DIYIN JIIHÓVAH éí bidineʼé ahidiníłnáago kʼé daʼahidiʼníi doo nízin. Áko kótʼéego hazʼą́ągo éí áłah nídajidleehgi hodéezyéelgo hazʼą́ą doo. Díí átʼéego hazʼą́ągo éí diné binaadę́ę́ʼ áłah néiidleehjįʼ dabíniʼ doo.

Madagascar hoolyéedi hataałii nílı̨́įgo Jiihóvah Yá Dahalneʼé nizhónígo kʼé daʼahidiʼníigo yaa ákoniizı̨́ı̨́ʼ, áko kótʼéego tsízdeezkééz, ‘Oodląʼ dayiikahígíí łaʼ bidiiyáago éí díidígíí dooleeł.’ Áko demons bichʼįʼ nahojiłá yę́ę neʼ ájiilaa, hachʼooní bił ahéʼéskéegi hashtʼejiilaa, áádóó Jiihóvah kʼé nídzinii bichʼįʼ dazhdiiyá.

Díí diné ádzaaígi átʼéego, tsʼídá tʼóó ahayóí diné Jiihóvah Yá Dahalneʼé yihidiikáahgo kʼé hadeintánę́ę ákwii yikʼéhákááh. Diyin Bizaad yíníiltaʼgo éí áłah náʼádleehgi oochʼı̨́ı̨́d dóó ałchʼą́ą́h naʼaʼnaʼ éí kʼé niyiiłchxǫǫh dóó baaʼihgo hooʼaah. ( James 3:​14-16) Ndi díí bitsʼąą áhátʼéii dooígi Diyin Bizaad yáʼátʼéehgo yee naʼnitin. Áko nihibrothers dóó nihisisters nizhónígo bił kʼé haʼníigi bidziil áyósin. Łahgóó kótʼéego nahazʼą́ą́ ńtʼéeʼgo díí naʼnítin bíká eelwodgi dadíníilʼįįł.

“Shibrother nilı̨́įgo bił naashnishgi doo hazhóʼó ahídiniilnáa da. Łah ałchʼįʼ niháhóóchįįd dóó dilwoshgo łaʼ nihił yah ajííʼáázh, éí ahííníidziihgo nihijiiłtsą́.”—CHRIS.

“Sister nilı̨́įgo tʼáá áłahájįʼ Diyin Bizaad baa nahwiilneʼ łeh ńtʼééʼ, bił nináháshnih yę́ęgi tʼáá hooshchʼįʼ neʼ áyiilaa. Áádóó doo shichʼįʼ yáłtiʼ da silı̨́ı̨́ʼ. Biniinaanii doo shił bééhózin da.”—JANET.

“Níłchʼi bee haneʼí biiʼjįʼ tániiltʼéego ałchʼįʼ yádeiiltiʼ ńtʼééʼ. Łaʼ éí hágoóneeʼ jidííniid, áko doo nihijíiztsʼą́ąʼ da niizı̨́ı̨́ʼ. Áko łaʼígíí tʼahdii shichʼįʼ yáłtiʼ yę́ę éí díí hágoóneeʼ nínę́ę doo yáʼátʼééhgóó bá hahaasdzííʼ, áko shı̨́ı̨́ tʼahdii nihíistsʼą́ą́ʼ lá.”—MICHAEL.

“Áłah néiidleehgi pioneers nidiltʼéego doo ałchʼįʼ ákótʼée da silı̨́ı̨́ʼ. Łahdę́ę́ʼ ódziihgo yaa nídiidzá. Kótʼéego ahizhdiʼníigo ayóó átʼéego łahdę́ę́ʼ bidaʼdiiłʼá.”—GARY.

Díí yeeʼ tʼáadoo átʼéhí da nahalin. Ndi kóhooníiłgo hazʼą́ągo éí yinííł niyiiłʼaah dóó áłah náʼádleehgi doo hashtʼehodítʼéégóó hwiidooʼaał. Díí tʼáá ájíłtso Diyin Bizaad bikʼehgo oodáałii bikʼeh ádaʼjiilaago baa hózhǫ́ǫgo náhootʼaʼ. Diyin Bizaad biiʼdę́ę́ʼ bikʼehgo oodáałii háidíígíí bíká eelwod?

“Nááhkahgóó tʼáadoo ahináádoohjahí.” (Genesis 45:24) Díí Jóseph éí bikʼis yee yichʼįʼ haadzííʼ. Łaʼda áháchįʼ doo yichʼįʼ haʼólníígóó éí tʼáá íídą́ą́ʼ doo yáʼátʼééhgóó hooʼaʼ yę́ęgi tʼóó tséʼádin íidoolííł. Áádóó łahdę́ʼígíí dinéda ałdóʼ báhodoochįįł.  Chris éí ádaa ákozhniizı̨́įʼgo łahda ayóó ádaa tsízdíkos índa doo akʼehgóó ájítʼée da łeh. Díí doo kóníshtʼée da dooleeł jiniizı̨́ı̨́ʼ, áko hakʼis binízhdiitłah yę́ę bił kʼé náʼahizhdooʼniid. Áádóó Chris éí áháchįʼ tʼáadoo hakʼeh didlínígo baa nízhdiidzá. Hakʼis bił ahínízhdiiltłah yę́ę díí yee haa ákoniizı̨́įʼgo, bí ałdóʼ ákótʼéego yee ádideeshnish. Kʼad éí tʼáá ájíłah kʼé bił ahíjółtąʼgo Jiihóvah bá nijilʼaʼ.

“Kótʼéego níinii ádingi biniyé ádahatʼíinii tʼóó ąąh nidahwiiłkaad.” (Proverbs 15:22) Janet bikʼis doo bichʼįʼ yáłtiʼ silı̨́ı̨́ʼgóó, díí Diyin Bizaad biiʼdóó haadzooígíí bikʼeh áʼdeeshlííł jiniizı̨́ı̨́ʼ. Hakʼis baazhníyáago bił ałchʼįʼ hajoodzííʼ. Janet éí hakʼis nabízhdééłkid, haʼátʼíí lá diiʼníigo biniinaa ałchʼįʼ kóniitʼé, bizhdííniid. Áłtsé éí biniinaa ałchʼįʼ hazhdoodzihígi há nanitłʼah, ndi hazhóʼó ałchʼįʼ yájíłtiʼgo bee hatah hashtʼehodíítʼeʼ. Akʼis jílínígíí éí hádą́ą́ʼ shı̨́ı̨́ áhóótʼįįd yę́ę Janet bee bikʼíhojiʼááh lá, ndi Janet éí doo hániʼ yiyiiłʼaʼ da lágo baa ákozhniizı̨́ı̨́ʼ. Áko Janet bił kʼé nízhdooʼniidgo Jiihóvah bá nijilʼaʼgo ałkʼis nijísdlı̨́ı̨́ʼ.

“Éí bąą bikááʼ nááʼiiniihí bikááʼdóó nááʼayíłniihgo, nítʼééʼ nikʼis bíniʼ yiniłʼaʼ yę́ę béénílniiʼgo, tʼáá ákwii nááhidííłnihígíí bikááʼ nááʼiiniihí bíighahgi nidíílééł, áádóó nikʼis áłtsé bichʼįʼ nídíídáałgo bił kʼé náʼahididííʼniił, áko índa nídíídáałgo náádiʼyííłnih.” (Matthew 5:23, 24) Díidí éí dził binániigi Jesus yee naʼneeztą́ą́ʼ. Michael éí hakʼis doo yáʼátʼééhgóó bá hajiisdzííʼ yę́ę, ayóó átʼéego baa hániʼ. Díí hashtʼedeeshłííł jiniizı̨́ı̨́ʼ. Áko hakʼis baazhniyáago bił kʼé náʼahizhdooʼniid. Daa hóótʼįįd? Michael ájíní, “Shikʼis tʼáá aaníí áníigo kʼé náshidooʼniid.” Ałkʼis nináájísdlı̨́ı̨́ʼ.

“Ałchʼįʼ hadaʼíínółní, łaʼda bichʼįʼ saad dahosoołı̨́įʼgo bił kʼé nídaʼahididoohʼniił.” (Colossians 3:12-14) Pioneers nidiltʼéego Diyin Bizaad yaa nahalneʼgo ahinídiiltłahgo baa hóoneʼ yę́ęísh béénílniih? Elder nilı̨́įgo díí kóʼahiʼdooʼniidgo łahdę́ę́ʼ bidaʼdiiłʼáago yikʼee doo ákódaatʼée da hałníigo hazhóʼó yee hachʼįʼ haadzííʼ. Ałchʼįʼ haʼíínółníigo éí áłah néiidleehgi bee hashtʼehodítʼé, hałníigo yééhoyííłnii’. Áko tʼáá ájíłah díí bee hachʼįʼ há oodzíʼígíí nízhdiiláago bikʼehgóó áʼjiilaa. Kʼad kʼé bił nítʼiʼgo nahaneʼgi ałhił joolnish.

Colossians 3:12-14 ánínę́ęgi níká adoolwołgo átʼé. Éí łaʼda saad doo yáʼátʼéehii yee nichʼįʼ haadzííʼ ńtʼéeʼgo bił kʼé náʼahididííʼniił áádóó ánídooʼniid yę́ę doo baa nitsíníkeesgóó ándoolííł. Ndi chʼééh kʼé nidííníʼniidgo shąʼ? Matthew 18:15 níká adoolwoł. Azhą́ shı̨́ı̨́ ákwiigi éí yéigo asdziihgo Jesus yeinítʼı̨́į ndi, éí nikʼis bił saad honiidlǫ́ǫgo kótʼéego ádoolnííł níigo chʼíiníʼą́. Nihá áhwiinítʼı̨́įgo, nihíniʼ yiyiiłʼaʼígíí baa diidáałgo hazhóʼó bił baa nídíitʼįįł áádóó hashtʼedoolnííł.

 Kótʼéego hooʼaahgo Diyin Bizaad biiʼdę́ę́ʼ ląʼígóó yee áká adoolwołii dahólǫ́. Ndi God biníłchʼiʼ diyinii baʼííníidlíigo tʼéiyá níłchʼi diyinii bineestʼąʼ bee ániitʼéego nihíká análwoʼ doo. Éí díidí “ayóóʼóʼóʼní, ił hózhǫ́, hashtʼehodítʼé, nízaadgóó haʼahóní, ajoobaʼ, yáʼátʼéehii, aʼahódlí, aʼohgo éʼétʼé, ádaa áháyą́.” (Galatians 5:22, 23) Baa nitsíníkees, tʼáadoo leʼé béésh yee yilwołgo éí akʼah bąą álʼı̨́įgo nizhónígo yilwoł łeh. Tʼáá ákótʼé, baa saad dahólónígíí hashtʼeelʼı̨́įgo éí áłah náʼádleehgi nizhónígo yilwoł łeh, éí níłchʼi diyinii bineestʼąʼ bee ániitʼéego ákóhootʼée doo.

Tʼááłaʼí niitínígo ałʼąą ániitʼé. Bee ániitʼéegi, tʼáadoo leʼé daníilʼı̨́įgi dóó yéiiltiʼgi ałʼąą ádaatʼé. Áko díí binahjįʼ ałkʼis ídlı̨́įgi baa hózhǫ́ dóó bee ahídaniidlı̨́. Ákondi díí ałʼąą ániitʼéegi ałghaʼditʼááh bił danítʼiʼ. Elder nilı̨́įgo, łaʼ kótʼéego áhodooníiłgo átʼé ní: “Łaʼda ayóó yánízinii éí ayóó yádíłtihii yitʼáahjįʼ doogáałgi bá nanitłʼah łeh. Díí doo átʼéhí da hwiinidzin ndi, tʼáá yéigo anáhóótʼiʼ hodooleełgo átʼé.” Łaʼda nitsíkeesgi ałʼąą átʼée ndi, doósh ahídineelnáa da doo? Yilʼaadii naakigo baa haneʼgi dadíníilʼįįł. Peter baa nitsídeiikeesgo éí hahadziihgi tʼáadoo yaa nitsíkeesí hahadziih. John baa nitsídeiikeesgo éí áátʼįįłgi dóó bizaad áłtsé yaa nitsíkeesgo yee hahadziih. Peter dóó John éí ájítʼéegi ałʼąą átʼé. Ndi Jiihóvah bá joolnishgi nizhónígo ahił nijishnish. (Acts 8:14; Galatians 2:9) Oodlání ídlı̨́įgi ániitʼéegi ałʼąą ádaatʼée ndi, nihí ałdóʼ tʼáá ákótʼéego ahił nideilnish doo.

Bił áłah nánídleehígíí łaʼ áátʼįįłgi dóó bizaad yee hahadziihgi bá díílnihgo shąʼ? Yáʼátʼéeh doo díí béénílniihgo Jesus ná daaztsánígi átʼéego nikʼis  ałdóʼ yá daaztsą́, áko nikʼis ayóóʼíníʼníi doo. (John 13:34, 35; Romans 5:6-8) Kʼad éí doo shikʼis jílı̨́į da dooleeł índa doo hachʼįʼ yáshtiʼ da doo, nínízingo éí doo ákótʼée da. Ndi díí baa nitsíníkees: ‘Shikʼis, éísh Jiihóvah bibee hazʼáanii yikʼijįʼ aʼáłʼı̨́? Atíshíléehgoósh átʼı̨́? Doodaiiʼ ałʼąą ániitʼéegoósh nitsíikees? Ndi shikʼis yee átʼéhígíísh łaʼ bee áníshtʼée doo?’

Doo ayóó yáníłtiʼ dago, łaʼda ayóó yáłtiʼígíí bił Diyin Bizaad baa nahołneʼ áádóó haʼátʼíí bee bitsʼą́ą́dóó bíhwiidííłʼááł? Doodaiiʼ łaʼda niláahdi ayóó bił hadleeʼgoshąʼ? Baa ákonínízinísh, náás daazlı̨́įʼii, bitah doo dah hatsʼíidii, doodaiiʼ bichʼįʼ anídahaztʼiʼii bíká aníjílwoʼgo ił hózhǫ́ bił nítʼiʼgo átʼé? Kótʼéego diné bił hadleeʼígíí haitʼéego bitsʼą́ą́dóó íhwiidooʼááł? Bitsʼą́ą́dóó naʼnítingo éí azhą́ ałʼąą ánóhtʼée ndi, nikʼis yáʼátʼéehii yee átʼéhígíí bá baa ákonínízin. Azhą́ doo ayóó átʼéego ałkʼis doołeeł da ndi, áhánígo ahił nohdlı̨́į doo. Áko éí binahjįʼ tʼáá ánóhłah áádóó áłah náʼádleehgi hashtʼehodítʼée doo.

Ałkʼidą́ą́ʼ ałkʼis nilı̨́įgo Yódiya dóó Síntikii joolyéego haa haneʼ. Díí ałʼąą átʼéego nitsíjíkees ńtʼééʼ. Ndi Paul éí “Bóhólníihii bee tʼáá aheełtʼéego nitsóhkees nihidishní,” hałní. (Philippians 4:2) Nihí ałdóʼ tʼáá ałtso nihikʼis bił Jiihóvah bá nideilʼaʼgo áłah néiidleehgi kʼé bee hashtʼehodítʼée doo.

Łaʼda doo yáʼátʼééhgóó baa nitsíikeesgo, haʼátʼíí biniyé tʼáá ákǫ́ǫ́ tsı̨́įłgo hashtʼediilnííł? Díí átʼéego nitsáhákees éí chʼil bílátah hózhóón naniseʼ bitahgi chʼil deeníní haníísą́ nahalin. Díí chʼil deeníní tʼáadoo nahjįʼ kólyaagóó éí ałtso kʼeeʼąą dínóosééł. Tʼáá ákótʼé, doo yáʼátʼééhgóó łaʼda  baa nitsíikeesgo éí nihikʼeh didoodleełgo bił yah anéiijah yę́ę bihodidootʼih. Ndi Jiihóvah dóó nihikʼis ayóóʼííníiʼníigo éí áłah néiidleehgi bił yah anéiijahígíí kʼé bił nítʼiʼgo íiníilzin doo.

Kʼé niidzingo éí yáʼátʼéehgo hazʼą́ą doogo átʼé. Nihisister nilı̨́įgo kótʼéego ádaa halneʼ: “Shikʼis nilı̨́įgo, áłchíní nishłı̨́ nahalingo shaa nitsíkees. Ayóó shiʼdiiłʼá silı̨́ı̨́ʼ. Áko tʼóó tséʼádin ákóníshtʼé sélı̨́įʼgo biniinaa tʼáá naʼníleʼdii hachʼįʼ hahasdziihgo baa nídiisdzá. Kwíínísin, ‘Ił ídlı̨́įgi doo bee shaa nitsíjíkees da, áko shí ałdóʼ hachʼįʼ ákóníshtʼée doo niizı̨́ı̨́ʼ.’”

Ńtʼééʼ nihisister ájítʼéegi bee ádaa tsízdeezkééz. “Tʼáá shí tʼóó baaʼihígi áníshtʼéé lá niizı̨́ı̨́ʼ, áko biniinaa shaa nahóókaad. Tʼáá shí nitséskeesgi hashtʼedeeshłííł niizı̨́ı̨́ʼ. Jiihóvah bee bichʼįʼ sodeeszindóó bikʼijįʼ, shikʼis tʼáadoo leʼé łaʼ bichʼįʼ íishłaa dóó naaltsoos bikáaʼgi doo álʼínígi ániishłaa bidishníigo kʼé nábideeshniid. Díí tʼáá átʼé béédiyiiʼnah ałhidiiʼníigo ałhiníshiichid. Áádóó doo ałchʼįʼ haa danáániitʼée da.”

Tʼáá áníiltso éí kʼé bídin daniidlı̨́. Ndi ntsinéiiltłiʼgo doodaiiʼ ádaa hodzódlíigo éí diné kʼé bee ádingo áyósin łeh. Díí ákótʼéego hazʼą́, ndi Jiihóvah bá ndaalʼaʼii éí tʼáadoo ákódajítʼéhí doo hóʼní. Jiihóvah Yá Halneʼé dajílínígíí éí kʼé dóó łáʼí ídlı̨́ bee dah jookah doo. Jiihóvah éí Paul kótʼéego Oodlání bichʼįʼ áʼdíílííł yidííniid, éí “Diyin God yiniyé nihíká ádííniidii bą́ą́h daʼnohłı̨́įgo dayínóhkááh.” Éí náyookąąhgo ííłní, “tʼáá ałtsojįʼ aʼohgo ádanohtʼée leʼ, nihaʼátʼeʼ ádaadin leʼ, áádóó nízaadgóó hadaʼíínółní. Ałchʼįʼ hadaʼíínółníigo ayóóʼádaʼahíínóhʼní. Níłchʼi diyinii bee łáʼí nohłı̨́įgo kʼé bee daʼahíínóhtąʼgo ádaʼdíínółzin.” (Ephesians 4:1-3) Jiihóvah bidineʼé kʼé yee daʼahótąʼgo íiyisíí ílíinii átʼé. Áko éí bąą tʼááłáʼí nítínígo kʼé bidziilgo ádeiyíníilzingo nihibrothers dóó nihisisters haʼátʼíí shı̨́ı̨́ bił bee ałchʼįʼ anáhóótʼiʼgo tʼáadoo tʼóó ákótʼéhí hashtʼedadiilnííł.