AŁKʼIDĄ́Ą́ʼ Ízrel dineʼé kéyah bee ádee haʼoodzííʼ yę́ę biiʼ jidoonééł biniyé hashtʼeʼ ádazhdilnéehgo, łaʼ haa íldeeʼ. Sáanii déʼéyóní danílı̨́įgo hwee yíkaígíí éí Ízrel hastóí wóshdę́ę́ʼ nitsaago daʼdiidı̨́ı̨́ł deidííniid. Ałkʼis ániid ádazhdoolííł, bił dazhdoolzhish, áádóó chʼiyáán yáʼátʼéhígíí dazhdooyı̨́ı̨́ł. Díí bóhoneedlı̨́įgo dóó baa honeení há ashjaʼiilaa dazhniizı̨́ı̨́ʼ. Ákondi díí sáanii haa yíkaígíí, éí bee ádaʼoolʼįįłgi dóó bintsídaakeesígíí God bibee hazʼáanii Ízrel dineʼé yikʼehgo dahiinánígíí doo bił aheełtʼée da. Áko łaʼ Ízrel dineʼé éí: ‘Tʼáá bídeíníigah. Tʼáá ádaa ádahwiilyą́ą doo,’ danízingo nitsídaakees.

 Haa hóótʼįįd? Diyin bizaad ání: “Ízrel dineʼé kééhatʼı̨́įgo Móʼab dineʼé bitsiʼké yił ajił yaa nídiikai.” Díí sáanii éí Ízrel dineʼé doo tʼáá aaníinii dadiyinii yichʼįʼ nidahałáa doo deinízin. Ákódaajidzaago biniinaa “Bóhólníihii [Jiihóvah] éí Ízrel dineʼé yichʼįʼ báhóóchįįd.”—Num. 25:​1-3.

Díí Ízrel dineʼé éí God bibee hazʼáanii naakigo daʼasiih: Áłtsé éí edaʼalyaii yichʼįʼ nitséédadigoh áádóó naaki góneʼ naʼageh bee tsiʼ naʼasdeeʼ. Áko díkwíí mííl shı̨́ı̨́ daʼjisiihígíí biniinaa dazhneezná. (Ex. 20:​4, 5, 14; Deut. 13:​6-9) Haʼátʼíí biniinaa tʼáá íiyisíí tidaʼhojoozniiʼ? Ízrel dineʼé éí God bibee hazʼáanii tʼáadoo kʼídajiztiʼgóogo, éí tʼáá ájíłtso Jórdan tooh nílínígíí tséʼnaa kéyah bee ádee haʼoodzííʼ yę́ę góneʼ atah yá hijiináa doo ńtʼééʼ.—Num. 25:​5, 9.

Díí ádahóótʼįįdígíí éí Paul yee akʼeʼashchı̨́: “Díidíígíí tʼáá ałtso diné náádaałaʼ bidaʼílnííh biniyé ádabiʼdoolʼįįd, áádóó nihí bee nidanihidiʼnitin biniyé bee akʼedaʼashchı̨́, háálá nihí díí hoolzhishígíí kʼadę́ę bił niitʼéehii daniidlı̨́.” (1 Cor. 10:​7-11) Ízrel dineʼé daʼjisiihígíí biniinaa Séítan ayóó yaa bił hóózhǫǫd. Áko kéyah bee há haʼoodzííʼ yę́ę góneʼ doo há ahóótʼiʼ da silı̨́ı̨́ʼ. Díí ádahóótʼįįdígíí éí nihił béédahózingo nihá yáʼátʼééh. Nahasdzáán ániidíii ánályaago éí nihá yah ahóótʼiʼgo, Séítan doo nihá yinízin da!

Séítan binahagiz choyoołʼı̨́įgo éí Oodlání danilínígíí dóó diné yóóʼayiiʼéésh. Alą́ąjįʼ baa chʼíhootʼánę́ę nahalingo, Séítan éí naʼageh bee tsiʼnaʼadáh choyoołʼı̨́. Dííshjı̨́įdi pornography łoh bádahádzidii átʼéego diné yihikááh. Nihí ndi, nihikʼeh didoodleełgo átʼé.

Dííshjı̨́įdi, diné nihinaagóó nidaakai ndi, doo yaa ádaa álchı̨́ı̨́hgóó pornography jidínóołʼįįłgo átʼé. Ląʼí nááhai yę́ędą́ą́ʼ, háiida pornography dinéeshʼįįł, índa náhideeshnih nízingo éí moviegóó doodaiiʼ adult bookstoregóó biniyé jidoogááł ńtʼééʼ. Ákondi, áadi hoʼdiiltsą́ągo haa yáhodoosįįłígíí biniinaa, tʼóó ahayóí doo ákǫ́ǫ́ nidaakai da ńtʼééʼ. Kʼad éí diné tʼáá bí danízingo, nidaalnishdi, doodaiiʼ chidí biiʼ ndi, pornography deinééłʼı̨́. Áko tʼóó ahayóí kéyahgóó, hastóí, sáanii, dóó nooséłí ndi, tʼáá bí bighangi pornography deidínóołʼįįłgo bá bíighah.

Mobile devices éí doo nantłʼagóó pornography jidínóołʼįįłgo áyiilaa. Áko bus biiʼ, train dah biiʼ, doodaiiʼ diné átiingóó yiigáał ndi yidínóołʼįįłgo átʼé.

Pornography doo nantłʼagóó jidínóołʼįįłígíí dóó nanilʼinígíí biniinaa, dííshjı̨́įdi diné tʼóó ahayóí pornography atíboolííł. Éí ahéʼéskéegi, dóó ílı̨́įgo ádaa nitsíjíkees yę́ę nayiiłchxǫǫh. Áádóó diné éí God yił kʼé ahidiʼnínę́ę nayiiłchxǫǫh. Pornography ná hodoołchǫǫł nínízindą́ą́ʼ éí tʼáá ákónéehę́ę ákótʼéego nitsíníkees. Tʼóó ahayóí áłʼąą átʼéego bikʼee yínííł hasingo ádaʼaleʼ. Díí atsázhdeetʼą́ą ndi nízaadgóó haa dahoołʼaahgo átʼé.

Jiihóvah ‘bikʼeh dahoniilʼı̨́įgo’ éí nihichʼą́ą́h naagháago baa ákodaniidzin doo. Ízrel hastóí ádaadzaa yę́ę doo bidaʼdiilníił da. (Ex. 19:5) Áko God pornography ayóó yijoołxáhígíí átʼéego nihí ałdóʼ ákónítʼée doo. Haʼátʼíísh biniyé kódadiiʼní?

Baa nitsíníkees: God bibee hazʼáanii éí Ízrel dineʼé tʼáá sahdii yee dahikááh. Éí kin haatłʼinii nahalingo, Ízrel dineʼé dóó diné bináágóó dahinánígíí bitahgi bee haatłʼin. (Deut. 4:​6-8) Jiihóvah naʼageh bee tsiʼnaʼadáh ayóó yijoołxá. Díí bibee hazʼáanii tʼáá bééhózinígo áyiilaa.

 Kéyah bináágóó naaznilígíí, éí bąąhági átʼéii yaa naakaigo biniinaa. Jiihóvah Ízrel dineʼé kwíidííniid: “Kéínan kéyah biih nihideeshʼishídi dadineʼé ádaatʼínígíí ałdóʼ tʼáadoo bikʼehgo ádaahtʼíní; . . . kéyahgóó bee dahóóchxǫʼ; éí bąą ákwii doo ákwii átʼéii ádajiilaaígíí hakʼi náhwiidleehgo bee haa nídéeshtʼįįł.” Ízrel biDiyin God sízı̨́ı̨́dę́ęʼgo éí Kéínan dineʼé nichxǫ́ʼígo dahinánígíí biniinaa, kéyah yiiʼ kéédahatʼínígíí ałtso yíchxǫʼgo yaa nitsékees.—Lev. 18:​3, 25.

Jiihóvah éí Kéínan dineʼé atíyiilaa ndi, diné tʼahdii naʼageh bee tsiʼnaʼadáh yaa ndaakai ńtʼééʼ. 1,500dóó baʼaan nááhaigo, Paul éí Oodlání danilínígíí dineʼé bináágóó kéédahatʼínígíí yaa halneʼgo ání, “éí bąąhági ádaaníił nidi doo yaa yádanízin da.” Áko “badaaʼihii tʼáá ałtso bíchą́hwíídéeniʼgo bee tsiʼnidaʼaldeehii yaa ádadeestʼą́.” (Eph. 4:​17-19) Dííshjı̨́įdi ałdóʼ, tʼóó ahayóí diné nichxǫ́ʼígíí yaa naakaigo doo yaa yádanízingóó dahiiná. Tʼáá aaníí oodlání jílı̨́įgo éí tʼóó baaʼihgo bił nidahaaztʼiʼígíí, tʼáá há bíighahjįʼ doo jidínóołʼı̨́į da doo.

Pornography jinééłʼı̨́įgo éí God bikʼijįʼ ídlı̨́įgo átʼé. Háálá God éí bílaʼashdlaʼii tʼáá bináłtʼéego dóó yáʼátʼéehgo ádaa nitsíikeesgo áyiilaa. Iłʼishtéézh éí hódzą́ bił naaztʼiʼgo God nihainílá. Éí ahéʼáskéegi yáʼátʼéehgo baa hózhǫ́ǫgo chooʼı̨́į doo biniyé ńtʼééʼ. (Gen. 1:​26-28; Prov. 5:​18, 19) Ákondi pornography ádeiłʼínígíí haash daatʼı̨́? Éí God bikʼehgo iinánígíí yitsʼą́ąjįʼ ádaatʼé. Pornography nihichʼįʼ kódeiłʼínígíí éí God doo bił danilı̨́į da. Díí nichxǫ́ʼígo yaa naakaiígíí éí God doo yikʼehgo dahiináa da, áko éí tʼáá ałtso bá nidahodiyootʼááł.—Rom. 1:​24-27.

Diné tʼáá bí ádeinízingo pornography deiníłʼínígíí doodaiiʼ dayółtaʼígíí shąʼ? Łaʼ éí díí doo átʼéhí da danízin. Áko éí God bikʼehgo oodáłígíí doo bił danilı̨́į dago yikééʼ naazı̨́. Pornography deiníłʼı̨́įgo yaa nídiikai yę́ędą́ą́ʼ, éí shı̨́ı̨́ doo ákódeeshníił da danízin ńtʼééʼ. Ákondi, God ayóóʼájóʼníigo éí pornography tsʼídá yéigo jijoołxáa doo ńtʼééʼ. Diyin Bizaad éí kódanohtʼée doo nihiłní: “Bóhólníihii ayóóʼádeínóhnínígíí, doo yáʼátʼéehii dajiinohłá.”—Ps. 97:10.

 Háiida pornography doo dínéeshʼįįł da nízin ndi, tʼáá há nantłʼa łeh. Nidaʼiyiilzííh, áko nichxǫ́ʼígo ił ashtéézh baa nitsáhákeesígíí yéigo bitsʼąą ádaniitʼée doo. Nihijéí nihinaʼaloʼgo biniinaa pornography doo átʼéhí da daniidzin łeh. (Jer. 17:9) Tʼóó ahayóí oodlání daazlı̨́ʼígíí éí nichxǫ́ʼíii yikʼeh dadeesdlı̨́ı̨́ʼ. Áko díí baa ákoniidzingo éí nihichʼįʼ nahwiiʼnánígíí bichʼįʼ hadaʼííníilníi doo. Pornography bikʼeh dideeshdleeł nínízingo éí Diyin Bizaad haitʼéego lá níká adoolwoł?

Alą́ąjįʼ baa chʼíhootʼánę́ę, Ízrel dineʼé éí tʼóó baaʼihgo yidánoolnínę́ę bitsʼą́ą́dóó dazhneezná. Dííshjı̨́įdi, tʼáá ákóhodooníiłgo átʼé. Jesus bitsilí James báhádzidii yaa hoolneʼ: “Tʼááłáʼí jinítínígo . . . tʼáá hó bidázhnoolníinii hodíníʼah áádóó nichxǫ́ʼíii yiih honiʼah. Áko bąąhági átʼéego adáhonooní iʼniiltsąąhgo bąąhági átʼéii yiłchííh.” (Jas. 1:​14, 15) Nichxǫ́ʼíii bidázhnoolníinii hajéí biiʼ díníséehgo éí tʼáá akǫ́ǫ́ ádił azhdoosihgo átʼé. Áko tʼóó baaʼihgo nitsáhákeesígíí éí bitsʼą́ąjįʼ kóniitʼée doo.

Baaʼihgo nitsíndíkosgo éí tsxı̨́įłgo nahjįʼ kódíílííł. Jesus ání: “Áko nílaʼ éí doodaiiʼ nikeeʼ bee bąąhági ánítʼı̨́ ánóhsingo, éí kʼínígéeshgo yóóʼahíłhan, . . . Áádóó ninááʼ éí bąąhági ánítʼı̨́ ánóhsingo, éí haniʼaahgo yóóʼahíłhan.” (Matt. 18:​8, 9) Jesus éí atídidíílnííł doo nihiłníi da. Éí haʼátʼíí nihidinoołtłʼahígíí tsxı̨́įłgo nahjįʼ kódíílníiłgo áhyiłní. Pornography baa ídahwiilʼą́ʼígíí haitʼéego chodeidiilʼįįł?

Pornography bikʼííníyáago, ‘Tʼáá bíinishghah,’ noozı̨́ı̨́ʼ lágo. Tsxı̨́įłgo bitsʼą́ąjįʼ nidííyis. Television, computer, doodaiiʼ moblie device dah tsxı̨́įłgo ánídiigis. Yáʼádaatʼééhjígo nabikʼítsíníłkees doo. Díí átʼéego éí nintsékees baa áhólyą́ą doo, áko nichxǫ́ʼígo bidázhnoolníinii doo nikʼeh didoodleeł da.

Pornography bikʼeh dínídlı̨́įʼ ndi, níníłʼı̨́ı̨́ʼ yę́ę béénáánílniihgoshąʼ? Pornographic images  doodaiiʼ baa nitsáhákeesígíí éí nízaadgóó doo baa jiyóónéeh da. Łahdi tʼáadoo hooyání baa nitsínáájíkees łeh. Ákójíítʼįįdgo, tʼóó baa yá hasinii ánáázhdoodlííł dajiniizįįh, masturbation, éí ádináázhdilchʼidgo dah baa nínáázhdiidaah. Díí baa ákonínízin, łahdi tʼáadoo hooyání díí átʼéego nitsínáájíkees dooleełígíí éí biniyé hashtʼeʼ ázhdólzin doo.

Nintsékees dóó ááníłígíí éí yéigo binaanilnishgo God íinízinii baa hidiʼaah. Yilʼaadii Paulgi ánítʼée doo, háálá éí kóní: “shitsʼíís doo shikʼeh didlı̨́į da doo biniyé tsʼídá tʼáá íiyisí shikʼeh hółʼı̨́įgo íínísin.” (1 Cor. 9:27) Nichxǫ́ʼígo nitsáhákees éí tʼáadoo nikʼeh didlíní. “Diyin God nihíniʼ ániidí ánáyoodlíiłgo . . . áko Diyin God yee íinízinii . . . éí nihá yáʼátʼééh, áádóó tʼáá bí bił yáʼátʼééh índa hadaałtʼéii átʼé.” (Rom. 12:2) Béénílniih: God íinízinii bikʼehgo jiiná dóó nitsíjíkeesgo éí azhdoosihgi biláahgo baa honeenigo átʼé.

Scriptures béénílniihgo íʼdílnééh. Áko nichxǫ́ʼígo nitsínááníkéesgo éí scriptures béénílniih yę́ę baa nitsíníkees doo. Scripture kódaatʼéhígíí: Psalm 119:37; Isaiah 52:11; Matthew 5:28; Ephesians 5:3; Colossians 3:5; dóó 1 Thessalonians 4:​4-8 éí níká adoolwoł. Áko Jiihóvah haitʼéego pornography yaa nitsékeesígíí dóó ná nayólíhígíí yee hashtʼeʼ ninániidlóosgo nił ííshjání íidoolííł.

Nichxǫ́ʼígo nitsáhákeesígíí nide ádzaagoshąʼ? Jesus áátʼįįdígíí bikʼeh ádíínííł. (1 Pet. 2:21) Jesus baptize ábiʼdiilyaadóó, Séítan nabínítaahgo yaa nídiidzá. Jesus haidzaa? Éí yitsʼą́ąjįʼ áʼdólzin. Scriptures choyoołʼı̨́įgo, Séítan nahónítaahgo yitsʼą́ąjįʼ áʼdólzin ńtʼééʼ. Jesus éí: “Yówehdi naniná, Séítan!” yidííniid. Áko hakʼi deeyáago dahodiileʼ. Jesus éí Séítan tsʼídá yitsʼą́ąjįʼ áʼdólzingi átʼéego, ní ałdóʼ ákónítʼı̨́į doo. (Matt. 4:​1-11) Séítan áádóó biyáádóó bił hazʼáanii tʼáá áłahjįʼ nichxǫ́ʼígo nitsáhákees nichʼįʼ kwííłʼı̨́į doo. Ákondi bitsʼą́ąjįʼ ánítʼéhígíí tʼáá bidinilkaal. Jiihóvah níká análwoʼgo pornography bikʼeh didiidleeł.

Sodizin bee Jiihóvah yéigo baʼíínílí. Paul ání: “Náʼookąąh bee deínóhkeedígíí Diyin God bił béédahonohsin leʼ. Áko Diyin God bitsʼą́ą́dę́ę́ʼ bee achʼįʼ hózhǫ́ náhásdlı̨́įʼii, akʼidiʼyiitįįh tʼáá ałtso yiláahdi átʼéii, éí Christ Jesus bee nihijéí índa nihintsékees yaa áhályą́ą doo.” (Phil. 4:​6, 7) Nidaʼiyiilzííh bikʼijįʼ ánítʼéego éí God bitsʼą́ą́dę́ę́ʼ hashtʼeʼ hodítʼéhígíí bee nihikʼi hwiildóóh. Jiihóvah hoł nilı̨́ ájósingo, éí “áhánígo hoł hólǫ́ǫ doo.”—Jas. 4:​8, NW.

Tʼáá ałtsoní bee Bóhólníihii áhánígo ádeíníilzingo éí bádahádzidígíí nihá yichʼą́ą́h naaghá. Jesus ání: “Nahasdzáán yinanitʼaʼí nilíinii [Séítan] kʼadę́ę yíghááh. Éí doo shee ádíhólníih da.” (John 14:30) Jesus haitʼéegoshąʼ díí bił bééhózin? Éí łahdi kódííniid: “Shiníłʼaʼígíí éí shił hólǫ́; aTaaʼ doo tʼáá shízhání shiʼníłniiʼ da, háálá bił hóshónígíí tʼéí tʼáá áłahjįʼ baa naashá.” (John 8:29) Jiihóvah bił honíshǫ́ǫgi baa nanináago éí doo yóóʼanídidooʼáał da. Pornography, Séítan biłoh bitsʼąą ánítʼé, áko tʼáá nísínízı̨́įgi doo yee nee ádíhólníih da doo.