1, 2. (a) Jesus éí tsʼídá ákéeʼdi bídahoołʼaahii yił sodoolzin yę́ędą́ą́ʼ haʼátʼíí yá yíyííkeed? (b) Jesus éí haʼátʼíí biniyé łáʼí ídlı̨́įgi yąą bíniʼ ńtʼééʼ?

JESUS éí bídahoołʼaahii bił akéeʼdi ajiyą́ą yę́ędą́ą́ʼ łáʼí ídlı̨́įgi yaa nitsíkees ńtʼééʼ. HaTaaʼ bił tʼááłaʼí jílínígi átʼéego hódahoołʼaahii tʼááłáʼí danílı̨́į doogo bá sozdoolzin. (John 17:20, 21 yíníłtaʼ.) * (Footnote níníłʼı̨́.) Jesus bídahoołʼaahii łáʼí dajílı̨́įgo Jiihóvah éí nahasdzáán bikáaʼjįʼ Jesus yiníłʼaʼgo bee bééhózin. Jesus bídahoołʼaahii ayóóʼádaʼahóʼníigo bee baa ákohwiindzin, díí ayóóʼóʼóʼní bee łáʼí ídlı̨́įgo ádahósin.​—John 13:34, 35.

² Jesus éí bídahoołʼaahii doo ayóó łáʼí dajílı̨́į dago yaa ákoniizı̨́ı̨́ʼ.Áko éí bitłʼééʼ bił dajiyą́ągo ląʼígóó bee bichʼįʼ hajoodzííʼ. Éí ałghadaʼditʼáahgo díkwíidi shı̨́ı̨́ kódaʼahidooʼniid, “Nihí háidashąʼ aláahdi ániitʼéego baa nitsáhákees?” (Luke 22:24-27; Mark 9:33, 34) Łah ałdóʼ James dóó John éí  yáʼąąshdi ninahatʼaʼ ninishʼnáájí índa ninishtłʼají dah díníikeeł níigo Jesus yíyííkeed.​—Mark 10:35-40.

3. Jesus bídahoołʼaahii éí łáʼí ídlı̨́įgi haʼátʼíí nidabiníłtłʼa ńtʼééʼ? Haʼátʼíí baa nídadíitʼįįł?

³ Jesus bídahoołʼaahii éí ádíhónííh dazhnízingi doo tʼáá éí tʼéiyá biniinaa doo łáʼí dajílı̨́į da. Jesus naagháhą́ądą́ą́ʼ éí diné ayóó daʼahijoodláago biniinaa ałtsʼá káh. Áko Jesus bídahoołʼaahii éí kótʼéego nitsáhákees nahjįʼ kódazhdoolííł. Díí táaʼgo naʼídíkid baa nídadíitʼįįł: Jesus éí diné joodláagi haitʼéego yeinístʼįįd? Bikééʼ ndaakai yę́ę aheełtʼéego ąą nitsáhákeesgo łáʼí ídlı̨́į dooígi haitʼéego yee neineeztą́ą́ʼ? Áádóó Jesus nihinááł áátʼįįdgi índa yee naʼneeztą́ąʼii haitʼéego bee łáʼí daniidlı̨́į doo?

4. Jesus biʼjoodláá ńtʼéeʼgi łaʼ chʼíníʼaah.

⁴ Jesus ałdóʼ biʼjoodláá ńtʼééʼ. Philip éí Mesáíyah bikʼi níyá níigo Natháneiyel yił hoolneʼ, ńtʼééʼ Natháneiyel ání: “Názarethdóó haʼátʼíhída yáʼátʼéehiísh tʼáá hodooleeł?” (John 1:46) Micah 5:2 éí Béthlehemdi Mesáíyah bidiʼdoochííł níigo bítséedi yaa chʼíhoníʼánę́ę Natháneiyel hoł bééhózin. Éí Názareth nahósʼaʼgi yáʼátʼéehii doo hodooleeł da, ákwii Mesáíyah bighan doogo doo bohónéedzą́ą da nízin. Áádóó Judíya dineʼé ayóó ádaatʼéii éí Jesus Gáliliidę́ę́ʼ naagháago biniinaa doo yáʼátʼééhgóó haa nitsídaakees. (John 7:52) Judíyadę́ę́ʼ diné ndaakaígíí éí Gáliliidę́ę́ʼ diné ndaakaígíí haláahdi ádaniitʼé danízingo nitsídaakees. Łaʼ Jew dineʼé éí Jesus ní yeeʼ Samériya dineʼé nilı̨́ deiłníigo dayódziih ńtʼééʼ. (John 8:48) Háálá Samériya dineʼé éí náánáłahdę́ę́ʼ dineʼé dajílı̨́, áádóó hwedaʼoodląʼ éí Jew dineʼé bibeʼoodląʼ doo bił aheełtʼée da. Judíyadę́ę́ʼ dóó Gáliliidę́ę́ʼ diné éí Samériya dineʼé doo bił danilı̨́į da áádóó yitsʼą́ąjįʼ kódaatʼé.​—John 4:9.

5. Jesus bídahoołʼaahii éí haitʼéego dabijoodlaa ńtʼééʼ?

⁵ Jew dineʼé beʼoodląʼ bá álą́ąjįʼ naazínę́ę ałdóʼ Jesus bikééʼ ndaakai yę́ę doo bił danilı̨́į da. Férisiiz éí “atídadoolníiłgo bá hadaʼiisdzííʼ,”deiłní. (John 7:47-49) Férisiiz éí Jew biʼóltaʼgi tʼáadoo ajííłtaʼ daaígíí índa hó bee ádaʼoolʼįįłii doo yikʼehgóó yigáałii éí doo ájíłʼı̨́į da índa tʼáá bóhólníhígíí jílı̨́įgo haa nitsídaakees. (Acts 4:13) Jesus dóó bídahoołʼaahii dabijoodlaa ńtʼééʼ, háálá íídą́ą́ʼ diné éí bibeʼoodląʼ, binaanish dayótąʼgi, dóó diné ádóoneʼé ídlı̨́įgi yee ádaa dahaʼniih ńtʼééʼ. Jesus bídahoołʼaahii éí diné joodláagi índa łahdę́ę́ʼ diné baa nitsáhákeesgi ałdóʼ ákódajítʼéego ádahodoolííł. Áko łáʼí dajílı̨́į doogo éí nitsídajikeesgi hashtʼedazhdoolííł.

6. Diné joodláagi haitʼéego nihí ałdóʼ ákódííníiłgi łaʼ chʼíníʼaah.

⁶ Dííshjı̨́įdi tʼáá ałtsogóó diné joodláago hazʼą́. Diné shı̨́ı̨́ łaʼ nihijoołá, doodaiiʼ haashı̨́ı̨́tʼéego łaʼda jiiníłáago átʼé. Nihisister Australiadi pioneer nilı̨́įgo  ání: “Aboriginal dineʼé tʼáá níléídę́ę́ʼ dóó tʼahdii nahjįʼ bidohní dóó atídabidilʼı̨́įgo biniinaa bilagáana ayóó jooshłxá sélı̨́ı̨́ʼ.” Áádóó tʼáá hó doo yáʼátʼéhígi ádahodilʼı̨́įgo biniinaa tʼóó tsé ádin diné jijoołá jizlı̨́ı̨́ʼ. Canadadę́ę́ʼ Nihibrother kótʼéego nitséskees ńtʼééʼ: “Frenchjí saad yee yádaałtiʼígíí ayóó ádaatʼé nisin ńtʼééʼ.” Áko biniinaa bilagáanakʼehjí yádaałtiʼígíí jijoołá.

7. Jesus éí diné joodláagi haitʼéego yeinístʼįįd?

⁷ Jesus naagháhą́ądą́ą́ʼ diné joodláá ńtʼéeʼgi, tʼáá ákótʼéego ayóó bidziil dóó tʼáadoo ákóníshtʼéhí doo jinízin dooígi nantłʼa. Áko Jesus éí ajoodlá haitʼéego yeinístʼįįd? Áłtsé éí diné doo jijoołáa da. Aheełtʼéego ąą nitsíjíkees. Daʼatʼíinii, baa dahojoobaʼíii, Férisiiz, Samériya dineʼé, áádóó tax nahalyéii yá naazdáii índa bąąhígi ádaatʼéii neineeztą́ą́ʼ. Náákóneʼé Jesus éí diné tʼáadoo baa ayadahoołníní doodaiiʼ dajiinohłáhí níigi bídahoołʼaahii neineeztą́ą́ʼ áádóó yinááł yikʼehgóó ádzaa.

8. Łáʼí ídlı̨́ haʼátʼíí bee naʼnitin? Łaʼ chʼíníʼaah.

⁸ Jesus éí binahjįʼ bee łáʼí ídlı̨́į dooleełígíí yee naneeztą́ą́ʼ. Bídahoołʼaahii ííłní: “Nihí tʼáá ánółtso ałkʼisóó danohłı̨́.” (Matthew 23:8, 9 yíníłtaʼ.) Tʼáá áníiltso ałkʼis daniidlı̨́, háálá tʼáá áníiltso Ádam baʼáłchíní daniidlı̨́. (Acts 17:26) Jesus éí bídahoołʼaahii ííłníigo ałkʼis dóó ałlah danohłı̨́, háálá Jiihóvah éí Nihizhéʼé nilı̨́ dadohní. (Matthew 12:50) Áádóó tʼáá ájítʼé éí God bił hazʼą́ą́dóó bíjiikai, áádóó ayóóʼóʼóʼní índa oodląʼ bee łáʼí dajílı̨́. Éí bąą daalʼaadii éí Oodlání naaltsoos yichʼįʼ ádayiilaa yę́ę biiʼdóó shikʼisóó deiłníigo yee dayózhí.​—Romans 1:13; 1 Peter 2:17; 1 John 3:13.

9.Haʼátʼíí biniinaa éí Jew dineʼé tʼáá hó hodineʼé doo bee ádaa deidzódlíi da doo?

⁹ Jesus éí bídahoołʼaahii tʼáá ánółtso ałkʼisóó danohłı̨́įgo ádaa nitsídaakees yidííniidóó bikʼijįʼ éí aʼohgo ádaʼdíínółzin yidííniid. (Matthew 23:11, 12 yíníłtaʼ.) Baa ídahwiilʼą́ąʼgo daalʼaadii éí ádaa hodzódlí biniinaa łahda ałtsʼá káh ńtʼééʼ. Jesus naagháhą́ądą́ą́ʼ éí dóoneʼé ídlı̨́įgi yee ádaa dadzódlíí ńtʼééʼ. Ląʼí Jew dineʼé éí nihí Éíbraham baʼáłchíní daniidlı̨́ danízingo náánáłahdę́ę́ʼ dineʼé bilááh ádaniitʼé danízin ńtʼééʼ. Ndi John Taah Iiníiłii áháłní: “Diyin God díí tsé kǫ́ǫ́ naaznilígíí bee Éíbraham baʼáłchíní íidoolíiłgo yíneelʼą́.”​—Luke 3:8.

10. Náánáłahdę́ę́ʼ dineʼé doo yáʼátʼééhgóó baa nitsáhákeesgi haitʼéego Jesus yee naʼneeztą́ą́ʼ? (Áłtsé naashchʼąąʼígíí nishtłʼajígoígíí níníłʼı̨́.)

¹⁰ Jesus naʼneeztą́ąʼgo éí hodineʼé doo bee ádeidzódlíi da doo. Bee hazʼáanii yínaʼniłtinii łaʼ kóníigo nahódééłkid: “Háí bił kééhashtʼíinii nilı̨́?” Bił ííshjání ázhdoolíiłgo Jesus haneʼ łaʼ baa hojoolneʼ. Éí Jew dineʼé nilı̨́įgo aghadaʼiiʼníiłii atídahoolaago tʼáá ákǫ́ǫ́ atiingóó dziztı̨́įgo ádahoolaa. Jew dineʼé łaʼ tʼóó hwíighah chʼíheeskai, tʼáadoo ndi háká iijeeh da. Ndi Samériya dineʼé nilı̨́įgo haa aʼááh niidzingo haa áhoosyąąd. Jesus ałtso hoolneʼgo bee hazʼáanii yínaʼniłtinii íidííniid, ni ałdóʼ tʼáá Samériya dineʼé ádzaaígi átʼéego ánítʼı̨́. (Luke 10:25-37) Jesus ííshjání áyiilaago éí Samériya dineʼé áátʼįįdgi éí bił kééhojitʼíinii ayóóʼóʼóʼní Jew dineʼé yee neineeztą́ą́ʼ.

11. Jesus bídahoołʼaahii éí haʼátʼíí biniyé diné aheełtʼéego baa nitsídajikees doo? Jesus éí haitʼéego díí yee neineeztą́ą́ʼ?

 ¹¹ Jesus tʼah doo yáʼąąshiigóó dah nídiidáahgo bídahoołʼaahii éí “Judíyagi tʼáá átʼéé nítʼééʼ áádóó Samériyagi, índa nahasdzáán nidaneesʼą́ą́góó” nidahodoołnih yidííniid. (Acts 1:8) Kótʼéego ádaʼjiilaago éí ádaa hodzódlí índa diné joodlá nahjįʼ kódazhdoolííł. Jesus éí kéyah náánáłahdę́ę́ʼ yigáałii tʼáá áłahájįʼ yáʼátʼéehgo yaa yáłtiʼ ńtʼééʼ. Éí hódahoołʼaahii éí náánáłahdę́ę́ʼ yigáałii ndazhdínóotįįł biniyé hashtʼeʼádazhdólzin doogo áhoolaa. Jesus éí náánáłahdę́ę́ʼ dineʼé siláo nilı̨́įgo bibeʼoodląʼ bidziilgi yee yaa haznih. (Matthew 8:5-10) Názareth nijigháádę́ę́ʼ, éí náánáłahdę́ę́ʼ dineʼé danilı̨́įgo Jiihóvah bíká eelwodgi Jesus yaa hólneʼ. Éí asdzání bąąh áhásdįįdii Finííshiya dineʼé nilı̨́įgo Zárefathdę́ę́ʼ naagháago áádóó Síriya dineʼé nilı̨́įgo Néíyaman. (Luke 4:25-27) Jesus éí Samériya dineʼé asdzánígo yił nahasneʼ áádóó Samériya dineʼé bikintahgi naakijı̨́ bił nahojisneʼ.​—John 4:21-24, 40.

12. Samériya dineʼé asdzánígo Jesus éí bichʼįʼ yáłtiʼgo bídahoołʼaahii haitʼéego yaa tsídadeezkééz? (Áłtsé naashchʼąąʼígíí ałníiʼgiígíí níníłʼı̨́.)

¹² Jesus bídahoołʼaahii éí náánáłahdę́ę́ʼ dineʼé joodláagi bikʼeh dazhdidoodleełgi bá ndanitłʼa. Jesus éí Samériya dineʼé asdzánígo bichʼįʼ hadeesdzih niizı̨́įʼgo biniinaa tʼóó bikʼee hoł adahóóyóí. (John 4:9, 27) Haʼátʼíí biniinaa? Éí shı̨́ı̨́ Jew dineʼé biʼoodląʼ yá álą́ąjįʼ naazíinii éí hasłą́ągi asdzání doo yichʼįʼ yádaałtiʼ daaígi biniinaa, áádóó Samériya dineʼé asdzání doo yáʼáshóonii yaa naagháii nilı̨́. Jesus bídahoołʼaahii éí íyą́ dahałní, ndi Jesus éí asdzání tʼáá bichʼįʼ yáshtiʼ jinízingo azhdooyı̨́ı̨́ł yę́ęgi doo ayóó baa nitsíjíkees da. God éí nizhdíʼnóotı̨́ı̨́ł hóʼní, índa Hazhéʼé íinízinii ájooníił doo jinízin, éí díí Samériya dineʼé asdzání ałdóʼ bił nahozhdoolnihgi hachʼiyąʼ átʼé nahalin.​—John 4:31-34.

13. James dóó John éí Jesus yee nahonitinígíí haitʼéego tʼáadoo hazhóʼó bikʼizhʼdiitą́ą da?

¹³ James dóó John éí Jesus naʼneeztą́ąʼgi tʼáadoo bikʼizhʼdiitą́ą da. Jesus éí bídahoołʼaahii Samériya góyaa bił jookahgo dah hwiidoołkáałgi łaʼ hadazneeztą́ą́ʼ. Ndi Samériya dineʼé doo kweʼé dínóojah da dahodííniid. James dóó John ayóó átʼéego bikʼee háhóóchįįdgo yádiłhił biyiʼdę́ę́ʼ kǫʼ dayídíikiłgo díí diné íidoołdįįłgo nił tʼáá ákoósh yiłní Jesus. Áádóó Jesus hodeezteh. (Luke 9:51-56) Ndi Gáliliidi, nijiʼaashídę́ę́ʼ, áadi nijikaigo éí doo kótʼéego háhóóchįįd da doo ńtʼééʼ. Tʼahádóó John éí Samériya dineʼé yił nahalneʼgo ląʼí dah hwíistsʼą́ą́ʼ ńtʼééʼ, éí kózhdííniid yę́ę shı̨́ı̨́ baa yáznízin.​—Acts 8:14, 15.

14. Saad dahazlı̨́įʼgo haitʼéego hashtʼeelyaa?

¹⁴ Péntekast 33 yę́ędą́ą́ʼ tʼáadoo nízaad nihoolzhíshí, áłah náʼádleehgi łaʼ saad dahazlı̨́ı̨́ʼ. Nihibrothers éí asdzání bąąh ádahasdįįdii chʼiyáán yanídaʼaltsoʼ, ndi sáanii Gríikjí yádaałtiʼii tʼáadoo yadaʼastsood da. (Acts 6:1) Díí saad łah átʼéhígíí bee yátiʼgo daatsʼí biniinaa kóhóótʼįįd. Yilʼaadii tʼáá akǫ́ǫ́ tsı̨́įłgo hashtʼedayiilaa. Hastóí Gríikjí yízhí dabízhiʼgo tsostsʼid yiltʼéego baʼahódlíhígíí nídeidiinilgo aheełtʼéego chʼiyáán nideezniiʼ. Éí sáanii tʼáadoo badaʼastsood da yę́ę bił dahóózhǫǫd.

15. Peter éí tʼáá ałtso diné tʼáadoo ałʼohgo baa nitsáhákeesígi haitʼéego baa íhojoołʼą́ą́ʼ? (Áłtsé naashchʼąąʼígíí nishʼnáájígoígíí níníłʼı̨́.)

 ¹⁵ 36 C.E. yihahgo Jesus bídahoołʼaahii éí dineʼé náánáłahdę́ʼígíí yił nidahalneʼgo yaa nídiikai. Tʼah doo kótʼéego ádaʼjilééh yę́ędą́ą́ʼ Peter éí Jew dineʼé tʼéiyá bił nijildeeh ńtʼééʼ. Áádóó God éí Oodlání ííłníigo tʼáadoo ałʼohgo diné baa nitsídaakeesí. Áko Peter éí Rome bisiláo nilı̨́įgo Korníílyas neineeztą́ą́ʼ. (Acts 10:28, 34, 35 yíníłtaʼ.) Díí bikéédóó Peter éí Oodlání doo Jew dineʼé danílínígíí yił naaldeeh índa yił dah ayą́ągo yaa nídiidzá. Áádóó nááhodideeshzhiizhí Peter éí Ántiyakdi Oodlání doo Jew dineʼé danílínígíí doo bił nídaʼjidı̨́ı̨́h da jizlı̨́ı̨́ʼ. (Galatians 2:​11-14) Áko Paul éí Peter yideeztehgo yee yichʼįʼ haadzííʼ, áádóó Peter díí hashtʼééjiidlaa. Díí haitʼéego nihił bééhózin? Peter éí Jew dineʼé índa doo Jew dineʼé danilíinii tsʼídá áłtsé naaltsoos yichʼįʼ áyiilaa yę́ę tʼáá ałtso nihikʼisóó ayóóʼóóʼníigi ílíinii átʼé níigo akʼeʼashchı̨́.​—1 Peter 1:1; 2:17.

16. Ałkʼidą́ą́ʼ Oodlání yę́ę haʼátʼíí bee hwéédahoʼdílzin ńtʼééʼ?

¹⁶ Jesus hanááł áátʼįįdgi binahjįʼ daalʼaadii éí “diné tʼáá ałtso” ayóóʼóóʼníi dooígi bídahojiiłʼą́ą́ʼ. (John 12:32; 1 Timothy 4:10) Łah átʼéego diné baa nitsáhákeesgi tʼah hodíínaʼgo índa bídahojiiłʼą́ą́ʼ. Áádę́ę́ʼ Oodlání yę́ę éí ayóóʼádaʼahízhdóʼníigi bee hwéédahoʼdílzin ńtʼééʼ. 200 C.E. yihahgo daatsʼí Tertullian wolyéego éí Oodlání kótʼéego baa nitsáhákees ńtʼééʼ ní, “Ayóóʼádaʼahóʼní,” áádóó “tʼáá bí bibee daʼiinaʼ ałhá ninádeidídooʼaałgo yee ałhaa nitsídaakees.” Oodlání éí God diné yaa nitsíkeesí átʼéego, diné aheełtʼéego baa nitsídajikeesgo ádazhdiilyaa, háálá éí “iiná ániidíii” biih dajiiskai.​—Colossians 3:10, 11.

17. Diné joodláagi, łaʼ tʼahdii nihiiʼ hólǫ́ǫgo haitʼéego nahjįʼ kódoolnííł? Łaʼ baa chʼíhoníʼaah.

¹⁷ Nihí ałdóʼ tʼáá ákótʼée doo, diné  jiniidláá ńtʼéeʼgi tʼáá hodidoonaałgo índa doo ániitʼée da dooleeł. Nihisister éí Francedę́ę́ʼ naagháago díí ayóó shá nantłʼa ńtʼééʼ níigo kóní: “Ayóóʼóʼóʼní, aheełtʼéego ałtsʼą́ą́ʼ ałkʼiiz dooleełgi, diné daʼníłtsʼą́ą́dę́ę́ʼ deíkáahii ayóóʼóóʼníigi íiyisíí óolyéegi Jiihóvah yee nashineeztą́ą́ʼ. Ndi diné joodláagi tʼáá íiyisíí nahjįʼ kódoolníiłgi tʼahdii bíhooshʼaah, díí nantłʼaii átʼé. Éí bąą bee shíká aʼdoowoł biniyé tʼáá sodisziní sodiszin.” Nihisister Spaindę́ę́ʼ naagháago áníigo éí łahdę́ę́ʼ dineʼé łaʼ, tʼahdii łaʼda doo yáʼátʼééhgóó baa nitséskees náshdleeh. Kóní: “Ląʼídi tʼáá bikʼeh nidíshdleehgo átʼé. Ndi shił bééhózin yéigo bikʼeh dishdlı̨́į doo. Jiihóvah bichʼįʼ ahééh nisin éí łáʼí ídlı̨́įgo dah oonééł bitahdóó honishłǫ́.” Tʼáá áníiltso éí nitsíikeesgi hazhóʼó bee ádaa ákoniidzin doo. Diné joodláagi, łaʼísh tʼahdii nihiiʼ hólǫ́?

18, 19. (a) Haʼátʼíí biniyé diné tʼáá ałtso kʼé bidiiʼníi doo? (b) Haitʼéego ákóniitʼée doo?

¹⁸ Yáʼátʼééh béédeilniihgo tʼáá áníiltso łah God bitsʼą́ądi dahoniidlǫ́ǫ́ ńtʼééʼ. (Ephesians 2:12) Ndi Jiihóvah bibee ayóóʼóʼóʼniʼ yee ádíchʼįʼ kónihiilaa. (Hosea 11:4; John 6:44) Áádóó Christ éí wóshdę́ę́ʼ nihidííniidgo God baʼáłchíní bídiikaigo nihá bohónéedzą́ągo áyiilaa. (Romans 15:7 yíníłtaʼ.) Azhą́ nidaʼiyiilzíih ndi, Jesus éí shaa hohkááh nihidííniid, áko éí bąą doo łaʼda nahjįʼ kwíilʼı̨́į da doo!

¹⁹ Díí nihooghááh bichʼįʼ hoolzhiizhgo diné tʼóó yówehda ałtsʼákahgo daʼahijoodláa doo. (Galatians 5:19-21; 2 Timothy 3:13) Ndi nihí Jiihóvah bidineʼé daniidlı̨́įgi éí “yáʼąąshdę́ę́ʼ bee hódzáanii” hádeiitʼı̨́, háálá éí bee aheełtʼéego ałhąąh nitsáhákees dóó bee kʼé daʼahidiiʼní. (James 3:17, 18) Baa nihił dahózhǫ́ǫgo kéyah náánáłahdę́ę́ʼ ndaakaii danihikʼisgo ádeilneʼ, yee ádaʼoolʼįįłii nihił yáʼádaatʼééh, áádóó bizaad yee yádaałtiʼígíí bídahwiilʼaah. Kódeiitʼı̨́įgo éí “tooh nílı̨́ nahalingo” dóó “tónteel yilkʼooł nahalingo” nihił áda hodéesyéél.​—Isaiah 48:17, 18.

20. Ayóóʼóʼóʼniʼ haitʼéego bee hashtʼeʼnitsínéiikeesgo ánihiłʼı̨́?

²⁰ Australiadę́ę́ʼ nihisister baa chʼíhootʼánę́ę Diyin Bizaad yíhoołʼaahgo diné jijoołáagi kóódígo doo ájítʼée da jooleeł. Nitsíjíkeesgi ayóóʼóʼóʼniʼ bee hashtʼeʼnitsíjíkeesgo áhoolaa. Canadadę́ę́ʼ nihibrother French bizaad yee yáłtiʼ ájíníigo éí baa ákozhniidzı̨́įʼgo diné daʼahijoodlá háálá doo ałhéédahójilzin da. Áádóó “diné yee ádaatʼéiigi éí naagháádę́ę́ʼ doo bee nélʼı̨́į da,” baa ákozhniizı̨́ı̨́ʼ. Nihisister éí bilagáana nilı̨́įgo hachʼooní ájiilaa! Díí bitsʼą́ą́dóó baa ídahwiilʼaahgo ayóóʼóʼóʼniʼ éí diné joodláagi yee yikʼeh didlí. Ayóóʼóʼóʼniʼ éí łáʼí ídlı̨́įgi yéigo ahínihółtąʼ.​—Colossians 3:14.