1, 2. Nihichʼįʼ nidahwiiʼnáago haitʼéego Jiihóvah bichʼįʼ hadaʼííníilní, dóó Bizaad biiʼ yee ádee haadzííʼ yę́ę, haʼátʼíísh bikʼídaniitą́ą́ʼ?

NIHIBROTHER ániid naaghá léiʼ éí 1 Corinthians 7:28 yaa nitsíkees. Díí ałhéʼáskéhígíí áníigo “daʼohéehii nihichʼįʼ nidahwiiʼnáa” dooleeł. Díí brother éí hastóí oodlání yá naazíinii beʼasdzą́ą hólónígíí léiʼ nabízhdíłkid: “Díí ‘nihichʼįʼ nidahwiiʼná’ haʼátʼíísh áhyiłní, dóó aséyéhgo ládą́ą́ʼ haitʼéego baa áhóshyą́ą doo?” Hastóí oodlání yá naazíinii łaʼ brother ániid naaghá léiʼ éí yilʼaadii Paul yikʼeʼashchínígíí baa nitsíníkees yidííniid. Éí ání: Jiihóvah éí “diné tʼáá ałtsojįʼ hayiʼiyoołníihii, . . . tʼáá ałtsojįʼ atínihiʼdilʼı̨́įgo hanihiʼiyoołnííh.”—2 Corinthians 1:​3, 4.

² Díí nihił béédahózin: nihichʼįʼ nidahwiiʼnáago, Jiihóvah nihiTaaʼ nilíinii éí ayóóʼánihóʼní dóó bichʼįʼ hadaʼííníilní. Nichʼįʼ nahwiisnááʼ yę́ędą́ą́ʼ, Jiihóvah Bizaad  yee níká eelwodgo béénílniih. Jiihóvah bá nidajilʼaʼ yę́ę nahalingo, iiná yáʼátʼéehii nihá yinízingo nihił béédahózin.—Jeremiah 29:​11, 12 yíníłtaʼ.

3. Haʼátʼíí bíndaʼídéékidígíí kʼad baa nídadíitʼįįł?

³ Haʼátʼííshı̨́ı̨́ nihichʼįʼ nahwiiʼnánígíí áłtsé nihił béédahózingo, éí binahjįʼ doo nanitłʼagóó hadaʼííníilníi łeh. Áko nihighan hazʼą́ągi doodaiiʼ ałhéʼáskéhígi, haʼátʼíísh biniinaa nihichʼįʼ nidahwiiʼnáa doo? Ałkʼidą́ą́ʼ dóó dííshjı̨́įdi ádahoodzaa yę́ę, haʼátʼíí bee hadaʼííníilníigo nihíká adoolwoł? Díí ndaʼídíkidígíí haitʼéego nihichʼįʼ nidahwiiʼnáago bichʼįʼ hadaʼííníilníi doogo baa nídadíitʼįįł.

4, 5. Ahastiin dóó beʼasdzą́ą́ haʼátʼíísh bee bichʼįʼ nahwiiʼná doo?

⁴ Jiihóvah asdzání áyiilaa yę́ę bikéédóó, hastiin yichʼįʼ yił níʼáazhgo beʼasdzą́ą́ silı̨́ı̨́ʼ. Ńtʼééʼ Jiihóvah ání: “Diné jílíinii hazhéʼé índa hamá bitsʼą́ą́ʼ dashdidoogáałgo hweʼasdzą́ą́ tʼéiyá bił jiináa doo, áko nizhdiltʼé yę́ę atsʼíís tʼááłáʼí jileeh.” (Genesis 2:24) Ákondi, tʼáá áníiltso ádił nidaʼiilzííh. (Romans 3:23) Éí biniinaa hastiin dóó asdzání ahíjízyehgo achʼįʼ nahwiiłnáanii dahólǫ́ǫ doo. Díí nahalingo: tʼahdóó iiyehgo asdzání éí bimá dóó bizhéʼé yikʼeh hółʼı̨́ı̨́ ńtʼééʼ. Ndi God Bizaad áníigo ahíjízyehgo bikéédóó asdzání bahastiin éí bitsijįʼ sizíinii dooleeł. (1 Corinthians 11:3) Ahastiin éí beʼasdzą́ą bitsiijįʼ jizíinii áłtsé há nanitłʼah łeh. Azhą́ shı̨́ı̨́ bimá dóó bizhéʼé bikʼeh hojíłʼı̨́į ndi, asdzání hahastiin atsiiʼjįʼ sizíinii nílı̨́įgo shı̨́ı̨́ ałdóʼ há nanitłʼah. Áádóó ahastiin dóó beʼasdzą́ą́ ániid ahijizyehgo éí bichʼooní bimá dóó bizhéʼé doo aheełtʼéego baa nitsíjíkeesgo, díí ałdóʼ hachʼįʼ nahwiiłʼnáa doo.

⁵ Díí baa nitsíníkees. Ahastiin dóó beʼasdzą́ą́ beʼawééʼ hodooleełígíí bił bééhoozingo haitʼéego yaa nitsídeezkééz. Azhą́ shı̨́ı̨́ tʼáá íiyisíí baa bił hózhǫ́ǫ ndi, yaa nitsináltłiʼ łeh. Awééʼ biʼootsánígíí yáʼátʼéehgo doochííł yóʼní, bitsʼíís doo bąąh téehgo doochííł ałdóʼ baa bíniʼ. Łą́ą́góó béeso díí dego ádooníiłgo hoł bééhózin. Awééʼ yizhchı̨́įgo bikéédóó, łahgóó átʼéego hweʼiinaʼ ázhdoolííł. Amá jílínígíí éí tʼáá áłahájįʼ hweʼawééʼ baa áhojilyą́ą doo. Áko ahastiin dóó beʼasdzą́ą́ doo tʼáá hó éí áłtséédą́ą́ʼ ádaa nitsíjíkees yę́ę átʼée da. Azhéʼé jílínígíí éí ląʼí honaanish hazlı̨́ı̨́ʼ. Beʼasdzą́ą́ dóó beʼawééʼ doo yídin nilínígóó áyósin doo.

6-8. Ahastiin dóó beʼasdzą́ą́ awééʼ doo hwee haleehgóó, haitʼéego baa nitsíjíkees doo?

⁶ Ahastiin dóó beʼasdzą́ą́ łahgóó ánáánátʼéego ałdóʼ bichʼįʼ nahwiiʼná. Áłchíní tʼáá íiyisíí jinízin ndi, awééʼ doo hwee haleeh da. Asdzání doo aʼniiltsą́ą́góó shı̨́ı̨́ hajéí yaa nahodoołkał. (Proverbs 13:12) Ałkʼidą́ą́ʼ, asdzánígíí baʼáłchíní hólǫ́ǫgo, éí aláahdi ílı̨́įgo átʼéé ńtʼééʼ. Jéíkab beʼasdzą́ą́ Réíchel doo ajiłchíígóó ndi hádí tʼéiyá naʼiiłchíihgo, éí biniinaa yéigo yínííł jizlı̨́ı̨́ʼ. (Genesis 30:​1, 2) Tʼóó ahayóí dineʼé, haʼáłchíní ląʼí hólǫ́ǫgo aláahdi ílı̨́įgo éí dayoodlą́. Łahda diné łaʼ adabiʼdiisʼaʼígíí nidabídíłkid: “Haʼátʼíí biniinaa  nihaʼáłchíní doo hólǫ́ǫ da?” Azhą́ shı̨́ı̨́ adabiʼdiisʼaʼígíí bił dahojilneʼ ndi, tʼahdii łaʼ ádaaníi łeh: “Ná sodadiilzin doo!”

⁷ Díí ałdóʼ baa nitsíníkees. Englandi sister léiʼ áłchíní shee hodooleeł jiniizı̨́ı̨́ʼ. Díí hoogáłígíí biiʼ, áłchíní doo hwee hodooleeł dago baa ákozhniizı̨́ı̨́ʼ, díí bąą hade áhósingo áhoolaa. Áádóó bí dóó hahastiin awééʼ łaʼ nihaa doołtéełgo biyaa hwiidííłʼaał jiniizı̨́ı̨́ʼ. Ákótʼée ndi asdzání éí tʼahdii yaa yínííł nilı̨́įgo nahashzhiizh. Éí ání: “Díí awééʼ nihaiyíltínígíí díníilzéełgo éí doo tʼáá shí shiłchínígíí nahalin átʼée da.”

⁸ Diyin Bizaad áníigo asdzání éí “ádaa áhojilyą́ągo éí niʼjiiłchíihgo yisdájiigháah doo.” (1 Timothy 2:15) Azhą́ shı̨́ı̨́ asdzání éí baʼáłchíní hólǫ́ǫ ndi, éí doo hoolʼáágóó iiná baa doolyéełgo áhyiłníi da. Áko 1 Timothy 2:15 biiʼ, haʼátʼíí áhyiłní? Amá éí bighan hazʼą́ągi baa áhojilyą́ągo yéigo binjilnish. Aseezı̨́ doodaiiʼ doo bídéétʼiʼígíí doo yee nítʼı̨́į dago, éí bee bíká análwoʼ. (1 Timothy 5:13) Ákótʼée ndi, ałhéʼáskéhgi dóó bighan hazʼą́ągi tʼahdii bichʼįʼ nahwiiʼnáa łeh.

9. Haʼátʼíí lá ałdóʼ ahastiin dóó beʼasdzą́ą́ bee bichʼįʼ nidahwiiʼná?

⁹ Łahda ahastiin dóó beʼasdzą́ą́ łaʼ bitsʼą́ą́ʼ ádin yileehgo bee bichʼįʼ nahwiiʼnáa doo. Azhą́ shı̨́ı̨́ díí doo shił áhodooníił da danízin ndi, ląʼída bichʼooní ádaadinígíí yéigo yichʼįʼ hadaʼoosniid. Oodlání danilíinii éí, náábiʼdidooljahígíí bee ádee haʼoodzííʼ yę́ę dayoodlą́, dóó díí yee hadaʼólní. (John 5:​28, 29) Nihichʼįʼ nidahwiiʼnáago, nihiTaaʼ Jiihóvah, Bizaad bee tʼóó ahayóí yee ádee haadzíʼígíí bee hadaʼííníilní. Haitʼéego Jiihóvah bá ndaalʼaʼí yee ádaʼahoʼníinii yaa ákodaniizı̨́ı̨́ʼ, dóó éí haitʼéego bíká eelwod kʼad baa nídadíitʼįįł.

10. Haʼátʼíísh Hánnah bee haʼjoosniiʼ? (Áłtsé naashchʼąąʼígíí níníłʼı̨́.)

¹⁰ Elkéínah beʼasdzą́ą́ Hánnah ayóóʼáyóʼníinii, áhoodzaa yę́ę baa nídadíitʼįįł. Éí áłchíní yinízin ndi, awééʼ doo hwee haleeh da. Ákondi, hahastiin náánáłaʼ beʼasdzą́ą́ Piinínah baʼáłchíní ląʼída hwee hazlı̨́ı̨́ʼ. (1 Samuel 1:​4-7 yíníłtaʼ.) Tʼóó tséʼádin áyoolíiłgo, Piinínah éí Hánnah “tʼáá nináháhááh bikʼeh” yéʼétsʼih. Éí Hánnah hajéí yidiisnáaʼgo jíícha. Haʼátʼíí bee haʼjólníi dooígíí chojoosʼįįd? Éí Jiihóvah yichʼįʼ sozdoolzin. Hánnah éí Jiihóvah bikin biiʼ sohodizingi jiníyá, dóó nízaadgóó sozdoolzin. Shiyáázh hodooleeł jiníigo Jiihóvah bizhdííkeed, éí háká adoolwołgo baʼjoozliʼ. Sozdoolzin bikéédóó, hatah yáʼáhootʼéehgo “doo yínííł náázhnoolnin da.” (1 Samuel 1:​12, 17, 18) Díí Hánnah hoł  bééhózin: Jiihóvah éí hayáázh hodooleeł doodaiiʼ łahgo átʼéego bee háká adoolwoł.

11. Haitʼéego nihisodizin bee nihíká adoolwoł?

¹¹ Tʼáá ániitʼé nidaʼayiilzííh dóó Séítan nihookáaʼgi bee bóhólnííhígíí biiʼ dahiniiʼná, éí biniinaa kʼad nihichʼįʼ nidahwiiʼná. (1 John 5:19) Ndi Jiihóvah bichʼįʼ sodiilzingo, nihíká adoolwoł. Jiihóvah éí “diné tʼáá ałtsojįʼ hayiʼiyoołníihii” jílı̨́. Tʼáá ákótʼéego Hánnah ádzaa. Hánnah éí biʼdiiłʼáhígíí Jiihóvah yił hólneʼ “shíká anilyeed” jiníigo baa níjookąąhgo sozdoolzin. Éigi átʼéego nihichʼįʼ nahwiiʼnáagi Jiihóvah doo tʼóó bił hodiilnih da, tʼáá íiyisíí néidííkąął. God bił béédahonohsįįh.—Philippians 4:6, 7.

12. Azhą́ shı̨́ı̨́ hachʼįʼ nahwiiʼnáa ndi, haʼátʼíí Anna háká eelwod?

¹² Nihaʼáłchíní doo hólǫ́ǫ́góó doodaiiʼ ayóóʼííníiʼnínígíí nihąąh ádingo nihichʼįʼ nahwiiłʼnáa łeh. Ákondi badaʼííníidlíi dooígíí hólǫ́. Anna ádzaa yę́ę baa nitsíníkees. Hahastiin bił hojílǫ́ǫgo tsostsʼid nááhai áádóó hatsʼą́ą́ʼ ádin. Haʼáłchíní shı̨́ı̨́ tʼáadoo hazlı̨́ı̨́ʼ da. Ákondi haʼátʼíí háká eelwod? Azhą́ shı̨́ı̨́ Anna 84 binááhai ndi, tʼahdii “kin biiʼ sohodizin bił hazʼánígi doo bitsʼájígháah da, . . . sodizin bee Diyin God bichʼįʼ nahojiłá.” (Luke 2:37) Éí bee haʼjoolníí ńtʼééʼ, azhą́ shı̨́ı̨́ hachʼįʼ nahwiiʼnáa ndi.

13. Nihikʼéí doo nihichʼįʼ ákótʼéego, haitʼéego danihikʼis bee hadaʼííníilníi doo?

¹³ Nihikʼis bił áłah nídeedleehígíí éí bee haʼííníilníi dooígíí yee nihíká análwoʼ. (Proverbs 18:24) Paula ashdlaʼ binááhaigo, bimá éí Jiihóvah doo yá naalʼaʼ da silı̨́ı̨́ʼ. Paula éí yinííł nilı̨́, tʼáadoo leʼé bił nanitłʼah. Ákondi alą́ąjįʼ nahalneʼii Ann joolyé, éí Paula ayóóʼáyóʼníigo yíká eelwod. Paula ání: “Ann doo shikʼéí da ndi, bee joobaʼ nízinígíí yee shíká eelwod. Éí bee Jiihóvah tʼahdii bá naashʼaʼ.”  Paula bił hózhǫ́ǫgo, bimá áłah náʼádleehjįʼ nináánádáah. Ann éí Paula, Jiihóvah yá naalʼaʼgo yíká eelwod yaa bił hózhǫ́.

14. Diné hadaʼólníigo ííníilzingo, haitʼéego nihíká adoolwoł?

¹⁴ Diné bíká anídeijahgo, áko éí nihide áhootʼéhígíí baa nídayiiʼnah. Tʼóó ahayóí nihisisters God biNahatʼaʼ yaa dahalneʼ. Bił dahózhǫ́ǫgo, Jiihóvah yił nidaalnish. Ákótʼéego diné ayóóʼádeíníiʼníigo, haneʼ yáʼátʼéehii bee bił dahwiilneʼ. Nihibrothers dóó nihisisters bichʼįʼ nihił hadleeʼgo, bił ahą́dí ádeíníilzin. (Philippians 2:4) Éí yilʼaadii Paul ákótʼı̨́ı̨́ ńtʼééʼ. “Tʼáá amá baʼáłchíní yaa áhályánígi átʼéego,” Paul ałdóʼ baa áhwiinítʼı̨́įgo diné bíká aníjílwoʼ.  Áádóó “azhéʼé baʼáłchíní yichʼįʼ yáłtiʼígi” nahalingo, hakʼis yee hadaʼólníigo bee bíká aníjílwoʼ.—1 Thessalonians 2:​7, 11, 12 yíníłtaʼ.

15. Ániid nidaakaiígíí éí Jiihóvah bee nidabinitingo, háísh baa deetʼą́?

¹⁵ Haitʼéego amá dóó azhéʼé bił áłah nídeidleeh bíká anídeijah? Łaʼ shı̨́ı̨́ íhoołʼaahígíí “shíká anilyeed, shaʼáłchíní éí Jiihóvah dóó Bizaadígíí bee shá nanitin,” hodidooniił. Diyin Bizaad ání, amá dóó azhéʼé danilíinii nihaʼáłchíní nidanohtin, éí Jiihóvah nihąąh niinílá. (Proverbs 23:22; Ephesians 6:​1-4) Łahda áká anídeelwoʼ łeh, ákondi amá dóó azhéʼé éí haʼáłchíní nazhnitingo íiyisíí bee hóhólnííh. Amá dóó azhéʼé éí haʼáłchíní tʼáá áłahjįʼ bił ałchʼįʼ yájíłtiʼ doo.

16. Áłchíní bíká anéiilwoʼgo, haʼátʼíísh bénéiilniih doo?

¹⁶ Amá doo azhéʼé łahda “shaʼáłchíní Diyin Bizaad bee shá nanitin,” hałniih. Ákondi amá dóó azhéʼé bibóhólníihii doo nihąąh silá da. Jiihóvah Yá Dahalneʼé doo danilínígíí, łahda baʼáłchíní nidaniitin łeh. Doo nihaʼáłchínída ndi nidaniitingo, tʼáá bighandi bimá doo bizhéʼé doodaiiʼ náánáłaʼ Jiihóvah Yá Dahalneʼé nilínígíí binááł, doodaiiʼ hootʼínígi nidaniitin doo. Áko doo łahgo átʼéego yaa nitsídaakeesii yee danihiníłʼı̨́į da. Náásgóó shı̨́ı̨́ amá dóó azhéʼé tʼáá hó haʼáłchíní Jiihóvah bee nazhnitin doo.

17. Haitʼéego áłchíní bighan hazʼą́ągi bił dahózhǫ́ǫgo áyósin?

¹⁷ Ániid nidaakaiígíí Jiihóvah ayóóʼádayóʼníigo yídahoołʼaah. Éí bee hooghan hazʼą́ągi yee hadaʼólní. Haitʼéego? Bimá dóó bizhéʼé bił danilı̨́įgo yił nidaalnishgo yíká anídaalwoʼ. Áádóó áłchíní Jiihóvah bikeeʼ sizı̨́įgo, éí bighan hazʼánígi yídaneedlı̨́į łeh. Tʼahdoo tó yíląąd yę́ędą́ą́ʼ Léímek éí Jiihóvah yikʼeh hóółʼįįd. Biyeʼ Nóah yaa halneʼgo ání: “Díí lą́ą nideiilnishgo índa nihílaʼ bee yéego nideiilnishgo nihikʼi hałtaʼgo ánihidoolííł, háálá Bóhólníihii éí niʼ hóyéeʼgo yá haadzííʼ.” Tó yíląąd baa hóoneʼ bohoolyaago bikéédóó Jiihóvah niʼ hóyéeʼgo yá haadzííʼ yę́ę nahjįʼ kóyiilaa. (Genesis 5:29; 8:21) Dííshjı̨́įdi áłchíní Jiihóvah bikeeʼ naazı̨́įgo, áko bighan hazʼánígi baa bił dahózhǫ́. Azhą́ shı̨́ı̨́ bichʼįʼ nidahwiiʼnáa ndi, náásgóó hoł chodahooʼı̨́.

18. Azhą́ shı̨́ı̨́ nihichʼįʼ nidahwiiʼnáa ndi, haʼátʼíí bee hadaʼííníilníi doo?

¹⁸ Díí átʼéego Jiihóvah bidineʼé yee hadaʼólníi doo: éí sodadilzin, dóó Diyin Bizaad biiʼdę́ę́ʼ dahaneʼígíí yaa nitsídaakeesgo, índa dabikʼisígíí bíká anájah. (Psalm 145:​18, 19 yíníłtaʼ.) Jiihóvah éí tʼáá áłahjįʼ haʼííníilníigo ánihósin dóó nihichʼįʼ nidahwiiʼnáago nihíká análwoʼgo, nihił béédahozin!