LĄʼÍ idaʼdiiłʼáaii áádóó achʼįʼ anídahaztʼiʼgo kééhwiitʼı̨́, áko ił hózhǫ́ bikʼíʼdoodáałgi tʼáá nantłʼa. Azhą́ nihił hózhǫ́ǫ ndi, tʼáadoo kótʼéʼílíní hatsʼą́ą́ʼ ádįįh. Tʼáá aaníigo ił hózhǫ́ índa kʼé doo nineełnéehii nihee hólǫ́ǫ doogo Diyin Bizaad éí haʼátʼíí nihíká adoolwoł nihiłní? Náánáłaʼda haitʼéego díí bee bíká adiilwoł?

Tʼáá aaníigo ił hózhǫ́ǫ doogo éí hasih índa aa áháyą́ągo nihił hazʼą́ą doo. Diné yáʼátʼéehii nihikʼis doo, áádóó íiyisíí éí Diyin God ahánígo ííníilzin doo. Díí lá haitʼéego ádiilnííł?

Jiihóvah yee hasʼáanii tʼáá áłahjįʼ nihá yáʼátʼééh. Éí bikʼeh honiilʼı̨́įgo Jiihóvah baʼííníidlíigi bééhózínígo ííníilzin áádóó nizhónígo bikʼis niidlı̨́į doo. (Jeremiah 17:7, 8; James 2:22, 23) Kwíidzáago éí Jiihóvah ahánígo nihił nilı̨́į doo, áádóó nihíniʼ hashtʼedítʼéego nihá áyósin doo. Isaiah 32:17 ání: “Tʼáá átʼéii éí bee hashtʼehodítʼée doo índa tʼáá ákogi átʼéii bee ił hodéezyéél áádóó hoł tʼáá aaníigo átʼéii iʼdeełní.” Hajéí tłʼááhdę́ę́ʼ íiznízingo Jiihóvah bikʼeh hojíłʼı̨́įgo tʼáá aaníigo ił hózhóonii bikʼízhdoogááł.​—Isaiah 48:18, 19.

Hashtʼehodítʼé doo ninítʼiʼii nihee hólǫ́ǫ doogo áká análwoʼii Jiihóvah nihainílá. Éí biníłchʼi diyinii, díí ílíinii átʼé.​—Acts 9:31.

Yilʼaadii Paul áníigo hashtʼehodítʼé éí “níłchʼi diyinii bineestʼąʼ” átʼé. (Galatians 5:22, 23) Hashtʼehodítʼéii éí God biníłchʼi diyinii bitsʼą́ą́dóó nihwiileeh, áko nihił hashtʼehodítʼée doo niidzingo éí níłchʼi diyinii bíniʼdii nihoolóos doo. Díí haitʼéego ádiilnííł?

 Áłtséhígi éí Diyin Bizaad tʼáá ákwíí jı̨́ yíníiltaʼ doo. (Psalm 1:2, 3) Yíníiltaʼígíí nabikʼítsíilkeesgo éí níłchʼi diyinii nihíká análwoʼgo Jiihóvah yaa nitsékeesii bikʼidiʼdiitı̨́ı̨́ł. Bíhwiidiilʼáłígíí éí Jiihóvah haʼátʼíí biniyé hashtʼehodítʼé íiyisíí bił nilı̨́ áádóó tʼáá bí haitʼéego bił hashtʼehodítʼé? Diyin Bizaad bitsʼą́ą́dóó naʼnitin bikʼehgo hiniiʼnáago éí hózhǫ́ǫgo nihił hashtʼehodítʼée doo.​—Proverbs 3:1, 2.

Naaki góneʼ éí níłchʼi diyinii bíká sodadiilzin doo. (Luke 11:13) Jiihóvah éí áká aʼaalyeed bídayókeedii ííłní: “Diyin God bitsʼą́ą́dę́ę́ʼ bee achʼįʼ hózhǫ́ náhásdlı̨́įʼii, akʼidiʼyiitįįh tʼáá ałtso yiláahdi átʼéii, éí Christ Jesus bee nihijéí índa nihintsékees yaa áhályą́ą doo.” (Philippians 4:6, 7) Jiihóvah ahánígo ádeíníilzin índa biníłchʼi diyinii badaʼííníidlíigo nihíniʼ hashtʼedítʼéego nihá áyósin.​—Romans 15:13.

Ląʼí diné Diyin Bizaad bikʼehgo dadeeskai, áko kʼad Jiihóvah bił kʼé daʼahizhdiʼní, hániʼ hashtʼedadítʼé áádóó kʼé daznidzin. Haitʼéego há bohónéedzą́ągo kódajiidzaa?

Tʼáá aaníinii bee naʼnitin tʼah doo bił béédahoozįįh yę́ędą́ą́ʼ łaʼ nihibrothers dóó nihisisters ayóó bádahachįʼ dóó ayóó atíʼdeeshłííł danízin ńtʼééʼ. Ákótʼée ndi wołí bee ádaatʼı̨́įgo yáʼátʼéehgo dadeeskai. Kʼad éí dajoobaʼ, hadaʼólní áádóó kʼé danídzin. * (Footnote níníłʼı̨́.) (Proverbs 29:22) Nihibrother David dóó nihisister Rachel ákójítʼéé ńtʼééʼ, kʼad éí hániʼ siláagi hashtʼééjiidlaago baa haneʼ.

David tʼah doo oodląąh yę́ędą́ą́ʼ ayóó aa níjítʼı̨́ áádóó bił dahaghanígíí bichʼįʼ ayóó hashké jińdzin ńtʼééʼ. Díí bee ádaa ákozhniidzı̨́įʼgo, łaʼgo áníshtʼée doo jiniizı̨́ı̨́ʼ. Haitʼéego hashtʼeʼninádzídzá? David ájíní, “Diyin Bizaad biiʼdę́ę́ʼ naʼnitinii bikʼehgo dah diiyá.  Áadi índa shimá dóó shizhéʼé dóó bił háíjééʼ ił ídlı̨́ bee ałchʼįʼ yádeiltiʼgo hahoolzhiizh.”

Rachel éí doo yáʼáhootʼééhgóó hayaa hooʼaʼ. Kótʼéego baa hojilneʼ: “Ayóó áháchįʼ hólǫ́ǫgi shiyaa hooʼaʼ, áko tʼahdii bee shichʼįʼ anáhóótʼiʼ.” Rachel haʼátʼíí bíká eelwod? Kójíní: “Sodiszingo Jiihóvah baʼííníshłí.”

Nihináágóó áháchįʼ hólǫ́ǫ ndi, nihí nihíniʼ hashtʼedadítʼé. David dóó Rachel tʼáá nidíltʼéhígo éí kótʼéego baa haneʼ. Ląʼí éí Diyin Bizaad bee naʼnitinii ałdóʼ yikʼeh dadeeskai dóó God biníłchʼi diyinii yadaʼólíigo bił dahózhǫ́. Áko doo nantłʼagóó akʼéí índa oodlání bił áłah néidleehígíí nizhónígo bił kʼé daʼahidiiʼní. Ndi Jiihóvah ání, “Diné tʼáá ałtso bił kʼé daʼahidohʼníigo kéédahohtʼı̨́.” (Romans 12:18) Díísh bohónéedzą́ągo átʼé? Áádóó haʼátʼíí biniyé diné tʼáá ałtso bichʼįʼ kʼé daniidzin doo?

God biNahatʼaʼ haneʼ yáʼátʼéehii ił hózhǫ́ náhásdlı̨́įʼii hootahgóó baa nidahwiilneʼ. (Isaiah 9:6, 7; Matthew 24:14) Díí haneʼ ląʼí diné bił yáʼádaatʼééh. Binaagóó ádahoonííł yę́ę doo yikʼee bádahachįʼ da, kʼad éí tʼáá íiyisíí bił chodahooʼı̨́. Áko éí “bee achʼįʼ hózhǫ́ náhásdlı̨́įʼii” hádaatʼı̨́.​—Psalm 34:14.

Łaʼ éí ił hózhǫ́ náhásdlı̨́įʼii haneʼ baa dahwiilneʼígíí tʼóó áłtsé deidiitsʼı̨́įhgo doo bił yáʼádaatʼéeh da łeh. (John 3:19) Azhą́ kódajítʼée ndi, Jiihóvah éí biníłchʼi diyinii yee nihíká análwoʼ. Éí bee nahwiilneʼgóó diné tʼáá ałtso nihił nilı̨́ índa kʼé niidzingo ánihósin. Jesus ánínę́ę bikʼeh ániitʼée doo: “Hooghangi yah adahohkáahgo, Díí hooghangi hózhǫ́ǫ leʼ, dadohníi doo. Áko hooghangi kéédahatʼíinii bił daʼílı̨́įgo, bíniʼdii kʼé bee yínóhʼníinii bił hólǫ́ǫ dooleeł, nidi doo yą́ą́h danilı̨́ı̨́góó, éí kʼé dadooniidii nihichʼįʼ tʼą́ą́ʼ nídoodleeł.” (Matthew 10:11-13) Azhą́ łaʼ doo bił yáʼádaatʼéeh da ndi, kóniitʼéego éí kʼé dóó ił ídlı̨́ nihee hólǫ́ǫ doo. Béénílniih, diné łaʼ łah átʼéego tsíńdadookosgo bee bíká adiijahgo átʼé.

Naatʼáanii danilíinii nidahwiilneʼgi azhą́ yikʼijįʼ danilı̨́į ndi, kʼé hwiindzin índa ił ídlı̨́ bee bichʼįʼ yádeiltiʼ. Africadi Kingdom Hall ádadoolnííł yę́ę doo yee nahasʼą́ą da. Nihibrothers bił béédahózingo hazhóʼó kʼé bee hashtʼedoolníiłgo átʼé. Nihibrother łaʼ missionary nilı̨́ı̨́ ńtʼéeʼgo High Commissioner [Africadóó yá yáłtiʼgo naagháii] bichʼįʼ hazhdoodzih biniyé London Englandgóó ahoʼdoolʼaʼ. Jiihóvah Yá Dahalneʼé kʼé bił naaztʼiʼgo nidaalnish bizhdidooniił.

Nihibrother ání, “Asdzą́ą́ naaltsoos ííłʼíní dah sidáagi níyáago éí Africadę́ę́ʼ ééʼ yee hadítʼé. Áko éí saad łaʼ bóhoołʼą́ʼígíí bitsʼą́ą́dóó łaʼ dóoneʼé jílı̨́ niizı̨́ı̨́ʼ. Áádóó éí saadígíí bee yáʼátʼééh bidííniid. Shikʼee deesyiz, áádóó áshíłní, ‘Haʼátʼíí biniyé níháíníyá?’ Áádóó hazhóʼó bichʼįʼ haasdzíiʼgo ábidishní, ‘High Commissioner baa níyá.’ Áádóó yichʼįʼ hoolneʼ. High Commissioner shichʼįʼ chʼíníyáago tʼáá ákwii saad bee yátiʼígíí yee shichʼįʼ haadzííʼ. Hazhóʼó shíistsʼą́ąʼgo Jiihóvah Yá Dahalneʼé éí hodéezyéelgo naanish ádeełʼı̨́ dishníigo bee bił hweeshneʼ.”

Nihibrother éí High Commissioner yił hoolneʼgo éí naanish ádeilʼı̨́įgi yaa ákoniizı̨́ı̨́ʼ, kʼad éí ajoodlá hwee ádin sílı̨́ı̨́ʼ. Tʼahádóó, Africa binahatʼaʼ yee ndahazʼánę́ę łah ándayiidlaago Jiihóvah Yá Dahalneʼé Kingdom Hall ádeiłʼı̨́įgo yá yee dahoołʼaʼ. Nihibrothers dóó nihisisters ayóó baa bił dahóozhǫǫd! Áko diné nihił nilı̨́įgo éí hodéesyéelgo hazʼą́ą doo.

Dííshjı̨́įdi Jiihóvah bidineʼé hodéesyéelgo bił nahazʼą́ągo Jiihóvah yá ndaalʼaʼ. Tʼááłaʼí niitínígo éí hashtʼehodítʼé atah łahdóó ííníilzingo éí nihił hashtʼehodítʼéego íʼdííníilzin doo. Áko Jiihóvah nihaa bił hózhǫ́ǫ doo. Nahasdzáán bikááʼ ayóó áhonóolingo ánáyiidlaago, Jiihóvah éí hashtʼehodítʼé dóó kʼé doo nineełnéehii nihaidoolééł.​—2 Peter 3:13, 14.