní. Dííshjı̨́įdi tʼóó ahayói tʼáá ákótʼéego nitsídaakees. God yinishdlą́ daaníi ndi, bąąhígi ádaatʼéii haitʼéego Jiihóvah yaa nitsékeesgi doo bił danilı̨́į da, éí ił ashtéézh hazʼą́ągi íiyisí. Áko éí tʼáadoo átʼéhí da, tʼáá shí nisinígi átʼéego hinishná hwiindzin.

9. Ániid ndaakaii éí haʼátʼíí biniyé Diyin Bizaad bikʼeh ádajítʼéego há yáʼátʼééh?

⁹ Oodlání ániid ndaakaii éí yéigo bee bichʼįʼ nidahwiiʼná. Yił daʼółtaʼii doodaiiʼ  yił ndaalnishígíí doo yáʼátʼééhgóó ádaʼoolʼįįłii yee bídaʼatsʼih. Aleksandar wolyéego ákójiidzaa. Ájíní: “Óltaʼdi atʼééké łaʼ shił díníítish dashiłníigo shídaʼatsʼih. Neʼatʼééd ádin, nádleeh daatsʼí nílı̨́, dashiłní.” Kótʼéego naníhoʼdinitah ládą́ą́ʼ, neʼoodląʼ bee sínízı̨́įgi béénílniih. Ádaa sínítiʼgi, nitsʼíís bił hazʼą́ągi, níniʼ siláagi, áádóó Jiihóvah bił kʼéʼahidíʼníigi baa áhólyą́. Naʼíhonitaah tʼáá bikʼeh nídídleeh bikʼehgo doo ná nantłʼa da doo. Áádóó béénílniih, ił ashtéézh éí tʼáá ádzaagóó nideigizgoígíí éí Séítan bitsʼą́ą́dóó hiditʼééh. Áko nihí éí kótʼéego tʼáadoo nitsíikeesígo éí ‘bąąhági átʼéii bikʼeh diidlı̨́.’—1 John 2:14.

10. 1 John 1:9 bikʼehgo nihíniʼ hashtʼedítʼéego éí Jiihóvah bá neiilʼaʼgi haitʼéego nihíká análwoʼ?

¹⁰ Jiihóvah éí haʼátʼíí shı̨́ı̨́ yáʼátʼééh índa doo yáʼátʼéeh da didooniiłgi Bí bąąh silá. Tʼáá bíniilʼánígi átʼéego doo chʼídíníidáał da. Chʼídiniidzáá ládą́ą́ʼ éí asiilziihígíí Jiihóvah néiniikąąhgo bee ádaa hodiilnih. (1 John 1:9 yíníłtaʼ.) Yéigo asiilziihgo éí Jiihóvah yee nihíká adoolwołígíí nihá yisłáago áyiilaa éí elders nihaa ádahalyą́ągo nihíká adoojah. (Jas. 5:​14-16) Ákondi asiilziih yę́ę baa nihíniʼgo tʼáadoo éí tʼéí baa nitsíikeesí doo. Haʼátʼíí biniyé? NihiTaaʼ ayóóʼóóʼníinii éí biYeʼ nihá ninéidiníʼą́ągo nidaʼayiilzíih ndi, nihaa néididooʼááł. Jiihóvah éí nihí bąąhígi átʼéii nihá yóóʼanídideeshʼááł níigo éí tʼáá aaníí ání. Nihíniʼ hashtʼedítʼéego éí Jiihóvah bá neiilʼaʼgi nihá bohónéedzą́ągo áyiilaa.—1 John 2:​1, 2, 12; 3:​19, 20.

11. Doo tʼáá aaníí naʼnitinii éí niheʼoodląʼ yidoołchxoołgi haitʼéego bee ádaa áhwiilyą́ą doo?

¹¹ Apostate bindaʼnitin nahjįʼ kwíiníilzin doo. Oodlání bicongregation hahoolzhiizhdóó wóshdę́ę́ʼ, Devil éí Oodlání danilíinii biʼoodląʼ yaatįįh nádááh. Áko  biniinaa tʼáá aaníinii índa yoochʼííd ádaatʼéii nihił béédahózin doo. * Danihijoołáhígíí éí dabiyoochʼíidgo Internet doodaiiʼ social media chodayoołʼı̨́įgo Jiihóvah yiniidlą́ągi dóó nihibrothers ayóóʼííníiʼníigi yaatįįh nákaah. Béénílniih díí éí yoochʼííd ádaatʼé áádóó Séítan bitsʼą́ą́dę́ę́ʼ hiditʼééh, áko nahjįʼ bitsʼąą ániitʼée doo!—1 John 4:​1, 6; Rev. 12:9.

12. Tʼáá aaníinii baa íhwiilʼą́ʼígíí haʼátʼíí biniyé yéigo baa ahééh niidzin doo?

¹² Séítan éí niheʼoodląʼ nayínítaahgi bitsʼąą ániitʼée doogo éí Jesus baʼííníidlíigi índa Jiihóvah íinízinígi átʼéego choboołʼı̨́įgi yéigo yiniidlą́ą doo. Jiihóvah biorganizationgi baʼahódlíigo naalʼaʼí tʼéiyá choyoołʼı̨́įgi ałdóʼ yiniidlą́ą doo. (Matt. 24:​45-47) Diyin Bizaad tʼáá ahą́ą́h neilkaahgo éí niheʼoodląʼ hózhǫ́ yéigo bidziil íidoolííł. Kwíitʼı̨́įgo éí tsin bihétłʼóól nízaadgóó łeeh níísánígíí nahoniidlin doo. Paul Kalásiigi yaa anájahígíí yichʼįʼ íʼiilaago kóní: “Christ Jesus nihiBóhólníihii nihee dahazlı̨́ʼígi átʼéego baa dadzíínóhłíigo bee dayínóhkááh, tʼáá nidanihidiʼneestą́ą́ʼ yę́ęgi átʼéego Christ biiʼ nihihétłʼóól danéeséehgo bikááʼdóó daʼohtłʼingo niheʼoodląʼ bee nihidahoníłdzil doo.” (Col. 2:​6, 7) Niheʼoodląʼ bidziil íilnéehgi yéigo bineilnishgo Séítan índa bá ndaalʼaʼí tʼáá aaníí oodląʼ yitsʼá nihidínóoʼahgi doo bá bohónéedzą́ą da doo.—2 John 8, 9.

13. Haʼátʼíí nideíníidlíi doo, éí haʼátʼíí biniyé?

¹³ Nihokááʼ dineʼé danihijoołáa dooígíí tʼáá naólní. (1 John 3:13) John ání, “Doo yáʼáshǫ́ǫ́góó naagháii nihokáaʼgi tʼáá átʼéé nítʼééʼ bee bóhólníihgo ałdóʼ nihił béédahózin.” (1 John 5:19) Díí nihoogháahjįʼ yoołkáałgo Séítan yéigo báháchįʼ. (Rev. 12:12) Éí tʼóó baaʼihígi ádaatʼéii, apostates yoochʼííd ádeiłʼíinii, áádóó atíʼílʼı̨́ ádaatʼéii nihikʼijįʼ choyoołʼı̨́. Séítan bił bééhózingo bá nihodootʼáałjįʼ áyídídę́ę́ʼ bichʼįʼ hoolzhish. Áko niheʼoodląʼ yidínóołtłʼahgi áádóó nahaneʼgi nihitsʼą́ą́ʼ neʼ íidoolííł nízin. Łaʼ daakéyahgóó nidahwiilneʼ yę́ę nihitsʼą́ą́ʼ neʼ ádaalyaa. Ndi brothers índa sisters yéigo hadaʼólní. Azhą́ Jiihóvah bidineʼé bíighahí ííłʼı̨́į ndi, bedaʼoodląʼ yéigo bidziilgo yee naazı̨́!

14. Nihibrothers índa nihisisters tʼáá aaníinii naʼnitin tʼáá yidiilkaal doogo haitʼéego bíká anéiilwoʼ doo?

¹⁴ Nihibrothers índa nihisisters tʼáá aanííjí oodląʼ yee naazı̨́į doogo éí aa aʼááh hasin bee bíká anéiijah doo. (1 John 3:​10, 11, 16-18) Yáʼátʼéehgo nihił ndahazʼą́ągo índa anáhóótʼiʼ haleehgo ayóóʼádaʼahííníiʼníi doo. Łaʼda ayóóʼáyóʼníinii bitsʼą́ą́ʼ ádingo bee haʼahóníinii yídin nilı̨́įgoda átʼé doodaiiʼ haitʼéegoda kʼadę́ę bíká aʼalyeed? Natural disaster bitsʼą́ą́dóó nihibrothers binaalyeʼé ałtso bąąh náádiilyáagoda, índa biKingdom Hall doodaiiʼ bighan áńdoolníiłgi tʼáadoo bíká oolyeedígóó baa ákonínízin. Ayóóʼóóʼní dóó aa aʼááh hasin nihikʼisóó bił ííshją́ą́ ádiilníiłgo éí doo nihizaad tʼéí bee yéiiltiʼ da, ndi íiʼníiłgi bee bééhózin.

15. 1 John 4:​7, 8 bikʼehgo haa díínííł nihiłní?

¹⁵ Ayóóʼádaʼahííníiʼníigo éí yáʼąąshii nihiTaaʼ ayóóʼóóʼníinii beʼiilʼı̨́. (1 John 4:​7, 8 yíníłtaʼ.) Niʼiidzííh ałhá yóóʼanídahidiitʼaahgo éí ayóóʼóóʼní ííshją́ą́ ííníilzin. Háida nihíniʼ yiyiiłʼaʼgo baa néiijidiibaał, áko ayóóʼóóʼní bee siidzı̨́įgo éí nihikʼijįʼ  asiihgi doo baa nitsíikees da doo. (Col. 3:13) Nihibrother Aldo éí brother łaʼ yáʼátʼéehgo baa nitsíjíkees léiʼ dóoneʼé jílı̨́įgi bikʼeʼashchʼíiʼgo yaa haadzííʼ. Aldo ájíní: “Brother tʼáadoo wooshchʼı̨́dígóó baa nitséskeesgi bee shíká anilyeed dishníigo Jiihóvah tʼáá ahą́ą́h bichʼįʼ sodiszin.” Éí nahaneʼgóó tádidiitʼash bizhdííniid. Nahojilneʼgo, habrother saad yee haadzííʼ yę́ę bikʼee yínííł jizlı̨́įʼgo átʼé jiníigo bił chʼízhníʼą́. Aldo ánáázhdíʼní: “Bikʼéé yínííł sélı̨́įʼgi yaa hodiiztsʼą́ąʼgo yaa náshozkan. Bééhózínígo yikʼédí nilı̨́įgo haadzííʼ. Áádóó kʼé náhásdlı̨́ı̨́ʼ.”

16-17. Haʼátʼíí éí tʼáá íiyisí beʼdiilnííł?

¹⁶ Yilʼaadii John bibrothers tʼáá íiyisí ayóóʼáyóʼníigo beʼoodląʼ yéigo dabidziil yá yinízingi ííshją́ą́ áyósingo éí táaʼgo naaltsoos áyiilaaígíí bikááʼ. Johngi átʼéego hastóí dóó sáanii Jesus yáʼąąshdi yił dahwéeʼaah dooleełígíí tʼáá ákótʼéego ałdóʼ nihaa dabíniʼgi ayóó baa hózhǫ́!—1 John 2:27.

¹⁷ Baa nídasíitʼįįdígíí ádiih diilyééł. Tʼáá aanííjí oodląʼ doo bitsʼá diidáał da. Tʼáá ałtso íiʼníiłgi Jiihóvah bikʼeh honiilʼı̨́į doo. Bizaad bíhwiilʼaah índa baʼííníidlíi doo. Jesus yiniidlą́ągi bidziilgo ádiilnííł. Bílaʼashdlaʼii índa apostate yee ndaʼnitinii nahjįʼ kwííníilzin doo. Jiihóvah bá neiilʼaʼgi tʼáadoo tʼóó ahoʼdiilʼíní. Yóóʼandínóoʼahii tʼáadoo yísíníiltsʼą́ʼí. Jiihóvah bibee hazʼáanii bikʼehgo hiniiʼnáa doo. Nihibrother łaʼ nihikʼijįʼ asiihgoda éí bá yóóʼanáhidiitʼaahgo índa yídin danílíinii bee bíká anéiilwoʼgo bee bidziil ííníilzin. Áko anáhóótʼiʼii dahólǫ́ǫ ndi, tʼáá aanííjí oodląʼ bidiilkaalgo bikʼeh ániitʼée doo.