1. Haʼátʼíísh éí naaldeehii biláahdi ániitʼéego ánihiʼdiilyaa?

JIIHÓVAH éí bílaʼashdlaʼii ílínígíí yee nílá. Díí éí bee hazhóʼó ádaa ákodaniidzin. Díí éí naaldeehii biláahdi ániitʼéego ánihiʼdiilyaa. Adam dóó Íiv ádaa ákoznidzingo áhoʼdiilyaa, haitʼéego nihił béédahózin? Éí God doo yikʼeh hółʼı̨́ı̨́góó bikéédóó God bitsʼąą nízhdeestʼı̨́ı̨́ʼ. Hániʼ ályaaígíí ajisiihgo bee ádaa ákozhniizı̨́ı̨́ʼ.

2. Ádaa ákodaniidzin haitʼéego bee naʼadloʼí nahalin? (Áłtsé naashchʼąąʼígíí níníłʼı̨́.)

² Ádaa ákodaniidzin doo éí yáʼátʼéhígíí índa doo yáʼátʼéhígíí bikʼeh yiidáałgo hiniiʼná. Diné ádaa ákoniidzinígíí doo hazhóʼó bee nabidiʼneestą́ą́ʼígíí éí tsinaaʼeeł bee naʼadloʼí yíchxǫʼgo nahalin. Níyol dóó tónteel yilkʼoołígíí tsinaaʼeeł doo áajigo iidoolooh da. Bee naʼadloʼí hazhóʼó naalnishgo nidaʼałʼeełii binanitʼaʼí bíká análwoʼ doo. Tʼáá  ákótʼéego, hazhóʼó bee ádaa ákodaniidzingo yee nihíká adoolwoł.

3. Ádaa ákodaniidzingo doo hazhóʼó bee nanihidiʼneestą́ąʼgo haash hodoonííł?

³ Ádaa ákodaniidzingo doo hazhóʼó bee nanihidiʼneestą́ąʼgo doo nihíká adoolwoł da. (1 Timothy 4:1, 2) Díí “doo yáʼátʼéehii éí yáʼátʼéehii átʼé” deiniidlą́ą doo. (Isaiah 5:20) Jesus bikééʼ nidaakaígíí áyidííniid: “Tʼáá aaníí bichʼįʼ hoolzhish, tʼáá háiida nihiisxı̨́įgo éí Diyin God bá nisisʼaʼ nízin doo.” (John 16:2) Díí átʼéego ídahoołʼaahii Stephen dayiisxı̨́įgo yaa nitsídadeezkééz. (Acts 6:8, 12; 7:54-60) Hoolzhishdę́ę́ʼ ląʼí oodlání ádaʼáłʼínii ákótʼéego atídaʼiilaa nidaʼałtseed ádaatʼéii dóó God bá naashʼaʼ danízin. Ákondi tʼáá áánídígíí tʼáá ákótʼéego ádaʼjiilaa dazhnízin ndi God bibee hazʼáanii kʼídajiiztiʼ. (Exodus 20:13) Tʼáá baa hatʼaadí habee ádaa ákodazhnízingo doo tʼáá ákódaatʼée da!

4. Haitʼéego ádaa ákodaniidzingo hazhóʼó bee neiilnish doo?

⁴ Haitʼéego ádaa ákodaniidzingo hazhóʼó bee neiilnish doo? Diyin Bizaad bee hazʼáanii dóó binahjįʼ naʼnitinii éí “naʼnitin biniyé, adidooteh biniyé, kʼéhézdon ninádoodlóós biniyé, índa tʼáá ákogi éʼétʼé bóhooʼaah biniyé chooʼı̨́.” (2 Timothy 3:16) Tʼáá áłahjįʼ Diyin Bizaad bídahwiilʼaah, hazhóʼó nabikʼítsíníłkees, dóó haash yitʼéego niheʼiinaʼ bídéétʼiʼ. Ákódeitʼı̨́įgo, Jiihóvah bintsékeesii bídahwiilʼaah. Áádóó bee ádaa ákoniidzingo hazhóʼó yee nihíká adoolwoł. Jiihóvah bibee hazʼáanii dóó bikʼehgo oodáałii haitʼéego yee nanihidínóotı̨́ı̨́ł baa nídadíitʼįįł.

5, 6. Haitʼéego God bibee hazʼáanii nihíká análwoʼ?

⁵ God bibee hazʼáanii nihíká adoolwoł niidzingo éí doo tʼóó yíníłtaʼ da doodaiiʼ ádaatʼéhígíí tʼéiyá nihił béédahózin. Éí ayóóʼádeíníiʼní dóó nihił danilíi doo. Diyin Bizaad ánihiłní: “Doo yáʼátʼéehii bikʼee dadinohniih; yáʼátʼéehii tʼéí ayóóʼádeínóhʼní.” (Amos 5:15) Haitʼéego ádaʼdiilnííł? Jiihóvah yiníłʼínígíí átʼéego níilʼı̨́į doo. Díí baa nitsíníkees. Łahda doo hazhóʼó íłhoshgo, ní azeeʼííłʼíní chʼiyáán yáʼátʼéhígíí niyą́, naʼádístsʼǫǫd, dóó łahgo átʼéego neʼiinaʼ ánánídlééh niłní. Bikʼeh hwiiniilʼı̨́įgo ná yáʼátʼééh! Haitʼéego azeeʼííłʼíní áníłnínígíí baa nitsíníkees?

⁶ Tʼáá ákótʼéego, Ánihiilaii bee hazʼáanii nihainílá doo ákódaatʼéhígíí bee niʼiilzíihii bitsʼąą dóó niheʼiinaʼ yáʼátʼéehgo áyósin yee nihíká análwoʼ. Diyin Bizaad yee nanihinitin díí tʼáadoo ádaałʼíní, yoochʼííd, honaʼadloʼ, azhniʼįįh, naʼageh bee tsiʼnaʼadá, atéʼélʼı̨́, doodaiiʼ álílee kʼehgo nahaghá. (Proverbs 6:16-19 yíníłtaʼ; Revelation 21:8) Jiihóvah bikʼeh dahwiiniilʼı̨́įgo yáʼátʼéhígíí baa ákoniizįįh éí binahjįʼ bibee hazʼáanii dóó bí ayóóʼííníiʼníníí nooséeł doo.

7. Haitʼéego Diyin Bizaad biiʼdóó haneʼígíí nihíká adoolwoł?

⁷ God bibee hazʼáanii kʼízhnítiʼgo biniinaa tiʼhooʼnííh biijíghah ákondi doo ákótʼéégóó tʼéiyá yáʼátʼéhígíí dóó doo yáʼátʼéhígíí bee íhooʼaah da. Náánáłaʼ doo ákótʼéégóó íʼiilaaígíí yę́ę bitsʼą́ą́dóó íhwiilʼaah, Diyin Bizaad łaʼ ííshjání ííłʼı̨́.  Proverbs 1:5 ání: “Diné hóyáanii íistsʼą́ąʼ doo, áádóó náásgóó óhoołʼaah doo.” Díí God bitsʼą́ą́dę́ę́ʼ éí íhooʼaahígíí aláahdi ílı̨́! Jiihóvah doo bikʼeh hojííłʼįįdgo biniinaa David tiʼhoozniiʼ yę́ę baa nitsíníkees, naʼageh bee tsiʼnaʼadá Bath-shííba bił ájiilaa. (2 Samuel 12:7-14) Díí baa haneʼígíí yíníłtaʼgo, naʼádílkid: ‘Haitʼéego David tiʼhooʼnííh bitsʼąą ájítʼée doo ńtʼééʼ? Tʼáá ákótʼéego shił hooʼaʼgo haash deeshnííł? Naʼageh bee tsiʼnaʼadá bee shihóneeztą́ąʼgoshąʼ, David doodaiiʼ Jóseph ádzaa yę́ę ádeeshnííł daatsʼí?’ (Genesis 39:11-15) Niʼiidzííh biniinaa tiʼhooʼnííh hazhóʼó baa nitsídeiikeesgo, “doo yáʼátʼéehii bikʼee dadinohniih” doo.

8, 9. (a) Haitʼéego bee ádaa ákodaniidzingo yee nihíká análwoʼ? (b) Bee ádaa ákodaniidzin dóó Jiihóvah binaʼnitinii haitʼéego ahił naalnish?

⁸ God yijoołáhígíí bitsʼąą ániitʼée doo. Ákoshąʼ hadiiʼnííł, Diyin Bizaad bee hazʼáanii doo biiʼgo? Haash yitʼéego nihił bééhodoozįįł God niháí yinízinígíí ádiilnííł? Diyin Bizaad choilʼı̨́įgo éí bee honiidzą́ą doo bee ádaa ákodaniidzingo yee nanihinitin.

⁹ Biniinaa Jiihóvah ayóóʼánihóʼní, bikʼehgo oodááłígíí bee ádaa ákodaniidzingo yee nanihinitin doo bikʼeh ádaʼiilʼı̨́. Éí ájíní: “Shí Bóhólníihii [Jiihóvah] niDiyin God nishłíinii éí ná yáʼátʼéehii áádóó ná honítʼiʼgóó yínááł dooleełgo  yínaniniłtinii nishłı̨́.” (Isaiah 48:17, 18) Diyin Bizaad binahjįʼ naʼnitinii hazhóʼó baa nitsídeiikees índa baa ahééh daniidzin. Áádóó bee ádaa ákodaniidzingo hazhóʼó hashtʼéédadiilnííł. Díí hódzą́ bee íʼiilʼı̨́įgo yee nihíká análwoʼ.

10. Binahjįʼ naʼnitinígíí haʼátʼíí áhyiłní, áádóó haitʼéego Jesus yee naʼneeztą́ą́ʼ?

¹⁰ Binahjįʼ naʼnitinígíí éí tʼáá aaníinii bee nitsíikeesí yee nihíká adoolwoł. Jiihóvah binaʼnitinii nihił béédahózingo yee nihíká análwoʼ, yaa nitsíkeesii bikʼidiʼdiitı̨́ı̨́ł dóó haʼátʼíí biniyé yee hazʼánii nihainílá. Binahjįʼ naʼnitinii éí Jesus bídahoołʼaahii yee neinitin éí ádajítʼéhígíí dóó ádajooníłígíí. Áháchįʼ éí átʼı̨́ doolíiłgo átʼé yee naʼneeztą́ą́ʼ. Áádóó naʼageh bee tsiʼnaʼadá nitsáhákees éí adilyé bił ahídéétʼiʼ yee hoł hólneʼ. (Matthew 5:21, 22, 27, 28) Jiihóvah bintsíkees Diyin Bizaad biyiʼdę́ę́ʼ ádaa ákodaniidzin hashtʼeyósin. God bił nilı̨́įgo bee ádiilnííł.​—1 Corinthians 10:31.

11. Ádaa ákoniidzingo haitʼéego náánáłahjįʼ ałʼąą ádaatʼé?

¹¹ Azhą́ Oodlání bee ádaa ákoniidzinígíí Diyin Bizaad choyoołʼı̨́įgo łahda tʼáadoo leʼé doo ákótʼéégóó yaa nitsékees yileeh. Díí baa nitsíníkees, Diyin Bizaad biiʼdę́ę́ʼ éí wáin doo yáʼátʼééh da doo nihiłníi da. Ndi doo bee tsiʼnijigháa da nihiłní. (Proverbs 20:1; 1 Timothy 3:8) Oodlání náánáłaʼ doo ayóó adeeshdlı̨́ı̨́ł nízingo, haʼátʼíísh ałdóʼ yaa nitsékees doo? Náánáłaʼ bintsékees baa ákozhnízin doo.

12. Haitʼéego díí Romans 14:21 saadígíí nihił nilı̨́įgo ádeíníilzin doo yee nihíká adoolwoł náánáłahjįʼ ádaa ákoniidzin dooleeł?

¹² Náánáłahjįʼ ádaa ákoniidzin Paul éí nihił ílínígíí ííshjání áyiilaa. Kótʼéego yee akʼeʼashchı̨́: “Atsįʼ jiyą́ągoda áádóó wáin jidlą́ągoda, doodaiiʼ haʼátʼíhída bee hakʼis bąąhági átʼı̨́įgo áníjiilʼįįhii, doodaiiʼ bidínóołtłʼahii, doodaiiʼ biʼoodląʼ doo bidziilgóó ábidoolíiłii doo baa nijigháájí yáʼátʼééh.” (Romans 14:21) Wáin choilʼı̨́į ndi áłtsé neʼ ádiilnííł. Náánáłahjįʼ éí doo bá yáʼátʼééhgóó nihił béédahózingo nihibrothers hazhóʼó nihił nilı̨́įgo bił ahínéekah. Nihibrother ałkʼidą́ą́ʼ ayóó adlą́ ńtʼééʼ tʼah doo Oodlání yileeh yę́ędą́ą́ʼ kʼad éí yóóʼiidííʼą́ągo binahjįʼ nihił nilı̨́įgo ííníilzin doo biniinaa éí doo nátʼą́ą́ʼ yaa tsíńdadookos da doo bee bíniʼ yidiilʼaał da. (1 Corinthians 6:9, 10) Nihibrother nihighangi nihaa níyáago daatsʼí doo wáin łaʼísh díídlı̨́ı̨́ł bididíiniił da, doo nízin da ndi doo bíniilchéeh da doo.

13. Náánáłahjįʼ bee ádaa ákoniidzinígíí, haitʼéego Timothy bił ílı̨́į doo?

¹³ Timothy tʼah ashkii jílı̨́ yę́ędą́ą́ʼ azhą́ shı̨́ı̨́ neezgai ndi ąąh náhinilgish bee lą́ ajisłı̨́ı̨́ʼ. Bił bééhózingo éí díí ąąh náhinilgish éí Jew dineʼé ílı̨́įgo ádayósin éí bichʼįʼ nahojilneʼ doo biniyé. Paul nahalingo, Timothy doo náánáłahjįʼ bíniʼ yideeshʼaał da. (Acts 16:3; 1 Corinthians  9:19-23) Niísh ałdóʼ bee nináʼádinitʼą́ągo náánáłahjįʼ bíká adiilwoł?

14. Haitʼéego éí Oodlání bee honiidzą́ą doo?

¹⁴ Tʼáá áníiltso náás deiyíníikáah doo “Christ bínaʼniltinígíí átsé bee nidanihidiʼneestą́ʼígíí” dóó “diyin kʼehgo nidíníilzéełii bichʼįʼ náás yiikah doo.” (Hebrews 6:1) Ląʼí nááhai tʼáá aaníinii Oodlání niidlı̨́įgo éí doo tʼóó Oodlání hóyáanii silı̨́ı̨́ʼ diiʼníi da doo. Tʼáá ákónéehee yéigo bineilnishgo Oodlání bee honiidzą́ą doo. Áko éí doo neʼ kódiilníił da yéigo bikʼidiʼdíítı̨́ı̨́ł dóó nihił béédahodoozįįł. Tʼáá ákwíí jı̨́ Diyin Bizaad yíníiltaʼ doo. (Psalm 1:1-3) Hazhóʼó Jiihóvah bibee hazʼáanii dóó bikʼehgo oodáałii bikʼidiʼdíítı̨́ı̨́ł.

15. Oodlání bee honiidzą́ągo haitʼéego bee kʼé diiʼníi doo?

¹⁵ Bee hazʼáanii éí ayóóʼóʼóʼní átʼé éí íiyisíí ílı̨́įgo Oodlání bee hazʼáanii bá ályaa. Jesus éí bídahoołʼaahii áhyiłní: “Ayóóʼádaʼahíínóhʼníigo shídahoołʼaahii danohłı̨́įgo diné tʼáá ałtso bił béédahózin doo.” (John 13:35) Ayóóʼóʼóʼní éí “Aláahgo Naatʼáanii yee hasʼáanii” áádóó “bee hazʼáanii tʼáá átʼé yiʼósinii” nilı̨́. (James 2:8; Romans 13:10) Ayóóʼóʼóʼní ílı̨́įgo nihił béédahózin biniinaa Diyin Bizaad ání “Diyin God ayóóʼóʼóʼníinii nilı̨́.” (1 John 4:8) God bee ayóóʼóʼóʼní éí doo tʼóó naʼiiłná átʼée da. Bee ayóóʼóʼóʼníinii nihił ííshjání áyiilaa. John yee akʼeʼashchı̨́, “Jó, Diyin God biYeʼ tʼááłáʼí bá yizhchínígíí bee dahiniiʼnáa doo biniyé nihokááʼ dineʼé yitahjįʼ yiníłʼaʼ. Díí bee Diyin God ayóóʼánihóʼnínígíí nihił béédahoozin.” (1 John 4:9) Jiihóvah, Jesus, nihibrothers, dóó náánáłaʼ dineʼé bichʼįʼ nihee ayóóʼóʼóʼní ííshjání ádeilʼı̨́įgo, éí Oodlání honiidzą́ bee ííníilzin doo.​—Matthew 22:37-39.

16. Haʼátʼíí biniyé bikʼehgo oodááłígíí éí Oodlání yéigo ídahoołʼą́ʼígíí danilínígíí nihił danilı̨́?

 ¹⁶ Bikʼehgo oodááłígíí éí Oodlání yéigo ídahoołʼą́ʼígíí nihił danilı̨́. Bee hazʼáanii tʼáá ałtso bídéétʼiʼ ndi bikʼehgo oodáałii tʼóó ahayói ałʼąą átʼéego bídéétʼiʼ. Díí baa nitsíníkees, ániid nidaakaígíí doo yáʼátʼéhígíí bikʼis ádayiiłʼįįhgo ádaatʼínígíí doo bił bééhózin da, áko azhéʼé dóó amá bee bikʼeh éʼélʼı̨́ ádayiiłʼįįh. (1 Corinthians 15:33) Ániid nidaakaígíí nooséełgo Diyin Bizaad bikʼehgo oodááłígíí éí yídahoołʼaah dóó yaa ádahoniizįįh. Éí binahjįʼ bíká eelwodgo bikʼis yáʼátʼéhígíí ádeileʼ. (1 Corinthians 13:11; 14:20 yíníłtaʼ.) Diyin Bizaad bikʼehgo oodááłígíí bikʼidaʼdidiitı̨́įł baa ííníidlíi doo hazhóʼó baa nitsíikees doo. Hazhóʼó bikʼidaʼdidiitı̨́įłgo éí God ádiilníłígíí tʼáá haʼátʼíí shı̨́ı̨́ íilʼínígíí yee nihíká análwoʼ.

17. Díí tʼáá ałtso hólónígíí hódzą́ bee ádiilnííł haitʼéego nihił béédahodoozįįł?

¹⁷ Tʼáá ałtso nihee hólónígíí Jiihóvah yaa bił hózhǫ́ dooígíí yee nihíká análwoʼ. Bee hazʼáanii dóó bikʼehgo oodáałii yee nihíká análwoʼígíí “tʼáá ałtsojįʼ yáʼátʼééh ájooníił doo biniyé hashtʼeʼázdólzin doo” éí Diyin Bizaad biyiʼ hólǫ́. (2 Timothy 3:16, 17) Jiihóvah yaa nitsékeesígíí bee bikʼidaʼdidiitı̨́ı̨́ł éí Diyin Bizaad bikʼehgo oodáałii yee nihíká análwoʼ. Bineilnishgo bikʼídíníítááł. (Ephesians 5:17) Yee nihíká adoolwołígíí nihee hólǫ́ Research Guide for Jehovah’s Witnesses, dóó Watchtower Library, dóó Watchtower ONLINE LIBRARY, dóó JW Library app. Díí choiniilʼı̨́į doo bee adíʼhozhdiilʼaah dóó family worship yee nihíká análwoʼ.

18. Jiihóvah bibee hazʼáanii dóó bikʼehgo oodáałii nízhdiiléehgo éí hweʼiinaʼ ájiiłʼįįhgo haash yitʼée łeh?

¹⁸ Jiihóvah bibee hazʼáanii dóó bikʼehgo oodááłígíí éí nihee iinaʼ yáʼátʼéehgo bee íʼiilʼı̨́! Psalm 119:97-100 ání: “Dooládóʼ nibee hazʼáanii ayóóʼóóshʼníi da! Shá bíighah nabikʼítséskeesgo shee eʼeʼááh. Shiʼanaʼí danilíinii biláahgo nibikʼeh óʼooʼníiłii honisą́ągo áshósin, háálá hoolʼáágóó shił hólǫ́. Nidashinitinii tʼáá ałtso biláahgo shił ééhózin, háálá bee hahíínídzíiʼii éí nabikʼítséskeesii ádaatʼé. Hadaastihii nidi biláahgo shił ééhózin, háálá nibikʼehgo iináanii bikʼeh honishʼı̨́.” God bibee hazʼáanii dóó bikʼehgo oodáałii nabikʼítsíilkeesgo éí hódzą́ dóó bikʼidiʼdiitı̨́ı̨́ł yee nihíká análwoʼ. Bibee hazʼáanii dóó bikʼehgo oodáałii hazhóʼó choilʼı̨́įgo bee ádaa ákoniidzingo “Christ nininísą́ yę́ęgi átʼéego nidadíníilzééł.”​—Ephesians 4:13.