1. Paul éí Oodlání anoint ádaalyaaígíí haʼátʼíí saad bidziilii yee yichʼįʼ haadzííʼ?

“NIHOKÁÁʼ bił nidahaztʼiʼii bikʼehgo tʼáadoo dahinohnání.” (Rom. 12:2) Yilʼaadii Paul éí díí saad ałkʼidą́ą́ʼ Oodlání danilíinii yee yichʼįʼ haadzííʼ. Haʼátʼíí biniinaa saad bidziilii chojoołʼı̨́įgo tʼáá íídą́ą́ʼ Oodlání anoint ádaalyaaígíí bee bichʼįʼ hajoodzííʼ?—Rom. 1:7.

2. Séítan éí haitʼéego Jiihóvah bikʼijįʼ niidlı̨́į doogo ánihósin?

² Paul éí Oodlání danilínígíí Séítan bił hoogáłígíí bitsʼą́ą́dóó ałghaʼditʼááh saad índa bílaʼashdlaʼii bintsáhákees binaʼnitin bee nitsídajíkees dazhdooleełgi ayóó biʼdiiłʼá. (Eph. 4:​17-19) Nihí ałdóʼ tʼáá ákódiiʼníiłgo átʼé. Nihił hoogááł binantʼaʼí nilíinii Séítan éí kódiiʼnííł nízingo ląʼígóó yee nihinaalnish. Éí tʼáá nihí ániitʼéiigi, alą́ąjįʼ íʼdííníilzingi, áádóó aláahdi ádaa nitsíikeesgi yee nihinaalnish. Nihiyaa hooʼaʼgi, nihee óʼoolʼįįłii, áádóó niʼsíiltaʼgóó nihikʼijįʼ choyoołʼı̨́įgo bíjí nitsékeesígi átʼéego nitsíikeesgo ánihidoolííł.

3. Doo yáʼádaatʼééhgóó nitsáhákees nihiyiʼ bił nahazhóód daazlı̨́įʼgo haitʼéego nahjįʼ kódoolnííł?

³ Baa nitsíikeesii nihiyiʼ naazhóodii ałtso nahjįʼ kódiilníiłgoósh bohónéedzą́? (2 Cor. 10:4) Paul ánínę́ę hazhóʼó  baa nitsíníkees. “Ałghaʼditʼááh saad índa Diyin God ił bééhodoozįįłgi yee nidaʼníłtłʼaii éí íildįįł, áádóó Christ yikʼeh dahółʼı̨́į doo biniyé nitsáhákees tʼáá ałtso yisnááh ádeiilneʼ.” (2 Cor. 10:​5, NW) Tʼáá aaníí, Jiihóvah nihíká análwoʼgo éí ałghaʼditʼááh saad bee nitsíikees yę́ę bikʼeh didiidleeł. Poison hodiyoołhééł bitsʼąą éí azeeʼ haíʼniłgo bee yisdázhdoogáłígi átʼéego, Diyin Bizaad binaʼnitin éí Séítan bitsʼą́ą́dóó doo yáʼádaatʼéehii nahjįʼ nihá kwíidoolííł.

4. Diyin Bizaad tʼóó bídahwiilʼaah yę́ędą́ą́ʼ haʼátʼíí neʼ kódeiilyaa?

⁴ Diyin Bizaad tʼóó bíhoołʼaahgo baa nídinidzá yę́ędą́ą́ʼ baa nitsíníkees. Jiihóvah bikééʼ yisháał doo ninizı̨́įʼgo éí doo yáʼádaatʼééhgóó ádaʼoolníiłii yę́ę neʼ kwíinilaa. Ląʼí shı̨́ı̨́ ákódeiidzaa. (1 Cor. 6:​9-11) Bąąhígi ádeiʼníiłgi bikʼeh diidlı̨́įgo Jiihóvah nihíká eelwodgi nitsaago bee bichʼįʼ ahééh daniidzin!

5. Romans 12:2 éí haʼátʼíí naakigo ádiiʼnííł nihiłní?

⁵ Kʼad yeeʼ doo yáʼádaatʼéehii yę́ę ałtso neʼ ádaashłaa, tʼáadoo niidziní doo. Baptize ánihiʼdiilyaago bąąhígi ádaatʼéii neʼ kwíilyaa ndi, bee nihínááhodínóotahii éí yéigo bitsʼąą ádaa áhwiilyą́ą doo. Díí éí haitʼéego bohónéedzą́? Paul éí kótʼéego ní: “Nihokááʼ bił nidahaztʼiʼii bikʼehgo tʼáadoo dahinohnání, ndi nihíniʼ łah átʼéego bee nitsídaakeesgo ánídaahdleʼ.” (Rom. 12:2) Díí saad éí naakigo ádiiʼnííł nihiłní. Áłtsé éí, Séítan “bikʼehgo tʼáadoo dahinohnání.” Naaki góneʼ éí, “łah átʼéego” nihintsékees ánídaahdleʼ ní.

6. Matthew 12:​43-45 góneʼ Jesus bizaadígíí haʼátʼíí bitsʼą́ą́dóó bíhwiilʼaah?

⁶ Paul éí łah átʼéego nitsídaakees nínígíí éí doo tʼóó bee nihiʼdootʼínígíí áhyiłníi da. Éí tʼáá ałtsojįʼ ániitʼéiigi  áhyiłní. (“Łahgoósh Ádiʼnilyaa doodaiiʼ Tʼóó Áhoʼdilʼı̨́?” níníłʼı̨́.) “Díí éí łahgi átʼéego” nitsáhákees doo—aa nitsíikeesgi, bee ániitʼéii, índa ádiilnííł niidzinii. Tʼáá áníiltso díí baa nitsíikees doo: ‘Oodlání deeshłeełgi, tʼóósh áhodishʼı̨́ doodaiiʼ yíní áníshtʼéiigi bee Oodlání nishłı̨́į dooígi bíká áshtʼı̨́?’ Díí ałʼąą átʼéegi éí ílı̨́įgo nélʼı̨́. Jesus éí Matthew 12:​43-45 góneʼ ádiilníiłgi bééhózingo áyiilaa. (Yíníłtaʼ.) Jesus bizaadígíí tʼáá aaníí: Éí doo yáʼátʼéehgo nitsáhákees tʼéiyá neʼ kójiilaago doo bíighah da, ndi bitséskʼeh góneʼ éí Diyin bintsékees bee hazhdidoołbı̨́ı̨́ł.

7. Haitʼéego éí ániitʼéiigi łah átʼéego ádiilnííł?

⁷ Tʼáá ałtsojįʼ ániitʼéiigi łah átʼéego ádiilníiłgoósh bohónéedzą́? Aooʼ, bíighahgo átʼé, ndi tʼáá nantłʼa. Diyin Bizaad ání: “Nihintsíkees ániidígo áńdaohdleʼ, áádóó ániidíii bee nitsáhákees biih hohkááh. Éí Diyin God tʼáá bináłtʼéego ályaa, tsʼídá tʼáá ákogi átʼé índa tʼáá aaníí dílyinii átʼé.” (Eph. 4:​23, 24, NW) Doo yáʼátʼéehii bidázhnoolníigi índa ázhdooníiłgi baa nitsíjíkeesgi tʼóó bitsʼąą ájítʼée dooleełgo éí doo bíighah da. ‘Nihintsíkees ániidígo ánídeilneʼ’ doo. Díí éí bidániilníinii, íiʼníiłii, índa nanihiiłnáanii tʼáá ałtso. Tʼáadoo neʼ kwiilnéhí bineilnish doo.

8-9. Nihibrother baa haneʼgo binahjįʼ, éí ániitʼéii łah átʼéego ádiilníiłgi haitʼéego ííshjání áyiilaa?

⁸ Nihibrother łaʼ ayóó báháchįʼgo baa haneʼ. Éí adlą́ áádóó diné bił ahigą́ągi neʼ kóyiilaa. Áádóó tʼahádóó baptize ábiʼdiilyaa. Kójiidzaago éí kin áłtsʼísígo dah shijaaʼgi bił kéédahojitʼínígíí tʼáá ałtso yee haa ákodaniizı̨́ı̨́ʼ. Baptize áhoʼdiilyaadóó tʼáadoo hodiinaʼí hóhodiʼneestą́ą́ʼ. Hastiin léiʼ bił honeezdogo, hoł ahideeshgą́ą́ł nízingo haghangi haa níyá. Áłtsé éí tʼóó tʼą́ą́ʼ kójítʼé. Ndi hastiin éí Jiihóvah doo yáʼátʼééhgóó yá haadzíiʼgo biniinaa nihibrother doo bił hóózhǫǫd da. Chʼíjílwodgo, hastiinée bikʼijiilwodgo názhneestsʼin. Haʼátʼíí biniinaa kójiidzaa? Azhą́ ayóó háháchįʼ ńtʼééʼ yę́ęgi Diyin Bizaad yee háká eelwod ndi, hontsékees áádóó ájítʼéii ńtʼééʼ yę́ęgi tʼáadoo łahgo átʼéego áníjiidlaa da lá.

⁹ Ákótʼée ndi tʼáadoo bikʼizhdeeyáa da. (Prov. 24:16) Elders háká anájahgo, hontsékees łahgo átʼéego ájoolííł. Tʼahádóó éí elder jizlı̨́ı̨́ʼ. Díkwíí shı̨́ı̨́ nááhai yę́ędą́ą́ʼ áhoodzaa yę́ę nahalingo, hastiin léiʼ bił honeezdogo Kingdom Hallgi níyáago elder łaʼ yikʼiilyeedgo yaa nídiidzá. Nihibrother haajiidzaa? Hoł ílı̨́įgo áádóó aʼohgo ázhdólzingo hastiin hazhóʼó bichʼįʼ hajoodzííʼ. Hastiinée áhodiilzeeʼgo bighangóó bił níjítʼáázh. Haʼátʼíí biniinaa nihibrother éí tʼáadoo háhóóchįįd da? Éí hontsékees índa ájítʼéii łahgo átʼéego ájiilaa. Kʼad éí kʼéznídzin áádóó aʼohgo áʼdólzinii jizlı̨́ı̨́ʼ. Díí éí Jiihóvah bee baa hasʼnih.

10. Ániitʼéiigi éí haitʼéego łah átʼéego ádiilnííł?

¹⁰ Łah átʼéego ázhdiʼdoolníiłgi doo tsı̨́įłgo índa doo tʼáá bíniʼ ádooníił da. “Tʼáá awołí bee” íitʼı̨́įgo díkwíí shı̨́ı̨́ náhah. (2 Pet. 1:5) Jiihóvah bá naʼaʼaʼgo ląʼí nááhai ndi, łah átʼéego ázhdiʼdoolníiłgi éí doo tsı̨́įłgo ádooníił da. Nihíká adoolwołii ałkééʼ sinilgo yisdzoh. Łaʼ dadíníilʼįįł.

11. Sodizin éí haitʼéego nihíká análwoʼgo ániitʼéiigi łah átʼéego ádiilnííł?

¹¹ Sodizin éí tsʼídá áłtsé ílíinii átʼé. Psalmist sodoolzin yę́ęgi átʼéego sodiilzin doo. “Diyin God nílíinii, baaʼihii shijéí biiʼ ádingo ánílééh, áádóó níłchʼi shiiʼ hólónígíí baʼahódlíigo ániidí ánánídlééh.” (Ps. 51:10) Ániitʼéiigi łah átʼéego ádiilníiłgi bee ádaa ákoniidzingo Jiihóvah shíká anilyeed bidiiʼníi doo. Nihíká eelwodgo éí haitʼéego nihił bééhózin doo? Iizííkiyel bíyoołkááł yę́ędą́ą́ʼ Ízrel dineʼé bijéí danitłʼiz ndi, Jiihóvah hachʼįʼ ádee haadzííʼ yę́ę bee hadaʼííníilníi doo. Éí ání: “Ajéí tʼááłáʼí haa dideeshʼáałgo nitsáhákees ániidíii hwiih dadeeshłééł, . . . hajéí dahináago haa dadideeshʼááł, [ajéí akʼeh hółʼínígíí].” (Ezek. 11:19) Jiihóvah éí bił hadleeʼgo Ízrel dineʼé yíká eelwod, áko nihí ałdóʼ nihíká adoolwołgo átʼé.

12. Psalm 119:59 bikʼehgo, haʼátʼíí nabikʼítsíilkees doo?

¹² Nabikʼítsáhákees éí naaki góneʼ ílı̨́įgo yisdzoh. Tʼáá ákwíí jı̨́ Diyin Bizaad hazhóʼó yíníiltaʼ doo, áádóó nabikʼítsíilkeesgo éí nihintsékees dóó bee ániitʼéii tʼah doo łahgo íilnéhígíí baa ákoniidzin doo. (Psalm 119:59 yíníłtaʼ; Heb. 4:12; Jas. 1:25) Bílaʼashdlaʼii bintsékees binaʼnitin łaʼ tʼahdii nihił yáʼátʼéehgo éí bee ádaa ákodíníidzįįł. Doo bichʼįʼ nihidziilígíí nihił bééhózingo éí yéigo bineilnishgo nahjįʼ kódiilnííł.

13. Haʼátʼíí baa nitsíikees doo?

¹³ Díí baa nitsíníkees: ‘Oochʼı̨́ı̨́d daatsʼí łaʼ tʼahdii shijéí biiʼ hólǫ́.’ (1 Pet. 2:1) ‘Shiyaa hooʼaʼgi, wódah ííłtaʼgi, doodaiiʼ shibéeso ánéelą́ʼígi daatsʼí bee ádaa hashʼniih.’ (Prov. 16:5) ‘Shee hólóonii yiʼoh daneelʼánígíí índa náánáłahdę́ę́ʼ dineʼé daatsʼí nichxǫ́ʼógo baa nitséskees.’ (Jas. 2:​2-4) ‘Séítan yíʼoołkąąhígíí daatsʼí bidáneeshní.’ (1 John 2:​15-17) ‘Tʼóó baaʼihígi átʼéego ałhaa naʼadáago índa atéʼélʼı̨́įgo ndaalkidii daatsʼí shił ayóó ádaatʼé.’ (Ps. 97:10; 101:3; Amos 5:15) Díí tʼáá ni tʼéiyá nídéétʼiʼ, áko tʼahdii bee nichʼįʼ anáhóótʼiʼgo hashtʼenilééh. Díí “bidziilii [nihiyiʼ] bił nahazhóodii” bikʼeh diidlı̨́įgo éí yáʼąąshdę́ę́ʼ Nihizhéʼé tʼáá íiyisíí bił honiilzhǫ́ǫ doo.—Ps. 19:14.

14. Akʼis yáʼádaatʼéehii bił ahéédaʼdiildahgi éí haitʼéego nihá yáʼátʼééh?

¹⁴ Akʼis yáʼádaatʼéehii bił ahéédaʼdiildahgi éí tááʼ góneʼ ílı̨́įgo yisdzoh. Doo baa ákoniidzin da nahalin shı̨́į ndi, béézhdiilwoʼígíí éí bikʼehgóó ájooníił dooleełgo átʼé. (Prov. 13:20) Neiilnishdi doodaiiʼ óltaʼdi éí diyingo nitsáhákees yee nihíká adoolwołii ádin. Ákondi, Oodlání áłah nádleehgi éí yáʼádaatʼéehgo bił ahéédaʼdiildahii dahólǫ́. Éí ákweʼé ił hózhǫ́ǫgo “ayóóʼádaʼííníiʼníigo índa naanish yáʼátʼéehii” bee ahídaniidlı̨́.—Heb. 10:​24, 25.

15-16. Séítan éí haʼátʼíí níigo łah átʼéego nitsíikees doo, nihóʼní?

¹⁵ Béénílniih, Séítan éí łah átʼéego nitsídajikees doo nihóʼní. Ląʼígóó yee aghaʼditʼáahgo Diyin Bizaad bitsʼą́ą́dóó tʼáá aaníigo naʼnitin yę́ę yikʼijįʼ naalnish.

¹⁶ Séítan éí dáákʼeh Íídendi Íiv neídééłkid yę́ę tʼáá éí tʼahdii yoołtʼih, éí: “Daʼ tʼáásh aaníí Diyin God kóní, . . . ?” (Gen. 3:1) Séítan ádíhólníihgo dííshjı̨́įdi tʼahdii  tʼáá ákótʼéego ndaʼídíkid. Éí kódahaʼní: ‘Diné doodaiiʼ asdzánída tʼáá hó ahił daʼjiyééh dooleełgo, daʼ tʼáásh aaníí Diyin doo yee hasʼą́ą da? Daʼ tʼáásh aaníí Diyin éí Késhmish dóó birthdays tʼáadoo anítahí doo, nóʼní? Daʼ tʼáásh aaníí niDiyin éí dił niih dookáałgi dooda didííniił, nóʼní? Diyin ayóóʼóʼóʼníinii, tʼáásh aaníí ayóóʼííníʼníinii disfellowship ábiʼdiilyaaígíí tʼáadoo bił ahéédiikahí doo, nóʼní?’

17. Niheʼoodląʼ bínanihidéékidgo, haadiiʼnííł? Áádóó Colossians 2:​6, 7 éí haaniitʼée doo ní?

¹⁷ Niheʼoodląʼ bee siidzínígíí éí tʼáá aaníí átʼéego yiniidlą́ą doo. Haʼátʼíí shı̨́ı̨́ tʼáadoo hazhóʼó bikʼidaʼdiitą́ą́góogo índa doo bíndaʼídíilkidgóogo éí tʼáá yéigo nihił naaki nilı̨́į doo. Tʼáá éí náasdi nitsíikees yę́ę índa niheʼoodląʼ yidoołchxǫǫł. Áko haadiiʼnííł? Diyin Bizaad ánihiłníigo God “íinízinii éí nihá yáʼátʼééh, áádóó tʼáá bí bił yáʼátʼééh índa hadaałtʼéii” átʼéegi baa ákoniidzin doo. (Rom. 12:2) Áko Diyin Bizaad tʼáá ahą́ą́h yíníiltaʼgo éí tʼáá aaníigo naʼnitinii baa ákodíníidzįįł. Kótʼéego éí Jiihóvah yee hasʼáanii tʼáá aaníi átʼéé lá niidzin doo. Áádóó tsin bikétłʼóól yee niłdzilígi átʼéego, “niheʼoodląʼ bee nihidahoníłdzil doo.”—Colossians 2:​6, 7 yíníłtaʼ.

18. Séítan bitsʼą́ą́dóó doo yáʼádaatʼéehii haitʼéego nahjįʼ kódiilnííł?

¹⁸ Tʼáá ni neʼoodląʼ bidziilgo ádíílííł. Łahgo átʼéego tsíńdííkosgi binanilnish. Tʼáá áłajįʼ sodílzin; Jiihóvah niníłchʼi diyinii bee shíká anilyeed bidiníigo néiníkąąh. Yéigo nabikʼítsáhákees; nitsíníkeesgi áádóó naniiłnáanii bee ádaa áhólyą́. Akʼis yáʼádaatʼéehii bił ahéédiikah; nintsékees łahgo ánánídléehgi yee níká adoojahii bił ahínéikah. Kónítʼı̨́įgo éí Séítan bitsʼą́ą́dóó doo yáʼádaatʼéehii nahjįʼ kódíílííł áádóó bitsʼąą ádaa áhólyą́ągo éí “ałghaʼditʼááh saad índa Diyin God ił bééhodoozįįłii yee nidaʼníłtłʼaii íildįįł” doo.—2 Cor. 10:​5, NW.