Sálaman, Riihobówam bizhéʼé éí 40 nááhai naatʼáanii jílı̨́ı̨́ ntʼééʼ. (1 Kings 11:42) Hazhéʼé ádin, Riihobówam dashdiiyá Jerúsalem dóó Shííkemjįʼ éí aadi naatʼáanii jizlı̨́ı̨́ʼ. (2 Chronicles 10:1) Naatʼáanii jizlı̨́įʼgo níjíldzidísh? Sálaman hódzą́ bee bééhoʼdílzin ńtʼééʼ. Ákogo Riihobówam éí hódzą́ ííshjání ázhdoolííł bee hwééhodoozįįł áko ndantłʼaaígíí daatsʼí hashtʼezhdoolííł.

Riihobówam bizhéʼé éí diné tʼáá naʼníleʼdii yichʼįʼ yáłtiʼ ńtʼééʼ. Ízrel dineʼé éí dabiʼdoolʼaad Riihobówam bichʼįʼ: “Nizhéʼé yę́ę nihiyéél nidaazgo áyósin nítʼééʼ; éí bąą kʼad, nizhéʼé yę́ę bikʼee tiʼdahwiiʼníihgo bá nidasiilʼaʼígíí áádóó hééł nidaazgo nihá áyósin nítʼééʼ yę́ę ászólígo nihá áníléehgo ná nideiilʼaʼ dooleeł.”​—2 Chronicles 10:3, 4.

Riihobówam tʼáá bá nanitłʼah. Ákondi diné ádeinízinígíí yeʼiilaa, bí dóó bighan hazʼánígíí dóó bá ndaalʼaʼ naadeełí yídaneesdin ńtʼééʼ ákondi tʼáágééd kéédahojitʼı̨́. Diné doo dabíistsʼą́ąʼ da, áko doo bikʼeh dahółʼı̨́į da. Haash jiidzaa? Hastiin náás silı̨́ʼígíí léiʼ hazhéʼé yíká análwoʼ ńtʼééʼ áłtsé bichʼįʼ hajoodzííʼ. Diné deyisíníłtsʼą́ą́ʼ bidooʼniid. Áko Riihobówam tʼáá bíighah béédááhaígíí yichʼįʼ haadzííʼ. Áádóó tʼáá naʼníleʼdii diné yichʼįʼ yáłtiʼ. Áko ííłní: “Shizhéʼé yę́ę nihiyéél nidaazgo áyósin nítʼééʼ, nidi shí éí tʼah biláhígi átʼéego nihiyéél nidaazgo ádeeshłííł; shizhéʼé yę́ę ałdóʼ bee atsxis yee atínihiłʼı̨́ı̨́ nítʼééʼ, nidi shí éí séígoʼ adishish nahalingo bee atsxis bee atínihishʼı̨́į dooleeł.”​—2 Chronicles 10:6-14.

Haʼátʼíísh éí bitsʼą́ą́dóó bohodííłʼááł? Dííshjı̨́įdi ląʼí náás daazlı̨́ʼígíí nihił hólǫ́ ląʼí nááhai Jiihóvah yá nidaalʼaʼ aadę́ę́ʼ éí nihíká adoolwoł yáʼátʼéehgo yiidáał doo. Áko baa honiidzą́ dóó íísíníłtsʼą́ąʼ doo.​—Job 12:12.

Riihobówam bisiláo áłah áyiilaa dineʼé bikéyahgi doo yikʼeh dahóółʼįįdígíí yikʼijįʼ nidaazbaaʼ. Jiihóvah éí halneʼii Shiiméíyah yiyiiłʼaʼ: “Doo chʼídoohkah da, doo nidi danihikʼisóó Ízrel dineʼé  bikʼiidoohjah da; diné tʼááłáʼí nootínígo danihighangóó nídadohkááh, háálá díí shitsʼą́ą́dóó átʼé.”​—1 Kings 12:21-24. *​—Footnote níníłʼı̨́.

Riihobówam éí Jiihóvah yíistsʼą́ąʼgoósh doo nantłʼa da? Díí ániid naatʼáanii éísh diné haitʼéego yaa nitsídaakees? Áko íidííniid “séígoʼ adishish nahalingo” bee atsxis bee atínihishʼı̨́į dooleeł, ndi kʼad éí doo bąą adeeshtʼįįł da. (Compare 2 Chronicles 13:7.) Diné shı̨́ı̨́ haitʼéego baa nitsídaakees ndi díí naatʼáanii dóó bisiláo “éí bąą Bóhólníihii hachʼįʼ haadzíʼígíí bikʼeh dahojííłʼįįdgo haghangóó anídadziiskai.”

Haʼátʼíísh bitsʼą́ą́dóó bohodííłʼááł? Tʼáá áłahájįʼ hóyáanii éí God yikʼeh hółʼı̨́ azhą́ diné atidanihiłʼįį ndi. God bikʼeh hwiiniilʼįįgo éí tʼáá áłahájįʼ nihikʼihojidlíi doo.​—Deuteronomy 28:2.

Riihobówam akʼeh hółʼı̨́įgoósh bikʼihojisdliʼ? Riihobówam tʼah ndi naatʼáanii nílı̨́ éí Júdah dineʼé bikéyahgi dóó Bénjamin dineʼé bikéyahgi, éí kweʼé ániid kin dashijaaʼgo ádeeshlííł niizı̨́ı̨́ʼ. Áádóó kin daniłdzilgo dahnaazhjaaʼ áyiilaa “ayóo bidziilgo áhoolaa.” (2 Chronicles 11:5-12) Áko tʼáá íiyisíí, Jiihóvah bibee hazʼáanii yikʼeh hóółʼįįd ńtʼééʼ. Neeznáago ałʼąą dadineʼé binahatʼaʼ éí daʼalyaii bichʼįʼ nidahojiłáago baa nízhdiikai. Ląʼída éí Jerúsalem góyaa tʼáá aaníí oodląʼígíí Riihobówam bee bíká aníjíjah. (2 Chronicles 11:16, 17) Riihobówam éí Jiihóvah yikʼeh hółʼı̨́, áko binahatʼaʼ bidziil silı̨́ı̨́ʼ.

Riihobówam binahatʼaʼ bidziil silı̨́ı̨́ʼ áko doo ákótʼéégóó ájiilaa. Jiihóvah bibee hazʼáanii doo bikʼeh hojíłʼínę́ę neʼ kójiilaa áádóó éí diyin bidaʼalyaii bichʼįʼ nahojiłáago ázhdiilyaa. Haʼátʼíísh biniinaa? Bimá éí Áman dineʼé nilı̨́ éí daatsʼí bikʼehgo nitsízdeezkééz? (1 Kings 14:21) Éí doo nihił béédahózin da, ndi doo ákójíítʼįįdgóó dineʼé bikééʼ dadiikai. Áko Jiihóvah yee hoołʼaʼ Ííjip dineʼé aláahgo binanitʼaʼí Sháíshak kin dahnaazhjaaʼgo yiisná ádayiilaa Júdahdi binahatʼaʼ. Díí ádzaa azhą́ shı̨́ı̨́ Riihobówam kin dahnaazhjaaʼígíí bidziilgo áyiilaa ndi!​—1 Kings 14:22-24; 2 Chronicles 12:1-4.

Tʼóó yóweh da doo yáʼátʼééhgóó hodéíyah Sháíshak dóó bisiláo Jerúsalem yikʼijįʼ dadeezbaaʼ, ákweʼé Riihobówam hooʼááł ńtʼééʼ. Áko halneʼii Shiiméíyah éí Riihobówam dóó binaatʼáanii danilíinii éí God bitsʼą́ą́dę́ę́ʼ haneʼ: “Yóóʼadashidooʼą́ągo bąą shí ałdóʼ nihitsʼą́ą́ʼ dah diiyáago Sháíshak baa nihidiníʼą́.” Riihobówam éí bikʼee haajiidzaa? Doo naaki bił nilı̨́įgo! Diyin Bizaad ání: “Ízrel dineʼé binanitʼaʼí danilíinii áádóó aláahgo naatʼáanii aʼohgo ádaʼdiilyaa áádóó ádadííniid, Bóhólníihii [Jiihóvah] tʼáá ákogi átʼéii nilı̨́.” Áko Jiihóvah Riihobówam yisdáyííłtı̨́, dóó Jerúsalem doo íísdįįd da.​—2 Chronicles 12:5-7, 12.

Bikʼijįʼ Riihobówam éí tʼah Júdah binaatʼáanii jílı̨́įgo náhoolzhiizh. Tʼahdoo dajitsaahgo ląʼí honaalyeʼé hayeʼké baazhdiníʼą́. Éí shı̨́ı̨́ Abáíjah bihodidootʼih jinízingo díí átʼéego tsízdeezkééz áko Abáíjah naatʼáanii nándlíi doo biniyé. (2 Chronicles 11:21-23) Ákótʼéego Riihobówam kʼad éí baa hojíyą́, nooséłí jílı̨́ yę́ędą́ą́ʼ éí ndagaʼ.

Azhą́ shı̨́ı̨́ Riihobówam yáʼátʼéehgo íʼjiilaa ndi, Diyin Bizaad ání: “Doo yáʼádaashóonii yaa naayá.” Haʼátʼíí biniinaa? “Háálá Bóhólníihii [Jiihóvah] hátʼı̨́į dooleełígíí doo yee hashtʼeʼnitsíníkéez da.” Áko Jiihóvah doo bił hojííshǫǫd da.​—2 Chronicles 12:14.

Riihobówam beʼiinaʼ néiltihígíí éí haʼátʼíísh bitsʼą́ą́dóó bohodííłʼááł? Łahda God yikʼeh hółʼı̨́į łeh. Áádóó Jiihóvah bidineʼé yáʼátʼéhígíí yaa áyiilaa. Doo áhą́dígo Jiihóvah bikééʼ joogáał da ńtʼééʼ, dóó doo tʼáá íiyisíí hoł nílı̨́įgo áʼjiilaa. Tʼáá ałtso yáʼádaatʼééh yę́ę nahjįʼ kójiilaa diyin bidaʼalyaii bichʼįʼ nahojiłáago ázhdiilyaa. Baa nitsíníkees: ‘Da’ Riihobówamísh Jiihóvah yikʼeh hółʼı̨́ı̨́ ńtʼééʼ, áko daatsʼí neʼ jíísı̨́ı̨́ʼígíí tʼáá íiyisíí baa aʼááh jinízin ńtʼééʼ dóó God shá aʼááh dínóozįįł jiniizı̨́ı̨́ʼ daatsʼí? Éí doodaiiʼ łaʼ ádaanínígíí daatsʼí biniinaa?’ (2 Chronicles 11:3, 4; 12:6) Náásgóó hwíídíiską́ągo neʼ jíísı̨́ı̨́ʼ. Hanálí naatʼáanii David éí  łahgo átʼé ńtʼééʼ! Azhą́ David neʼ jíísı̨́ı̨́ʼ ńtʼééʼ ndi. Azhą́ shı̨́ı̨́ tʼáá íiyisíí nitsaago neʼ jíísı̨́įʼ ndi yee ádaa naʼooskan. Jiihóvah dóó tʼáá aaníí oodlánígíí yee beʼiinaʼ ayóóʼáyóʼníigo áyósin ńtʼééʼ.​—1 Kings 14:8; Psalm 51:1, 17; 63:1.

Díí Diyin Bizaad biiʼdóó chʼíhootʼánígíí éí ląʼí bíhwiidiilʼááł. Baa ahééh hasin diné łaʼ bił hazʼánígíí náánáłahjįʼ yáʼátʼéehgo yaa ádaʼałʼı̨́. Jiihóvah bikʼis diidleełgo éí íinízinígíí átʼéego bichʼįʼ nahwiidláa doo, áádóó tsʼídá yéigo bidziilgo áhą́dígo kʼé bidiiʼníi doo.

Díí bikʼehgo ádiilnííł niidzingo, Jiihóvah tsʼídá yéigo ayóóʼííníiʼníi doo. Kǫʼ diltłiʼígíí chizh bikʼi déédíłjahgi nahalingo nihee ayóóʼóʼóʼní éí Diyin Bizaad tʼáá áłahjįʼ yííníiltaʼgo, baa nitsíníkees, áádóó tʼáá áłahjįʼ sodiilzin. (Psalm 1:2; Romans 12:12) Díí ayóóʼóʼóʼniʼ Jiihóvah bił honiilzhǫ́ǫgo yee nihíká adoolwoł tʼáá íiyisíí asiilziihígíí baa ákodaniidzin áádóó Jiihóvah nihaa néididooʼááł bíídííkił. Doo éí Riihobówam nahoniidlin da doo, áko tʼáá wołí bee niłdzilgo bee siidzı̨́į doo.​—Jude 20, 21.