1. Łaʼda shí ayóó áníshtʼé nízingo nitsékeesgo haitʼéego hooʼaah?

DÍÍSHJĮ́ĮDI ląʼí diné shí ayóó áníshtʼé danízingo ádaa nitsídaakees. Biniinaa łaʼda atídoolnííł doo danízin da. Businessman nilı̨́įgo éí náánáłahjįʼ business deíłyeedígíí bilááh áníshtʼée doo danízin. Áko éí bee atíʼdoolníiłii ádaatʼéii yee nidaalnish. Jooł bee nidaʼaʼnéégóó éí yikʼijįʼ nidaanéhígíí łaʼ atídeeshłíiłgo nihí dahodíníilnééł danízin. Ółtaʼí łaʼ éí university ayóó bééhoʼdílzingóó łaʼ bee atah deeshááł danízingo test yee indaʼaloʼgo atah hakááh. Oodlání jílı̨́įgo díí tsʼídá doo álʼı̨́į dago nihił béédahózin. Háálá éí “tsʼísee kʼehgo baa ooldahii” átʼé. (Gal. 5:19-21) Brothers dóó sisters łaʼ ayóó áníshtʼé nízingo nitsékeesgo doo yee ádaa ákonídzin dago éí náánáłahjįʼ ákótʼéego nitsékeesgo íidoolííł. Áko congregationdóó shí ayóó áníshtʼé nízingo nitsékeesii hólǫ́ǫgo éí łáʼí ídlı̨́įgo dah hikahígíí yidoołchxǫǫł.

2. Haʼátʼíí baa nídadíitʼįįł?

² Biniinaanii ayóó áníshtʼé hwiindzingo ádaatʼéii baa nídadíitʼįįł. Áádóó Diyin Bizaad biiʼdóó Jiihóvah bá nidaasʼaʼii baa dahaneʼígíí éí doo ayóó áníshtʼé danízin ńtʼééʼ yę́ę ałdóʼ baa nídadíitʼįįł. Ndi áłtsé éí haʼátʼíí nanihiiłnáago Jiihóvah bá neiilʼaʼgi baa nídadíitʼįįł.

3. Haʼátʼíí naʼídíkid baa nitsíikees doo?

³ Tʼáá ahą́ą́h díí naʼídíkid baa nitsíikees doo: ‘Łaʼda bilááh áníshtʼé nisingo tsídískosgo, ákogoósh tʼéiyá shitah yáʼáhootʼééh? Ayóó áníshtʼéego tʼáá shí tʼéí ayóó naanish doogoósh biniyé congregationgi yéigo naashnish? Éí doodaiiʼ yéigo naashnishgo éí bee Jiihóvah bił honishǫ́ǫ dooísh nisin?’ Díí haʼátʼíí biniyé baa nitsíikees doo?

4. Galatians 6:3, 4 haʼátʼíí biniyé shí ayóó áníshtʼé tʼáadoo niidziní doo nihiłní?

⁴ Diyin Bizaad ánihiłníigo éí ayóó áníshtʼé tʼáadoo níníziní. (Galatians 6:3, 4 yíníłtaʼ.) Haalá éí adaa dzííníidlí diidleeł. Ndi brothers shiláahgo ádaʼałʼı̨́ niidzingo éí nihaa nahwiiłkaad doo. Tʼáá háájí shı̨́ı̨́ nitsíikeesígíí bee ádaa áhwiilyą́ą doo. (Rom. 12:3) Nihisister Greecedi bighan, Katerina * ání: “Shiláahdi ayóó ánoolninii índa nahaneʼgi yiyiichįįhii áádóó akʼis álnéehgi ayóó bił bééhózinii bił ahąąh naʼídíshtʼeʼ ńtʼééʼ. Áko biniinaa doo anishłı̨́į da nisin łeh.” Béénílniih doogo Jiihóvah ayóóʼííníiʼní áádóó biYeʼ yísíníiltsʼą́ąʼgo biniyé ádíchʼįʼ kónihiilaa. Ayóó ániilningi, ayóó saad bee yéiiltiʼgi, doodaiiʼ ayóó nihééhoʼdílzingi éí doo yee Jiihóvah ádíchʼįʼ kónihiilaa da.—John 6:44; 1 Cor. 1:26-31.

5. Hyun baa haneʼgi haʼátʼíí bitsʼą́ą́dóó bíhwiiniłʼą́ą́ʼ?

⁵ Łaʼ naʼídíkid baa nitsínáánéiikees doo: ‘Kʼé naʼoołeełii nishłı̨́įgo doodaiiʼ áłahjįʼísh łaʼda bił ałghadaʼdishtʼáahgo bee shééhoʼdílzin?’ Nihibrother Hyun wolyéego South Koreadi bighango kótʼéego baa haneʼ. Éí congregationgi brothers privileges bee dahólónígíí aláahdi ádaatʼéego nitsídaakees jinízin ńtʼééʼ. Éí ájíní: “Brothers ayóó kódajítʼé. Áko biniinaa ádajinínígíí ayóó bee hoł ałghadaʼdishtʼááh. Kóníshtʼéego biniinaa congregationgi doo łáʼí ídlı̨́ı̨́góó áshłaa.” Kójítʼéego bee adaa ákozhniidzı̨́įʼgo hakʼis łaʼ yee háká ííjéeʼ. Éí doo ájítʼéégóó ázhʼdiilyaago kʼad elder baʼahódlíii jílı̨́. Áko shí ayóó áníshtʼé áádóó doo kʼé siilʼą́ą́góó bee adaa ákoniidzı̨́įʼgo tsxı̨́įłgo tʼáá akǫ́ǫ́ hashtʼedíílííł.

6. Galatians 5:26 bikʼehgo haʼátʼíí doo yáʼátʼéehii bitsʼąą ániitʼée doo?

⁶ Galatians 5:26 yíníłtaʼ. Haʼátʼíí doo yáʼátʼéehii bee éʼétʼéego akʼeezhdiniih jidooleeł? Łaʼ éí ádaa hodzódlí. Éí diné ákótʼéhígíí tʼáá bí tʼéí adaa nitsíkees łeh. Náánáłaʼ éí oochʼı̨́ı̨́d. Éí diné bee hólóonii doo tʼóó yidánoolniih da, ndi bighadeeshdlééł nízin łeh. Kótʼéego oochʼı̨́įdgo éí ajijoołáago átʼé. Áko díí tʼáá áłah tsʼídá yéigo bitsʼąą ániitʼée doo.

7. Ádaa hodzódlí índa oochʼı̨́ı̨́d haʼátʼíí binahjįʼ bitsʼą́ą́dóó bikʼidiʼdiitı̨́ı̨́ł?

⁷ Ádaa hodzódlí índa oochʼı̨́ı̨́d éí chidí naatʼaʼí bitooʼ łeezh biiʼ silı̨́įʼgo átʼéhígíí nahalin. Chidí naatʼaʼí éí nididootʼah, ndi łeezh éí bitooʼ biiʼ nilínígíí dadiʼdoołjah. Áko biniinaa nidáahgo doo bidziil da dooleełgo tʼóó crash ádoonííł. Tʼáá ákótʼé nahalin, łaʼda Jiihóvah yá naalʼaʼgo hodinah, ndi ádaa hodzódlí doodaiiʼ oochʼı̨́ı̨́d silı̨́įʼgoda éí crash ádoonííł. (Prov. 16:18) Éí Jiihóvah bá naʼaʼaʼgi neʼ íidoolííł áádóó atíʼadiʼdoolnííł índa náánáłahjí ałdóʼ atíidoolííł. Áko ádaa hodzódlí índa oochʼı̨́ı̨́d haitʼéego bitsʼąą ániitʼée doo?

8. Ádaa hodzódlí haitʼéego bikʼeh diidlı̨́į doo?

 ⁸ Paul éí Fílipai dineʼé yee yichʼįʼ haadzííʼ yę́ę baa nitsíikeesgo ádaa hodzódlí bikʼeh diidlı̨́į doo. Éí ání: “Ałchʼą́ą́h naʼaʼnaʼ áádóó ádaa hodzódliʼ bee tʼáadoo haʼátʼíhída baa nidaahkaaí, nidi aʼohgo nitsáhákees bee náánáłaʼ nihiláahdi ádaatʼéego baa nitsídaahkees.” (Phil. 2:3) Kótʼéego náánáłaʼda nihíláahdi átʼéego baa nitsíikeesgo éí náánáłaʼda tʼáadoo leʼé ayóó yiyiichįįhii nílı̨́įgo doo bikʼee diniiʼniih da doo. Ndi tʼóó bá baa nihił hózhǫ́ǫ doo. Éí yiyiichįįhígíí yee Jiihóvah bá naʼaʼaʼgi choyoołʼı̨́įgo Jiihóvah yee yaa haniih. Brothers doodaiiʼ sisters ląʼígóó iichįįhgo áádóó Paul yee haadzíiʼgi yikʼeh átʼéego éí yáʼátʼéehii bee ániitʼéegi nihá dayooʼı̨́į doo. Áko éí binahjįʼ congregationgi kʼé hólǫ́ǫgo łáʼí ídlı̨́į doo.

9. Brother doodaiiʼ sister haitʼéego tʼáadoo yiilchʼı̨́dí doo?

⁹ Brother doodaiiʼ sister tʼáadoo yiilchʼı̨́dígo éí biʼoh niilʼánígíí bee ádaa ákoniidzin doo. Ákóniitʼéego éí shí ayóó áníshtʼé doo niidzin da doo. Ndi tʼáadoo leʼé nihiláahdi dayiichįįhígíí bitsʼą́ą́dóó íhwiilʼaah doo. Éí brother łaʼ tsʼídá nizhónígo talks ííłʼı̨́įgo éí nitalks haitʼéego ahiih yínínil bidiiʼníi doo. Áádóó sister łaʼ ayóó ałtʼeesgo shíká anilyeedgo haitʼéego ayóó astʼees deeshłeeł bidiiʼníi doo. Áádóó tʼah ániid naagháii akʼis ádoolníiłgi bá nantłʼago éí náánáłaʼda akʼis álʼı̨́įgi doo bá nantłʼaaígíí shíká anílyeed bijiníi doo. Kwíitʼı̨́įgo éí tʼáá nihí tʼáadoo leʼé yiichįįh dooleełgi bee áká adiilwoł.

10. Gídiyan haʼátʼíí bee bikʼijįʼ asdlı̨́ı̨́ʼ?

¹⁰ Manáseh dineʼé jílı̨́įgo Gídiyan éí Íífreiyim dineʼé hastóí yił ádáátʼįįd yę́ę baa nitsíníkees. Gídiyan éí 300 siláo yił Jiihóvah háká aalwodgo hweʼanaʼí bił daʼahijoogą́ąʼgo bikʼeh dazhdeesdlı̨́įʼgi bee ayóó ádeijódlíi doo ńtʼééʼ. Íífreiyim dineʼé  éí Gídiyan yidááh yikai, doo éí haa bił dahózhǫ́ǫ da, ndi tʼóó nahóyádaastiʼ. Háálá Gídiyan éí Diyin beʼanaʼí bikʼi jiijéeʼgo tʼáadoo hodaʼasniiʼ dago biniinaa bikʼee bádahachįʼ. Éí hodineʼé bił ídlı̨́į dooleełjí tʼéiyá yaa nitsídaakees. Gídiyan íiyisíí yiniyé atʼíinii éí Jiihóvah bizhí dólzin áádóó bidineʼé bichʼą́ą́h ídlı̨́įgi íiyisíí yaa nitsíkeesjí baa dajiyooznah.—Judg. 8:1.

11. Gídiyan éí Íífreiyim dineʼé haʼátʼíí néidooʼniid?

¹¹ Gídiyan éí Íífreiyim dineʼé kónéídooʼniid: “Áátʼįįdígíí éí ádaotʼįįdígíísh bił ałhąąh nidanohnííł?” Éí Jiihóvah háká análwoʼgo ayóó átʼéego há áʼííłʼįįd yę́ęgi yééhoyííłniiʼ. Áádóó hastóí “áńdahodiilzeeʼ.” (Judg. 8:2, 3) Gídiyan tʼáadoo ádaa hodzódlíhígo éí Diyin bidineʼé kʼé yee dah yikah doo nízin.

12. Íífreiyim dineʼé dóó Gídiyan haʼátʼíí bitsʼą́ą́dóó bídahwiidiilʼáał?

¹² Díí haʼátʼíí bitsʼą́ą́dóó bóhooʼaah? Íífreiyim dineʼé ádaadzaaígi átʼéego nihí nihaa hodóʼní tʼáadoo niidziní doo, ndi Jiihóvahjí baa haʼniih niidzin doo. Hooghangi ánaazíinii índa elders éí Gídiyan bitsʼą́ą́dóó ídahwiizhdoołʼááł. Haʼátʼíí shı̨́ı̨́ íítʼįįdgo biniinaa łaʼda yikʼee doo ákótʼéégóogo éí haʼátʼíílá biniinaa ání niidzingo bá baa ákodíníidzįįł. Ndi éí yáʼádaatʼéehii áániiłgo éii nizhónígo áníłʼı̨́ bidiiʼníi doo. Áádóó éí kónihidiʼníigo doo tʼáá aaníí ákótʼée da ndi, éí aʼohgo éʼétʼéego hazhóʼó bichʼįʼ hadiidzih. Nihibrothers bił kʼé ííníilzin niidzin doo, shíyeeʼ tʼáá aaníí ádíshní tʼáadoo niidziní doo.

13. Hánnah éí haʼátʼíí bee bichʼįʼ nahwiisʼnááʼ áádóó éí haitʼéego hashtʼejiilaa?

¹³ Hánnah baa haneʼgi ałdóʼ baa nitsíníkees. Éí Elkéínah, Líívai dineʼé nílı̨́įgo hahastiin, éí ayóóʼáhóʼní. Elkéínah éí beʼasdzą́ą́ łaʼ nááhódlǫ́, éí Piinínah wolyé. Ndi Hánnahjí ayóóʼájóʼní. “Piinínah baʼáłchíní hólǫ́, nidi Hánnah éí baʼáłchíní tʼah doo haleeh da.” Áko éí biniinaa “Piinínah éí Hánnah yéʼétsʼihgo tsʼádoolnihgo áyiilaa.” Hánnah éí “doo ajóyą́ą́ʼ átʼéégóó tʼóó jicha.” (1 Sam. 1:2, 6, 7) Diyin Bizaad éí Hánnah kóbiʼdílʼı̨́įgo tʼáadoo biniinaa Piinínah yichʼįʼ kʼéédiidzaa da, doo níi da. Hasodizin bee tsʼídá ájítʼéegi Jiihóvah bee bił hojoolneʼ. Háálá éí háká adoolwołgo beijólí. Ákoósh Piinínah éí Hánnah yaa nitsíkeesgi yikʼi deeyá? Diyin Bizaad doo áníi da. Nihił béédahózingo Hánnah yáʼátʼéehgo bił náhooʼaʼgo “doo yínííł náázhnoolnin da,” ní Diyin Bizaad.—1 Sam. 1:10, 18.

14. Haʼátʼíí Hánnah bitsʼą́ą́dóó bídahwiidiilʼááł?

¹⁴ Hánnah áátʼįįdgi haʼátʼíí bitsʼą́ą́dóó bídahwiidiilʼááł? Łaʼda shí niláahdi  áníshtʼé nízingo naa nitsíkeesgo ni éí tʼáadoo nátʼą́ą́ʼ ákónítʼéhí. Nichʼįʼ doo yáʼátʼééhgóó ádaaníiłii tʼáadoo tʼáá éí bee kʼéédadohdleʼé, ndi tʼóó bił kʼé íínísin. (Rom. 12:17-21) Azhą́ nichʼįʼ nátʼą́ą́ʼ doo kʼé nídzin da ndi, ni éí nił hodéesyéelgo nił hózhǫ́ǫ doo.

15. Apálas dóó Paul haʼátʼíí yee aheełtʼéé ńtʼééʼ?

¹⁵ Tsʼídá akéeʼdi bitsʼą́ą́dóó íhwiidooʼáłígíí éí íhoołʼaahii Apálas dóó yilʼaadii Paul. Díí hastóí éí Diyin Bizaad ayóó bił bééhózin áádóó ayóó bééhoʼdílzin. Tsʼídá nizhónígo naʼnitinii nilı̨́ı̨́ ńtʼééʼ. Íhoołʼaahii álnéehgi łahdóó áká ahiʼnoolchą́ą́ʼ, ndi doo ahoołchʼı̨́įd da.

16. Apálas éí diné haitʼéhígíí jílı̨́ı̨́ ńtʼééʼ?

¹⁶ Apálas éí Alezáandriyadi biʼdizhchı̨́, éí ákwii yéigo íhooʼaahgo bił hazʼą́ągo bee bééhoʼdílzin. Apálas éí yátiʼgi ayóó jiichįįh índa Diyin Bizaad ayóó hoł bééhózin. (Acts 18:24) Kórinthgi Jiihóvah bá nijilʼaʼgo congregationdóó brothers łaʼ éí náánáłaʼ brothers dóó Paul biláahdi haa nitsídaakees. (1 Cor. 1:12, 13) Ákoósh Apálas kótʼéego brothers haa nitsídaakeesgo hoł yáʼátʼééh? Doo shı̨́ı̨́ ákódzaa da. Éí tʼahádóó Paul éí Kórinthgóó nínáádíídááł hodííniidgo ahóółʼaʼ. (1 Cor. 16:12) Apálas éí congregation ałtsʼáʼáldahgo áyiilaago Paul éí doo ákǫ́ǫ́ ninááhodoołʼaał da ńtʼééʼ. Apálas éí yiyiichįįhii nizhónígo choyoosʼįįd, éí nizhónígo baa haneʼii yaa nahasneʼ áádóó brothers bidziilgo ánáyiidlaa. Índa doo ayóó ádeidzódlíi da. Éí Ákwila dóó Prisíla, ‘Diyin bikʼehgo honítʼiʼii hózhǫ́ yáʼátʼéehgo tʼáá wónásígo yínanááhoneestą́ąʼgi’ tʼáadoo bikʼee nízhdiiltáal da.—Acts 18:24-28.

17. Paul éí haitʼéego kʼé hólǫ́ǫgo áyósin ńtʼééʼ?

 ¹⁷ Yilʼaadii Paul éí Apálas yáʼátʼéehgo naanish áyiilaagi yaa ákonízin. Áádóó Apálas éí haláahdi átʼé hodóʼníi ndi, doo ayóó baa nitsíjíkees da. Éí Kórinth dineʼé yichʼįʼ áʼiilaa yę́ę deíníiltaʼgo Paul doo ádeidzódlíi da índa doo saad hółǫ́ǫgo áʼiilaa da. “Shí Paul yíhoołʼaahii nishłı̨́,” dahałníigi doo hoł yáʼátʼéeh da. Ndi Diyin Jiihóvah índa Jesus Christ áajigo yá naalʼaʼí danohłı̨́ yidííniid.—1 Cor. 3:3-6.

18. 1 Corinthians 4:6, 7 bikʼehgo Apálas dóó Paul áátʼįįdgi haʼátʼíí bitsʼą́ą́dóó bóhooʼaah?

¹⁸ Apálas dóó Paul áátʼįįdgi haʼátʼíí bitsʼą́ą́dóó bídahwiidiilʼááł? Jiihóvah shı̨́ı̨́ yéigo bá neiilnish áádóó ląʼí shı̨́ı̨́ baptize ádoolníiłjįʼ bee bíká iilwod. Ndi baa ákoniidzingo Jiihóvah díí yee nihíká análwoʼgo bohónéedzą́ągo ádzaa. Apálas dóó Paul áátʼįįdgi ałdóʼ łahdóó bitsʼą́ą́dóó ínááhooʼaah. Éí congregationgi ląʼígóó nihinaanish hólǫ́ǫgo kʼé áhwííníilzin doo. Elders dóó ministerial servants łáʼí ídlı̨́įgi áádóó kʼé daʼahidiiʼníigo hazʼą́ągo yee nihíká anájahgo baa ahééh daniidzin. Éí Diyin Bizaad chodayoołʼı̨́įgo yee achʼįʼ yádaałtiʼ. Shí ayóó áníshtʼé doo danízin da. Ndi tʼáá ałtso congregationdóó Jesus yikʼeh dahółʼı̨́įgo bí bikʼehgóó oodáał dooleełgi yee áká anájah.—1 Corinthians 4:6, 7 yíníłtaʼ.

19. Tʼááłaʼí niitínígo haʼátʼíí íitʼįįł doo? (“ Éii Ayóó Ájítʼé Tʼáadoo Diiʼníní Doo” ałdóʼ níníłʼı̨́.)

¹⁹ Tʼááłaʼí niitínígo Diyin éí tʼáadoo leʼé yiichįįh dooleełii nihainílá. Éí ‘bee ahíłká anéijahgo’ bee choiniilʼı̨́. (1 Pet. 4:10) Shíyeeʼ łahdóó áłtsʼísígo bee anáshwoʼ shı̨́ı̨́ niidzin, ndi áłtsʼísígo bee anéiilwoʼígíí éí łáʼí ídlı̨́įgo ííłʼı̨́. Áko éí bąą tʼáadoo shí ayóó áníshtʼé niidzingo ádaa nitsíikeesí doo. Wołí bee íitʼı̨́įgo congregation góneʼ kʼé hólǫ́ǫgo áádóó łáʼí ídlı̨́įgo ííníilzin doo.—Eph. 4:3.